Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ta'e kon singgai in Diminggu modiugpa mobayag, bobay mita tatua minayak ing kubur bo nodia kom bahan mita pomomondu kom mayat inta aindon sinadia monia.
2 Bo naonda in no'iyaputmai kong kubur, indaianmai monia batu inta pinolingkop nolitoidon.
3 Bo mosia sinumu'ot kom bonu ing kubur tatua, ta'e diaídon no'ulií monia im mayat i Tuhan Yesus.
4 Sinimindogpa makow im mosia sim moporai-raimai kon soaáḷ tatua, daliíbií bo no'isindog magií kon diug monia in intau doyowa inta nogiḷambung nobudoí mopo'uli-ulinag.
5 Mosia totok inagiían in ondok, bo sinumungkud dapot im butaí, ta'e intau doyowa tatua noguman ko'i monia, "Nongonu sim mo'ikow motayakbií kon intau inta nobiagdon kon sigad in intau minatoi?
6 Sia Diaíbií ing kon na'a. Sia aindon nobiag! Toropdon onu inta ain pinoguman-Nya ko'i monimu ko wakutu in Sia kong Galileapa."
7 Nana'a im pinoguman-Nya, "Adií Intau musti posarahkan kon intau mita baradosa, bo popopakuí kong kayu pinoyotalempang, ta'e kon singgai intoḷunya Sia mobiag bui."
8 Daí kino'toropandon monia in singog i Yesus tatua.
9 Bo naonda im mosia nobuidon nongkon kuburan tatua, ino'uman mita monia im bayongan inta ain nobalií tatua kom murií-Nya inta mopuḷuh bo mita bo kom bayongan dumodudui Yesus ibanea.
10 Tangoi im bobay mita inta nopota'au kon dumodudui i Yesus mita tua ing: ki Maria Magdalena, ki Yohana bo ki Maria inta ki inaí i Yakobus bo bobay doman mita ibanea inta noyotakin monia.
11 Ta'e rasuḷ mita inta pinogumanan monia, diaí mopirisaya, sin irai monia bobay mita tatua in nongongumanbií kon inta diaí totu'u.
12 Ta'e umpakah natua, ki Petrus bango-bangon bo noribatuk minayak no'indoi kong kubur tatua. Naonda in sia iḷumongow monag kom bonu ing kubur tatua, dongkadon pusií inta pinobakut ko'i Yesus in inontongnya. Ki Petrus noherang totok bo nobui sindaḷan morai kon soaáḷ onu inta ain nobalií.
13 Kon singgai doman tatua, dumodudui Yesus doyowa minayak in tobatuí lipuí inta tangoinya 'Emaus'. Mopuḷuhmai nokilo degaí ing koyayuknya aka nongkon Yerusalem.
14 Kon daḷan mosia sindaḷan mongonguman kom bayongan inta bagupa nobalií tua.
15 Koyogot im mosia mongonguman bo mopomiki-mikirmai kon soaáḷ inta bagu nobalií tua, ki Yesus namangoi bo dinimiug ko'i monia bo minayak doman noyotakin monia.
16 Ta'e naí oyuíon in no'iḷamboi kom mata monia, sahingga diaí kinota'auan monia mongo ki ine in Sia.
17 Bo ki Yesus noliboí ko'i monia, "Onubií in sindaḷan monimu o'umanon na'a kon daḷan?" Mosia baḷuí sinumogon takin moaíjar ing gina.
18 Bo tobatuí nongkon i monia inta tangoinya ki Kleopas noliboí ko'i Yesus nana'a, "Degaí bodongka bidon ki Amaí in intau kon ḷuai in Yerusalem na'a inta diaí nonota'au kom bayongan inta bagu nobalií tumimai na'a?"
19 Daí ki Yesus noliboí doman, "Onu intua?" Tubag monia doman, "Soaáḷ inta nobalií ko'i Yesus intau in Nazaret tua. Sia tua in tobatuíbií nabi. Singog bo oaíid-Nya mita totokbií im mokawasa -- pinomayak kom mata i Allah andeka kom mata im bayongan intau.
20 Ta'e Sia tua pinosarahkan in imang mita itoi bo in itoi mita nami sin hukumon dapot matoi. Bo pinopopakuí monia in Sia kong kayu pinoyotalempang!
21 Padahaḷ aindon i harap makow nami kon Siabií tua inta mamangoi bo moposaḷamat kon Israel. Singgai na'a, singgaidon intoḷunya nongkon kino'baliían intua komintan.
22 Apapa doman oyuíon im bobay mita inta noyotakinmai nami nodia kon habar inta nokotalikokog ko'inami. Modiugpa mobayag, mosia minayakdon ing kubur,
23 ta'e no'iyaputmai diaídon inotong monia im mayat-Nya kon tua. Bo nobui im mosia bo noguman kon noko'ontong kom malaekat mita kong kubur tatua. Malaekat mita tatua in noguman kong ki Yesus buidon nobiag kon sigad in intau minatoi.
24 Tongonu degaí in yobayat nami minayak ing kubur bo no'ulií magií onu inta ain ino'uman im bobay mita tatua in na'anta totu'ubií mita, tongaí mosia diaí noko'ontong ko'i Yesus."
25 Bo ki Yesus noguman ko'i monia, "Mo'ikow nion totu'ubií kom bodok! Moḷaḷoi totok im pororai monimu kon onu inta ain pinoguman in nabi mita!
26 Degaí diaíbií kinota'auan monimu kon Raja Mopoposaḷamat mustibií muna moko'rasa muna kon roriga simbaí moko'ulií kong kamulia'an-Nya?"
27 Onda intua nodait-Nya sinarangkan ko'i monia im bayongan onu inta pinais kom Buk Mosuci soaáḷ Sia. Pinangkoi kon inta pinais i Musa nodapot im buk in nabi mita.
28 Mosia kodiug-kodiugdon kon lipuí inta bayaían monia. Ki Yesus ki ubo-uboḷmai tumurus mayak,
29 ta'e sinahangdon monia in Sia, takin noguman, "Pongandupa kon tampat nami na'a sin aindon modoḷom." Daí nongandupdon in Sia bo nogogai takin monia kon tua.
30 Ko wakutu in limituídon monga'an moyotakin monia, ki Yesus nogamaí kon roti, bo nopoyaput in sukur ko'i Allah poḷat nomonsi-monsig kon roti tatua, bo inogoi ko'i monia.
31 Kon dodaipa doman tua bo kinota'auandon monia kong ki Yesusbií inta kotaki-takin monia tua.
32 Bo mulaidon mosigumanan im mosia, kai monia, "Tuamai porasaan naton naí bií tumagab wakutu in Sia nongonguman naton kon daḷanpa, bo noginsilang kom bonu im Buk Mosuci ko'i naton!"
33 Kon dodaipa doman tua mosia nobuat bo nobui kon Yerusalem. Kon tua mosia noyodungkuḷ im murií-Nya mopuḷuh bomitaí inta noyosipun takin dumodudui-Nya mita ibanea.
34 No'iyaputmai kon tua mosia noguman nana'a, "Totu'ubií kong ki Tuhan aindon nobiag bui! Sia ain nokipogontong ko'i Simon!"
35 Dumodudui i Yesus doyowa inta bagu namangoi tatua nongonguman doman kon onu inta ain nobalií ko'i monia, tuata inta wakutu im mosia kon bonupa im binaya'an, bo kon soaáḷ kinotota'au monia kong ki Tuhanbií intua ko wakutu in Sia nomonsi-monsig kon roti.
36 Koyogotpa im mosia nongonguman kom bayongan inta ain nobalií tatua, dongka no'isindog magií ing ki Yesus kon yuaí-yuaík monia bo noguman ko'i monia, "Dodamean umuran kotaki-takin monimu!"
37 Mosia nongo'italikokog bo no'ondok sing kai monia kamai dimbuḷoíbií in inontong monia tua.
38 Ta'e ki Yesus noguman, "Nongonu sim mo'ondokbií im mo'ikow bo diaí mopirisaya?
39 Inodoiaikah in lima bo si'oḷ-Ku. Aku'oibií in na'a! Kokapkah bo tarukira in awak-Ku, sin dimbuḷoí in diaíbií kotapu andeka kotuḷan, naí inta inontong monimu ko'i-Nakoí na'a."
40 Koyogot Sia noguman natua, nopo'ontong doman in Sia in lima bo si'oḷ-Nya ko'i monia.
41 Bo kon dodai im mosia diaípa basií mopirisaya, lantaran no'iliudon pia ing gina bo noherang, ki Yesus noliboí ko'i monia, "Oyuíon degaí ing ka'anon ko'i monimu na'a?"
42 Mosia nobogoi ko'i-Nia in toyak ginoreng topongkoí.
43 Ginamaí i Yesus intua bo kinaían kon tayowonmai monia.
44 Onda intua Sia noguman ko'i monia, "Na'adon in soaáḷ mita inta aim pinoguman-Ku ko'i monimu ko wakutu ing kotaki-takinpa monimu in Aku'oi: kon bayongan inta aim pinais so'ḷ Aku'oi kom bonu im buk i Musa bo buk in nabi mita, bo buk Mazmur, tua im mustibií mobalií."
45 Onda intua ki Yesus nobukaí kon raian monia simbaí komangalean monia im bayongan inta aim pinais kom Buk Mosuci.
46 Bo Sia noguman ko'i monia, "Kom bonu im Buk Mosuci pinais nana'a: Raja Mopoposaḷamat musti mokorasa kon roriga, bo musti mobiag bui nongkon kinopatoian-Nya kon singgai intoḷunya.
47 Bo podoyon doman kon tangoi Raja Mopoposaḷamat tua mustibií popota'au kom bayongan bangusa, kon intau mustibií mogogai mogaid kon inta diaí mopia bo pota'au doman kon ki Allah im mongampungbií kom bayongan dosa mita monia. Bo habar tatua musti popota'au pangkoion kon Yerusalem.
48 Mo'ikowbií nion inta mobalií saksi kom bayongan tua komintan.
49 Sin onu inta aim pinodandi i Amaí ko'i monimu, Aku'oibií in mobogoi. Ta'e mo'ikow musti umuran mogoḷat kong kotaí tana'a modapot ogoiandon i Allah ing kawasa mo'ikow."
50 Nopaḷut makow kon tua, ki Yesus nodia ko'i monia minayak iḷumuai kong kotaí nodapot im Betania. Kon tua Sia nobingkat kon lima-Nya bo nomarakat ko'i monia.
51 Koyogotpa nomarakat, indoianmai yo no'ibingkatdon in Sia minayak in soroga bo no'itondiídon in Sia ko'i monia.
52 Baḷuí im mosia sinumungkud bo nosumbah ko'i-Nia. Onda intua nobuidon mosia kon Yerusalem takin sanang gina,
53 bo umuran modayow ko'i Allah kom Baḷoi Tuhan.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA