Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Waktu rani Minggu, pagi-pagi nihan, bebai-bebai ano mik kuboran ngusung ramuan-ramuan sai radu disediako tian.

² Di kuboran, tian ngehalu batu sai nyalok kuboran radu teguling.

³ Kak raduni tian kuruk mik kuboran ano, kidang mak nungga mayat Tuhan Isa di disan.

⁴ Waktu tian cecok di disan rik bingung mikerko hal ano, tiba-tiba rua jelma makai kawai sai bekilau-kilauan cecok redik tian.

⁵ Tian merabai nihan, kak raduni sujud sampai di tanoh, sedangko rua jelma ano cawa jama tian, "Mengapi keti nyepok jelma hurik di hantara jelma mati?

⁶ Ia mak ngedok di dija. Ia radu bangkit! Ingok api sai radu diucakko-Ni jama keti waktu Ia masih di Galilea,

⁷ bahwa 'Anak Manusia haga diserahko jama jelma bedusa, kak raduni disalibko, rik rani sai ketelu Ia haga bangkit.'"

⁸ Kak raduni ampai ingok bebai-bebai ano jama cawa-cawani Isa.

⁹ Waktu mulang jak kuboran ano, tian nyeritako sunyinni kejadian ano jama sebelas rasul rik sunyinni jelma sai nutuk sai barehni.

¹⁰ Bebai-bebai sai ngeni pandai sunyinni ano jama jelma-jelma sai nutuk Isa, yakdo: Maria Magdalena, Yohana rik Maria emakni Yakobus, rik bebai-bebai barehni sai barong jama tian.

¹¹ Kidang rasul-rasul nyangko bebai-bebai ano angkah nyeritako sai mawat-mawat gaoh. Tian mak percaya cerita bebai-bebai ano.

¹² Kidang Petrus minjak rik tegar mik kuboran. Sambil ngebungkuk ia ngeliak mik delom, kak raduni ngeliak angkah kain kafan di disan. Petrus hiran nihan, kak raduni mulang jama lamon pertanyaan delom hatini tentang api sai radu tejadi.

¹³ Waktu rani seno juga, rua jelma sai nutuk Isa lagi lapah mik pekon kebelah sai gelarni Emaus, kira-kira sebelas kilometer jaohni jak Yerusalem.

¹⁴ Sambil lapah tian rua ngubrol tentang peristiwa sai radu tejadi ano.

¹⁵ Waktu tian rua ngubrol rik tukor pikeran, Isa tenggalan ratong rik lapah jejama tian rua.

¹⁶ Tian ngeliak Isa, kidang wat sai hal sai nyaniko tian mak ngenal Isa.

¹⁷ Kak raduni Isa cawa, "Api sai dicawako keti rua di tengah renglaya ajo?" Tian rua taru jama pudak sedih.

¹⁸ Kak raduni sai jelma jak tian ano, sai gelarni Kleopas, nanya jama Isa, "Bapakdo satu-satuni jelma asing di Yerusalem sai mak pandai peristiwa api sai tejadi akher-akher inji?"

¹⁹ "Peristiwa api?" tanya Isa. "Peristiwa sai tejadi jama Isa, jelma jak Nazaret ano," jawabni tian. "Ia nabi. Cawa-cawa-Ni rik guai-Ni bekuasa nihan -- betik nurut pandangan Allah maupun nurut pandangan sunyinni jelma.

²⁰ Imam-imam kepala rik jelma-jelma sai mimpin bangsa ram nyerahko Ia untuk dihukum mati, rik tian nyalibko Ia!

²¹ Padahal sekam ngeharap kik Ia sai haga ngebebasko Israel! Rik rani inji rani ketelu jak hal seno tejadi.

²² Lagi muneh, pira-pira bebai jak anggota sekam radu nyani sekam tekanjat. Pagi-pagi nihan tian mik kuboran,

²³ kidang mak ngehalu mayat-Ni udi. Kak raduni tian muloh rik cawa kik tian ngeliak malaikat, rik malaikat-malaikat ano cawa kik Isa hurik.

²⁴ Pira-pira jelma jak sekam kak raduni mik kuboran rik ternyata api sai dicawako bebai-bebai ano sangun temon, angkah tian mak ngeliak Isa."

²⁵ Kak raduni Isa cawa jama tian rua ano, "Keti sangun bugu! Lali nihan keti untuk percaya sunyinni sai radu dicawako para nabi!

²⁶ Kan Raja Penyelamat haga ngalami pai penderitaan seno, kak raduni ampai ngedapokko kemuliaan-Ni?"

²⁷ Kak raduni Isa nerangko jama tian rua api sai tetulis delom sunyinni Alkitab tentang diri-Ni, mulai jak buku-buku Musa rik buku para nabi.

²⁸ Waktu tian radu meredik jama pekon sai tian tuju. Isa ngelakuko seolah-olah haga lapah terus,

²⁹ kidang tian nahan Ia, "Tinggaldo di rang sekam," ani tian jama Ia, "tano radu hamper di bingi rik radu mekelom juga." Maka Isa kuruk untuk minok di rangni tian.

³⁰ Waktu mejong haga mengan jejama tian, Isa ngakuk ruti, ngucapko syukor jama Allah, ngebelah-belah ruti ano jama culuk-Ni, kak raduni ngenikoni jama tian.

³¹ Kak raduni sadardo tian kik ano Isa. Kidang Ia lebon jak pengliakanni tian.

³² Cawani tian sai jama sai bareh, "Kan rasani hati ram bekobar-kobar, waktu Ia cawa jama ram di tengah renglaya, rik nerangko isi Alkitab jama ram?"

³³ Waktu seno juga tian minjak kak raduni muloh mik Yerusalem. Di disan tian ngedapokko kesebelas jelma sai nutuk Isa lagi bekumpul jama sai bareh.

³⁴ Tian ano cawa, "Sangun temon Tuhan radu hurik luot! Ia radu ngeliakko diri-Ni jama Simon!"

³⁵ Rua jelma sai nutuk Isa sai ampai ratong ano kak raduni nyeritako pengalamanni tian rua di tengah renglaya, rik repa carani tian ngenali Tuhan waktu Ia ngebelah-belah ruti.

³⁶ Waktu tian lagi becerita, tiba-tiba Isa tenggalan cecok di tengah-tengah tian rik cawa, "Sejahterado keti!"

³⁷ Tian tekanjat rik merabai, mani nyangko tian lagi ngeliak hantu.

³⁸ Kidang Isa cawa, "Mengapi keti bang merabai? Mengapi bang timbul keragu-raguan delom hatimu?

³⁹ Liak culuk-Ku rik cukut-Ku. In keti pandai, kik Nyak kedo inji! Sadakdo rik perhatiko, mani hantu mak ngedok daging atau tulan, injuk sai diliak keti jama Nyak."

⁴⁰ Isa cawa reno sambil ngeliakko culuk rik cukut-Ni jama tian.

⁴¹ Rik waktu tian masih makkung percaya, mani terlalu riang rik hiran, Isa nanya jama tian, "Api keti ngedok kanikan di dija?"

⁴² Tian ngeniko jama Ia kepelok iwa tengguring.

⁴³ Isa ngakuk iwa ano, kak raduni nganikni di hadapanni tian.

⁴⁴ Kak raduni jak seno Ia cawa jama tian, "Injido hal-hal sai radu Kucawako jama keti waktu Nyak masih jama-jama keti: sunyinni hal sai tetulis tentang Nyak delom Buku-buku Musa, Para Nabi, rik Mazmur, haga tejadi."

⁴⁵ Kak raduni Isa ngebukak pikeranni tian untuk ngerti maksud Alkitab.

⁴⁶ Kak raduni Ia cawa jama tian, "Di delom Alkitab tetulis bahwa Raja Penyelamat haga menderita, rik haga bangkit luot jak kematian pada rani sai ketelu.

⁴⁷ Juga bahwa atas gelar Raja Penyelamat ano haga diwartako jama sunyin bangsa kik manusia haga betubat, rik bahwa Allah ngampuni dusa. Rik kabar ano haga diwartako mulai jak Yerusalem.

⁴⁸ Ketido saksi-saksi jak sunyinni ano.

⁴⁹ Rik Nyak tenggalan haga ngirim jama keti api sai radu dijanjiko ulih Bapa. Kidang keti haga tetap nunggu di kota inji sampai kuasa jak Allah ngeliputi keti."

⁵⁰ Jak seno Isa ngusung tian mik luah kota sampai Betania. Di disan Ia ngiwakko culuk-Ni, kak raduni ngeberkati tian.

⁵¹ Sementara Ia ngelakuko seno, Ia teiwak mik surga, kak raduni tepisah jak tian.

⁵² Tian sujud nyumbah Ia, kak raduni muloh mik Yerusalem jama hati sai riang nihan,

⁵³ rik terus muji-muji Allah di Lamban Ibadah.

Lukas

Video Lukas 24

Ikuti Kami:

KONTAK | PARTISIPASI | DONASI