Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Kareb ineh Herodés, raca' Galilia ineh neninger bala ratnan Yésus.
2 Idi keburi'neh nelun tarehneh, "Ini Yahya luk Ngerereb, ieh pangeh netumui rat arang lun naté; ini punneh inan lalud luk kudeng ini ngakem bang bururneh."
3 Ngaceku Herodés pangeh nengakem idi nengaling idi nenutup Yahya atun, ngaceku ratnan Herodia, awan Pilipus luk kinanakneh.
4 Ngaceku Yahya megéi' mada' ni Herodés, "Bibpeng kuanmu na miak ngalap decur ineh ku awanmu."
5 Herodés sikal ngaté ni Yahya, iamo' ieh matot nelun mula', ngaceku ideh manu Yahya ineh aceh lun nabi.
6 Iamo' kareb nacing aco irau, ieh ineh aco Herodés tinganak, idi anak decur Herodia nengalai arang lemulun, idi ieh nengawang niat Herodés,
7 pad Herodés nepebulung idi nepejani' maré anun-anun luk pituenneh.
8 Idi ngaceku tinanneh nengubuk neneh, kebala anak decur ineh, "Do' maré kuanku uluh Yahya luk Ngerereb ineh bang aceh bigan."
9 Idi raca' mesusa' niat; iamo' ngaceku bulungneh idi lemulun luk netudo kuman denganneh, ieh nengecuk nedeh maré ineh neneh.
10 Idi ieh nengecuk nedeh amé' ngaleb uluh Yahya déi' bang tutup.
11 Idi uluh Yahya inuitdeh bang bigan, idi biré kuan anak decur ineh, idi ieh nenguit neneh amé' inan tinanneh.
12 Idi anak-anak sekola' Yahya iné' ngalap butungneh, idi ideh nenanem neneh, idi ideh iné' mada' Yésus.
13 Kareb Yésus neninger baladeh, idi Ieh neburo rat déi' maya' aceh alud amé' su luk ali-ali. Idi kareb lun mula' neninger ratnan ineh, ideh nenecan bawangdeh maya' tana' luun idi nemaya' Neneh.
14 Idi kareb Yésus neremuat Ieh nenier pelaba ula' lemulun, idi Ieh méi' nedeh, idi nengedo' lemulun luk mét arangdeh.
15 Idi kareb malem aco, anak-anak sekola' ineh iné' Neneh, keburi'deh, "Su ini mali tu, idi aco pana' pangeh macep do' ngecuk lun mula' ini amé' bang bawang-bawang, pad ideh melih luk kenen kuandeh."
16 Iamo' kebala Yésus nedeh, "Na ulek ideh nalan; do' muyuh maré nedeh kuman."
17 Idi kebaladeh Neneh, "Na luk kenen kai ieni, iamo' inan limeh balad ruti idi dueh lawid mo'."
18 Idi kebala Yésus nedeh, "Do' nguit ineh amé' Negku."
19 Idi Ieh nengecuk lun mula' ineh tudo luun uduh; idi Ieh nengalap ruti luk limeh balad, idi dueh lawid ineh, idi Ieh netengook déi' langit, idi nesembayang. Idi Ieh nemuri'-muri' ruti ineh, idi nemaré ineh kuan anak-anak sekola'Neh, idi ideh nenganid ineh kuan lun mula'.
20 Idi amung-amungdeh nekuman pad ideh mebor. Idi ideh nengamung tecehneh, pad panu' pulu' dueh ngebuan.
21 Idi amungdeh luk nekuman ineh lélé limeh ngeribu deléi, idi inan teh decur-decur idi anak-anak.
22 Idi petacu Yésus nengecuk anak-anak sekola'Neh temaleb bang alud, idi amé' dipar pa atunNeh, laba' Ieh ngecuk lun mula' ineh muli'.
23 Pangeh Ieh nengecuk lun mula' ineh muli', idi Ieh iné' luun pegkung sikal sembayang. Idi kareb malem aco, Ieh netudo déi' buleng-buleng.
24 Iamo' alud ineh pangeh nacing inan uned abpa', idi ieh mekibing ku ribut; ngaceku bui nengeluut neneh.
25 Kareb malé macang, idi Yésus iné' nedeh, nalan maya' luun abpa' rayeh ineh.
26 Kareb anak-anak sekola'Neh nenier Neneh nalan luun abpa' rayeh ineh, idi ideh megagap, keburi'deh, "Ada' ini!" Idi ideh nengitang ngaceku pelaba tot.
27 Iamo' petacu Yésus nepebala nedeh, kebalaNeh, "Aleg merapang! Ui ini, aleg matot."
28 Idi kebala Pétrus, "Tuhan, kudeng matu ineh Iko, nawar negku amé' Namu maya' luun abpa'."
29 Idi kebala Yésus, "Do' iko amé'." Idi Pétrus neremuat rat bang alud idi nenalan luun abpa' iné' Neneh.
30 Iamo' kareb ieh kali' barui, ieh matot; idi ieh lélé petarem bang abpa', idi ieh nengitang, kebalaneh, "O Tuhan, ngulun negku!"
31 Idi petacu Yésus nenatang ticu'Neh, idi nengimet neneh, idi nepebala neneh, "O iko luk na petap anu, ngudeh iko merapang?"
32 Idi pangeh didueh netemaleb bang alud ineh barui ineh pana' nugka' peh.
33 Idi anak sekola' Yésus luk bang alud ineh netekeradung sembayang Neneh, kebaladeh, "Matu, Iko Anak Allah."
34 Idi ideh neguta, idi nacing déi' tana' Genésaret.
35 Kareb lun luk bang bawang ineh nengiti Yésus, idi ideh nengecuk lemulun amé' libut-libut bawang ineh, pad ideh nenguit amung-amung lemulun luk mét amé' Neneh.
36 Idi ideh nemutuh Neneh maré nedeh ngakem iring kuyu'Neh mo' idi idé-idé luk nengakem Neneh, ieh miak do' peh.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA