Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ 'O Roti Koiragi-ragiwa ma Wange ma Amoko gee yosironga Wakisisupu ma Wange 'isoriokau.

² 'O 'imam ma sae-saeke de 'o 'agamaka yodoto-dotoko yomau 'o Yesus wito'oma so ma ngekomo yosikanonu-nonu kayomasiriidino, sababu 'ona yododato 'o kawasaka 'iruahe.

³ Ge'enaka de 'o Yudas gee wisironga 'o Iskariot ge'ena la wimoi gee 'o Yesus 'awi do-domoteke yamogiooko de modidioka naga, 'o Tokata ma Koana widongosama.

⁴ Ge'enau so 'o Yudas wotagi 'o 'imam ma sae-saeika de ma Jo'oungu ma Dutu 'awi Woa ma jo-jaga ma balu-balusika la yomabicara ma ngale kokia 'una 'idadi wisisarakani 'o Yesus 'onaka.

⁵ 'Ona 'ifoloi yomorene de yojajiokau 'ato nako 'o Yesus wisisarakani 'onaka ge'ena dua 'o pipi 'o saaka wikula.

⁶ 'O Yudas ma wosimoteke de 'o 'orasi yaowa-owa wononu la 'o Yesus wisisarakani 'onaka 'ena 'o nyawa yoku-kudai 'uwa yanakoka.

⁷ 'O Roti Koiragi-ragiwa ma Wange ma Amoko ya'adono, 'o domba gee Wakisisupu ma Wange ma rame ma 'inomo yatoaka.

⁸ So 'o Yesus wakisuloko 'o Petrus de 'o Yohanesika wongose 'ato, "Ngini niotagi niosidaotou nanga 'inomo ma ngale Wakisisupu ma Wange ma ngodomo."

⁹ De 'ona yosano, "'Aba, ngona nomau kiaka miosidaoto?"

¹⁰ 'O Yesus wosango, "Gedagee ngini dua niowosama 'o kotaka, ngini 'asa nimakamake de wimoi 'o 'akere ma ngii de ma 'akeroka wo'asa. Winimoteke 'una gee kiaka naga 'o woaka wowosama.

¹¹ De niongose ma woa ge'ena ma dutuka: ''Esa moi, ma 'Aba Guru wosuloko miosano 'ato kiaka 'o ngii gee 'idua-duangou ma ngale 'una de 'awi do-domoteke mio'odomo Wakisisupu ma Wange ma 'inomo?'

¹² Ma woa ma dutu 'asa winisidumutu 'o ngii moi 'ingoa-ngoatika 'o lotengoka, ma kia sonaa 'iodumu 'idua-duangou. So niosidaotukou nanga 'inomo ge'enaka doka."

¹³ So 'o Petrus de 'o Yohanes yotagi, de yakokimake 'isoka gee 'o Yesus wosidemo-demokau. De 'ona mita yosidaotokau ma 'inomo ge'ena.

¹⁴ Gee ma 'orasi ya'adonokau yo'odomo Wakisisupu ma Wange ma 'inomo ge'ena, de 'o Yesus de 'awi do-domoteke yomasidogogerie 'o ngodomoka.

¹⁵ Ge'enaka de 'una kawongosekau 'onaka, "Ngoi ne'ena rekeni tosangisaraka de rekeni tosongenoka! Ne'ena ngoi posironga toduaoka ngone pomasido'odomo Wakisisupu ma Wange posingano-nganono ma 'inomo.

¹⁶ Tinidongose ne'ena: Sababu ma gou-goungu ngoi dua kota'odomuawau ne'ena, sigado 'o ngodomo ne'ena ma ngale 'isidumutu ma Jo'oungu ma Dutu 'awi Dunia ma Sungioka."

¹⁷ Ge'enaka de 'o Yesus wagoraka 'o 'anggur 'o sawoko moi de wo'amalaha ma Jo'oungu ma Dutuka. Ge'enaka de kawongosekau, "Nee nia'ese, de niosibula-bula.

¹⁸ Tinidongose ne'ena: Ngoi dua kota'okeruawau 'o 'anggur sigado ma Jo'oungu ma Dutu woparetakasi 'o duniaka."

¹⁹ Ge'ena 'ipasa de 'o Yesus 'o roti wa'ese. De gee wo'amalaha 'iduanga, de ma roti ge'ena wapela-pelaka 'asa de wosibula-bula 'onaka, de kawongosekau, "Ne'ena to ngoi 'ai roese gee 'isisarakani ma ngale ngini. Dua niadiai kone'ena, ma ngale nisi-singina ngoi."

²⁰ Koge'enali mita gee yo'odomo 'iduanga de 'o 'anggur ma sawoko ge'ena wokula 'onaka de kawongosekau, "'O sawoko ne'ena ge'ena ma Jo'oungu ma Dutu 'awi jaji ma sungi, gee 'isitatapu de 'ai 'aunu gee 'ipoa ma ngale ngini.

²¹ Tei! 'O nyawa gee woiwuku-wukunu 'una nongoka dau wo'odomo de de ngoi!

²² Ngoi 'o Nyawa ma Ngowaka ge'ena salingou tosongene moteke ma Jo'oungu ma Dutu wositatapuokau. Ma dua wotorouoka 'o nyawa gee woiha-halebiru!"

²³ So ma rai 'ona yomakasano-sano moi de moi, nago'ona 'onaka naga gee dua yadiai koge'ena.

²⁴ 'O Yesus 'awi do-domotekoka naga 'idadi 'o kaributu ma ngale nago'ona salingou yakinakoku 'ifoloi yoamoko 'onaka naga.

²⁵ Ge'enau so 'o Yesus kawongosekau 'onaka, "'O koa-koana 'o duniaka ne'ena gee ma Jo'oungu ma Dutu kowinako-nakowa, yakihalebiru manga kawasa, de yopa-pareta yomasironga 'o kawasa manga ro-riwo.

²⁶ Ma ngini koidadiwa koge'ena. Ma 'ena 'o nyawa gee 'ifoloi yoamoko naga nginioka salingou yodadi 'isoka 'ifoloi yotingoono naga nginioka, de yosibalu-balusu salingou yodadi 'isoka 'o gilaongo.

²⁷ Tinisanosi nginika! 'O nyawa gee wogoge-gogeruku wo'odomo 'o mejaka wotaarika, de wimoi wileleani wo'odo-'odomo gu'una ge'ena nago'ona 'ifoloi yoamoko? Ma raiokau 'o nyawa gee wogoge-gogeruku wo'odomo. Ma ngoi 'ania sigoronaka ne'ena ge'ena 'isoka 'o ro-riwo.

²⁸ Ngini kaitaurika de de ngoi gee 'ai singina ma susa 'irupa-rupaka.

²⁹ So 'isoka 'o 'Aba 'o kuasa woikulakau ma ngale topareta, koge'enali mita ngoi 'asa tinikula 'o kuasa ge'ena la ngini niopareta.

³⁰ Ge'enau so ngini 'idadi niomoteke nimasa-sanangi de de ngoi, po'odomo de porame ma 'orasi ngoi topareta 'o Dunia ma Sungioka. Ngini 'asa niogogerie 'o koana ma go-gogere 'o ngai mogiooko de modidioka ma ngale niakipareta niahakimi 'o Israeloka 'o suku mogiooko de modidi."

³¹ Ge'enaka de 'o Yesus kawongosekau 'o Simon Petrusika, "Ee Simon, nosigisene! 'O Tokata ma Koana 'iga'asookau ma Jo'oungu ma Dutuka ma ngale nitaili ngini, 'isoka 'o bira yatadoko ma ngale yosikati-tingaka ma owa de ma konga.

³² Ma ngoi tonisilahidoakau, la 'ani ngo-ngaku 'uwa 'iisanga. De nako ngona nolionou ngoioka, ngona salingou nakisikuata 'ani riaka dodoto manga ngo-ngaku."

³³ 'O Petrus wosango, "Jou, ngoi tomangaku tobui de pomasidosongene de de ngona Jou!"

³⁴ De 'o Yesus kawongosekau, "Petrus, tonidongose ne'ena, ne'ena ma obiri 'o namoro koisorenuawasi 'ena ma sa'angeu nomasipongono 'o nyawa manga bionoka 'ato konoinakowa."

³⁵ Ge'ena 'iduangino de 'o Yesus kawongosekau 'awi do-domoteika, "Ma sira gee ngoi tinisuloko ma kotinisidabiwa nio'asa 'o pipi ma ngii, de 'o 'inomo ma ngii, bolo 'o tarupa, so bika ma 'orasi ge'ena nisidukurangiokau 'o kianikia?" 'Ona yosango 'ato, "Ko'uwa!"

³⁶ 'O Yesus wongose, "Ma ne'ena, nago'ona de manga pipi ma ngiioka bolo de manga 'inomo ma ngiioka, ge'ena salingou ya'asa; de nago'ona manga wase koi'iwa, salingou manga juba yawukunu ma ngale manga wase yosi'ija.

³⁷ Sababu salingou niongaku 'o Buku 'Itebi-tebini ma bo-bulaka 'ingose koneda, ''Una 'o nyawa yongose 'ato 'o nyawa ma dorou!', ge'ena salingou 'idadi ngoioka. Sababu 'okia naga 'isilefokau 'o Buku 'Itebi-tebinoka ma ngale ngoi naga 'idadi ma gu-gudaioka ne'ena naga."

³⁸ 'O Yesus 'awi do-domoteke kayongosekau 'o Yesusika, "Jou, neda ngomioka 'o wase 'o ngai modidioka." 'O Yesus wosango, "'Iduangou. 'Uwau niabicara ge'ena!"

³⁹ 'O Yesus wamada 'o kotaka de wotagi 'o Zaitun ma gigieka 'isoka biasau 'una waika-ika ge'enaka, de 'awi do-domoteke mita yomoteke.

⁴⁰ Gee ya'adonika ge'enaka de kawongosekau 'onaka, "Niomalahidoa la 'uwa niosowono nako nitaili."

⁴¹ Ge'enaka de wotagi 'ifoloiosi 'ikurutika ma eta 'onaka 'ena, poilia kogee pawakoka, ge'enaka de wobukuku wolahidoa.

⁴² Kawongosekau, "'Aba, nako 'idadi de noisikurutu 'o sangisara gee salingou tamoku ne'ena. Ma 'uwa moteke ka to ngoi 'ai mau, 'ena moteke to ngona 'ani mau 'Aba."

⁴³ ['O mala'ekati moi yaino 'o Yesus wisikuata.

⁴⁴ Sioko 'o Yesus 'awi singina 'isusa ma de 'isangisara ma sala so kawodofoloi monga wolahidoa wosigou-gounguku. 'Awi gasauku 'itege-tege 'o tonauku 'isoka 'o 'aunu.]

⁴⁵ Wolahidoa waduanga de wolioli 'awi do-domoteika. Waika 'ena kayoma'iduokasi sababu yolamahani, ngano kaifoloi manga singina 'isusa so.

⁴⁶ Ge'enaka de kawongosekau 'onaka, "'Ido'oa so kanionisuku? Niomomikie de nimalahidoa la 'uwa nisimadaka nitaili."

⁴⁷ 'O Yesus kawobi-bicarasi 'ena 'o duono moi yoboa 'o Yudas gee 'o Yesus 'awi do-domoteke wimoi wakisi'asa. Ge'enaka de 'o Yudas 'o Yesusika witabea de wiame.

⁴⁸ Ma 'o Yesus kawongosekau 'unaka, "Ee Yudas, noiame ge'ena nomau noiwukunu ngoi 'o Nyawa ma Ngowaka?"

⁴⁹ 'O Yesus 'awi do-domoteke ge'enaka gee yanako 'ato 'o Yesus witagokou de kayongosekau, "Jou, to ngomi de mia wase, so miakicobou!"

⁵⁰ Ge'enaka de 'o do-domoteke wimoi wo'oto ma 'Imam ma Amoko 'awi ro-riwoka so wi ngauku ma giniraka 'itoaoka.

⁵¹ Ma 'o Yesus kawongosekau, "'Iduangou!" Ge'enaka de wa'ao 'o nyawa gu'una 'awi ngaukika so wosi'aiki.

⁵² Ge'enaka dau yoboano mita 'o 'imam ma sae-saeke de ma Jo'oungu ma Dutu 'awi Woa ma jo-jaga ma balu-balusu, de mita 'o Yahudioka manga balu-balusu la 'o Yesus witagoko. Ge'enaka de 'o Yesus kawongosekau 'onaka, "Ngoi ne'ena toti-tingkai? so nidagasano 'o samarangi de 'o ba-ba'asana ma ngale nitagoko ngoi?

⁵³ 'O wange 'isinoimi ngoi de de ngini ma Jo'oungu ma Dutu 'awi Woaka, ma konitagokuwa. Duga ne'enau ma 'orasi ngini nitagoko ngoi sababu ngini niamoteke to ngini nia singina de 'o darusu ma pareta."

⁵⁴ 'Ona witagoko 'o Yesus de wi'asa ma 'Imam ma Amoko 'awi woaka. 'O Petrus wisidu-du'uru wisoa 'o gurutika.

⁵⁵ 'O ginitaroka ge'ena ma goronaka 'o 'uku ma susukoka yalurusieu de 'o Petrus waika so yomasidogogerie de 'o nyawa gee yogoge-gogerie yosigilolitino ma 'uku ge'ena.

⁵⁶ 'O ro-riwo mimoi mimake 'o Petrus wogogeruku 'o 'uku ge'ena ma dateoka, ge'enaka de midi-diriidi 'unaka de kamongosekau, "'O nyawa nu'una mita kangano de 'o Yesus!"

⁵⁷ Ma 'o Petrus womasipongono. Kawongosekau, "Ngoi ka ma eta ma kotowinakowa 'o nyawa gu'una!"

⁵⁸ Koito'ingowa 'ena wimoioli wimake de kawongosekau, "Ngona mita de de 'ona gee wimote-moteke 'o Yesus!" Ma 'o Petrus wongose 'ato, "Ko'uwa, ko ngoiwa!"

⁵⁹ Poilia 'o takoro moi de wimoioli womarofu kawongosekau, "Ma goungu 'o nyawa nu'una 'o Yesus wimote-moteke, sababu 'una mita 'o Galilea ma nyawa!"

⁶⁰ 'O Petrus womasipongono wongose 'ato, "'Okia 'ani dumutu, ngoi kotasahewa!" Ma 'orasi ge'ena 'o Petrus kawobicarasi de 'o namoro 'isorene.

⁶¹ 'O Yesus womapulutuka widi-diriidi 'o Petrusika de 'o Petrus wonganonie ma Jou wongosekau 'unaka, "Ne'ena ma obiri 'o namoro koisorenuawasi 'ena nomasipongono ma sa'angeu 'ato konoinakowa."

⁶² So 'o Petrus wosupu ge'enaka wosigari-gari kawidomo-domo.

⁶³ 'O nyawa gee 'o Yesus wijaga-jagano, wisisasaru de wipesana.

⁶⁴ 'Awi ako yatamunoko de yosano 'unaka, "Nako ngona 'o nabii moi de bika nosidemo nago'ona nipesana?"

⁶⁵ De 'o gudaiosi 'ona wisikatemo.

⁶⁶ Ma ngoru-ngorumika, 'o Yahudioka manga balu-balusu de 'o 'imam ma sae-saeke de 'o 'agamaka yodoto-dotoko go'ona yomatoomu, de 'o Yesus wi'asa to 'ona manga 'Agamaka ma Hakimika.

⁶⁷ 'Ona kayongosekau, "Nosidemo ngomino, ngonau? 'o Koana gee ma Jo'oungu ma Dutu Wiiri-iriki Wosilaha-laha gu'una?" 'O Yesus wosango, "Nako ngoi tinisidemo nginika, ma raiokau dua koniongakuwa.

⁶⁸ De nako ngoi tosano nginika, ma raiokau dua koniosangowa.

⁶⁹ Ma ne'ena 'ipasa de ngoi 'o Nyawa ma Ngowaka dua topareta de ma Jo'oungu ma Dutu gee 'awi kuasa ma batingi koi'iwa."

⁷⁰ De 'ona yoodumu kayongosekau, "Nako koge'ena, ge'ena ma ngale nongose 'ato ngona ge'ena ma Jo'oungu ma Dutu 'awi Ngowaka ma Dutu! Ma goungu?" 'O Yesus wosango, "Ma goungu 'isoka to ngini nia demo."

⁷¹ So 'ona kayongosekau, "Koiparaluuwau ma sakisii! Ngone po'isenokau to 'una ma sirete 'awi 'urude 'isupu!"

Lukas

Video Lukas 22

Ikuti Kami:

KONTAK | PARTISIPASI | DONASI