Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Naparamo eo posusa ntoYahudi niuli Posusa Roti Ledo Noragi. Posusa haitu niuli muni Posusa Paskah. Balengga-balengga ntopanggeni pesomba bo *guru-guru agama da nangelo dalapa mompatesi i Yesus nggalino-lino, apa naeka ira ka todea.
2 (22:1)
3 Tempo haitu Magau nu Seta nesua riara ntai i Yudas anu niulu Iskariot, saito lako ri sapulu randua anaguru i Yesus.
4 Naupu nipesua nu Magau Seta, hau ia nosinggava nte *balengga-balengga ntopanggeni pesomba bo pakeni ntopojaga Banua nu Alatala, notesaka berimba rapobaluna i Yesus ka ira.
5 Nadamba mpuu rarara nangepe anu niuli i Yudas bo nijanjira mombadekei doi ka ia.
6 Nadotamo i Yudas. Jadi, hau ia mangelo loga mompobalu i Yesus ka ira tempo ledo ria todea.
7 Nakavamo eo matana Posusa Roti Ledo Noragi, haitumo tempona mosambale *ana bimba rakande ri Posusa Paskah haitu.
8 I Yesus nombatudu i Petrus bo i Yohanes ivei: "Koi pasadiamiu kandea Paskah ka kita."
9 Nekutana ira randua, "Pue, ri umba rapodotaMiu rapompakasadia kandea haitu?"
10 Nesana i Yesus, "Tempo komiu mesua rangata, raposinggavakamiu saito langgai manjimbuaka gumba nte uve. Tuntunimo ia hau ri banua rapesuana.
11 Pade ulika tupu banua ivei: 'I Guru nanguli ivei: ri umba tombi Kupangande kandea Paskah mosanggani-nggani ante ana-anaguruKu?'
12 Bo tupu banua haitu mombatuduaka ka komiu sangu tombi mbaso ri kalangana nagana ante parevana. Ri siamo rapompakasadiamiu kandea Paskah ka kita."
13 Haumo i Petrus bo i Yohanes nesua rangata. Nikavara nasimbayu mpuu eva anu niuli i Yesus ka ira. Jadi nipakasadiaramo kandea Paskah.
14 Nakavamo tempo mangande kandea Posusa Paskah haitu, i Yesus nangande singgani-nggani ante anaguruNa ri banua haitu.
15 NiulikaNa ira, "Naoge mpuu raraKu mangande mosinggani-nggani ante komiu ri Posusa Paskah hitu dopame Yaku rapandasa.
16 Kuuli ka komiu, domo Kukande hanupa kandea Paskah sampe Alatala momparenta pura-pura manusia bo anu nirapaka Posusa hitu rapakadupa."
17 Naupu sia i Yesus nangala saboda uve anggur bo nanguli tarima kasi nte Alatala. Pade niuliNa ka anaguruNa, "Alamo uve *anggur hitu bo inumo, saito-saito.
18 Kuuli ka komiu, nompamula hitu, domo Kuinu hanupa uve anggur sampe majadimo Poparenta nu Alatala."
19 Naupu sia, niala i Yesus munimo roti. Naupu niuliNa tarima kasi nte Alatala, nitubi-tubiNa roti haitu bo nibagiNa ka ira bo niuliNa, "Roti hitu karoKu Kudekei mombatolosi komiu. Kandemo roti hitu rapombatora Yaku."
20 Ivesia muni naupu nangande, nialana saboda uve anggur bo niuliNa, "Panginu hitu tandana Pojanji nu Alatala nabaru anu rapakaasa nte raaKu matiti ka komiu.
21 Peintamo! Topompobalu Yaku naria nosinggani-nggani ante Yaku ri sii.
22 Yaku, Ana nu Manusia kana mamate mami nangoseaka anu nipakatantu nu Alatala. Tapi mandasa mpuu tona mompobalu Yaku!"
23 Nangepe haitu, nosimpekutanamo anaguru i Yesus, "Isema lako nte kita hitu mompobalu i Yesus?"
24 Pade anaguru i Yesus nosinjanaika isema ira naogepa.
25 Nangepe haitu, i Yesus nanguli ka ira, "Ane todea-todea anu ledo nosisani nte Alatala, magaura nabiasa nompatundu todeana bo tomaoge-tomaoge nompokono rauli ntona topesaliku.
26 Tapi ledo ivesia nte komiu. Kakanana isema naoge kana majadi nasimbayu mpo tona naede, bo pakenimiu kana majadi nasimbayu mpo batua.
27 Isema naogepa, tona nonturo nangande, atau tona nosondu ka ia? Natantu naogepa toponturo. Tapi Yaku Tupumiu, naria ri tatangamiu najadi toposondu ka komiu. Jadi ledo masipato komiu masesa mompekirika isema naogepa!
28 Tempo Yaku nombarasai susa bo pari, ledo nipalaisimiu Yaku.
29 Jadi, Kudekei kuasa ka komiu moparenta, nasimbayu eva TuamaKu Alatala, nombadekei kuasa ka Yaku momparenta todeaNa.
30 Jadi komiu muni madamba mangande bo manginu ante Yaku ri PoparentaKu tempo Yaku majadi Magau. Bo komiu monturo ri sapulu randua gadera magau bo momparenta tona lako ri sapulu randua *valaa ntoIsrael."
31 Pade nanguli i Yesus ka i Simon Petrus, "Simon, epemo tesaKu! Magau nu Seta nipaloga nu Alatalamo mompesori komiu pura-pura nasimbayu mpo topovaro pae.
32 Tapi niposambayaKukamo iko, Simon, ala pomparasayamu ledo moura. Jadi maupu iko rapesori bo muoseaka mpanjili Yaku, iko kana mompakaroso pomparasaya nu roamu."
33 Pade nesana i Petrus, "Pue, ledo kupalaisi Komiu! Yaku nasadia ratarunggu mosanggani-nggani nte Komiu!"
34 Tapi nesana i Yesus, "Pariaramo, Petrus! Dopame mototoroko manu ngena bobaya, talu-ngganimo iko mombasapu Yaku!"
35 Naupu haitu i Yesus nanguli ka anaguruNa pura-pura, "Bara ipia nituduKu komiu hau nompatolele Kareba Belo lako nte Alatala, bo ledo nidekeiKu komiu manggeni doi bara batutu bara sapatu. Berimba tempo haitu, naria anu nakura nte komiu?" Nesana ira, "Kami ledo nakura nuapa-nuapa."
36 Pade nanguli i Yesus, "Nakana tesamiu. Tapi sii-sii isema naria doina bara batutuna kana rakenina. Isema ledo naria gumana kana rapobaluna bajuna raalikana guma.
37 Sabana, naria anu nitulisi riara Buku Gasa nanguli, 'Magau Topepakasalama rareke ntona todaa.' Anu nitulisi haitu mpuu-mpuu majadi ri karoKu. Apa anu nitulisi ri Buku Gasa anu nombatesa Yaku, nipakadupa sii-sii."
38 Pade nanguli anaguruNa, "Pue, siimo guma romata." Nesana i Yesus, "Naganamo."
39 Naupu sia, i Yesus nesuvu lako rangata haitu bo hau nantende ri Bulu Zaitun nangoseaka kabiasaNa. Bo ana-anaguruNa muni hau nosinggani-nggani nte Ia.
40 Nakava sumai, niulikaNamo ka ira, "Komiu kana mosambaya ala komiu ledo mambela pesori."
41 Pade haunapa Ia sakide lako nte ira. Kakavaona nitasere samporempetaka vatu. Ia nantaputu bo nosambaya:
42 "Tata, ane rapodotaMiu, lelakasimo peparajea hitu anu rapambela ka Yaku. Tapi nee dotaKu majadi, tapi dotaMiu majadi."
43 [Pade nakavamo saito *malaeka lako ri suruga nompakaroso raraNa.
44 Nasusa mpuu raraNa, sampe Ia nosambaya mpuu-mpuu bo iniNa eva raa natiti ri tana.]
45 Naupu nosambaya, neanggamo i Yesus bo nanjili hau nte anaguruNa. NikavaNa namonjo puramo ira, nikeni kabuku nu rarara.
46 NiuliNa ka ira, "Pembangumo! Nakuya komiu aga namonjo? Pembangumo bo posambayamo ala komiu ledo mambela pesori."
47 Da notesa i Yesus ka ira, nakavamo bara sako-pulu tona nikeni i Yudas, anaguru i Yesus. I Yudas nanggaparai i Yesus bo nitabena ante peeki, nangoseaka ada ntoYahudi.
48 Tapi nanguli i Yesus, "Yudas, ante petabemu tutumo tano iko mompobalu Yaku, Ana nu Manusia ka baliKu."
49 Tempo nisani nu anaguruNapa i Yesus rasaka, nangulimo ira, "Pue, ratimbe kami ante guma ira?"
50 Saito ira netimbe mpuumo bo nambela batua nu Pakeni *nTopanggeni Pesomba sampe napudu talinga ngganana.
51 Tapi i Yesus nombatagi ira, "Nee metimbe!" Bo nituiNa talinga ntona bo nipakabeloNa.
52 Pade niulikaNa *balengga-balengga ntopanggeni pesomba, pakeni-pakeni topojaga Banua nu Alatala, bo totua-totua ngata nakava ri sia mombasaka Ia, niuliNa: "Yaku hii ledo topeago sampe komiu kana makava ante guma bo pato mosaka Yaku!
53 Eo-eo Yaku naria nosanggani ante komiu ri Banua nu Alatala, tapi ledo nisakamiu Yaku. Damo bongina hitu pade nabia komiu nakava mombasaka Yaku. Hitumo logamiu, loga nu Magau Seta!"
54 Nisakara mpuumo i Yesus bo nikenira hau ri banua nu Pakeni *nTopanggeni Pesomba. I Petrus netuntuni nggavao lako ri purina.
55 Ri doyata naria apu nipadumpu ntona rapanderu. Jadi haumo i Petrus nonturo nte topanderu haitu.
56 Naria batua mombine nompelepi ia nonturo napara apu haitu nanguli, "Tona haitu muni roa i Yesus!"
57 Tapi i Petrus nesapu, "Ledo nakana! Ledo nisaniku Ia!"
58 Dopa nasae naria vai tona ntanina ri sia nanggita i Petrus bo nanguli ka ia, "Iko muni saito roara!" Tapi nanguli i Petrus, "Ledo! Ledo yaku, le!"
59 Nitasere sajaa kaliuna, nanguli vai saito, "Ia haitu mpuu-mpuu roa i Yesus, sabana ia muni toGalilea!"
60 Tapi nesana i Petrus, "Ledo nisaniku nuapa niulimu!" Da notesa i Petrus notesa, eva nisuka nototorokomo manu.
61 Pade neilimo i Yesus nangganoto i Petrus. Jadi nitora i Petrusmo anu niuli i Yesus ka ia pangane ivei: "Dopame mototoroko manu ngena bobaya, talu-ngganimo iko mombasapu Yaku."
62 Pade nesuvumo i Petrus hau ri savalikuna bo notumangi natesumonde-monde.
63 Tona nombajaga i Yesus nompongei-ngeika Ia bo nibobara.
64 Nibonggora mataNa bo nipekutanara, "He, *nabi! Boto vei isema nombaboba Iko!"
65 Nadea muni tesa-tesara nadaa nompongeika Ia.
66 Naeo mpadondo nasiromumo tona ri Polibu Mbaso Agama Yahudi, haitumo totua-totua ntoYahudi, balengga-balengga *ntopanggeni pesomba, bo *guru-guru agama. Pade nikenira i Yesus hau ri ngayo ntoPolibu haitu.
67 Niulikara i Yesus, "Ane iko mpuu-mpuu Magau Topepakasalama, ulimo ka kami!" Nesana i Yesus, "Nau damo Kupesanaka, ledo raparasayamiu tesaKu,
68 bo ane Kupekutana komiu, tantu ledo rapesanakamiu.
69 Aga hitu Kuuli ka komiu: nompamula sii-sii Yaku, Ana nu Manusia monturo ri sabingga nggana nu Alatala anu Neliu KakuasaNa."
70 Pade nekutana vai ira pura-pura, "Jadi, Ikomo hii tano Ana nu Alatala?" Nesana i Yesus, "Nakana niulimiu, Yakumo hii Ana nu Alatala."
71 Pade nosiulikamo ira, "Domo paraluu raelota sabi ntanina, apa niepeta salaNa lako ri tesaNa mboto!"
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA