Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Idi Irau Ruti luk Na Lamud luk titen Irau Paska pangeh muneng.
2 Imam-imam rayeh idi guru-guru Ukum nenakap dalan ngaté Yésus; ngaceku ideh matot inan pupu ineh.
3 Idi Sétan nesemuet bang burur Yudas luk titen Iskariot, ieh ineh selemulun luk iniap dengan pulu' dueh burur anak sekola' ineh.
4 Idi Yudas iné' matun imam-imam rayeh idi lun rayeh lun pebunu' idi nengitun kudeng apeh ieh miak maré Yésus kuandeh.
5 Idi ideh mawang niat idi nepejani' maré usin neneh.
6 Yudas pana' nengamo, idi nenakap kareb luk do' inanneh maré Yésus kuandeh kareb na lemulun.
7 Idi nacing karebneh Irau Ruti luk Na Lamud. Idi na miak na anak dumba Paska ineh kereten.
8 Idi Yésus nengecuk Pétrus idi Yahya, kebalaNeh, "Amé' medueh nganau' temina' Irau Paska kuan tau, pad tau miak kuman."
9 Idi kebala didueh Neneh, "Su apehké pianMu kai nganau' temina' Irau Paska ineh?"
10 Idi kebala Yésus nedidueh, "Kareb medueh semuet bang bawang, inan aceh deléi luk nguit aceh sidangur abpa' miak papu' nemedueh; do' maya' neneh umak ruma' luk inanneh umak.
11 Idi mala kuan tuan ruma' ineh, 'Keburi' Guru namu, Su apehké takep luk inanKu miak kuman Irau Paska dengan anak-anak sekola'Ku?
12 Idi ieh miak mada' kuan medueh aceh takep luk rayeh déi' dita', luk tinina' do'-do', idi déi' do' medueh nganau' temina'!"
13 Idi didueh iné' idi nenier mepad kudeng luk bila Yésus nedidueh, idi didueh nenganau' temina' Irau Paska ineh.
14 Idi macing karebneh, idi Yésus pana' netudo dengan rasul-rasulNeh.
15 Idi Ieh nepebala nedeh, "Ui pelaba pian kuman Irau Paska ini pad-pad dengan muyuh, kareb nateh Ui ngalap dereh!
16 Ngaceku Ui pebala nemuyuh, Ui na miak kuman neneh pad macing Irau Paska ineh uen ngeriput bang Imet Allah."
17 Idi Ieh nengalap aceh sangkir, idi kareb Ieh pangeh nemaré ubur, Ieh nepebala, "Lapen muyuh ini, idi nganid arang muyuh sebuleng.
18 Ngaceku Ui pebala nemuyuh, rat kareb ini, Ui na miak ngirup abpa' anggur ini pad Imet Allah macing."
19 Idi Yésus nengalap ruti, idi nemaré ubur, idi nemuri' neneh, idi nemaré neneh kuandeh, keburi'Neh, "Ini bururKu luk biré ngaceku muyuh; nganau' kudeng ini mangun ku sebuleng terawé rat Negku."
20 Idi kudeng ineh teh, pangeh ideh nekuman, Ieh nemaré sangkir ineh nedeh, keburi'Neh, "Sangkir ini, ieh ineh pejani' Allah luk mebaruh bang dara'Ku, luk pangeh inutang ngaceku muyuh.
21 "Iamo' siruh! Lemulun luk masui Negku idi pamung denganKu luun téng ini!
22 Ngaceku Anak-Lemulun amé' rungen, mepad kudeng luk pangeh litep kuanNeh; iamo' mesusa' kuan lemulun luk masui Neneh."
23 Idi ideh nengimun ngitun seburur dengan seburur, idéké rat arangdeh luk sikal nganau' kudeng ineh.
24 Idi mangun aceh kedaluh arangdeh, idéké rat arangdeh luk meluun rayeh.
25 Idi kebala Yésus nedeh, "Raca'-raca' lun pupu baken ngimet nedeh; idi lemulun luk ngimet lalud pa luundeh titen lun ngedengan.
26 Iamo' aleg muyuh ini kudeng ineh. Luk meluun rayeh arang muyuh, do' ieh mangun kudeng luk meluun mangud, idi luk ngimet, do' ieh mangun kudeng lemulun luk ngasa'.
27 Ngaceku idéké luk meluun rayeh, lemulun luk tudo kumanké, kian luk ngasa' lek? Kali' rungen lemulun luk tudo kuman ineh. Iamo' tudo arang muyuh kudeng lemulun luk ngasa'.
28 "Iamo' muyuh luk megéi' idi denganKu bang amung-amung tutunKu,
29 idi mepad kudeng TamanKu pangeh nemaré Negku lalud ngimet, kudeng ineh teh Ui maré nemuyuh lalud ngimet.
30 Muyuh miak kuman idi ngirup luun sebuleng téng denganKu bang ImetKu, idi muyuh miak tudo luun kerusi idi ngukum pulu' dueh babpat pupu Israil.
31 "O Simun, Simun! Siruh! Sétan pangeh nemutuh nutun nemuyuh, pad ieh tunap nemuyuh mepad kudeng padé.
32 Iamo' Ui pangeh nesembayang kuanmu, pad anumu na metutu'; idi kareb iko pangeh nuren, do' iko ngepicet kinanak-kinanakmu."
33 Idi kebala Pétrus Neneh, "O Tuhan, ui temina' tetupin idi maté denganMu!"
34 Iamo' kebala Yésus, "O Pétrus, Ui pebala namu, kareb nateh lal ngekook aco sini iko miak ngalum Negku teluh kua', idi mala iko na miti Negku."
35 Idi keburi' Yésus kuan anak-anak sekola' ineh, "Kareb Ui ngecuk nemuyuh remuat dengan na nguit kapil, tabpung, idi kasut, inanké muyuh masi'?" Idi keburi'deh, "Na."
36 Idi kebalaNeh nedeh, "Iamo' nekini lemulun luk inan kapil do' ieh nguit neneh, idi luk inan tabpung kudeng ineh teh; iamo' lemulun luk na luk idi anun-anun, do' ieh masui kuyu'neh idi melih pelapet.
37 Ngaceku Ui pebala nemuyuh, anun-anun luk inayud ratnan bururKu na miak na uen ngacing teh, ieh ineh, 'Idi Ieh pangeh iniap pad-pad dengan lemulun luk ngelaba ukum,' ngaceku amung-amung luk petulu denganKu inan kekipedneh."
38 Idi keburi'deh, "O Tuhan, siruh, tungé' inan dueh pelapet!" Idi kebala Yésus nedeh, "Petap gayam ini peh!"
39 Yésus nenalan rat Yerusalim, idi iné' déi' Pegkung Saitun maya' kudeng luk pekalai; idi anak-anak sekola'Neh nemaya' Neneh.
40 Kareb Ieh nacing su luk inan ineh, Ieh nepebala nedeh, "Do' muyuh sembayang pad muyuh na tetunin!"
41 Ieh nepatad rat nedeh, idi iné' mado sesuut. Idi Ieh netekeradung sembayang,
42 kesembayangNeh, "O Ama', kudeng petulu dengan pianMu, ngatad sangkir ini rat Negku, iamo' baken pianKu, iamo' pinianMu mo' miak mangun."
43 Idi nesilagan kuanNeh seburur melaikat rat surga nengetueh Neneh.
44 Dengan pelaba dereh Ieh meluun tueh sembayang, pad panaNeh mangun kudeng dara' temepek luun tana'.
45 Idi kareb Ieh netukag ratnan sembayang, idi Ieh iné' inan anak-anak sekola'Neh, idi Ieh nenier nedeh rudap ngaceku susa' niatdeh.
46 Idi kebalaNeh nedeh, "Anunké punneh muyuh rudap? Do' muyuh tumui idi sembayang, pad muyuh na tetunin."
47 Yésus uned pebala, kareb lun mula' nacing, dengan lemulun luk ngadanneh Yudas ineh, ieh ineh seburur rat arang pulu' dueh anak sekola' ineh, luk nenguyut nedeh, idi ieh iné' matun Yésus sikal muen Neneh.
48 Idi keburi' Yésus neneh, "O Yudas, iko sikal masui Anak-Lemulun dengan muenké?"
49 Kareb lemulun luk iring Yésus nenier ratnan luk sikal mangun ineh, idi keburi'deh, "O Tuhan, do'ké ai ngaté dengan pelapet ini?"
50 Idi seburur rat arangdeh nenarad demulun Imam Rayeh idi nenangal lalidneh pa tinueh.
51 Iamo' Yésus nengor baladeh, "Miak ineh peh!" Idi Ieh nengakem lalidneh ineh idi nengedo' neneh.
52 Idi kebala Yésus kuan imam-imam rayeh idi lun rayeh Ruma' Allah idi amung-amung lun rayeh luk nacing Neneh, "Petuluké muyuh macing dengan pelapet idi kayuh pad ngakem Negku, ayu-ayuneh Ui ini lun luk dat?
53 Anid-anid aco Ui idi arang muyuh bang Ruma' Allah, idi nateh muyuh pian ngakem Negku, iamo' ini karebneh muyuh ngakem kareb lalud dacem ngimet."
54 Ideh nengakem Yésus, idi nenguit Neneh amé' bang ruma' Imam Rayeh. Iamo' Pétrus nemaya' Neneh rat mado.
55 Kareb ideh pangeh nengaba apui déi' sikang idi ideh nepamung tudo, idi Pétrus nacing idi netudo arangdeh ineh.
56 Kareb seburur anak adi' decur nenier neneh muneng ku apui ineh, idi ieh nenutong neneh idi nepebala, "Lun ini teh pad-pad dengan Yésus!"
57 Iamo' Pétrus nengena, keburi'neh, "O decur, ui na miti Neneh."
58 Idi na mio ratnan ineh seburur lun baken teh nenier neneh, idi nepebala, "Iko pana' seburur lemulun rat arangdeh teh." Iamo' keburi' Pétrus, "Na ieh ui."
59 Kareb lélé sejam muci ratnan ineh seburur lun baken teh mesaad idi nepebala, "Matu lemulun ini teh luk denganNeh, ngaceku ieh ini pana' seburur lun Galilia."
60 Iamo' keburi' Pétrus, "Ui na kali' ilung anun luk bilamu." Idi kareb ineh teh uned ieh pebala, lal pana' nengekook.
61 Idi Yésus nelumi idi nenier Pétrus; idi Pétrus nengerawé ratnan bala Tuhan, mepad kudeng luk bilaNeh neneh atun, "Idi kareb nateh lal ngekook aco sini, iko miak ngalum Negku teluh kua'."
62 Idi Pétrus neremuat, idi nenangi' dengan singap-singap.
63 Idi lemulun luk nengimet Yésus nesitunga idi nemebal Neneh.
64 Pangeh ineh ideh nengakeb kiung Yésus, idi nengitun Neneh, keburi'deh, "Do' Iko mada', idéké lemulun luk nemepag Namu?"
65 Idi mula' teh bala luk baken rinuatdeh nguyo Neneh.
66 Kareb aco pangeh macang, idi lun rayeh-rayeh lun Yahudi nepamung tebubpun dengan imam-imam rayeh idi guru-guru Ukum. Ideh nenguit Yésus amé' matun tebubpun besara'deh.
67 Idi keburi'deh, "Kudeng matu Iko Keristus, do' mala kuan kai." Iamo' kebala Yésus nedeh, "Kudeng Ui mala nemuyuh, muyuh na manu Negku;
68 idi kudeng Ui ngitun nemuyuh, idi muyuh na pian ngor balaKu.
69 Iamo' rat pad kareb ini Anak-Lemulun miak tudo pa tinueh lalud Allah."
70 Idi amungdeh nepebala, "Kudeng pieh kudeng ineh, Iko ini Anak Allahké?" Idi keburi'Neh kuandeh ineh, "Mepad kudeng bala muyuh sebuleng, Ui ini Ieh!"
71 Idi keburi'deh ineh, "Anunké ulekneh lun nekali' kuan tau teh, ngaceku tau pana' pangeh neninger ratnan balaNeh sebuleng?"
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA