Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ 'O 'Ahadi ma wange yaika 'ikinitara, de 'o nge-ngeweka gee 'okia sonaa ma bounu yaowa-owa yoka-kalari go'ona, yotagi 'o bo'osuika ya'asa 'okia sonaa ma bounu yaowa-owa gee yadua-duangou.

² Yaika 'ena ma bo'osuku ma da-datoko 'o teto gee 'ilolokokau.

³ Ge'enaka de yowosanga ma bo'osuku ma dodaka, ma ge'enaka dau koyamakewa ma Jou Yesus 'awi maieti.

⁴ 'Ona yoma'oko-'oko ge'enaka 'ena koyosikanakowau yatiba-tibangi ma hali ge'ena, de yomanako 'ena yamididi manga baju 'ileto-letongo yoma'okode manga dateoka.

⁵ 'O nge-ngeweka go'ona yakimodongo yotirineka, so yosuba sigado manga biono dau 'o tonaoka 'itigiku, 'ena yamididi go'ona kayongosekau 'onaka, "'Ido'oa so ngini wininonu 'o nyawa wowango-wango naga yosonge-songene manga sigoronaka?

⁶ 'Una kowi'iwa ne'enaka. 'Una womomikokau so! Niongano-nganono 'okia naga wongosekau nginika ma 'orasi 'una ka 'o Galileakasi,

⁷ 'ato 'una 'o Nyawa ma Ngowaka salingou wisisarakani 'o nyawa yosowo-sowonika, deika wisidele 'o salipoka de wosongene. 'Asa de 'o wange sa'angeka de wo'ahuokali."

⁸ So 'o nge-ngeweka go'ona yonganonie 'o Yesus 'awi demo-demo ge'ena.

⁹ 'O bo'osukino yoliono de yosijarita 'iodumu ge'ena 'o su-suloko yamogiooko de moika, de 'o do-domoteke 'ireguka yoodumu.

¹⁰ 'O nge-ngeweka gee yositota-totara 'iodumu ge'ena 'o su-suloko yamogiooko de moika, 'ona ge'ena la ngo Maria Magdalena, ngo Yohana de ngo Maria 'o Yakobus ma 'esa, de 'o nge-ngeweka 'iregu-reguosi gee yomote-moteke de de 'ona.

¹¹ Ma 'o su-suloko go'ona 'ona yongose 'o nge-ngeweka go'ona kayosisomoa, so 'ona koyongakuwa 'o nge-ngeweka manga jarita ge'ena.

¹² Ma 'o Petrus wo'isenoka de kawoowa-owara 'o bo'osuika. Wototarika de wodubugutuku watutumu ma dodaka 'ena ka 'o songenou ma sa-sao ya'are-'arese ge'enaka. 'O Petrus woherangi ma sala, so wolio 'ena ka 'o gudai wosano-sano 'awi singina ma dodaka ma ngale 'okia naga 'idadiokau gee.

¹³ Ma wange ge'ena mita 'o Yesus 'awi do-domoteke yamididi 'o Yerusalemuoka de yotagi 'o soana moika ma ronga 'o Emaus, 'o Yerusalemuoka 'ena poilia 'o kilo mogiooko de moika.

¹⁴ Manga do-dagioka ge'ena yosija-jarita 'okia naga gee 'ikokidadiokau.

¹⁵ 'Ona yomajarita ma gu-gudaioka ma de 'o dibangi yomakadukula, de 'o Yesus ma sirete woboa de womoteke de de 'ona.

¹⁶ 'Ona wimakekau 'o Yesus, ma 'okia naga moi yakidiai so kowinakowa.

¹⁷ Ge'enaka de 'o Yesus kawongosekau, "'Okia niosijarita nia do-dagi ma sigoronaka ne'ena?" 'Ona yomaogorukosi 'o 'orasi moi 'ena manga singina 'isusa so manga biono ka 'o gari.

¹⁸ De wimoi 'awi ronga 'o Kleopas wosano 'o Yesusika, "'Aba, ngona 'o nyawa ma dudunino? nomanoa 'o Yerusalemuoka, gee konanakokawa 'okia naga 'idadi ge'enaka doka ma du'uru ne'ena?"

¹⁹ 'O Yesus wosango, "'Okia ge'ena?" 'Ona yongose, "'Okia naga gee 'idadi 'o Yesusoka 'o Nazaret ma nyawa gu'una. Moteke 'o nyawa 'iodumu yalega-legaku 'una ge'ena 'o nabii moi, 'awi demo-demo de 'awi manarama de ma kuasa ma Jo'oungu ma Dutuno.

²⁰ 'O 'imam-'imam ma sae-saeke de yopa-pareta ngoneka wisisarakani ma ngale wihukumu wiso-songene, de wisidele 'o salipoka!

²¹ 'Ena momongo ngomi miongano-ngano 'unau dua ngone 'o Israeloka wonariwo wonasipidili nanga saturuuoka. De ne'ena ma wange 'o wange sa'angeu 'iodumu ge'ena 'idadi.

²² De mita 'amia nge-ngeweka yamuruo naga misitodokana. Sababu kangano kaitaru-tarusikasi 'ona yotagi 'o bo'osuika,

²³ ma kadoka koyamakewa 'o Yesus 'awi songene. De yoliono de yongose 'ato 'o mala'ekati yamake, de 'o mala'ekati 'ingose 'ato 'o Yesus wowangokali.

²⁴ Ge'enaka de ngomioka yamuruo naga yotagi 'o bo'osuika, de yamake 'isoka kokia naga 'o nge-ngeweka yosidemo-demokau gee, duga 'ona kowimakewa 'o Yesus."

²⁵ Ge'enaka de 'o Yesus kawongosekau 'onaka, "Ngini ma goungu niohaga-haga! Kaifoloi 'isusa niongaku 'iodumu gee 'o nabii yosidemo-demokau!

²⁶ Ko ma gounguawa? 'o Koana 'o Nyawa Wosilaha-laha ma Jo'oungu ma Dutu Wiiri-iriki gu'una salingou 'isira wamoku 'o sangisara ge'ena, 'asa de wisitedene de wopareta de 'awi kumati?"

²⁷ Ge'enaka de 'o Yesus wosiwaiti 'onaka 'iodumu gee 'isilefoku 'o Buku 'Itebi-tebinoka ma ngale 'una, 'ikurue 'o Musa 'awi le-lefoka sigado 'o nabii 'iregu-regu yolefo-lefo.

²⁸ 'Ena 'ona ya'adono 'o soana gee yodago-dago ge'ena la 'o Emausika de 'o Yesus wodiai 'isoka wogila-gila,

²⁹ ma 'ona witu'umungu kayongosekau, "Ne'enakasi dau nomasido-dogumu, ne'ena 'iobirou de 'itarusokau mita so." So 'o Yesus womatoobiri ge'enaka.

³⁰ Gee wogogeruku de de 'ona yomasido'odomo, de 'o Yesus 'o roti wa'ese, de wo'amalaha ma Jo'oungu ma Dutude, de waeta-eta ma roti ge'ena, de wakikula 'onaka.

³¹ Ge'enaka de yanako 'ato gu'una 'o Yesus. Ma 'una kawoma'iwa-'iwaka to 'ona manga bionoka.

³² 'Ona yomasikademo yongose 'ato, "Kangano ngone pamao nanga singina 'isanangi gee 'una wobi-bicara ngoneno 'o ngekomo ma goronaka de wosiwaiti 'o Buku 'Itebi-tebini ma doda."

³³ Kage'enaka de yoliokau 'o Yerusalemuka. Yaika 'ena yakidaenika 'o do-domoteke yamogiooko de moi de mita 'o do-domoteke 'iregu-regu yomatoomuno.

³⁴ 'Ona kayongosekau, "Ma goungu ma Jou wowangokauoli! 'Una womasidumutokau 'o Simonika!"

³⁵ Ge'enaka de yamididi go'ona yosijarita 'okia naga yamake 'o ngekomo ma goronaka, de kokia 'ona ma Jou winako ma 'orasi 'o roti waeta-eta.

³⁶ 'Ona kayoja-jaritasi de yomanako 'ena 'o Yesus ma sirete woma'okodeu to 'ona manga sigoronaka de kawongosekau, "Tabea, 'Esa moi! Tanu ngini kaniosa-sanangi."

³⁷ 'Ona yakitodokana ma de yakimodongo sababu 'ona yongose 'o tokata yamake.

³⁸ Ma 'o Yesus kawongosekau, "'Ido'oa so nimodongo? 'Ido'oa so nia singina 'ikapula?

³⁹ Nialega 'ai giama de 'ai dou la nianako ne'ena ngoiou! Nia'ao de nialega ma diai, sababu 'o tokata ma akeme de ma kobongo koi'iwa 'isoka gee niamake ngoioka ne'ena."

⁴⁰ 'O Yesus koge'ena wongose ma de wakisidumutu 'awi giama de 'awi dou.

⁴¹ De 'ona yomorene ma koyongakuwasi, sababu kaifoloi yoherangi, so 'o Yesus wosano 'onaka, "Naga de nia 'inomoka ne'enaka?"

⁴² 'Ona wikula 'o naoko 'isaro-sarongo 'o ngogu moi.

⁴³ 'O Yesus wa'ese 'o naoko ge'ena de wo'odomo to 'ona manga bionoka.

⁴⁴ Ge'ena 'iduanga de 'o Yesus kawongosekau, "Ne'enau gee tinisidemokau nginika ma 'orasi ngoi ka de de nginiosi, 'ato 'okia naga gee 'isilefoku ma ngale ngoi 'o Musa 'awi buku-bukuoka, 'o nabii manga bukuoka de 'O Mazmuroka salingou 'idadi."

⁴⁵ Ge'enaka de 'o Yesus wapelenga to 'ona manga di-dibangi la yasahe 'o Buku 'Itebi-tebini ma dumutu.

⁴⁶ Deika kawongosekau 'onaka, "Naga 'o Buku 'Itebi-tebinoka 'isilefoku, ''O Koana 'o Nyawa Wosilaha-laha ma Jo'oungu ma Dutu Wiiri-iriki gu'una salingou wosangisara de wosongene, de salingou 'o wange sa'angeka de womomikokali.

⁴⁷ De ma ngale de to 'una gee ma Jo'oungu ma Dutu Wiiri-iriki 'awi kuasa, 'o habari ma ngale 'o nyawa salingou yomaogoro 'o sowono yodiai de yolio ma Jo'oungu ma Dutuka la manga so-sowono kowosi-singinawau, salingou 'isitotara 'o daeraa 'isinoimika 'ikurue 'o Yerusalemuoka sigado 'o dunia yasuluunuku.'

⁴⁸ Nginiou niamakekau de niosakisii 'iodumu gee 'idadi-dadiokau ge'ena.

⁴⁹ Ngoi 'asa tinikula 'o Ngomasa 'Itebi-tebini gee 'ai Dea wosijajiokau. Ma ngini salingou niotamaa ne'ena 'o Yerusalemuoka, sigado 'o kuasa ma Jo'oungu ma Dutuno nipareta."

⁵⁰ Ge'ena 'ipasa de 'o Yesus waki'asa 'o kota ma dudunika sigado 'o Betaniaka. Ge'enaka dau 'una 'awi giama wagorakie de wakisibarakati.

⁵¹ Gee 'una wakisibarakati ma gu-gudaioka, de 'o sorogaade wodoa ge'enaka de womatingakokau 'onaka.

⁵² 'Ona yotalibukuku wisuba, deika yolio 'o Yerusalemuka 'ena manga singina posironga 'imorenoka.

⁵³ So ma rai 'ona kaitaurika yaika ma Jo'oungu ma Dutu 'awi Woaka wisiare-arene ma Jo'oungu ma Dutu.

Lukas

Video Lukas 24

Ikuti Kami:

KONTAK | PARTISIPASI | DONASI