Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ma moi ge'ena, manga gudaioka 'o pajaki yoga-ga'asoko de 'o nyawa gee 'o kawasa yakimakeka 'o nyawa ma dorou yaino yosigisene 'o Yesus wodotoko.

² 'O 'agamaka yodoto-dotoko de 'o Farisioka yakimake de yokurubungu. 'Ona kayongosekau, "Cedeke, 'o nyawa nu'una wakidawongo 'o nyawa ma dorou de yomasido'odomoli!"

³ Sababu ge'ena 'o Yesus wakidajarita 'o 'ade-'ade ne'ena:

⁴ "Nako wimoi nginioka naga 'awi domba 'o ratusu moioka, de 'iisangoka 'o ngai moi, dua 'okia wodiai? Ma raiokau dua wamada ma domba 'o nagi siwo de siwo ge'ena 'o 'ubu-'ubutoka, de wotagi wanonu 'iisa-isangoka gee sigado wamake.

⁵ De nako wamakeli ma domba ge'ena, ge'ena womorene ma sala sigado ma domba ge'ena wamokude,

⁶ deika wosigilio. Wototarika 'awi woaka de waki'asokino 'awi ma-manai de 'awi sidateke de kawongosekau, ''Alele! Nialega 'ai domba 'iisa-isangoka tamakekau! Nou, ngone porame!'

⁷ Tinidongose ne'ena: Koge'enali mita 'o sorogaaka ma Jo'oungu ma Dutu posironga womorenoka, de 'awi mala'ekati mita 'ikokimorene ma sala ngaro ka moi yosowo-sowono yomaogoro 'o sowono yodiai de yolio ma Jo'oungu ma Dutuka. Ge'ena 'ifoloi yodomorene de godagee yanagi siwo de siwo yoti-tiaiou koiparaluuwau yotoba."

⁸ "Bolo nako 'o ngeweka mimoi 'ami pipi 'o saaka 'o ngai mogiookoka, de 'o ngai moi 'iisangoka, ge'ena dua 'okia modiai? Dua muna manonu 'o silo modutuuku de masesara ma bootoka 'ami woa ma dodaka ge'ena sigado ma pipi ge'ena mamakeka.

⁹ Gee mamakeno ma pipi ge'ena, de maki'asoko 'ami ma-manai de 'ami woa ma sidateke de kamongosekau, 'Ngoi tomorene ma sala 'ai pipi 'iisa-isangoka tamakenou. Nou, ngone porame!'

¹⁰ Tinisidemo ne'ena: Koge'enali mita ma Jo'oungu ma Dutu womorene ma sala de 'awi mala'ekati mita 'ikokimorene, gee 'o nyawa 'isowo-sowono moi yomaogoro 'o sowono yodiai de yolio ma Jo'oungu ma Dutuka!"

¹¹ 'O Yesus wongoseli, "Naga 'o dea wimoi 'awi ngowaka 'o nauru yamididioka.

¹² 'O dodotoka gee kawongosekau ma deaka, ''Aba, nanga harataa noisibulanou to ngoi ka kone'enasi.' So manga harataa ge'ena ma dea wakisibula 'awi ngowaka yamididika.

¹³ 'O wange muruo naga 'ipasano de 'o ngowaka 'o dodotoka gu'una wawukunokau 'awi bula ge'ena, de wotagi 'o daeraa 'ikuru-kurutika. Ge'enaka doka 'una 'awi pipi ge'ena wosisasaru kawosiso-somoa.

¹⁴ Gedagee 'awi pipi 'ibootokau de 'o baulaco ma kiamati 'idadi ma daeraaka ge'ena, so wosaigalere.

¹⁵ Ge'enaka de 'una wotagi womanarama 'o sewa wo'ese 'o daeraa ma dutuka wimoi ge'enaka dau, gee wisuloko 'awi titi wojaga 'o liunoka.

¹⁶ So womanarama 'ena wisawini 'ifoloiokau sigado womau 'o titi ma 'inomo ge'ena wa'odomo. Ngaro wisawini 'ifoloiokau, ma komoiwa 'o 'inomo wikula.

¹⁷ Ge'enaka de womatoduba de 'awi singina ma dodaka kawongosekau, ''O nyawa gee yoma-manarama 'o sewa yo'ese-'ese 'ai deaka posironga de manga 'inomoka, de ngoi ne'enaka dau 'o sawini rekeni tosisongenoka!

¹⁸ Ngoi dua tolio 'ai deaka de tongose 'unaka: 'Aba, ngoi tosowonokau ma Jo'oungu ma Dutuka de mita ngonaka.

¹⁹ Koyadaenuawau noisironga 'ani ngowaka 'Aba. Noidiai 'isoka 'ani nyawa 'o sewa yo'ese-'eseu ngonaka 'Aba.'

²⁰ So wotagiokau wolio ma deaka. 'O woaka 'ena 'o gurutikasi, 'ena ma dea wimakekau. De ma dea wi singina so kawido-doowarika wikooo de wiame.

²¹ 'O ngowaka gu'una kawongosekau, ''Aba, ngoi tosowonokau ma Jo'oungu ma Dutuka de ngonaka 'Aba. Koyadaenuawau ngoi noisironga to ngona 'ani ngowaka 'Aba.'

²² Duga ma dea waki'asokino 'awi ro-riwo de kawongosekau, 'Niomatai-taiti nia'ese 'o pakeangi gee 'isure 'ifo-foloi de winisinoaku. Wini'ali-'alino de winicapatode.

²³ Ge'ena 'iduanga de nia'ese 'o sapi ma gooka yaowa-owa de niatoaka. Ngone dua pomarame pomore-morene.

²⁴ Sababu 'ai ngowaka nu'una 'isoka wosongenokau ma wowangokauoli. 'Una matero kawoisangokau ma ne'ena towimakenouoli.' Ge'enaka de 'iodumu 'ikokiduanguku de yorame.

²⁵ Ma 'orasi ge'ena 'o ngowaka 'o riaka 'o bairoka. Gee wolio so 'o woa wodomoorika, 'una wogi'isene 'o damunu de 'o liwanga ma 'ilingi, de mita yosoda de yohia-hia.

²⁶ 'Una wi'asokino 'o ro-riwo wimoi de wosano, ''Okiau ne'ena 'o woaka?'

²⁷ 'O ro-riwo gu'una wosango, ''Ani dodoto wolionou! De 'ani dea wosulokokau 'o sapi ma gooka yaowa-owa yatoaka, sababu wimakenou 'awi ngowaka kawosa-sanangi!'

²⁸ 'O ngowaka 'o riakoka gu'una wi do'otasa 'irama so wooluku wowosama 'o woaka. Ge'enaka de ma dea wosupu wibaja wowosama.

²⁹ Ma 'una kawongoseka, 'Tei! De ma tau-taunou tonileleani 'Aba, de koma'iwa talawani 'ani pareta. Ma ka 'o kabingi 'o ngai moi ma koma'iwasi noikula tatoaka la mimarame de 'ai ma-manai!

³⁰ Ma 'ani ngowaka gu'una 'ani harataa wabootokau wosisasaru 'o nge-ngeweka ma do-dorou, duga gee woliono de wonidotoaka 'o sapi ma gooka yaowa-owa!'

³¹ Ma dea wosango 'awi ngowaika, 'Ngona kaitaurika de de ngoi ne'enaka dau. 'Okia sonaa 'iso de to ngoiou ge'ena to ngona mita.

³² Ma ngone salingou pomarame de pomorene sababu 'ani dodoto gu'una matero kawosongenokau ma ne'ena wowangodeuoli; 'una matero woisangokau ma ne'ena powimakenou.'"

Lukas

Video Lukas 15

Ikuti Kami:

KONTAK | PARTISIPASI | DONASI