Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Perayaan Ruti Ndẽq Beragi saq tesebut Paskah sampun rapet.

² Imam-imam kepale dait ahli-ahli Taurat kenyeke boyaq langan jari nyematẽq Deside Isa secare tedoq-tedoq, sẽngaq ie pade takut lẽq dengan luwẽq.

³ Beterus Belis tamein Yudas saq tesebut ẽndah Iskariot, salaq sopoq lẽman kedue olas pengiring Deside Isa.

⁴ Beterus Yudas lumbar dait berunding kance imam-imam kepale dait kepale-kepale pengawal Gedẽng Allah mengenai berembẽ entane adẽqne bau nyerahang Deside Isa tipaq ie pade.

⁵ Ie pade seneng gati dait bejanji gen ngebẽng kẽpẽng tipaq Yudas.

⁶ Yudas ẽndah setuju, dait mulai boyaq kesempatan jari nyerahang Deside Isa tipaq ie pade ndẽq tetaoq siq dengan luwẽq.

⁷ Jelo Perayaan Ruti Ndẽq Beragi sampun dateng. Nike jelone dombe jari keloran Paskah tesembelẽh.

⁸ Make Deside Isa ngemanikang Petrus dait Yahya, "Lumbar sedieang ite keloran Paskah."

⁹ Ie pade metakẽn, "Lẽq mbẽ taoq saq Pelungguh kayunang adẽq tiang pade siepang?"

¹⁰ Jawab Deside Isa, "Lẽq waktu side pade tame ojok kote, side pade gen bedait kance sopoq dengan mame saq kenyeke jauq cẽrẽt berisi aiq. Turut ie ojok balẽ saq ie tamein,

¹¹ dait badaq ẽpẽn balẽ nike: Guru bemanik, 'Lẽq mbẽ taoq Tiang kance pengiring-pengiring Tiang ngelorang keloran Paskah?'

¹² Dengan nike gen petitoq side sopoq kamar belẽq saq araq lẽq atas lengkap kance perabotanne. Sidieang selapuqne lẽq derike."

¹³ Make Petrus dait Yahya lumbar, terus daitne selapuqne tepat maraq saq sampun temanikang siq Deside Isa. Ie pade sedieang keloran Paskah nike.

¹⁴ Sewaktu sampun wayene ngelorang keloran Paskah nike, Deside Isa melinggih teiring pengiring-pengiring-Ne lẽq taoq perjamuan.

¹⁵ Terus Ie bemanik lẽq ie pade, "Tiang melẽt gati ngelor keloran Paskah niki bareng kance side pade, sendẽqman Tiang menderite!

¹⁶ Tiang badaq side: Tiang ndẽq gen ngelorang niki malik jangke arti perjamuan niki tenyatayang dalem Kerajaan Allah."

¹⁷ Sesampun nike, Deside Isa ngangkat cawan saq berisi anggur nike, terus ngucapang do'e syukur tipaq Allah, beterus bemanik, "Silaq bait niki, dait bagi-bagiang;

¹⁸ Tiang badaq side: Mulai mangkin niki Tiang ndẽq gen nginem anggur niki malik jangke Kerajaan Allah rauh."

¹⁹ Sesampun nike, Deside Isa bait ruti. Dait sesampun ngucapang do'e syukur, Ie peleng-peleng ruti nike kadu gading-Ne, terus ngicanin tipaq ie pade, dait bemanik, "Niki ragen Tiang saq teserahang umaq side pade. Laksaneang niki jari nginget Tiang."

²⁰ Maraq nike ẽndah sesampun medaran, Ie ngicanin cawan saq berisi anggur tipaq ie pade dait bemanik, "Cawan niki perjanjian baru siq daraq Tiang, daraq saq tetumpahang tipaq side pade."

²¹ "Laguq serioq! Dengan saq behianat lẽq Tiang araq lẽq deriki bareng Tiang!

²² Bije Manusie mule gen ninggal maraq saq sampun tetentuang Allah; laguq celake dengan saq behianat lẽq Ie!"

²³ Make ie pade mulai saling ketuan sopoq kance saq lain, sai lẽq antare ie pade saq gen ngelaksaneang hal nike.

²⁴ Lẽq antare pengiring-pengiring Deside Isa araq pegejuhan mengenai sai saq harus teanggep paling belẽq lẽq antare ie pade.

²⁵ Deside Isa bemanik lẽq ie pade, "Raje-raje bangse-bangse saq ndẽq kenal kance Allah perlakuang rakyatne semẽlẽ-mẽlẽ dait penguase-penguasene tesebut 'Pelindung Rakyat'.

²⁶ Laguq side pade ndẽq kanggo maraq nike. Sebalikne, dengan saq paling belẽq lẽq antare side harus jari maraq saq paling kodẽq, dait pemimpin-pemimpin harus jari maraq pelayan.

²⁷ Sai saq belẽqan: Dengan saq tokol bekelor lẽq mẽje, atao dengan saq ngelayanin ie? Pasti dengan saq tokol nike. Laguq Tiang araq lẽq antare side pade jari pelayan.

²⁸ Side pade tetep bareng-bareng kance Tiang lẽq dalem selapuq cobe saq Tiang alamin.

²⁹ Tiang nentuang hak-hak Kerajaan tipaq side, pade maraq Bapa Tiang nentuang hak-hak Kerajaan tipaq Tiang,

³⁰ adẽq ẽraq side bekelor dait nginem semẽje kance Tiang lẽq dalem Kerajaan Tiang dait side gen tokol lẽq atas tahte jari hakimin kedue olas suku Israel."

³¹ "Simon, Simon, dengahang! Belis sampun tebẽng ijin jari nguji side pade; maraq gandum tekelin lẽman lẽndongne sehingge saq solah tekelin lẽman saq lengẽ.

³² Laguq Tiang sampun do'eang side, Simon, adẽq imande ndẽq luntur. Dait lamun side sampun tulak tipaq Tiang, side harus teguqang iman semeton-semetonde."

³³ Jawab Petrus, "Junjungan Saq Mulie, tiang rẽde tame bui dait matẽ bareng-bareng kance Pelungguh!"

³⁴ Laguq Deside Isa bemanik, "Tiang badaq side, Petrus, sendẽqman manuk ngungkung jelo niki, side telu kali nilas Tiang."

³⁵ Sesampun nike Deside Isa bemanik tipaq ie pade, "Laẽq sewaktu Tiang ngutus side pade dait ndẽq ngijinang side pade jauq dompẽt, kantong atao sepatu, napi side pade kekurangan?" "Nẽnten!" jawab ie pade.

³⁶ Terus Deside Isa bemanik lẽq ie pade, "Laguq mangkin, sai bedowẽ dompẽt atao kantong, harus tejauq; dait sai ndẽq bedowẽ klẽwang, harus jual jubahne jari beli klẽwang.

³⁷ Tiang badaq side, bahwe ayat Kitab Suci saq tetulis maraq niki, 'Ie tame itungan lẽq antare dengan-dengan jahat,' harus telaksane lẽq diriq Tiang. Sẽngaq napi saq tetulis lẽq dalem Kitab Suci mengenai Tiang kenyeke telaksane mangkin niki."

³⁸ Pengiring-pengiring Deside Isa matur, "Junjungan Saq Mulie silaq cingakin, lẽq deriki araq due klẽwang." "Nike sampun cukup!" jawab Deside Isa.

³⁹ Deside Isa bilin kote dait maraq biasene lumbar ojok Bukit Zaitun, dait pengiring-pengiring-Ne lumbar ẽndah ngiring Ie.

⁴⁰ Sewaktu rauh lẽq derike, Ie bemanik lẽq ie pade, "Pade bedo'e adẽq side pade ndẽq ngalamin cobe."

⁴¹ Beterus Deside Isa lumbar jaoqan sekediq lẽman ie pade, kire-kire sejaoq pelẽwasan batu, terus sujut dait bedo'e,

⁴² "Bapa, lamun bau, jaoqang lẽman Tiang cawan penderitean saq harus Tiang alamin niki. Laguq sampunang menurut kemẽlẽq Tiang, laguq menurut pekayunan Deside mẽsaq."

⁴³ [Sopoq malaẽkat rauh tipaq Deside Isa jari ngicanin Ie kekuatan.

⁴⁴ Deside Isa menderite gati secare batin sehingge Ie sayan pacu-pacu bedo'e. Daur-Ne maraq ruen daraq ngitik ojok tanaq.]

⁴⁵ Sesampun tutuq bedo'e, Deside Isa tulak malik ojok pengiring-pengiring-Ne. Dait-Ne pengiring-pengiring-Ne kenyeke tindoq sẽngaq sedih gati.

⁴⁶ Terus Ie bemanik lẽq ie pade, "Kembẽq side pade tindoq? Pade ures dait bedo'e adẽq side pade ndẽq ngalamin cobe."

⁴⁷ Lẽq waktu Deside Isa masih bebaos, dateng serombongan dengan. Ie pade tepimpin siq Yudas, salaq sopoq pengiring Deside Isa. Beterus Yudas ngerapetin Deside Isa jari siduk Ie.

⁴⁸ Laguq Deside Isa bemanik lẽq ie, "Yudas, napi siq sidukan nike side mẽlẽ behianat lẽq Bije Manusie?"

⁴⁹ Sewaktu pengiring-pengiring Deside Isa saq araq lẽq derike serioq napi saq gen telaksane, ie pade matur, "Junjungan Saq Mulie, tiang pade serang doang ie pade kadu klẽwang!"

⁵⁰ Terus salaq sopoq dengan lẽman ie pade ngerantek pelayan Imam Agung kadu klẽwang jangke pegat kentokne saq kanan.

⁵¹ Laguq Deside Isa bemanik, "Engkahang!" Terus Ie jamah kentok dengan nike dait nyelahang ie.

⁵² Beterus Deside Isa bemanik lẽq imam-imam kepale dait kepale-kepale pengawal Gedẽng Allah, serte pemimpin-pemimpin Yahudi saq dateng ojok derike jari bau Ie, "Napi Tiang niki perampok, jangke side pade dateng jauq klẽwang dait gegitik jari bau Tiang?

⁵³ Sebilang jelo Tiang araq bareng side pade lẽq Gedẽng Allah, side pade ndẽq bau Tiang. Laguq niki waktune side pade ngelaksaneang, lẽq waktu penguase saq nguasein peteng negel kekuasean."

⁵⁴ Ie pade bau Deside Isa dait jauqne ojok gedẽng Imam Agung. Petrus turut mudi lẽman jaoq.

⁵⁵ Lẽq tengaq-tengaq lelẽah gedẽng nike, dengan sampun penyalaq api dait ie pade tokol keliningin api nike. Petrus ẽndah tokol lẽq antare ie pade.

⁵⁶ Salaq sopoq pelayan nine serioq Petrus tokol lẽq dẽkẽt api nike; ie perhatiang Petrus, beterus bebase, "Onẽq dengan niki ẽndah araq bareng-bareng Deside Isa!"

⁵⁷ Laguq Petrus nilas. Ie bebase, "Tiang tetu-tetu ndẽq kenal dengan nike!"

⁵⁸ Ndẽq ngonẽq sesampun nike, araq dengan lain serioq Petrus dait bebase, "Side ẽndah salaq sopoq lẽman ie pade!" Laguq Petrus bejawab, "Ndẽq, ndẽqne tiang!"

⁵⁹ Kire-kire sejam sesampun nike, araq dengan lain malik saq teges entane ngeraos, "Mule dengan niki pengiring Deside Isa, sẽngaq ie ẽndah dengan Galilea!"

⁶⁰ Laguq Petrus bejawab, "Tiang ndẽq nenaoq, napi maksut side!" Waktu nike ẽndah, sewaktu Petrus masih ngeraos, manuk ngungkung.

⁶¹ Deside Isa ngẽngat andang Petrus. Beterus Petrus inget Junjungan Saq Mulie sampun bemanik lẽq ie, "Sendẽqman manuk ngungkung jelo niki, side telu kali nilas Tiang."

⁶² Terus Petrus sugul lẽman derike dait nangis ẽroq asẽq.

⁶³ Dengan-dengan saq kenyeke jagaq Deside Isa, pade ngoloq dait ngempuk Ie.

⁶⁴ Ie pade tungkem penjarupan-Ne dait beketuan lẽq Ie, "Cobaq badẽq sai saq ngempuk Side?"

⁶⁵ Luwẽq ẽndah raos ie pade jari menghine Deside Isa.

⁶⁶ Kelẽmaqne, pemimpin-pemimpin Yahudi, imam-imam kepale, dait ahli-ahli Taurat bekumpul, terus Deside Isa tejauq ojok arepan Mahkamah Agame ie pade.

⁶⁷ Ie pade bebase lẽq Deside Isa, "Badaq tiang pade, napi Side niki Almasih?" Jawab Deside Isa, "Lamun Tiang badaq side, side pade tetep ndẽq gen percaye.

⁶⁸ Dait lamun Tiang beketuan lẽq side, side pade tetep ndẽq gen bejawab.

⁶⁹ Laguq mulai mangkin, Bije Manusie gen melinggih lẽq sedi kanan Allah Saq Mahekuase."

⁷⁰ Ie pade selapuq bebase, "Lamun maraq nike, Side niki Bije saq asalne lẽman Allah?" Jawab Deside Isa, "Maraq nike basen side pade."

⁷¹ Make ie pade bebase, "Ndẽq perlu malik saksi! Ite sampun dengah lẽman cangkem-Ne mẽsaq!"

Lukas

Video Lukas 22

Ikuti Kami:

KONTAK | PARTISIPASI | DONASI