Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Aefa da'õ Itutunõ sambua gamaedola Yesu, ba wamahaõ ira nifahaõ-Nia, ena'õ lalau mangandrõ fa lõ aetu wanõtõnara.
2 Imane Yesu, "Ba zi sambua mbanua so samõsa zanguhuku si lõ mangata'ufi Lowalangi, ba lõ gõi ba dõdõnia niha.
3 Ba da'õ so gõi ndra alawe si lõ aetu mangondrasi sanguhuku andrõ ena'õ i'o'awõgõ ia ba farakaronia. Imane lakha mbanua andrõ, 'Tolo ndra'odo wolaw̃a udugu.'
4 Ba zi ha wa'ara, lõ omasi zanguhuku wanolo lakha mbanua andrõ. Ba gafuriata muhede dõdõ zanguhuku andrõ, 'Hew̃a'ae lõ u'ata'ufi Lowalangi ba lõ gõi ba dõdõgu niha,
5 ba bõrõ me lõ aetu ibusi dõdõgu lakha mbanua andre, abõlõ sõkhi na utolo ia ba warakaronia, ena'õ bõi i'ondrasi sa'ae ndra'o ba ibusi manõ dõdõgu.'"
6 Aefa da'õ Imane Yesu, "Mitõngõni hadia niw̃a'õ zanguhuku si lõ sõkhi andrõ!
7 Na mu'ao mbanua-Nia khõ Lowalangi bongi ma'õkhõ, hadia lõ gõi Itolo mbanua-Nia andrõ Lowalangi? Hadia Ibalobaloi ua awena itolo ira?
8 Ya faduhu dõdõmi: I'anema'õ Itolo ira ba farakarora! Ba hiza, hadia so nasa niha samati ba gulidanõ na inõtõ tohare Nono Niha?"
9 Itutunõ gõi gamaedola andre Yesu ba niha sanguma'õ tõdõra wa ha ya'ira ni'omasi'õ Lowalangi ba la'ositengagõ niha bõ'õ.
10 Imane Yesu, "Darua niha si mõi mangandrõ ba Nomo Zo'aya. Farizai'o zi samõsa ba sangozara beo zi samõsa.
11 Ilau muzizio Farizai'o andrõ, wangandrõ imane, 'He Lowalangi u'andrõ saohagõlõ khõ-U, bõrõ me tenga serõhõ ndra'o ba gana'a si mane niha bõ'õ, si lõ fa'atulõ dõdõ awõ wohorõhorõ. U'andrõ saohagõlõ khõ-U me tenga si mane sangozara beo ndra'o.
12 Ulau fuasõ dua kali ero migu, ba ube'e sambua ni'ofulu moroi ba zinõndragu.'
13 Ilau muzizio gõi ba zarõu sanema beo andrõ ba lõ barani ia wamaigi si yaw̃a. Ibõzibõzi dõtõ'ania ba imane, 'He Lowalangi, hakhõsi tõdõ ndra'o niha si so horõ andre!'"
14 Imane Yesu, "Ya faduhu dõdõmi, me mangawuli ba nomo, sanema beo andrõ nitema Lowalangi, tenga Farizai'o. Bõrõ me dozi sangebua'õ ya'ia da'õ ni'ide'ide'õ dania; ba dozi sangidengide'õ ya'ia da'õ dania ni'ebua'õ."
15 So niha solohe iraonora khõ Yesu ena'õ Itufa tanga-Nia ndraono andrõ ba Ifahowu'õ. Me la'ila ira nifahaõ Yesu da'õ, lategu niha andrõ.
16 Ba hiza, Ikaoni Yesu niha andrõ Imane, "Akha mõi khõ-Gu ndraono andrõ! Bõi mitegu ira, bõrõ me iraono si mane dania zi tobali ono mbanua amatõrõw̃a Lowalangi.
17 Mitõngõni! Si lõ mangondrasi Lowalangi si mane iraono, tebai tobali ono Mbanua wamatõrõ Lowalangi ia."
18 Samõsa zatua niha Yahudi sanofu khõ Yesu, "He Amagu Guru si sõkhi, hadia nilaugu ena'õ tola usõndra wa'auri sindruhundruhu?"
19 Isofu Yesu khõnia, "Hana wa õw̃a'õ si sõkhi Ndra'odo? Samõsa lõ si sõkhi baero Lowalangi.
20 Tatu õ'ila goroisa ba agama, 'Bõi ohorõ, bõi amunu niha, bõi anagõ, bõi falimo, fosumange namau awõ ninau.'"
21 Itema li niha andrõ, "I'otarai wa'a'ono matuagu no u'o'õ goroisa andrõ."
22 Me irongo da'õ Yesu, Imane khõnia, "So sambua tõ zi lõ tola lõ'õ õ'ohalõw̃õgõi: Famawa fefu zi so khõu, ba be'e mbõlinia ba niha si numana; õsõndra dania harato ba zorugo. Aefa da'õ o'õ Ndra'o."
23 Ba me irongo da'õ niha andrõ, abu dõdõnia me niha si kayo sibai ia.
24 I'ila Yesu wa abu dõdõ niha andrõ, bõrõ da'õ Imane Yesu, "Fondrege wa'afõkhõ ba niha si kayo wolo'õ famatõrõ Lowalangi.
25 Abõlõ aoha ba gondra wanõrõ tõgi walõlõw̃a, moroi na i'o'õ Mbanua si Bohou khõ Lowalangi niha si kayo."
26 Samõsa ba gotalua zamondrongo fehede Yesu sanofu, "Na si manõ haniha zi tola ni'orifi?"
27 Itema li Yesu, "Si tebai ba niha, no tola ba Lowalangi!"
28 Aefa da'õ imane Fetero, "Iada'e no marõi nomoma ba wolo'õ Ya'ugõ, Ama."
29 Imane Yesu, "Sindruhu! Ya faduhu dõdõmi: Dozi niha sondrõi omonia, ma fo'omonia, ma zui talifusõnia ma ira satuania ma zui iraononia we'amõi enoni wolo'õ oroisa Lowalangi,
30 lõ tola lõ'õ tebe'e wa'auri si lõ aetu dania ba ginõtõ si so fõna."
31 I'ohe Yesu ndra nifahaõ-Nia andrõ si felendrua ba zi lõ niha, aefa da'õ Imane khõra, "Mihaogõ wanõngõni! Numalõ ita iada'e ba Yeruzalema, ba alua fefu nisura ndra sama'ele'õ sanandrõsa khõ Nono Niha.
32 Tebe'e Ia ba danga niha si tenga niha Yahudi, la'o'aya Ia ba ladidiloi.
33 Lafakao ba labunu Ia; ba hiza, ba ngaluo si tõlu, ifuli auri Ia."
34 Fefu da'õ lõ aboto ba dõdõ ndra nifahaõ Yesu. Lõ mangatõla ba dõdõra wehedehede Yesu. Lõ la'ila hadia niw̃a'õ-Nia.
35 Me arakha irugi Yerikho Yesu, ba zinga lala so niha sau'a si dadao ba wangandrõngandrõ.
36 Me irongo sau'a so niha sato ba da'õ, isofu imane, "Hadia da'õ?"
37 Lamane khõnia, "Itõrõ Yesu banua Nazareta."
38 Mu'ao ia imane, "He Yesu, nga'õtõ Dawido! Hakhõsi tõdõ ndra'o."
39 Ba lategu ia niha si so tanõ fõna ena'õ ihonogõ ia. Ba hiza i'abõlõgõ we'ao imane, "He ono Dawido, hakhõsi tõdõ ndra'o!"
40 Ilau molombase Yesu ba Ifaw̃a'õgõ ena'õ la'ohe khõ-Nia niha sau'a andrõ. Me irugi fõna Yesu, Imane khõnia,
41 "Hadia zomasi'õ Ulau khõu?" Itema li niha sau'a andrõ imane, "He Ama, omasido u'ila niha mangawuli."
42 Imane khõnia Yesu, "Faigi iada'e! No ifadõhõ ndra'ugõ famatimõ."
43 I'anema'õ i'ila niha, ba i'o'õ Yesu, si fao fanunonuno Lowalangi. Fefu niha sangila da'õ, lasunosuno Lowalangi gõi.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA