Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Idi muka pekak Aco Minggu ineh, idi decur-decur ineh iné' déi' nan tanem idi nenguit luk do' buen luk pangeh tinina'deh.
2 Idi ideh nenier batu ineh pangeh linubid ratnan tanem ineh.
3 Kareb ideh nesemuet, idi ideh nenier butung Tuhan Yésus na idi.
4 Kareb ideh tuped idi mawa ratnan ineh, denak-denak dueh burur lemulun netuped iringdeh dengan ayung luk merasat.
5 Idi ideh pelaba tot dengan netekunal macing kiungdeh luun tana', idi dueh burur lemulun ineh nepebala nedeh, "Anunké punneh muyuh nakap luk mulun arang luk naté?
6 Na Ieh idi tungé, iamo' Ieh pangeh netumui. Do' ngerawé kudeng apeh balaNeh kuan muyuh kareb Ieh tudo déi' Galilia:
7 'Anak-Lemulun na miak na barén bang palad lun mesala' pad Ieh uen nalib, idi aco luk keteluh Ieh miak tumui peh.'"
8 Idi decur-decur ineh nengerawé ratnan bala Yésus ineh,
9 idi ideh nuli' ratnan tanem ineh idi nemaré kali' ratnan amung-amung ineh kuan pulu' aceh anak sekola' ineh idi lun baken pana'.
10 Idi decur ineh, ieh ineh Mariam Magdalina, Yohana, idi Mariam tinan Yakub. Ideh dengan decur baken luk nemaya' nedeh ineh nemaré kali' ratnan amung luk mangun ini kuan rasul-rasul.
11 Iamo' rasul-rasul ngerawé bala decur ineh mebalih, idi na ideh manu ku baladeh.
12 Iamo' Pétrus nudur idi nupun iné' ku tanem ineh, idi ieh netekunal nier déi' dalem. Sebuleng anun-anun pana' nateh luk nekali'neh iamo' kibung luk mebuda' ineh mo'; idi ieh nuli' dengan mawa ku amung-amung luk pangeh nangun ineh.
13 Bang aco sineh teh inan dueh burur lemulun rat arangdeh ineh uned nalan amé' bang aceh bawang luk ngadanneh Emaus, kiado dalanneh lélé tudu' batu rat Yerusalim.
14 Idi didueh nepebala arang didueh sebuleng ratnan amung-amung luk pangeh nangun ineh.
15 Kareb didueh pebala-pebala idi nengitun seburur ratnan seburur, denak-denak Yésus netuped iring didueh, idi nenalan maya' nedidueh.
16 Didueh nenier Yésus, iamo' na didueh miti Neneh.
17 Idi Yésus nengitun nedidueh, "Anunké bala luk bila medueh kareb medueh nalan?" Idi didueh nugka' dengan dat niat.
18 Idi sebuleng didueh luk ngadanneh Kliopas, nepebala Neneh, "Iko sebuleng mo' luk tudo déi' Yerusalim, luk nateh nekali' ratnan amung-amung luk pangeh nangun déi' bang kareb iniké?
19 Idi kebala Yésus nedidueh, "Ratnan anunké ineh?" Idi keburi' didueh Neneh, "Ratnan Yésus lun Nasarét, ieh ineh seburur Nabi luk melalud bang kekamenNeh idi balaNeh pa kiung Allah idi lun mula' pana'.
20 Imam-imam rayeh idi lun luk ngimet netau pangeh nemaré Neneh pad Ieh pitayen. Idi ideh nenalib Neneh.
21 Iamo' tau ini merapet Ieh luk miak nguli' nelun Israil. Meluun teh, aco sini abud aco luk keteluh ngimun ratnan amung-amung ineh luk pangeh mangun.
22 Idi teh tuda'-tuda' decur luk ratnan rurum kai nemada' luk nan mawa kuan kai; kareb aco masat ideh iné' nan tanem,
23 iamo' ideh na nekali' butungNeh. Idi ideh nelemubed idi nemala, idi ideh nenier aceh luk sinierdeh, ieh ineh melaikat-melaikat luk nemada' ratnan Yésus mulun teh.
24 Idi tuda'-tuda' lun ratnan rurum kai iné' nan tanem ineh, idi ideh nenier matu luk bila decur ineh, iamo' Yésus sebuleng na idi nekali'deh."
25 Idi Yésus nepebala nedidueh, "O lemulun luk mebacé. Muyuh mulai maya' amung-amung bala nabi-nabi ineh!
26 Na miak na Keristus ngalap medereh, pad Ieh semuet bang rayehNeh."
27 Idi Yésus nengelio kuan didueh ineh amung-amung luk bila ratnan bururNeh sebuleng bang amung-amung Surat Allah, ngimun ratnan surat Musa idi anun-anun luk inayud nabi-nabi.
28 Idi diteluh ineh iné' muneng ku bawang su luk ulek didueh, idi Yésus nesilaba.
29 Iamo' didueh ineh sikal ngimet Neneh, keburi' didueh, "Do' Iko tudo dengan kai dueh, ngaceku aco pangeh malem idi aco pangeh macep." Idi Ieh pana' numak pad-pad dengan didueh.
30 Idi Ieh tudo kuman pad-pad dengan didueh, idi Ieh nengalap ruti, idi nesembayang. Ieh nemuri' ruti ineh, idi Ieh nemaré kuan didueh ineh.
31 Mateh didueh mukab pad didueh nengiti Yésus; iamo' Yésus neburo rat su siren didueh.
32 Idi didueh nepebala seburur kuan seburur, "Bakenké niat kiteh nesigio kareb Ieh nepebala kuan kiteh maya' dalan, idi nengelio rat bang Surat Allah kuan kiteh?"
33 Petacu didueh nudur idi nelemubed iné' Yerusalim. Idi didueh nepapu' pulu' aceh anak sekola' ineh uned tebubpun dengan lun baken pana',
34 idi kebaladeh, "Matu, Tuhan pangeh netumui idi Ieh nesilagan kuan Simun."
35 Idi didueh ineh pana' nemada' ratnan amung-amung luk pangeh nangun kareb didueh tangal dalan, idi kudeng apeh Yésus initi didueh kareb Ieh nemuri' ruti ineh.
36 Uned ideh pebala-pebala ratnan amung-amung ineh, idi denak-denak Yésus netuped arang uneddeh, idi nepebala kuandeh, "Awang kuan muyuh!"
37 Iamo' ideh negagap idi pelaba tot ngaceku ideh ngerawé Ieh ada.'
38 Iamo' kebala Yésus nedeh, "Anunké punneh muyuh megagap, idi anunké punneh muyuh merapang?
39 Siruh ticu' idi kukudKu, ini Ui. Do' ngakem Negku idi nier, ngaceku ada' na uang idi tulang mepad kudeng luk siner muyuh Negku."
40 Kareb Ieh pangeh pebala kudeng ineh, idi Ieh nemada' ticu'Neh idi kukudNeh pana' sirendeh.
41 Idi kareb ideh na manu ngaceku mawang niat idi mawa, idi Ieh nengitun nedeh, "Inanké luk kenen muyuh ieni?"
42 Idi ideh nemaré setangal lawid luk kiriki kuanNeh.
43 Idi Ieh pana' nengalap, idi nekuman neneh pa kiungdeh.
44 Idi Ieh nepebala kuandeh, "Ini balaKu luk pangeh bilaKu kuan muyuh kareb Ui idi dengan muyuh atun, idi na miak na uen ngacing amung-amung luk pangeh inayud ratnan bururKu rat bang Ukum Musa, surat nabi-nabi, idi Nani Ubur ineh teh."
45 Idi Ieh nengukab terawédeh pad ideh kali' ilung bala Surat Allah ineh,
46 idi kebalaNeh nedeh, "Pangeh inayud, Keristus na miak na medereh, idi Ieh miak tumui teh rat arang lun naté bang aco luk keteluh;
47 idi bang ngadanNeh miak badén dalan uren idi do' ratnan sala' kuan amung-amung pupu, ngimun rat Yerusalim.
48 Muyuh ini mangun ku lun luk nekali' ratnan amung-amung ini.
49 Ui ini maré kuan muyuh luk pijani' TamanKu. Iamo' do' muyuh nganét bang bawang ini, pad muyuh uen ngeriput dengan lalud luk rat déi' dita'."
50 Idi Yésus nenguit nedeh remuat rat Yerusalim idi nemaya' nedeh macing Baitani. Idi Ieh nengiding ticuNeh idi nengeperuan nedeh.
51 Uned Ieh nengeperuan nedeh, idi Ieh nepatad rat nedeh, idi Ieh nekemikit umak iné' surga.
52 Idi ideh netekeradung sembayang Neneh, idi nelemubed iné' Yerusalim dengan pelaba rayeh awang niatdeh.
53 Idi ideh megéi' semuet bang Ruma' Allah idi ngubur-ngubur Allah.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA