Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Sal᷊iwang u Borotẹ̌ Tawe Kabọ e, isẹ̌sẹ̌bạ Paskah e seng masandigẹ̌.
2 Manga imang těmbonange ringangu mananěntiro agama mang kapẹ̌dẹ̌deạ e ral᷊engu mamate si Yesus dingangu marěma-rěmasẹ̌, batụu i sire mạtakụ u taumata l᷊awọ.
3 Bọu e setang simuẹ̌ e si Yudas kụ isẹ̌sẹ̌bạ lai si Iskariot, sěngkatau wọu i sire mapul᷊o dua murit'i Yesus.
4 Ual᷊ingu ene i Yudas tamai kụ němpahumbisara ringangu manga imang těmbonange ringangkewen manga těmbonangu l᷊ukad'u Wal᷊em Mawu měnsang kereapa i sie makapěnarakang i Yesus si sire.
5 I sire měngkate maral᷊uasẹ̌ kụ nẹ̌kědo měmpẹ̌gěllịu roitẹ̌ si sie.
6 I Yudas mal᷊aing kimire kụ nanětạ e nẹ̌deạ loahe pakapia mědeạu manarakang i Yesus si sire, tawe kasingkateng i sai-sai.
7 Nidatingken tempone ěllon Sal᷊iwang u Borotẹ̌ Tawe Kabọ e, tangu domba waugu kaěngu Paskah e nipotọ e.
8 Tangu i Yesus rimolohi Petrus rẹ̌duan Yohanes, "Dakọko pěmpěnạdia kaěngu Paskah waug'i kitẹ."
9 "Suapa i Tuang mapulu sadiang i kami e?" kakiwal᷊on dẹ̌dua.
10 Yesus simimbang, "Su tempon i rua kạpahunsuẹ̌ e su soa, piạ sěngkatau esẹ mạmasaěng běnsad'u akẹ sarung ipẹ̌sombang i rua. Tol᷊eiko i sie sarang bal᷊e suěkange,
11 mase pěmpẹ̌bera su taghuang'u wal᷊e e: I Tuang nẹ̌bera, 'Suapa tampạ Iạ ringangu manga muritẹ̌-Ku kumaěng kaěngu Paskah?'
12 Taghuangu wal᷊e ene sarung manul᷊ada si rua kamarẹ̌ gẹ̌guwạ su loteng nasukụ u apal᷊iwụe. Sadiako kěbị ene sene."
13 Tangu nahundal᷊engke i Petrus dẹ̌duan Yohanes kụ nakahombangke kěbị ene kere nipaul᷊ị i Yesus. I rẹ̌dua němpanạdia simokol᷊'u Paskah e.
14 Sarạeng seng oras'u mẹ̌pakẹ simokol᷊u Paskah e, i Yesus naiangke ringangkewen manga murit'E su medang perjamuang.
15 Mase i Sie něhengetang si sire, "Iạ nạung měngkai měkẹ̌karimang tạ sihinge kumaěng kaěngu Paskah e ringang i kamene kal᷊imonan Iạ e masunsara!
16 U pangimang bue: Iạ e sembeng ta kumaěng ini e l᷊ai sarạeweng mangal᷊en pẹ̌papěrjamuang ini e ipakal᷊ahẹ su Wanuan Duata Wuhu e."
17 Bọu e i Yesus rimaẹ kụ nihengkẹ e panganginumangu anggorẹ̌, bọu ene nakitarimakasẹ su Ruata, mase něhengetang, "Al᷊ạko ini kụ pẹ̌papahiạeng kamene;
18 kụ kěngkasingkạko: manětạ orasẹ̌ ini Iạ mang seng ta manginung akẹ u anggorẹ̌ ini lai sarạeweng Mawu Ruata e ruměnta kapia mẹ̌kawasa patikụ."
19 Bọu e Mawu Yesus něngal᷊ạ e borotẹ̌. Kụ bọuten nakitarimakasẹ, nikakakompenge borotẹ̌ ene ringangu l᷊iman'E mase tinẹ̌gone si sire kụ něhengetang, "Ini e kai wadang-Ku [ilẹ̌onggọ baug'i kamene. Koạko ini e tatahěndung si Siạ."
20 Kerene lai samuring kạkaěnge, i Sie nangonggọen panganginumangu anggorẹ̌ e si sire mase něhengetang, "Panganginumang ini e kai pẹ̌dariandin Mawu Ruata wuhu nisarakang su ral᷊ungu raha-Ku -- rahạ e niapaelehẹ̌ baug'i kamene]."
21 "Kaiho, kěllạe! Tau manarakangu Iạ e ene lai sini ringang-Ku!
22 Ahus'u Taumata e sarung mapohong kerẹewe nịtatantung'u Mawu Ruata; arawe kaěngkěhang taumata kụ manarakang i Sie!"
23 Ene i sire nanětạ e nẹ̌kiwal᷊o, sěngkatau su wal᷊ine, měnsang i sai wọu tal᷊oaran sire sarung mẹ̌koạ kerene.
24 Sutal᷊oaran manga murit'i Yesus nakoạ pẹ̌sasitori měnsang i saị e wọi sire hinong ikatikạ kasěllahenge.
25 Yesus něhengetang si sire, "Datung kal᷊awọu umatẹ̌ běgan Mawu Ruata manigěsạ kawanuane, ringangu měngangawasa si sire e isẹ̌sẹ̌bạ 'Měndal᷊ukad'u Kawanua'.
26 Arawe i kamene abe kerene. Kaiso i saing makoạ kasěllahenge su tal᷊oarang kamene hinong makoạ kere kakạdodokange, ringangu pangahạ e hinone makoạ kere mẹ̌tatangkiang.
27 Kụ kawe i sai limembong kasěllahenge: taumata mạiang kụkaěng su meda, arau kawe i sai mẹ̌tẹ̌tangkiang si sie? Tantu i saing kụkaiang ene. Arawe Iạ ene su tal᷊oarang kamene kere mẹ̌tatangkiang.
28 Su patikụ sigěsạ-Ku i kamene měngkate sěntiniạ dingang-Ku.
29 Kerẹewe i Amang seng něgěllịu kawasa si Siạ mẹ̌parenta, kerene lai Iạ e sarung mengonggọu kawasa ene si kamene.
30 Ual᷊ingu ene i kamene wotonge makapahul᷊uasẹ̌ dingang-Ku su tempon Iạ makoạ Datu. Kụ i kamene sarung kumaiang su wowong kadera mapul᷊o dua mědeạu kawasa makaparenta umat'u Israel mapul᷊o dua su hěntone."
31 "Simon, Simon daringihẹ̌ko! Setange seng niapakawala ipanal᷊ukạ si kamene; tabidạu gandung nihae wọu pisine hakịewen mapia e nihae wọu ral᷊akisẹ̌.
32 Arawe Iạ e seng nẹ̌kal᷊iomaneng baug'i kau, Simon, tadeạu pangangimangu e tawe měnsu. Kụ kereu i kau mẹ̌sasěsilẹ̌ bọu pẹ̌sasal᷊a ute i kau harusẹ̌ panoghasẹ̌ manga anạ u sěmbaụ u."
33 I Petrus simimbangu, "Mawu, iạ manilaing sumuẹ̌ su tahungkụ, saral᷊aing mate asal᷊ẹ̌ dingang'U Mawu!"
34 "Pangimangke, Petrus," angkuěng i Yesus, "těntal᷊ang manụ deng ta kimẹ̌kukụ sahěllo ini, u i kau e seng těllun sul᷊e nẹ̌děndilu Iạ e."
35 Bọu ene i Yesus něhengetang si sire, "Kangerẹ piạ Iạ dimoloh'i kamene ringangu tawe mapakawalang kamene měmpẹ̌bawa dompetẹ̌, kawihẹ̌ arau sapatu, i kamene nikakawusangu manga apa?" "Tala!" angkuěng i sire.
36 "Arawe ini," angkuěng i Yesus, "i sai piạ dompete arau kawihe harusẹ̌ pěmpẹ̌bawa; ringangu i sain tawẹ pedane harusẹ̌ pẹ̌bal᷊ụ u lakụe kụ pěmělli peda.
37 U, pangimangke ayet'u Winohẹ Susi e bawal᷊one kere ini, 'I Sie kai nirekeng kere sěngkatau ral᷊akị,' hinong mariadi su watangeng-Ku. U apan mạbawohẹ su ral᷊ungu Winohẹ Susi e mětẹ̌tatahinong Iạ e selaing mạdiadi orasẹ̌ ini."
38 "Mawu," angkuěngu manga murit'i Yesus, "kakělla, ěndaung sini piạ peda rarua." "Kuhạe!" angkuěng i Yesus.
39 Mawu Yesus naněntangken soa e, kụ dimal᷊eng sarang Bukid'u Zaitun kerẹewe tundune kụ manga murit'E nahuntol᷊e lai si Sie.
40 Sarạeng nahumpạ sene, i Sie něhengetang si sire, "Pěmpẹ̌kal᷊iomaneng mědeạu i kamene tawe mědosa kerẹewe i kamene kasal᷊ukateng."
41 Mase i Sie nẹ̌těngkaghea kadodọ bọ'i sire, mangawe pamahungangben batu karaune, bọu ene němul᷊angeng dingangu nẹ̌kal᷊iomaneng,
42 "Amang," angkuěng'E, "kereu wotonge apakarauko wọu kasasigěsạ kụ humombang si Siạ ini. Kai wal᷊inewe tuhụ kapulu-Ku, kaiso tuhụbe su kapulung Amang sẹ̌sane."
43 [Malạekatẹ̌ sěngkatau riměnta si Sie kụ nanoghasẹ̌.
44 I Yesus měngkatewe mạsusa naunge hakịu i Sie měngkate makuatẹ̌ mẹ̌kal᷊iomaneng. Liaghan'E měngkate kere raha tụtědọ su ěntana.]
45 Bọuten nẹ̌kal᷊iomaneng, i Yesus tangu nẹ̌sul᷊e kapia su anum manga murit'E. I Sie nakaěbạ e si sire kạpahuntikị e kahian susa naung.
46 Kutẹu i Sie něhengetang si sire, "Kawe unụe i kamene měmpẹ̌tẹ̌tikị? Pěmpẹ̌bangungke kụ pěmpẹ̌kal᷊iomaneng, mạdiring i kamene kahinoěngu sasal᷊ukạ."
47 Mawu Yesus těntal᷊ang deng kạpẹ̌lẹ̌hengetange riměntạ e taumata sěnggapaeng. I sire lẹ̌ahakeng i Yudas, sěngkatau wọu manga murit'i Yesus. Bọu ene i Yudas nakoạ sarang anung Yesus mase riměngu si Sie.
48 Kutẹu i Yesus něhengetang si sie, "Yudas ual᷊ingu rarěngunu e i kau manarakangu Ahus'u Taumata?"
49 Sarạeng manga murit'i Yesus apang ene sene nakasilọe apa sarung mariadi, i sire němpẹ̌bera, "Mawu, pilikangkeng kami ringangu peda!"
50 Mase sěngkatau wo'i sire namilị e ěllangu manga imang mawantugẹ̌ dingangu pẹda hakịu nasahing tul᷊ine koaneng.
51 Kutẹu i Yesus něhengetang, "Balạete!" Mase i Sie nanenggehẹ̌ tul᷊in tau e kụ niapakapiane.
52 Bọu e i Yesus něhengetang su manga imang těmbonange dingangu manga těmbonangu l᷊ukad'u Wal᷊em Mawu, ringangkewen matatimad'u Yahudi němpẹ̌děnta sarang ene mědeạu manamẹ si Sie. "Unụe Iạ kai taumata ral᷊akisẹ̌ tangu, sarang kate i kamene ruměntang pẹda ringangu pal᷊o-pal᷊o měnamẹ si Siạ?
53 Apan kal᷊aěllo Iạ e ene ringangi kamene su Wal᷊em Mawu, i kamene tawe měnamẹ Siạ. Kai ini e seng tempone i kamene kumanoạ, su piạ kawasang kararěndunge nakoạ panekehe."
54 I sire něnamẹ si Yesus kụ niěntudẹ̌ su wal᷊en imang mawantugẹ̌. I Petrus ute nẹ̌batụ bọu maraune.
55 Su tal᷊oaran dělahẹ̌ ene putunge seng niaparěllị kụ i Petrus tamai kimaiang sěngkakaiang dingangi sire mạhungkaiang mělẹ̌likụ putung.
56 Sěngkatau wọu ěllange wawine nakasilọe si Petrus kụkaiang su wiwih'u putung kạděllịe; mase ěllang bawine ene namanda si Petrus, bọu e nẹ̌bera, "Tau ěndaị kanini e mal᷊aing dingang i Yesus!"
57 Arawe i Petrus nẹ̌děndilẹ̌. I sie nẹ̌bera, "Iạ mang bẹ̌ga-wěgan tau ěndaị ene!"
58 Ta nararěnnạ, piạko sěngkatau wal᷊ine nakasilo si Petrus kụ nẹ̌bera, "I kau mal᷊aing sěngkatau wọ'i sire!" Kai i Petrus simimbang, "Tala, bal᷊inewe iạ!"
59 Mangawe sěngkaorasẹ̌ bọu ene, sěngkatauko l᷊ai wal᷊ine mal᷊aing nẹ̌bera maihạ, "Kahěngang tau ěndaị e murit'i Yesus, batụu i sie mal᷊aing tau Galilea!"
60 Kutẹu i Petrus simimbang, "Kai a su tiněnnanu, iạ běga wue!" Orasẹ̌ ene lai, piạ i Petrus bẹ̌dang kạpẹ̌berane, ute manụ kimukụ.
61 Yesus lai nẹ̌bihu kụ timingang si Petrus. Mase i Petrus nakatahěndungke Mawu seng něhengetang si sie, "Těntal᷊ang manụ deng ta kimẹ̌kukụ sahěllo ini, i kau seng těllun sul᷊e nẹ̌sunial᷊'u Iạ."
62 Tangu simẹ̌bangke i Petrus wọu ene kụ měngkatewe apa simangị marasai.
63 Manga taumata kapẹ̌lẹ̌hapane si Yesus e měmpẹ̌tẹ̌taghunalang dingangu nělimadẹ̌ si Sie.
64 I sire němpanakạ matan'E ringangu nakiwal᷊o si Sie, "Kěnang tikạ, i sai nělimadẹ̌ si Kau e?"
65 Lawọ l᷊ai manga wawera lahinakang kụ nịbaweran sire si Sie.
66 Sěngkamal᷊ukade, manga matatimad'u tau Yahudi, manga imang těmbonange ringangu manga mananěntiro agama němpẹ̌komol᷊ẹ̌ bọu ene i Yesus niěntudẹ̌ su těngon Měnggaghuta agaman sire.
67 "Habareko i kami e," angkuěng i sire si Sie, "kai i Kau ini Ratu Mananal᷊amatẹ̌?" Yesus simimbang, "Kerẹu Iạ měhabarẹ̌ si kamene, kai i kamene mang tawe mangimang.
68 Kai maning Iạ makiwal᷊o si kamene kai i kamene tawe sumasimbang.
69 Kai manětạ bọu orasẹ̌ ini, Ahus'u Taumata sarung maiang su sěmběkang koanengu Mawu Kasěllahenge."
70 I sire kěbị němpẹ̌bera, "Kamageng kerene, i Kau ini kai Ahus'u Ruata?" Yesus simimbang, "Kere niwerang kamene."
71 Tangu i sire němpẹ̌berạ e, "Tawahal᷊uas'u mẹ̌gausẹ̌ sasahidine! I kitẹ seng nakaringihẹ̌ bọu mohong'E sẹ̌sane."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA