Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Kenca bage, guna ngajari ajar-ajar gelah ia ertoto rusur maka ola peltep pengarapenna,

² ituriken Jesus perumpaman enda nina, "I bas sada kuta lit sekalak hakim si la erkemalangen man Dibata dingen la erkeleng ate man manusia.

³ Lit ka pe i bas kuta e sekalak diberu nggo mbalu. Ia rusur reh ndahi hakim e, janah nina, 'Sampati min aku i bas perkarangku nandangi imbangku.'

⁴ Ndekah la nggit hakim e, tapi dungna nina i bas ukurna, 'Aminna gia aku la erkemalangen man Dibata dingen la erkeleng ate man manusia,

⁵ tapi perbahan rusur aku igangguna, kupejore gia perkarana e; gelah olanai ia reh rusur dingen dungna iraukina ayongku.'"

⁶ Iterusken Tuhan nina, "Begindu kai si nggo ikataken hakim si la bujur e?

⁷ Ma kin ibegiken Dibata nge kalak PilihenNa si erlebuh suari ras berngi mindo penampat man BaNa? Melawen kin Ia nampati kalak PilihenNa?

⁸ Kukataken pe man bandu, pedas nge IberekenNa keadilen man kalak si mindo man BaNa. Tapi asum reh pagi Anak Manusia si isuruh Dibata lit nge pagi IdapetiNa kalak si erkiniteken i doni enda?"

⁹ Man kalak si pebujur-bujur bana dingen si erpengakap maka kalak si deban la lit ergana, ituriken Jesus perumpaman enda,

¹⁰ "Lit me dua kalak si lawes ku Rumah Pertoton guna ertoto. Sekalak e me kalak Parisi janah sekalak nari pengalo cuke.

¹¹ Kalak Parisi e tedis janah ertoto ia i bas ukurna nina, 'O Dibata, bujur kukataken man BaNdu, sabap aku la merangap, la nipu, la erlua-lua bagi kalak si deban. Bujur kukataken man BaNdu sabap aku labo bagi pengalo cuke ah.

¹² Aku erpuasa dua kali seminggu, janah kupersembahken man BaNdu sepersepuluh i bas kerina ulihku erdahin nari.'

¹³ Tapi pengalo cuke tedis ndauh i bas ia nari, janah la ia pang nare ku langit, itemtemina bana janah nina, 'O Dibata, mekuah min atendu aku kalak perdosa!'"

¹⁴ Nina Jesus, "Kukataken man bandu: Mulih kalak enda ku rumah janah pengalo cuke enda me si ibenarken Dibata, labo kalak Parisi e. Sabap kalak si peganjangken bana ipeteruk Dibata, janah kalak si peteruk bana ipeganjangken Dibata kap."

¹⁵ Reh me piga-piga kalak orang tua maba anak-anakna si kitik denga man Jesus. Atena gelah ipasu-pasu Jesus anak-anak e. Asum idah ajar-AjarNa, emaka ilarangna.

¹⁶ Tapi idilo Jesus anak-anak e janah nina, "Pelepas anak-anak e reh ndahi Aku, ola ambati ia. Sabap kalak si bagi enda kap empuna Kinirajan Dibata.

¹⁷ Ingetlah! Kalak si la ngaloken Kinirajan Dibata bali ras sekalak anak-anak, la ia banci bengket ku bas Kinirajan Dibata."

¹⁸ Lit me sekalak peminpin kalak Jahudi nungkun man Jesus nina, "O Guru si bujur, kai nge ndia arus kubahan gelah kudat kegeluhen si rasa lalap?"

¹⁹ Erjabap Jesus, "Ngkai maka ikatakenndu Aku si bujur? Ma ise pe labo bujur seakatan Dibata ngenca?

²⁰ Tentu nggo ietehndu pedah Dibata, 'Ola munuh; ola erlua-lua; ola nangko; ola ngataken si la tuhu; ola nipu; mehamat man nande ras bapandu.'"

²¹ Emaka ngaloi ia, "O Guru, kerina pedah e nggo kuikutken kitik-kitikku nari."

²² Kenca ibegi Jesus jabapna e nina, "Sada nari kekurangenndu, dayaken erta-ertandu janah duitna bereken man kalak musil, gelah idatndu erta-erta i Surga; jenari reh kam, ikutken Aku."

²³ Kenca ibegina kata Jesus e gulut ukurna, sabap bayak kal ia.

²⁴ Asum idah Jesus bage kal cedana atena, emaka nina, "Tuhu-tuhu mesera kal kalak bayak bengket ku bas Kinirajan Dibata.

²⁵ Sukahen sada unta mentas arah lubang jarum asangken sekalak kalak bayak bengket ku bas Kinirajan Dibata."

²⁶ Kalak si megi Ia nungkun nina, "Adi bage ise nari nge pagi terkelin?"

²⁷ Erjabap Jesus, "Kai si la banci jadi i bas manusia, e me banci jadi i bas Dibata."

²⁸ Jenari nina Petrus, "Kami nggo nadingken sikerajangen kami guna ngikutken Kam."

²⁹ Ngaloi Jesus, "Tuhu, janah Kukataken pe man bandu maka ise pe si nadingken rumahna ntah ndeharana ntah seninana ntah orang tuana ntah anak-anakna erkite-kiteken Dibata dingen erkite-kiteken dahin Dibata,

³⁰ ialokenna nge erganda-ganda i bas jaman enda pe, dingen pagin ialokenna kegeluhen si tuhu-tuhu si rasa lalap."

³¹ Idilo Jesus ajar-AjarNa si sepulu dua kalak, jenari nina, "Begikenlah! Genduari kita i bas perdalanen ku Jerusalem. I je me pagi jadi kerina si nggo isuratken nabi-nabi kerna Anak Manusia si isuruh Dibata.

³² Sabap Ia pagi iendesken man kalak si la nandai Dibata. Isaling-saling kalak e pagi Ia, igombang-gombangina janah icidurina.

³³ Iligasina jenari ibunuhna Ia, tapi i bas wari peteluken nggeluh Ia mulihi."

³⁴ Bage gia labo iangka ajar-ajar kai si ikataken Jesus. La tangkas man bana erti kata e, emaka labo iangkana maksud Jesus.

³⁵ Asum Jesus nandangi seh i Jeriho, lit me sekalak pentang kundul i tepi dalan mindo-mindo.

³⁶ Asum ibegina mentas jelma si nterem, nungkun ia nina, "Kai e?"

³⁷ Erjabap kalak man bana, "Mentas Jesus kalak Nasaret."

³⁸ Jenari erlebuh ia alu sora megang, "O Jesus! Anak Daud! Mekuah min AteNdu aku."

³⁹ Ilarang kalak si arah lebe ia, gelah ola ia gejek. Tapi reh gangna ia erlebuh nina, "O Anak Daud! Mekuah min AteNdu aku."

⁴⁰ Emaka ngadi Jesus erdalan, jenari IsuruhNa kalak negu si pentang e ku Ia. Kenca seh ia i lebe-lebe Jesus, isungkun Jesus ia nina,

⁴¹ "Kai kin atendu Kubahan man bandu?" Erjabap ia, "O Tuan, ateku min gelah aku erpengidah mulihi."

⁴² Emaka nina Jesus man bana, "Erpengidahlah kam! Kinitekenndu erbahanca kam nggo malem."

⁴³ Minter ia erpengidah, jenari ikutkenna Jesus, janah ikatakenna bujur man Dibata. Asum kalak si nterem ngidah si e, kerina ia muji Dibata.

Lukas

Video Lukas 18

Ikuti Kami:

KONTAK | PARTISIPASI | DONASI