Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Roo indo, Yesu mopahawe hampaka ngkora pandiri i topeguruNa bona mekakae liliuhe hai inee malede lalunda.

² Nauli: "I lalu hambua boea, ara hadua topobotusi au bara mengkoru i Pue Ala hai bara wori mobila ba hema pea.

³ I boea iti, ara wori hadua towawine au bemba. Bosa belana laomi molindo topobotusi iti moanti kara-karana, nauli: 'Tulungi wongkoya mampombelindoa iwalingku.'

⁴ I lalu bahangkia kamahaena, topobotusi iti bara mau modurei. Agayana kahopoana, nauli laluna: 'Kehapirina bara mengkoru i Pue Ala hai bara mobila ba hema pea,

⁵ agayana anti kahawena liliu tobemba iti maina mosalempori, agina kubotusi peami kara-karana. Lawi ane bara kutulungi, ia ina mai liliu iriko.'"

⁶ Roo indo, nauli Pue Yesu: "Nipehadingi apa au nauli topobotusi iti. Nauri bara manoto laluna, agayana naunde motulungi tobemba au merapi liliu iria.

⁷ Mewali, apa mani Pue Ala au Naunde mohanai pamperapinda taunaNa au meraroa Iria maroa kaindi ba mabaa. Ba nipehangu, hangangaa mahae-hae tapegia, hangko Natulungirike Pue Ala?

⁸ Bara! Batena holiga kaNatulunginta. Agayana ane hawe huleNa, Iko Ana Manusia, ba Kulambi mani tauna au mepoinalai i lalu dunia ide?"

⁹ Napahawe mbulimi Yesu ngkora pandiri ide i tauna au mampetomanoto hai au mopapakoihe ranganda.

¹⁰ Nauli Yesu: "Ara rodua tauna au lao i Souna Pue Ala bona mekakae, hadua to Parisi, hai hadua, toperuru asele.

¹¹ To Parisi iti meangkami hai mekakae i laluna, nauli: 'Pue Ala, kuuli ngkaya kamaroana Irio, lawi barana nodo tauna ntanina au manangka, au motengko lalunda, hai au mebualosi. Kuuli ngkaya kamaroana Irio lawi barana nodo olou toperuru asele.

¹² Mopuasana rombela i lalu haminggu. Hai hangko i ope-ope wuana bagongku, kuweiKo hangkira hampulo.'

¹³ Agayana toperuru asele iti, meangka ngkarao pea, hai bara bai mengoa i langi. Anti kanaisana dosana, ia mohapa-hapa pondana, nauli: 'Pue Ala! Nupokaahi wongkoya, lawi iko ide tauna au madosa!'"

¹⁴ Hangko indo, napahopo Yesu lolitaNa, Nauli: "Tou mpuu au Kuuliangaakau: i pesulenda i sounda, toperuru asele iti nadokomi Pue Ala hai Naimba manoto i peitaNa, agayana to Parisi iti, bara nadoko Pue Ala. Lawi hema au mampemahile, ina napaiwoi Pue Ala. Hai hema au mengkaiwoi, ina napakahile Pue Ala."

¹⁵ Hambela tempo, arahe tauna au moanti ananda i Yesu bona Napetobohe hai Nawatihe. Karaitana topeguruNa apa au rababehi tauna iti, rakarumpuirihe.

¹⁶ Agayana Yesu mokakiomohe anangkoi iti, hai Nauliangaahe topeguruNa: "Pogiangaahe anangkoi mai Iriko. Ineehe nikonto, lawi tauna au nodohe anangkoi ide ina mewali taunana Pue Ala i lalu poparentaNa.

¹⁷ Tou lolitaNgku ide: ane barakau mengkoru i Pue Ala nodo hadua anangkoi, barakau ina mewali taunaNa i lalu poparentaNa."

¹⁸ Hambela tempo, ara hadua tuana au mekune i Yesu, nauli: "Guru au maroa, apa au hangangaa kubabehi bona molambina katuwo maroa au bara mokahopoa?"

¹⁹ Nauli Yesu i tauna iti: "Moapari hai nuuli Iko ide tauna au maroa? Bara ara hadua tauna au maroa, batena pea Pue Ala.

²⁰ Nuisami hawa au teuki i lalu Aturana Musa: inee mebualosi, inee mepapate, inee manangka, inee mosabiki dongko, hai nubila inamu hai umamu."

²¹ Nauli tauna iti: "Ope-ope hawa iti, aminami kupeulai hangko i kaanangkoiku mani."

²² Kanahadina Yesu lolitana, Naulimi: "Ara mani hampaka au hangangaa nubabehi. Laomoko hampai mampobalu ope-ope anu-anumu, hai holona nuweihe tauna au meahi-ahi tuwonda. Ane nodo nubabehi, ina mahile hurungina au nuhumba i lalu suruga. Roo indo, maimoko meula Iriko."

²³ Kanahadina lolitana Yesu, masusami laluna, lawi ngkaya anu-anuna.

²⁴ Naisami Yesu kamasusana laluna, ido hai Nauli: "Mapari mpuu tauna au pebuku mewali taunana Pue Ala i lalu poparentaNa.

²⁵ Mamura mani hambaa onta mesua i kalolu gigiu pane topebuku mewali taunana Pue Ala i lalu poparentaNa."

²⁶ Tingkaramohe tauna au mohadi lolitana Yesu iti, rauli: "Oo, ane nodori, hema pae au nabuku molambi katuwo maroa au bara mokahopoa?"

²⁷ Nahanai Yesu: "Ane manusia, bara nabuku. Agayana ane i Pue Ala, ope-ope peisa mewali, lawi bara ara au bara Nabuku."

²⁸ Hangko indo, nauli Peturu: "Noumbami ikami? Kipalehimi hinangkana bona kiulaKo."

²⁹ Ido hai nauli Yesu i topeguruNa: "Bona niisa: hema au mopalehi souna, ba towawinena ba halaluna ba tosaena ba anana anti pengkoruna i Pue Ala,

³⁰ batena ina molambi bosa belana hurungina hangko i ope-ope au napalehi i dunia ide, hai molambi wori katuwo maroa au bara mokahopoa i alo au ina mai."

³¹ Hambela tempo, Yesu mokakiomohe topeguruNa au hampulo hai rodua mogulu mopatani, hai Nauliangaahe: "Nipehadingi maroa! Ide-ide laomoke monontohi Yerusale. I kota iti, ina tepabukei ope-ope au rauki nabi-nabi kana Iriko.

³² Ina rahuhuNa i tauna au barahe to Yahudi. Ina rakakabosaiNa, rapakoiNa, ratinuduhiNa,

³³ rawombeNa, hai rapapateNa. Agayana i kataluna alona, ina tuwo huleNa."

³⁴ Agayana topeguruNa barahe moisa tunggaiana Yesu, lawi lempona lolitaNa tewuniangi mani irihira.

³⁵ Hungkumi Yesu i boea Yeriko, ara hadua tobilo au mohuda i wiwi rara merapi-rapi.

³⁶ Pohadina tauna bosa moliu, mekunemi, nauli: "Moapari?"

³⁷ Rahanai tauna bosa: "Yesu to Nasare, Iami au moliu!"

³⁸ Kanahadina tobilo iti lolitanda, meraroami, nauli: "Yesu, pemuleana Datu Daudi! Nupokaahi wongkoya!"

³⁹ Tauna au moiyoruhe mampokarumpu, rauliangaa "Mandiiko!" Agayana tobilo iti, monganga-nganga pea masisimbuku, nauli: "Pemuleana Datu Daudi! Nupokaahi wongkoya!"

⁴⁰ Mengkaroomi Yesu hai Natudu tauna, Nauli: "Anti mai tobilo iti!" Raanti mpuumi i Yesu, hai Yesu mekune iria, Nauli:

⁴¹ "Apa au nuunde Kubabehiako?" Nahanai tobilo iti: "Pue, kuunde wongkoya bona meitana!"

⁴² Nauli Yesu: "Meitamoko. Anti pepoinalaimu Iriko, Kupakaohamoko."

⁴³ Unga pea meita. Hangko indo, liliu meula i Yesu hai motoya Pue Ala. Hai ope-ope tauna au moita apa au mewali, motoya worimohe Pue Ala.

Lukas

Video Lukas 18

Ikuti Kami:

KONTAK | PARTISIPASI | DONASI