Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Lẽq sopoq jelo, luwẽq penagih pajek dait dengan-dengan saq bedose, dateng dengahang Deside Isa.

² Dengan-dengan Parisi dait ahli-ahli Taurat mulai ngerumun. Ie pade bebase, "Dengan niki nerimaq dengan-dengan saq bedose dait malahan bareng medaran kance ie pade!"

³ Keranaq nike Deside Isa nyeriteang perumpamean niki lẽq ie pade,

⁴ "Lamun salaq sopoq lẽman side pade bedowẽ satus dombe, terus ie kẽlangan sopoq -- napi saq gen ie piaq? Pasti ie gen bilin dombe saq siwaq pulu siwaq nike lẽq lendang pupaq, dait lumbar boyaq saq telang nike jangke kendaitan.

⁵ Lamun ie ndait malik dombe nike, ie cemoh gati sehingge ponggoqne dombe nike,

⁶ terus jauqne ulẽq. Beterus ie ngempoh batur-batur dait tetangge-tetanggene, dait bebase, 'Silaq ite beseneng-seneng. Sẽngaq dombe tiang saq telang sampun tiang ndait malik!'

⁷ Tiang badaq side, maraq nike ẽndah lẽq sorge gen araq sukecite saq belẽqan lantaran sopoq dengan bedose saq betobat, ketimbang siwaq pulu siwaq dengan saq sampun keruan kenaq dait ndẽq perlu betobat."

⁸ "Atao lamun sopoq dengan nine bedowẽ sepulu kẽpẽng perak, terus telang sopoq -- napi saq gen ie piaq? Ie gen penyalaq dilah dait sapu balẽne terus boyaq lẽq mbẽ-mbẽ jangke ie ndait kẽpẽng nike.

⁹ Sewaktu ie ndait kẽpẽng nike, ie ngempoh batur-batur dait tetangge-tetanggene, terus bebase, 'Tiang seneng gati sampun ndait malik kẽpẽng tiang saq telang. Silaq ite beseneng-seneng!'

¹⁰ Tiang badaq side, maraq nike ẽndah malaẽkat Allah gen gembire lamun araq sopoq dengan bedose betobat lẽman dose-dosene."

¹¹ Deside Isa bemanik malik, "Araq sopoq amaq saq bedowẽ due bije mame.

¹² Saq sengari bebase tipaq amaqne, 'Amaq, bẽng tiang dowẽ saq jari bagian tiang.' Make amaqne bagi kesugihanne nike tipaq kedue bijene.

¹³ Pire jelo sesampun nike bijene saq sengari nike jual bagianne nike terus lumbar ojok negeri saq jaoq. Lẽq derike ie ambur-amburang kẽpẽngne siq idup loyar dait beseneng-seneng.

¹⁴ Sewaktu selapuq kẽpẽngne bis, lẽq negeri nike araq musibah kelapahan saq belẽq, sehingge ie mulai melarat.

¹⁵ Terus ie lumbar begawẽan lẽq salaq sopoq penduduk lẽq derike. Dengan nike suruq ie ojok lendang jagaq bawine.

¹⁶ Saking lapahne ie melẽt ngisiq tianne siq kakenan bawi-bawi nike laguq ndẽq araq sopoq dengan juaq saq ngebẽng ie kakenan bawi nike.

¹⁷ Ahirne ie sadar dait bebase, 'Dengan-dengan saq begawẽan lẽq amaq tiang belimpah-limpah keloranne, dait tiang lẽq deriki matẽ kelapahan!

¹⁸ Tiang gen tulak ojok amaq tiang, dait bebadaq lẽq ie: Amaq, tiang sampun bedose tipaq Allah dait lẽq side.

¹⁹ Ndẽq patut malik tiang tesebut bijende. Anggep tiang niki salaq sopoq pesuruqde.'

²⁰ Terus ie lalo ulẽq ojok amaqne. Masih jaoq lẽman balẽ, ie sampun teserioq siq amaqne. Amaqne jari periak lẽq ie dait pelai sambut ie, terus kapongne dait sidukne bijene nike.

²¹ 'Amaq,' basen bijene nike, 'tiang sampun bedose tipaq Allah dait lẽq side. Tiang ndẽq patut malik tesebut bijende.'

²² Laguq amaqne ngempoh pelayan-pelayanne, dait bebase, 'Becat! Baitang kelambi saq paling solah, dait kaduang lẽq ie. Pasangang ali-ali lẽq ranggotne dait sepatu lẽq naẽne.

²³ Sesampun nike bait anak sampi saq mokoh dait sembelẽh. Ite gen roah dait besukecite.

²⁴ Sẽngaq bije tiang niki sampun milinang, mangkin idup malik; ie sampun telang laguq mangkin tedait malik.' Terus ie pade mulai begawẽ.

²⁵ Lẽq waktu nike, bijene saq sengake araq lẽq lendang. Sewaktu ie ulẽq dait sampun rapet balẽne, ie dengah suare gending dait igel-igelan.

²⁶ Ie ngempoh salaq sopoq pelayan-pelayanne, terus beketuan, 'Araq napi niki lẽq balẽ?'

²⁷ Jawab pelayan nike, 'Adiqde sampun tulak! Dait amaqde sampun suruq dengan sembelẽh anak sampi saq mokoh, sẽngaq bijene sampun tulak malik dalem keadaan selamet!'

²⁸ Bije saq sengake nike gedek gati, jangke ie ndẽq mẽlẽ tame balẽ. Beterus amaqne sugul dait ngodop ie adẽqne tame.

²⁹ Laguq ie bebase lẽq amaqne, 'Betaun-taun ngonẽqne tiang begawẽan matẽ-matẽan umaq side. Tiang ndẽq uwah ngelawan prẽntahde. Dait napi saq side bẽng lẽq tiang? Timaq sopoq bẽmbẽq ndẽq uwah tiang terimaq lẽman side jari begawẽ kance batur-batur tiang!

³⁰ Bijende nike sampun nyembih kesugihande kance pelacur-pelacur, laguq waktu ie tulak, side sembelẽh anak sampi saq mokoh umaq ie!'

³¹ 'Anak,' jawab amaqne, 'side tetep araq lẽq deriki bareng kance tiang. Selapuq saq tiang ẽpẽang ẽndah jari dowẽnde.

³² Laguq ite harus roah dait beseneng-seneng, sẽngaq adiqde nike sampun milinang, laguq mangkin idup malik; ie sampun telang, laguq mangkin sampun tedait malik.'"

Lukas

Video Lukas 15

Ikuti Kami:

KONTAK | PARTISIPASI | DONASI