Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Lẽq waktu nike, Herodes saq jari raje wilayah negeri Galilea pireng kabar mengenai Deside Isa.

² Beterus Herodes bebase lẽq pejabat-pejabatne, "Pasti niki Yahya Pembaptis saq sampun idup malik! Keranaq nike Ie bedowẽ kuase miaq keajaipan."

³ Sẽngaq sendẽqman nike Herodes ngutus dengan jari bau Yahya dait sẽkoq ie terus tetamaqang ojok dalem bui. Hal nike telaksaneang siq Herodes lantaran Herodias sebiniqne Pilipus, sanakne mẽsaq.

⁴ Sẽngaq Yahya sampun bebase maraq niki lẽq Herodes, "Nẽnten kanggo pelungguh merariq kance Herodias!"

⁵ Setetune Herodes beniat nyematẽq Yahya, laguq ie takut lẽq dengan-dengan, sẽngaq ie pade anggep Yahya nike nabi.

⁶ Sewaktu Herodes ngerayeang gawẽ ulang taunne, bije Herodias saq nine ngigel lẽq julun temuẽ-temuẽ. Igelan kanak nike tetu-tetu nyenengang angen Herodes,

⁷ sehingge Herodes bejanji kadu sumpah lẽq dedare nike, bahwe napi juaq saq ie tunas, gen teican tipaq ie.

⁸ Lantaran tehasut siq inaqne, dedare nike bebase, "Tiang tunas ulune Yahya Pembaptis adẽqne tejauq ojok tiang mangkin niki ẽndah kadu narẽ!"

⁹ Sesampun tepirengang siq Herodes napi saq tetunas siq dedare nike, Herodes jari sedih gati. Laguq lantaran ie sampun besumpah lẽq julun selapuq temuẽne, ie prẽntahang adẽq petunasan dedare nike tekabulang.

¹⁰ Herodes suruq dengan lumbar ojok bui jari penggal ulu Yahya.

¹¹ Beterus ulu Yahya nike tejauq tame tangkaq narẽ, dait serahangne lẽq dedare nike. Terus jauqne siq dedare nike ojok inaqne.

¹² Sesampun nike, pengiring-pengiring Yahya dateng bait jenazah Yahya dait nguburang ie. Beterus ie pade lumbar dait nyampẽang lẽq Deside Isa mengenai hal nike.

¹³ Sesampun Deside Isa pireng berite nike, Ie taẽk perau mẽsaq-mẽsaq dait bilin taoq nike, terus margi boyaq taoq saq sepi. Laguq sewaktu dengan-dengan dengah mengenai hal nike, ie pade bilin kote-kote ie pade dait nerutuk Deside Isa langan darat.

¹⁴ Sewaktu Deside Isa turun lẽman perau dait cingakin dengan luwẽq nike, Ie periak lẽq ie pade. Beterus Ie nyelahang dengan-dengan saq sakit lẽq antare ie pade.

¹⁵ Lẽq waktu serep jelo, pengiring-pengiring Deside Isa parek dait matur, "Sampun serep jelo, dait taoq niki kesempil. Solahan Pelungguh manikang dengan-dengan nike lumbar, adẽqne mauq beli keloran lẽq dẽse-dẽse."

¹⁶ Laguq manik Deside Isa lẽq ie pade, "Ndẽq perlu dengan luwẽq niki lumbar, side pade saq harus ngebẽng ie pade bekelor."

¹⁷ "Tiang pade cume bedowẽ lime ruti dait due empaq!" basen pengiring-pengiring Deside Isa nike.

¹⁸ "Jauq ojok deriki," manik Deside Isa.

¹⁹ Beterus manikang-Ne dengan luwẽq nike tokol lẽq atas pupaq. Deside Isa bait lime ruti dait due empaq nike, beterus nengadah andang langit dait ngucap syukur tipaq Allah. Sesampun nike peleng-peleng-Ne ruti nike siq gading-Ne terus icanin-Ne lẽq pengiring-pengiring-Ne jari tebagi-bagiang lẽq dengan luwẽq nike.

²⁰ Selapuqne bekelor jangke besuh, sesampun nike pengiring-pengiring Deside Isa ngumpulang salone, araq due olas bakaq penoq luwẽqne.

²¹ Saq ngelor lẽq waktu nike araq kire-kire lime iyu dengan mame, ndẽqman terẽkẽng dengan nine dait kanak-kanak.

²² Sesampun nike, Deside Isa manikang pengiring-pengiring-Ne taẽk ojok perau dait juluan mbelat danao, lẽq waktu nike ẽndah Ie manikang dengan luwẽq nike ulẽq.

²³ Sesampun dengan luwẽq nike lumbar, Deside Isa taẽk nyendiri bedo'e ojok atas sopoq bukit. Waktu nike sampun peteng, Deside Isa tetep masih araq lẽq derike mẽsaq-mẽsaq.

²⁴ Lẽq waktu nike, perau saq taoqne taẽk pengiring-pengiring Deside Isa sampun jaoq lẽq tengaq-tengaq danao. Perau nike teampes-ampes siq umbak sẽngaq angin belawan andang kance perau nike.

²⁵ Kire-kire jam telu parek menah, Deside Isa rauh tipaq ie pade, bemargi lẽq atas aiq.

²⁶ Sewaktu pengiring-pengiring-Ne serioq Ie bemargi lẽq atas aiq, ie pade tinjot gati terus ie pade bekuih, "Nike hantu!" sẽngaq ie pade takut gati.

²⁷ Laguq Deside Isa bemanik lẽq ie pade, "Tenang! Tiang niki Isa, ndaq takut!"

²⁸ Terus Petrus matur, "Junjungan Saq Mulie, lamun tetu nike Pelungguh, manikang tiang parek lampaq lẽq atas aiq."

²⁹ "Silaq dateng," jawab Deside Isa. Beterus Petrus turun lẽman perau, lampaq lẽq atas aiq dait parek ojok Deside Isa.

³⁰ Laguq sewaktu Petrus serioq berembẽ belẽqne angin lẽq danao nike, ie takut terus mulai ketelep, dait ie bekuih, "Junjungan Saq Mulie, tulung tiang!"

³¹ Deside Isa ngulurang gading-Ne dait negel ie terus bemanik, "Hai, side dengan saq kurang percaye, kembẽq side bimbang?"

³² Beterus deduaqne taẽk ojok perau nike, dait langsung angin nike jari tenang.

³³ Make selapuq pengiring-pengiring saq araq lẽq perau nike sujut nyembah Deside Isa. Ie pade matur, "Setetune Pelungguh Bije saq asalne lẽman Allah!"

³⁴ Sewaktu ie pade rauh lẽq itoqan danao, ie pade mendarat lẽq Genesaret.

³⁵ Dait sewaktu dengan-dengan lẽq derike serioq bahwe saq rauh nike Deside Isa, ie pade nyiarang kabar nike tipaq selapuq daẽrah sekiter kote nike. Beterus selapuq dengan sakit tejauq ojok arepan Deside Isa.

³⁶ Dait ie pade tunas lẽq Deside Isa adẽq teijinang kintur jubah-Ne, timaq cume potone. Beterus selapuq saq kintur jubah Deside Isa nike jari selah.

Matius

Video Matius 14

Ikuti Kami:

KONTAK | PARTISIPASI | DONASI