Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Erpagi-pagi si lampas i bas wari Minggu, berkat diberu-diberu e ku kuburen. Ibabana rempah-rempah si merim si nggo isikapkenna.
2 Idapetina batu si nutupi lubang kuburen e nggo igulingken.
3 Emaka bengket ia ku bas; tapi lanai i je mait Tuhan Jesus.
4 Asum kalak e tedis i je dingen mamang atena, rempet tedis i deherna dua kalak dilaki, uisna terang ersinalsal.
5 Mbiar kal diberu-diberu e, emaka nembah mungkuk ia seh ku taneh. Tapi nina si dua kalak e man bana, "Ngkai maka idaramindu Kalak si nggeluh i tengah-tengah kalak si nggo mate?
6 Ia lanai i jenda; Ia nggo ipekeke. Ingetlah kai si nggo IkatakenNa man bandu asum Ia i Galilea denga, e me,
7 'Anak Manusia si isuruh Dibata la banci lang iendesken man kalak perdosa, ipakuken ku kayu persilang janah i bas wari peteluken nggeluh mulihi.'"
8 Kenca bage i inget diberu-diberu e kai si nggo ikataken Jesus.
9 Jenari mulihken ia i kuburen nari emaka iturikenna kerina kejadin enda man ajar-ajar si sepulu sada bage pe man ajar-ajar si deban.
10 Gelar diberu-diberu e: Maria Magdalena, Johana ras Maria nande Jakup. Bage pe diberu-diberu si deban si ikut ras kalak enda nurikenca man rasul-rasul e.
11 Tapi la tek rasul-rasul e. Iakapna maka kai si ikataken diberu-diberu e bual saja.
12 Tapi keke Petrus jenari kiam ia ku kuburen. Asum itungkirna ku bas, uis mbentar balut mait e nari ngenca idahna, lain si e kai pe la lit. Emaka mulih ia ku rumah dingen mamang atena kerna kai si nggo jadi e.
13 I bas wari e pe lit dua kalak ajar-ajar Jesus lawes ku sada kuta. Gelar kuta e Emaus. Kuta e kira-kira sepulu sada kilometer i Jerusalem nari.
14 I tengah dalan ercakap-cakap ia duana kerna kerina si nggo jadi e.
15 Asum ia ercakap-cakap, reh me Jesus ndeheri ia dingen erdalan ras.
16 Idah si dua kalak e nge Jesus, tapi la itandaina.
17 Nina Jesus man bana duana, "Kerna kai nge si icakapkenndu janah erdalan e?" Jengang kalak e janah teridah i bas ayona maka ceda atena.
18 Sekalak i bas ia gelarna Keleopas ngaloi man Jesus nina, "Ntah kam kal nge ngenca kalak pertandang i Jerusalem si la meteh kerna kejadin-kejadin i bas wari-wari si perpudi enda?"
19 "Kai kin e?" nina Jesus nungkun. Erjabap kalak e, "Kerna kai si nggo jadi man Jesus kalak Nasaret e. Ia sekalak nabi janah erkuasa i bas kata ras perbahanen subuk iakap Dibata bage pe kerina manusia.
20 Tapi Ia nggo idudurken imam-imam si mbelin ras kalak si erkuasa gelah iukum mate. Ia ipakuken ku kayu persilang.
21 Pada hal nggo iarapken kami maka Ia me si mbebasken bangsa Israel. Tapi i babo si e kerina sendah me petelu wariken kenca kejadin e.
22 Lit ka pe piga-piga teman kami si diberu si erbahanca kami sengget. Ndai erpagi-pagi si lampas lawes ia ku kuburen,
23 tapi lanai lit i je idapetina mait Jesus. Jenari mulihken ia janah iturikenna maka ia nggo ngidah malekat-malekat. Ikataken malekat-malekat e man bana maka Jesus nggeluh kap.
24 Kenca bage piga-piga kalak teman kami lawes ku kuburen. Idapetina payo kal bagi si ikataken diberu-diberu e. Tapi la idahna Jesus."
25 Jenari nina Jesus man si dua kalak e, "Bodoh kal kam tuhu dingen mesera kal iakapndu tek nandangi kai si ikataken nabi-nabi.
26 Ma kin Raja Penampat si ipadanken Dibata e arus ngenanami kiniseran e janah alu bage bengket KemulianNa?"
27 Jenari iterangken Jesus man si dua kalak e kai si nggo isuratken i bas Pustaka Si Badia kerna Ia, mulai i bas kitap-kitap Musa ras kerina kitap nabi-nabi.
28 Kenca seh kalak e ku kuta si man dahinna, Jesus tempa-tempa nerusken PerdalanenNa.
29 Tapi si dua kalak e mindo alu meseksek nina, "I jendalah kita sendah, sabap wari nggo ben nandangi gelap me." Emaka bengket Jesus ku rumah janah tading Ia ras kalak ndai.
30 Ibuat Jesus roti, IkatakenNa bujur man Dibata jenari icepik-CepikNa janah IberekenNa man kalak e.
31 Kenca bage minter terang pengidah si dua kalak e janah itandaina Jesus. Tapi i je ka minter lanai iidahna Jesus.
32 Nina si dua kalak e sapih-sapih ia, "Ma malem kal tuhu ateta dingen ergiah-giah ukurta asum Ia ngerana ras kita i gedang-gedang dalan dingen IterangkenNa man banta kerna isi Pustaka Si Badia?"
33 Keke ia duana dingen minter mulihken ku Jerusalem. I je idapetina ajar-ajar si sepulu sada kalak pulung ras teman-temanna si deban.
34 Nina si pulung e ngalo-ngalo ia, "Tuhu-tuhu Tuhan nggo nggeluh mulihken! Nggo IcidahkenNa BaNa man Simon."
35 Jenari si dua kalak e pe nuriken, kai si nggo jadi i tengah dalan janah kuga ia nggo nandai Tuhan asum icepik-CepikNa roti.
36 Asum kalak ndai ercakap-cakap kerna kejadin e, rempet tedis Tuhan i tengah-tengahna janah nina, "Mejuah-juah man bandu."
37 Sengget dingen mbiar kal kalak e. Iakapna maka ia ngidah begu.
38 Tapi nina Tuhan man bana, "Ngkai maka kam mbiar? Ngkai maka turah ukur la tetap i bas kam?
39 Nehenlah tanKu ras nahengKu. Perdiateken, ma idahndu Aku nge enda. Dadaplah Aku gelah ietehndu maka adi begu labo lit daging ras tulanna bagi iidahndu lit i bas Aku."
40 Asum Ia ngerana e IcidahkenNa TanNa ras NaheNa man kalak e.
41 Tapi langa denga kalak e tek perbahan ia dem alu keriahen dingen mamang denga atena; emaka nungkun Tuhan nina, "Lit pangan i bas kam?"
42 Ibereken kalak ndai man BaNa sada potong ikan si nggo ipanggang.
43 Ibuat Jesus ikan e jenari IpanNa i lebe-lebe kalak ndai.
44 Jenari nina Tuhan man kalak ndai, "Kai si nggo jadi enda nggo Kukataken nai man bandu asum Aku ras kam denga e me: Kerina si isuratken kerna Aku i bas Undang-undang Musa ras surat nabi-nabi bage pe i bas Masmur nggo jadi kap."
45 Kenca bage ibuka Tuhan perukuren kalak e gelah iangkana si tersurat i bas Pustaka Si Badia.
46 Nina man kalak ndai, "Lit kap tersurat maka Raja Penampat si ipadanken Dibata e arus ngenanami kiniseran, janah i bas wari si peteluken arus keke i bas si mate nari.
47 Bage pe i bas GelarNa berita kerna jera ras pengalemi dosa arus ipeseh man kerina bangsa, ibenaken i Jerusalem nari.
48 Kam me jadi saksi si enda kerina.
49 Janah Aku jine nuruhsa man bandu kai si nggo ipadanken BapangKu. Tapi arus itimaindu i bas kuta enda seh nusur kuasa i datas nari man bandu."
50 Jenari ibabai Jesus kalak e ku darat kuta, seh ku Betani. I je IangkatNa TanNa janah ipasu-PasuNa kalak e.
51 Asum Ia masu-masu, sirang Ia ras kalak e; iangkat Ia ku Surga.
52 Nembah erjimpuh kalak e man BaNa, jenari meriah kal ukurna mulih ku Jerusalem.
53 Gedang-gedang wari ipujina Dibata i bas Rumah Pertoton.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA