Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Sesampun nike Deside Isa nyeriteang sopoq perumpamean jari ngajah pengiring-pengiring-Ne adẽq ie pade tetep bedo'e dait ndaq nyerah.

² Deside Isa bemanik, "Lẽq sopoq kote araq sopoq hakim saq ndẽq takut tipaq Allah, dait ndẽq peduli lẽq sai-sai.

³ Lẽq kote nike araq ẽndah sopoq bebalu saq rimpes gati ojok hakim nike tunas adẽq pelekarene tebẽle, 'Silaq bẽle pelekara tiang ngelawan dengan saq nuduh tiang,' basen bebalu nike.

⁴ Bẽgaq ngonẽqne hakim nike ndẽq mẽlẽ tulung bebalu nike. Laguq ahirne hakim nike mikir, 'Timaq tiang ndẽq takut lẽq Allah dait ndẽq peduli lẽq sai-sai,

⁵ laguq lantaran bebalu niki terus doang ganggu tiang, bagusan tiang bẽle pelekarene. Lamun ndẽq, ie gen terus-terusan dateng dait nyusahang tiang.'"

⁶ Beterus Junjungan Saq Mulie Deside Isa bemanik, "Perhatiang napi saq teucapang siq hakim saq ndẽq adil nike!

⁷ Napi Allah nẽnten gen bẽle pelekare dengan-dengan pilẽqan-Ne saq kenjelo kekelem tunas lẽq Ie? Napi Allah gen ngulur-ngulur waktu jari nulung ie pade?

⁸ Tiang badaq side: Allah gelis gen bẽle pelekare ie pade! Laguq lamun Bije Manusie rauh, napi lẽq gumi niki masih araq tedait dengan saq bedowẽ iman?"

⁹ Deside Isa nyeriteang ẽndah perumpamean niki saq Ie tujuang tipaq dengan saq girang ngerẽmẽhang dengan lain, laguq yakin bahwe diriqne mẽsaq saq paling kenaq.

¹⁰ Manik Deside Isa, "Araq due dengan lumbar bedo'e ojok Gedẽng Allah. Saq sopoq dengan Parisi, saq lainne penagih pajek.

¹¹ Dengan Parisi nike nganjeng mẽsaq-mẽsaq dait bedo'e, 'Ya Allah, tiang besyukur lẽq Deside, sẽngaq tiang ndẽq maraq dengan lain, saq serakah, ndẽq adil, atao bezinah. Tiang besyukur sẽngaq tiang ndẽq maraq penagih pajek nike.

¹² Tiang puase due kali seminggu, dait tiang ngaturang sepersepulu lẽman selapuq pengasilan tiang.'

¹³ Laguq penagih pajek nike nganjeng jaoq-jaoq dait malahan ndẽq bani nongaq andang langit. Sambilne empuk dadene, ie matur, 'Ya Allah periakang tiang dengan bedose niki!'"

¹⁴ "Tiang badaq side, waktune ulẽq ojok balẽ, penagih pajek nike saq tejariang kenaq siq Allah, dait ndẽqne dengan Parisi nike. Sẽngaq dengan saq nyombongang diriqne gen terendahang, dait dengan saq ngerendahang diriqne gen tetinggiang."

¹⁵ Araq dengan-dengan jauq kanak-kanak kodẽq ojok Deside Isa adẽq ie pade tejamah dait teicanin berkah siq Deside Isa. Sewaktu pengiring-pengiring Deside Isa serioq nike, ie pade siliq dengan-dengan nike.

¹⁶ Laguq Deside Isa ngemanikang kanak-kanak nike dait bemanik lẽq pengiring-pengiring-Ne, "Alurang kanak-kanak nike dateng ojok Tiang! Ndaq balaq ie pade, sẽngaq dengan maraq niki saq dowẽang Kerajaan Allah.

¹⁷ Tiang badaq side: Setetune dengan saq ndẽq nerimaq Kerajaan Allah maraq sopoq kanak, ie ndẽq gen bau tame lẽq dalemne."

¹⁸ Araq sopoq pemimpin Yahudi metakẽn lẽq Deside Isa, "Paq Guru saq solah, napi saq harus tiang piaq adẽq tiang bau nerimaq idup sejati dait kekel?"

¹⁹ Jawab Deside Isa, "Kembẽq side paran Tiang solah? Ndẽq araq saq solah kecuali Allah.

²⁰ Side sampun nenaoq prẽntah-prẽntah Allah: 'Ndaq bezinah, ndaq nyematẽq, ndaq memaling, ndaq jari saksi duste, dait pade hormatin amaq dait inaqde.'"

²¹ "Selapuq prẽntah nike sampun tiang turut lẽman masih bajang," atur dengan nike.

²² Sesampun Deside sa pireng dengan nike bebase maraq nike, Ie bemanik lẽq dengan nike, "Masih araq sopoq hal saq harus side laksaneang: Jual selapuq dowẽnde, bẽng kẽpẽngne tipaq dengan-dengan miskin, dait side gen mauq harte lẽq sorge. Sesampun nike dateng turut Tiang."

²³ Laguq sewaktu dengan nike dengah hal nike, ie jari sedih sẽngaq ie sugih gati.

²⁴ Deside Isa wikan dengan nike sedih angenne, keranaq nike Ie bemanik, "Sengke gati dengan sugih tame ojok dalem Kerajaan Allah!

²⁵ Molahan sopoq onte tame loang jarum, ketimbang sopoq dengan sugih tame ojok dalem Kerajaan Allah."

²⁶ Dengan-dengan saq dengah Deside Isa bemanik maraq nike metakẽn, "Lamun maraq nike, sai saq bau selamet?"

²⁷ Jawab Deside Isa, "Napi saq ndẽq mungkin bagi manusie, jari mungkin bagi Allah!"

²⁸ Terus Petrus matur, "Tiang pade sampun bilin selapuq saq tiang pade ẽpẽang jari ngiring Pelungguh."

²⁹ Jawab Deside Isa, "Tiang badaq side, setetune sebilang dengan saq sampun bilin balẽne, atao seninene, atao semetonne, atao inaq amaqne atao anak-anakne lantaran Kerajaan Allah,

³⁰ dengan nike gen tebales belipet-lipet lẽq waktu niki, dait lẽq jaman saq gen dateng, ie gen nerimaq idup sejati dait kekel."

³¹ Deside Isa ngumpulang kedue olas pengiring-Ne secare husus, terus bemanik, "Silaq mangkin ite lumbar ojok Yerusalem. Lẽq derike, selapuq saq tetulis siq nabi-nabi mengenai Bije Manusie gen telaksane.

³² Ie gen teserahang tipaq bangse-bangse saq ndẽq kenal kance Allah, saq gen ngoloq-oloq, menghine, dait nijuh Ie.

³³ Ie pade gen siksaq dait nyematẽq Ie, laguq lẽq jelo ketelu, Ie gen idup malik."

³⁴ Pengiring-pengiring Deside Isa nẽnten paham napi saq teucapang siq Deside Isa nike. Arti ucapan-ucapan-Ne nike terahasieang lẽman ie pade. Ndẽqne pade taoq napi maksut Deside Isa.

³⁵ Sewaktu Deside Isa sampun rapet kote Yeriko, araq sopoq dengan bute kenyeke tokol nunas-nunas lẽq sedin rurung.

³⁶ Sewaktu ie dengah dengan luwẽq nike liwat, ie beketuan, "Araq napi?"

³⁷ "Deside Isa dengan Nazaret nike, liwat," basen ie pade lẽq ie.

³⁸ Make dengan bute nike bekuih, "Deside Isa, keturunan Daud! Periakang tiang!"

³⁹ Ie tesiliq siq dengan-dengan saq lẽq julu, dait suruq ie tedoq. Laguq sayan keras ie bekuih, "Bije Daud! Periakang tiang!"

⁴⁰ Deside Isa mentelah, terus ngemanikang dengan jauq dengan bute nike tipaq Ie. Sesampun ie dateng, Deside Isa beketuan,

⁴¹ "Napi saq side melẽtang adẽq Tiang piaq lẽq side?" "Junjungan Saq Mulie," jawab dengan bute nike, "tiang melẽt tao nyerioq."

⁴² Terus Deside Isa bemanik, "Cobaq nyerioq! Imande sampun miaq side selah."

⁴³ Waktu nike ẽndah ie tao nyerioq, terus ie ngiring Deside Isa sambil ngucap syukur tipaq Allah. Dengan luwẽq saq serioq hal nike ẽndah mulieang Allah.

Lukas

Video Lukas 18

Ikuti Kami:

KONTAK | PARTISIPASI | DONASI