Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Kon singgai tobatuí, nobayong im mononagih kom pajak bo intau mita baradosa ibanea namangoi ko'i Yesus, sim mokidongog ko'i-Nia.
2 Daí intau mita im Parisi bo mototunduí mita kon agama nomangkoidon mongunsingog, kai monia, "Seseíah intau tanion mo'ibogbií motarima kon intau mita inta diaí mopia, bo monga'an doman moyotakin monia."
3 Daí tuamai ki Yesus nongonguman kom porumpama'an tana'a ko'i monia, kai-Nia,
4 "Aka kuma oyuíon kon sigad monimu inta nomiag kon domba mogatut ing kobayongea, bo tobatuí in nobuli, yo onu in aidannya? Tantuí taḷa'annyapabií in domba inta siow nopuḷuh bo siow kon ḷantungea bo mayak in sia motayak kon inta nobuli tatua modapot im mo'uliínya.
5 Bo aka mo'uliínyadon bui in domba tatua, yo totokbií im mopia-pia ing ginanya, sahingga im pota'anonnyadon in domba tatua,
6 bo diaan mobui. Onda im mo'iyaputmai kom baḷoinya sia mogoinií kon yobayatnya mita bo topodiugmai poḷat moguman nana'a, 'Igai baí moramepa ing kita sin dombaku inta nobuli no'uliíkudon bui!'
7 Baí poguman-Kudon ko'i monimu: natua doman ing kon soroga. Moḷoben totok pia ing gina lantaran tobatuí intau inta ain nogogai nogaid kon dosa. Pia ing gina tatua mo'iliu kom pia ing gina ko'i monia inta siow nopuḷuh bo siow inta ain nopira bo diaídon moparaḷu mogogai mogaid kon dosa."
8 "Andeka, aka kuma bo tobatuí bobay kodoit perak mopuḷuh in kobayongea, bo tobatuí in nobuli - onu in aidannya? Tantuí mopoyongkitbií in togaí in sia bo monga'it kom bonu im baḷoinya bo kotaya-tayak modapot im mo'uliínya bui in doitnya tatua.
9 Bo aka mo'uliínyadon in doitnya tatua, yo mogoiniíbií in sia kon yobayatnya mita bo topodiugmai mita bodongka moguman, 'Igai mobarasanangpa ing kita sin doitku inta nobuli no'uliíkudon bui!'
10 Natua doman im malaekat mita i Allah, mopia ing gina monia aka oyuíon tobatuí intau inta mora'at mogogaidon mogaid kon dosa. Tuamai, popirisayabií!"
11 Ki Yesus nongonguman doman kon porumpama'an nana'a, "Oyuíon tobatuí guyanga ḷoḷaki kogadií kon doyowa, adií ḷoḷaki komintan.
12 Inta muit noguman ko'i amaínya, 'Papa, ogoidon ko'inakoí tana'a makow in silaiku nongkon kapunya'an naton.' Daí sinilaidon i amaínya ko'i adiínya doyowa tua ing kapunya'annya.
13 Tongonumaidon nosinggai no'iduduimai nongkon tua, adií muit tatua nopotaḷui im bayongan silainya bodongka minayak ing kota inta moyayuk. Kon tua sia nopomakeí in doitnya tua inimibo-ibogbií.
14 Naonda in doitnya nodaitdon komintan, kotaí inta binaya'annya tatua kino antugan im malarat, sahingga sia mulaidon doman mokorasa kon susah sin diaídon ko'onu bo onu.
15 Daí sia minayak nogaid kon tobatuí intau kong kotaí tatua. Intau tatua nopotabaí ko'inia minayak ing gobaí sim moḷukad kom bokeínya.
16 Wakutu intua, sia totokdon gogoyon, sahingga sia mo'ibog domandon moka'an kong ka'anon im bokeí tatua. Sin umpakah totokdon ing gogoyon in sia, ta'e diaíbií doman intau im mamangoi mobogoi ing ka'anon ko'inia.
17 Pangabisannya sia nosadar bo nosingog nana'a, 'Intau mita inta nogaid ko'i papaku mobayong totok ing ka'anon ko'i monia, ta'e aku'oi ing kon na'a gogioíbií bo matoi ing gogoy!
18 Yo manikah bo mobui in aku'oi ko'i papaku, bo moguman ko'inia nana'a: Papa, aku'oi na'a ain nomia kon taḷaí ko'i Tuhan bo ko'i papa,
19 daí aku'oi in diaí bidon patus tangoion ki adií i papa. Tuamai aidaidon aku'oi na'a saḷaku intau inta mongonga'ang gaji ko'i papa.
20 Daí nobuatdon sia bo nobui mangoi ko'i amaínya. Noyayukpa in sia, inontongdon i amaínya. Lantaran nokotanob bo notabi totok daí noribatuk ing ki amaínya bo notomu ko'inia, bo ginakapannya poḷat inayokan.
21 Ta'e ki adiínya tatua noguman: 'Papa, aku'oi na'a aindon nomia kon taḷaí ko'i Tuhan bo ko'i papa, tuamai aku'oi diaí bidon patus tangoion ki adií i papa.'
22 Ta'e ki amaínya nogoinií kon simpaḷnya mita bo noguman, 'Kolikat! Podiaaipa mangoi kon ḷambung inta totok in nopira bo popopakeí ko'nia. Popopakeíai doman in sising kon limanya bo ḷutudai domandon in sapatu.
23 Mopaḷut makow pogamaí kong ki adií in sapi inta totok in noḷongoí bo rataídon. Kita mongaan moyotakin poḷat morame.
24 Sing ki adiíku inta aim minatoi, tana'a makow nobiagdon bui.' Bo nomangkoidon mosia norame.
25 Koyogot morame, ki adiínya inta guya-guyang kong gobaípa. Naonda in sia nobui bo nodiugdon kom baḷoi, sia nokodongog kon singog im musik pinoramean kom baḷoi monia.
26 Daí sia nogoinií kon simpaḷnya tobatuí bo noliboí mongo onu in nobalií kom baḷoinya.
27 Daí simpaḷ tatua noguman, 'Ki ai-ai i tuang nobuidon mangoi! Bo pinorataan i papamu kong ki adií in sapi inta totok moḷongoí, sin no'uliínyadon bui ing ki adiínya takin nosaḷamat!'
28 Daí sinumoruí totok ing ki adiínya guya-guyang tatua poḷat doií sinumu'ot kom baḷoi. Daí iḷumuai ing ki amaínya bo nodondo'uḷug ko'inia.
29 Ta'e adií tatua noguman ko'i amaínya, 'Aindon kon taongannya aku'oi nogaid nobantung ko'i papa. Diaí dodai onda aku'oi nomaḷawang kom parentah i papa. Yo onu degaí in inogoy i papa ko'inakoí? Sedang tongaí ki adií im bembeí diaípa dodai onda ki papa nobogoy ko'inakoí sim poramean takin yobayatku mita!
30 Ta'e naonda in nobuidon mangoi ki adií i papa inta ain nokopodaitmai kom bayongan kapunya'an i papa takin bobay mita sundaḷ, sia sinomu i papa bo pinorataan kong ki adií in sapi inta totok im moḷongoí!'
31 Daí ki amaínya notubag nana'a, 'Uleku, ikow in umuran koyota-yotakin i papa, bo bayongan kapunya'an i papa, kapunyaanmubií doman.
32 Tana'a kita im patusbií mosanang ing gina bo morame moyotakin, sing ki ai-aimu ule inta aim minatoi, nobiagdon bui. Ki ai-aimu inta nobuli, no'uliídon bui.'"
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA