Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Suatu rani, lamon tukang tagih pajak rik jelma-jelma sai dianggap mak benor ulih masyarakat, ratong ngedengiko cawani Isa.

² Jelma-jelma Farisi rik guru-guru agama mulai ngomel. Tian cawa, "Iih, jelma sinji nerima jelma-jelma sai mak benor malah mengan jejama tian!"

³ Ulih senodo Isa nyeritako jama tian perumpamaan inji,

⁴ "Kik jak keti unyinni wat sai jelma ngedok seratus ekor biri-biri, kidangni ia kelebonan sai -- api sai haga disanini? Pasti ia haga ninggalko biri-biri sai siwa puluh siwa ano di padang jukuk, rik nyepok biri-biri sai lebon sampai kehaluan.

⁵ Rik kik ia ngehalu luot biri-biri udi, ia riang nihan raduni digindungni biri-biri udi di atas di layangni,

⁶ kak raduni diusungni mulang. Kak raduni ia ngurau kantik-kantikni jama tetanggani, ia cawa, 'Ija neram besenang-senang. Biri-biriku sai lebon radu kehaluan luot!'

⁷ Nah, injuk reno juga di surga wat keriangan kik sai jelma bedusa betubat, jak siwa puluh siwa jelma sai benor sai mak perlu lagi betubat."

⁸ "Atau kik wat sai jelma bebai ngedok puluh duit perak, lebon sai -- api sai haga disanini? Ia haga nyalako lampu rik nyapu lambanni disepokni di dipa-dipa gaoh sampai ia ngehalu duit seno.

⁹ Waktu ia ngehalu duit seno, ia ngurau kantik-kantikni jama tetangga-tetanggani, ia cawa, 'Nyak senang nihan mani radu ngehalu duitku sai lebon. Ija ram besenang-senang!'

¹⁰ Injuk reno juga malaikat Allah senang kik wat sai jelma jahat betubat jak dusa-dusani. Percayado!"

¹¹ Isa cawa luot, "Wat sai bapak sai ngedok rua anak bakas.

¹² Sai bungsu cawa jama ia, 'Bak, keniko jama nyak tano bagianku jak harta ram.' Raduni bakni ngebagi harta seno jama rua anakni.

¹³ Pira rani jak seno anak bungsu ngejual bagianni kak raduni ia mik negeri sai jaoh. Di dudi ia ngebelako duitni rik hurik befoya-foya.

¹⁴ Waktu duitni bela unyinni, di negeri seno tejadi kebetohan di dipa-dipa, hingga ia mulai melarat.

¹⁵ Kak raduni ia mik beguai jama jelma di disan sai ngayun ia mik kebun untuk ngejaga babui.

¹⁶ Ia kebetohan nihan haga ia ngisi tenaini jama kanikan babui-babui seno. Walaupun ia mebetoh nihan mak ngedok sai jelma pun ngeni kanikan jama ia.

¹⁷ Akherni ia sadar rik cawa, 'Jelma-jelma sai beguai jama bakku belimpah-limpah kanikanni kidang di dija nyak hamper mati kebetohan!

¹⁸ Nyak haga mik mulang jama bakku, rik cawa jama ia: Bak, nyak radu bedusa di hadap Allah rik di hadap Bak.

¹⁹ Mak patut lagi nyak disebut anakni Bak. Anggap gaoh nyak pesuruhni Bak.'

²⁰ Kak raduni ia mik mulang jama bakni. Masih jaoh jak lamban, ia radu diliak ulihni bakni. Jama hati teharu bakni tegar nungga ia, raduni ditekop rik disiumni anakni ano.

²¹ 'Bak,' cawani sanak seno, 'nyak radu bedusa tehadap Allah rik tehadap Bak. Mak patut lagi nyak disebut anakni Bak.'

²² Kidang bakni ngurau jelma-jelma sai ngelayani ia rik cawa, 'Geluk! Akuk kawai sai paling helau, rik pakaiko jama ia. Pakaiko ali-ali dijarini, rik sepatu dicukutni.

²³ Kak raduni akuk jawi sai gemuk rik tikol. Ram haga mengan rik besukacita.

²⁴ Mani anakku sai kuanggap mati, tano hurik luot; ia radu lebon, tano kehaluan luot.' Raduni tian mulai pesta.

²⁵ Waktu seno, anakni sai tuha lagi di kebun. Waktu ia mulang rik sampai di redik lambanni, ia ngedengi musik rik tari-tarian.

²⁶ Ia ngurau salah sai jak jelma-jelma sai ngelayani ia, ia betanya, 'Wat api di lamban?'

²⁷ Jelma sai ngelayani ano ngejawab, 'Adik Tuan muloh! Rik bak Tuan radu ngayun nikol jawi sai gemuk, mani ia radu betungga luot jama anakni delom keadaan selamat!'

²⁸ Anak sai tuha ano butong nihan sampai ia mak haga kuruk di lamban. Raduni bakni mik luah ngebujuk anakni kuruk.

²⁹ Kidang ia cawa, 'Betahun-tahun sakani nyak beguai mati-matian untuk Bak. Mak pernah nyak ngebantah perintahni Bak. Rik api sai dikeniko bak jama nyak? Sai kambing pun makkung pernah Bak keniko jama nyak untuk bepesta jama kantik-kantikku!

³⁰ Anakni Bak seno radu ngebelako hartani Bak jama bebai lacor, kidang waktu ia mulang luot, Bak nikol jawi sai gemuk untuk ia!'

³¹ 'Anakku,' jawab bakni, 'niku selalu jama nyak di dija. Sunyinni hartaku hartamu juga.

³² Kidang neram haga pesta rik besenang-senang, mani adikmu seno radu mati, kidang tano hurik luot; ia radu lebon, kidang tano kehaluan luot.'"

Lukas

Video Lukas 15

Ikuti Kami:

KONTAK | PARTISIPASI | DONASI