Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Pado maso itu, Herodes, panguwaso di nagari Galilea, mandanga kaba tantang Isa Almasih.

² Herodes mangecek kabake anak buwahnyo. "Iko lah jaleh Nabi Yahya Pambaptis ko nan lah iduik baliak! Itu sababnyo mangko Inyo mampunyoi kuwaso untuak mampabuwek mukjizat."

³ Dek karano sabalun itu, Herodes lah manyuruah manangkok sarato jo mangabek Nabi Yahya Pambaptis tu, sasudah tu inyo puruakkan masuak pinjaro. Mangkonyo Herodes batindak bakcando itu, dek karano parkaro Herodias, nan adolah bini dari dunsanaknyo sandiri nan banamo Filipus.

⁴ Dek karano dawulu panah Nabi Yahya mangecek kabake Herodes bakcando iko, "Sabananyo manuruik agamo, indak buliah doh angku mampabini si Herodias!"

⁵ Sajak dari itu, Herodes lah bamukasuik nak ka mambunuah Nabi Yahya, tapi inyo takuik kabake urang nan banyak, dek karano urang-urang tu ma anggap baraso Nabi Yahya adolah sabana nabi.

⁶ Dikutiko Herodes mamparalekkan ari kalayierannyo, anak si Herodias nan padusi, tagak manari di adok-an si alek nan tibo. Sangaik sanangnyo ati Herodes mancaliak tari nan dibawokkannyo,

⁷ sainggo Herodes bajanji kabake paja tu sarato jo basumpah, baraso apo sajo nan dimintaknyo, musti ka dipalakukan.

⁸ Dek karano di asuang dek mandehnyo, paja gadih tu bakato, "Ambo niyo kapalo Nabi Yahya Pambaptis, dibarikan ka ambo kiniko juwo di ateh talam!"

⁹ Mandanga pintak paja tu, sangaik sadiahnyo ati Herodes. Tapi dek karano inyo lah tadorong basumpah di adok-an si alek, mako tapasolah inyo mamarentahkan supayo kandak paja tu dipalakukan.

¹⁰ Inyo manyuruah urang payi ka pinjaro untuak mamancuang kapalo Nabi Yahya.

¹¹ Sasudah tu kapalo Nabi Yahya tu dibawok masuak di ateh talam, dibarikan ka paja gadih tu. Paja tu mambawoknyo pulo kabake mandehnyo.

¹² Indak lamo sasudah tu, pangikuik-pangikuik Nabi Yahya bi tibo manjapuik mayik baliau, untuak ka dikubuakan. Pangikuik baliau tu pun payi pulo mambaritawukan kajadian tu kabake Isa Almasih.

¹³ Kutiko Isa Almasih mandanga kajadian tu, Baliau nayiak ka ateh parawu, barangkek dari tampaik tu, Baliau payi ka suatu tampaik nan langang. Tapi kutiko urang-urang bi tawu, baraso Baliau lah barangkek, urang-urang tu pun barangkek pulo maninggakan nagarinyo, payi untuak mangaja-i Isa Almasih malalui jalan darek.

¹⁴ Dikutiko Baliau turun dari parawu, Baliau manampak urang banyak, Baliau maraso ibo kabake urang-urang tu. Sudah tu, Baliau cegakkanlah urang nan sakik, di antaro urang nan banyak tu.

¹⁵ Di patang arinyo, pangikuik-pangikuik Isa Almasih bi tibo mangecek kabake Baliau, "Ari lah sanjo, tampaik ko tapancie. Labiah elok Angku suruah urang-urang ko payi dari siko, buliah inyo dapek mambali nan ka dimakan di kampuang nan dakek ko."

¹⁶ Isa Almasih bakato, "Indak usah inyo bi payi dari siko, angku-angku sajolah nan ka ma agiah inyo makan."

¹⁷ Pangikuik Baliau bi bakato, "Roti limo buwah, ikan duwo ikua, itunyo nan ado di kami!"

¹⁸ "Bawoklah roti jo ikan tu kamari," kecek Isa Almasih.

¹⁹ Sasudah tu Baliau manyuruah urang nan banyak tu bi duduak di ateh rumpuik. Baliau ma ambiak roti nan limo, sarato jo ikan nan duwo tu, Baliau maningadah ka langik sarato basyukur kapado Allah. Sasudah tu Baliau mambalah-balah roti tu jo tangan-Nyo, sarato mambarikannyo kabake pangikuik-pangikuik-Nyo, untuak ka dibagi-bagikan kabake urang nan banyak.

²⁰ Urang-urang tu bi makan sampai kanyang kasadonyo. Sasudah tu pangikuik-pangikuik Baliau mangumpuakan makanan nan balabiah; ado duwo baleh katidiang panuah labiahnyo.

²¹ Urang nan bi makan dikutiko itu, ado kiro-kiro limo ribu urang banyaknyo, alun tamasuak lai tu urang padusi sarato jo paja-paja ketek.

²² Sasudah tu Isa Almasih manyuruah pangikuik-pangikuik-Nyo nayiak ka ateh parawu, supayo buliah labiah dawulu barangkek manyubarangi danau, urang nan banyak disuruah-Nyo bi pulang.

²³ Sasudah urang nan banyak tu bi bajalan, Baliau mandaki ka sabuwah bukik untuak badowa. Sampai ari lah malam, Baliau disinan juwo lai badowa surang-Nyo.

²⁴ Samantaro itu, parawu nan ditompangi dek pangikuik-pangikuik Baliau cako, lah jauah, lah tibo di tangah-tangah danau. Parawu tu lah ta ampeh-ampeh di oyak ombak, dek karano angin balawanan arah jo parawu tu.

²⁵ Antaro pukua tigo jo pukua anam subuah, Isa Almasih tibo bajalan kaki di ateh ayie kabake pangikuik-pangikuik-Nyo nan sadang dalam palayieran tu.

²⁶ Dikutiko pangikuik-pangikuik-Nyo maliyek Baliau bajalan di ateh ayie, mako pangikuik-Nyo tu bi takajuik sangaik, sambia bi mamakiak "Antu!"

²⁷ Tapi Isa Almasih lansuang manjawab, "Tananglah! Ambo ko, Isa Almasih. Angku-angku jan takuik!"

²⁸ Sudah tu si Petrus bakato, "Jikok iyo sabana Angku, suruahlah ambo datang kian bajalan kaki di ateh ayie."

²⁹ "Kamarilah," kecek Isa Almasih. Mako turunlah si Petrus dari parawu, inyo bajalan di ateh ayie datang kabake Isa Almasih.

³⁰ Tapi kutiko si Petrus marasokan ribuik nan kareh di danau tu, tabik takuiknyo, inyo muloi karam sambia mamakiak. "Oih Tuhan, tolonglah ambo!"

³¹ Isa Almasih capek ma oncongkan tangan-Nyo manyemba si Petrus, sambia bakato, "Petrus, Petrus, angkau kurang picayo. Baa mangko angkau ragu-ragu kabake Ambo?"

³² Mako nayiaklah kaduwo-duwonyo ka ateh parawu, ribuik pun tanang.

³³ Kasadonyo pangikuik Baliau sujuik manyambah. Pangikuik-Nyo bi bakato, "Tuhan, Angkau iyo sabana-bana Anak Allah!"

³⁴ Dikutiko rombongan Isa Almasih tu lah tibo di subarang danau, inyo manapi di Genesaret.

³⁵ Kutiko urang-urang nan disinan maliyek, baraso nan tibo tu adolah Isa Almasih, mako inyo bi malewakan kaba tu kasadonyo daerah di sakuliliang kota tu. Kasadonyo urang nan sakik dibawok kabake Baliau.

³⁶ Urang-urang tu sabana mamintak kabake Baliau, kok dapek inyo dibuliahkan untuak manyintuah jubah Baliau agak saketek, biyalah hanyo ujuangnyo sajo. Kasadonyo urang nan lai sato manyintuah jubah Baliau, cegaklah panyakiknyo.

Matius

Video Matius 14

Ikuti Kami:

KONTAK | PARTISIPASI | DONASI