Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Wali yako etu i Yesu manganto’oka wo’u anaguruNya rapa apa Ia rani mampotundeka sira ne’e mosa makai-kai nempo pokai-kai etu tawa mansaka rasono.
2 Wali Ia manganto’o, “Rapanya re’e samba’a to pobotus to maroo ri kota pasi nja’u seja samba’a tau we’a to balu. Wali to pobotus etu, ia taa mampalaika i Pue Allah pasi taa manga’angga Ia, pasi ia taa seja mamporayang tau. Wali tau we’a to balu etu tare pandoonya yau ri to pobotus etu pei mamporapika resi ia, to’onya, ‘Sawang aku naka ne’e balingku manganangi aku.’
3 (18:2)
4 “Wali masae sangkodi to pobotus etu bo’onya mangansawang ia, pei tau we’a etu tare pandoonya marapi-rapi sawang resi ia, see naka ia mampobuuka, ‘Kamonsonya aku taa mampalaika i Pue Allah pasi aku taa manga’angga Ia pasi taa seja mamporayang tau, pei nempo ewa wetu to tao-tao aku mampasimbalika tau we’a si’i see ia damandoo apa ane tare pandoonya ia ma’i, gete, aku damosa kojo!’” Etu semo rapa to nato’oka i Yesu anaguruNya.
5 (18:4)
6 Wali i Yesu manganto’oka sira, “Pobuuka anu to naika nto pobotus to etu. Apa ia to pobotus to taa biasa mangika anu to masipato raika, pei nempo ia tau to maja’a, pei apa saba tau we’a masae kojo tare pandoonya marapi sawang resi ia, see naka ia re’e mangansawang tau we’a etu.
7 Wali ane to pobotus to maja’a etu pei mangansawang tau, taa manto’o i Pue Allah. Ia mansaka damangansawang tau to Ia roomo mangampilis to wuri eo makai-kai marapi sawang resi Ia. Ia taa damangampeas mampasimbalika sira.
8 Taa kojo. Aku manganto’oka komi, ane ratamo temponya, i Pue Allah mansaka damampasimbalika sira apa Ia si’a ewa to pobotus to maja’a etu to masae kojo panewa mampasimbalika tau we’a to marapi sawang resi ia. “Wali kasimbalinya yako etu, ane ratamo temponya Aku, Wiyaa nto Lino, dama’i muni ri lino si’i, tempo etu bara taa boros tau to dakurata to maroso pangayanya resi Aku.”
9 Wali re’e tau to mangei to mampobuuka lengko nsira singkonong pei i Pue Allah. See naka sira mansarumaka koro nsira pei mampobuuka tau to yusa taa bae batuanginya. Wali i Yesu manganto’oka tau to ewa wetu pampobuukanya rapa si’i, Ia manganto’o,
10 “Re’e dua mba’a tau to yau ndeku banua i mPue Allah damakai-kai. Tau dua etu samba’a to Yahudi to aliran Parisi pasi samba’a to pantagi asele to Yahudi seja.
11 Wali rata ri banua i mPue Allah, to Parisi etu makore pei makai-kai ri raya mpampobuukanya, ia manganto’o, ‘Pue Allah, aku manganto’oka Komi tarima matao apa aku si’a ewa samparia tau to yusa. Apa aku si’a tau to bamporomung pasi si’a to panipu pasi si’a seja tau to mangika palaong to maja’a resi to we’a to si’a rongongku. Pasi aku manganto’oka seja Komi tarima matao apa aku taa mantipu tau ewa naika nto pantagi asele etu.
12 Kasimbalinya yako etu, aku mangorop dua ngkani rayanya samba’a minggu, pasi aku mangawaika yau resi Komi santila sampuyu yako samparia to ratangku.’ Etu semo pokai-kai nto Parisi etu.
13 “Pei to pantagi asele makore nja’u longko, pasi ia sakowa matingoa, taa rani apa ia mangepe ia taa masipato mampotango i Pue Allah. Ia ojo mangantopo-ntopo dadanya apa masoso rayanya pei manganto’o, ‘O Pue Allah, porayang aku, apa aku madosa kojo.’ Ewa wetu pokai-kai nto pantagi asele.
14 “Wali Aku manganto’oka komi tempo sira dua mawolili muni njo’u banuanya, to pantagi asele semo to nato’o i mPue Allah tare dosanya. Si’a to Parisi. Apa tau to mampakabae angganya, tau etu darapakakodi, pei tau to mampakakodi angganya, tau etu darapakabae.”
15 Wali yako etu re’e seore ma’i tau mangkeni ngana mayunu resi i Yesu apa sira rani Ia mampotaka sira pei mampokaika sira mamporapika resi i Pue Allah see Ia mampakasanang katuwu nsira. Apa ewa wetu ada nto Yahudi. Pei tempo anaguru i Yesu mangkita tau etu mangkeni ngana mayunu, sira manganseko tau etu.
16 Pei i Yesu mampokio ngana mayunu etu pei manganto’oka anaguruNya, “Biakamo naka ma’i ngana mayunu resi Aku. Ne’e mangamparas sira apa tau to ewa ngana mayunu etu, sira semo to mawali tau to Makolenya i Pue Allah.
17 Apa Aku manganto’oka komi, ane ngana mayunu, nempo bara kesaa nato’o ntau tu’anya sira, sira mansarumaka kojo. Wali ane tau to si’a ewa wetu pansarumakanya resi i Pue Allah, tau etu taa maya mawali tau to Ia Makolenya.”
18 Wali yako etu re’e samba’a kepala nto Yahudi to mampotanaka resi i Yesu, ia manganto’o, “Pa’a Guru, Komi to matao, bara kesaa palaong to dakuika see aku damangarata katuwu to singkasaenya?”
19 Wali i Yesu manganto’o, “Maka pei korom manganto’oka Aku matao? Ojo patanya i Pue Allah to matao. Tare to yusa.
20 Pei ane mangkonong mangarata katuwu, korom mangansani porenta-porenta i mPue Allah, wali to tao-tao lulu porenta etu. Re’e to manganto’o, ‘Ne’e masala, ne’e malima, ne’e mawali matamanasa to taa monso, pasi pakabae pa’amu pei indomu.’”
21 Wali ngkai etu manganto’o, “Samparia porenta etu aku mangalengkoka yako damangurawa.”
22 Wali ojo pangandonge i Yesu gombo ngkai etu, Ia manganto’oka wo’u ia, “Jamo sanjaya to tawa nuika, etu semo, intamo pei pobalu yau samparia kasugimu pei olinya tilaka yau tau to masiasi. Ane ewa wetu nuika ngkorom, korom damangarata kasugi ndate saruga. Pasi ane roomo mangawaika yau samparia etu, mai muni pei lulu Aku.”
23 Pei ojo pangandonge ngkai etu gombo i Yesu etu ia mawo kojo rayanya apa ia bae kojo kasuginya pasi ia mamporayang kasuginya etu.
24 Wali i Yesu mangkita ngkai etu mawo kojo rayanya, see naka ia manganto’o, “Masuli kojo tau sugi mawali tau to Makolenya i Pue Allah apa kasuginya semo to isarumakanya.
25 Wali to gampa-gampa binatang to rato’oka unta masua ri raya mpoko njau sakowa tau sugi mawali tau to Makolenya i Pue Allah.”
26 Wali tau to mangandonge gombo i Yesu etu ipu rayanya apa sira mampobuuka tau naka pei mawali sugi apa i Pue Allah semo mangawaika sira rasi. Wali sira manganto’oka i Yesu, sira manganto’o, “Gete! Ane tau sugi to bae-bae rasinya pei tau to yusa pei taa maya rapalaes, ane ewa see, tare tau to maya rapalaes!”
27 Wali i Yesu mangansono, “Ane to lino taa kojo nakurang mampalaes koronya, pei ane i Pue Allah Ia samparia palaong paka nakurang mangika.”
28 Wali roo see i Petrus manganto’oka i Yesu, to’onya, “Lo’a, kami room mampiyaika samparia ngaya-ngaya mami pei mangalulu Komi!”
29 Wali i Yesu manganto’oka anaguruNya, “Aku manganto’oka komi, monso pu’u re’e tau to roomo mampiyaika yau samparia saba rani mangika palaong i mPue Allah, Makolenya. Anu to napiyaika nsira etu, etu semo banuanya, bara indo nu ananya, bara tukakanya pasi tua’inya, bara tau tu’anya bara ananya.
30 Wali samparia tau to etu ane mampiyaika samparia to etu, ri raya ngkatuwu nsira to tempo si’i sira mangarata yabi wo’u yako to sira mampiyaika etu. Pasi ri tempo to darata sira damangarata katuwu to singkasaenya.”
31 Wali yako etu i Yesu mampokio anaguruNya to sampuyu pei dua pei mangkeni sira masepi yau sangkodi yako ri jaya. Roo see Ia mampakanasaka sira mangkonong palaong to damawali resi Ia, Ia manganto’o, “Kita dayau ndeku Yerusalem, panewa nda’a ria damawali samparia palaong to natulis yami nto pantuntu tuntu i mPue Allah tempo owi mangkonong Aku, Wiyaa nto Lino.
32 Wali Aku daraposora yau resi tau to si’a to Yahudi panewa tau etu damampokore Aku pasi damangarunes Aku.
33 Pasi sira damangeru-ngerus, damangampedas pasi damampopate yau seja Aku. Pei ri rayanya togo eo Aku damambangu muni yako ri kapatengKu.” Etu semo gombo i Yesu mangkonong kapateNya.
34 Pei anaguruNya taa mangansani batuanginya gombo i Yesu etu. Taa kojo manasa resi sira mangkonong palaong to to’oNya etu apa batuanginya ewa rawuni yako resi sira.
35 Wali yako etu, ri raya mpalinja i Yesu pasi anaguruNya yau ri Yerusalem, sira mosu ri kota Yerikho. Tempo etu re’e samba’a tau buta maroo-roo matunda ri wii njaya. Ngkai etu mampea mamporapi doi resi tau to liu apa ia buta.
36 Wali tempo ia maroo-roo ri wii njaya etu i Yesu pasi anaguruNya pasi tau boros sira malinja liu re ria. Wali ojo pandonge ntau buta loo ntau boros etu ia mampotanaka resi tau bara kesaa to mawali etu.
37 Wali tau etu manganto’oka ia, “I Yesu to Nasaret re’e liu ri jaya si’i.”
38 Wali see naka ngkai etu mampokio, ia manganto’o, “O Yesu, Wiyaa i Makole Daud, porayang aku!”
39 Pei tau to malinja ri tango i Yesu, sira manganseko ngkai etu, sira manganto’o, “Ne’e kanano!” Pei ia ojo maroso wo’u loonya kaboo-boo, ia manganato’o, “Wiyaa i Makole Daud, porayang aku!”
40 Wali i Yesu mangandonge panewa Ia mandoo pei manganto’oka tau, “Keni mai ia.” Wali tau etu mangkeni tau buta panewa ojo karatanya ri awe i Yesu, i Yesu mampotanaka resi tau buta etu,
41 Ia manganto’o, “Kesaa to nuporani daKuika resi korom?” Wali ngkai buta etu mangansono, “Pue, aku rani matao muni matangku.”
42 Wali i Yesu manganto’oka ia, “Nukita muni rao! Apa korom mangaya Aku, see naka korom matao muni matamu.”
43 Wali tau etu mansaka mangkita muni rao, panewa ia mangalulu seja i Yesu ri raya mpalinjaNya etu. Pasi ri rayanya ia malinja ia mangabaro-barong i Pue Allah. Wali ojo pangkita ntau boros palaong to mawali etu, sira paka mangabarong seja i Pue Allah.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA