Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Bang seaco amung-amung lemulun luk ngamung usin pupuk idi lun mesala' pana' iné' tuped iring Yésus sikal ninger balaNeh.
2 Idi lun Parisi idi guru-guru Ukum ngedureng, kebaladeh, "Lemulun ini nawar lun mesala' idi pamung kuman dengandeh."
3 Idi Yésus nemada' luk pinginud ini kuandeh, kebalaNeh:
4 "Kudeng seburur lemulun rat arang muyuh inan meratu dumba, idi sebuleng rat arangdeh metutu', naké ieh necan iwa' ngepulu' iwa' dumba bang laman idi amé' nakap luk metutu' ineh pad macing ieh ngalap neneh?
5 Kareb ieh ngalap neneh, idi ieh nganau' neneh luun tudungneh dengan mawang niat.
6 Kareb macing ruma'neh, idi ieh nawar lun rurumneh idi lun bang bawangneh, kebalaneh, 'Do' muyuh mawang niat denganku, ngaceku ui pangeh nengalap dumbaku luk netutu' ineh.'
7 Idi Ui pebala nemuyuh, kudeng ineh teh awang luk déi' surga ngaceku seburur lemulun luk mesala' luk uren, meluun ratnan iwa' ngepulu' iwa' burur lemulun luk matu luk na susa' uren.
8 "Kudeng seburur decur inan pulu' balad pirak, idi sebalad metutu', anunké luk ruenneh? Ieh nutud lapung idi ngapuh ruma'neh idi nakap do'-do' pad macing ieh ngalap ineh?
9 Kareb ieh ngalap usinneh, idi ieh nawar lun rurumneh idi lun bang bawangneh, keburi'neh, 'Do' muyuh mawang niat denganku, ngaceku ui pangeh nengalap usinku luk pangeh netutu' ineh!'
10 Ui pebala nemuyuh, kudeng ineh teh melaikat-melaikat Allah mawang niat ngaceku seburur lemulun luk mesala' uren."
11 Idi kebala Yésus teh, "Inan selemulun luk inan dueh anak deléi.
12 Idi keburi' luk isuut ineh kuan tamanneh, 'O Ama', maré aceh babpat binaweh kuanku.' Idi ieh nemabpat binaweh ineh kuan didueh.
13 Na mio rat pangeh ineh, idi anak luk isuut ineh nengamung amung-amung binawehneh idi iné' bang bawang luk mado; idi déi' ieh nengebura' binawehneh dengan kekamen luk dat.
14 Kareb binawehneh nabud pinasui, idi mangun aceh iru' rayeh bang bawang ineh; idi ieh pelaba asi'.
15 Idi ieh iné' ngakem kuan seburur lun bang bawang ineh; idi lemulun ineh nengecuk neneh matar barekneh déi' lati'.
16 Idi ieh melili sikal ngebor batekneh ku padak luk kenen barek ineh, iamo' seburur pana' na nemaré kuanneh.
17 Kareb ieh nengerawé do'-do', idi ieh nepebala, 'Tuda' ula' lun tebarin tamanku luk ngalap akan dengan petap, iamo' tunge' ui lélé maté ku lau!
18 Ui sikal lemubed amé' inan tamanku idi pebala neneh, O Ama', ui pangeh nenganau' sala' pa kiung Allah idi pa kiungmu pana'.
19 Na ui mayu tetanen ku anakmu peh, do' nganau' negku mangun ku seburur lun tebarinmu.'
20 Idi ieh nenalan idi iné' inan tamanneh. "Iamo' kareb ieh mado, tamanneh pangeh nekali' neneh, idi niatneh sigio ngaceku méi' neneh, idi tamanneh nupun nengapel dierneh idi nemuen neneh.
21 Idi keburi' anakneh kuanneh, 'O Ama', ui pangeh nenganau' sala' pa kiung Allah idi pa kingmu pana', na ui mayu tetanen ku anakmu peh.'
22 Iamo' tamanneh nenawar demulun-demulunneh, kebalaneh, 'Do' nguit dengan mesaget kuyu' buyor luk do' tu-tu idi ngayung neneh, idi ngebpul aceh susing luun bua' ticu'neh idi kasut luun kukudneh.
23 Idi nguit anak sapi' luk melamu, idi ngeret neneh, do' tau irau.
24 Ngaceku anakku ini pangeh naté idi muli' mulun. Ieh pangeh neraruh, idi pangeh nelemubed.' Idi ideh pana' nengimun do' ria'.
25 "Idi anakneh luk rayeh ineh déi' lati'. Kareb ieh muli' idi muneng ku ruma' ineh, idi ieh neninger uni suling idi lun ngalai.
26 Idi ieh nenawar seburur rat arang demulunneh idi nengitun, anunké luk mangun ineh.
27 Idi keburi' demulun ineh kuanneh, 'Kinanakmu luk isuut pangeh nuli', idi tamanmu nengeret aceh anak sapi' luk melamu ineh, ngaceku ieh pangeh nengalap neneh lemubed dengan ulun luk do'.'
28 Idi anak luk rayeh ineh museh na sikal semuet bang ruma', idi tamanneh neremuat ngubuk neneh semuet.
29 Iamo' kebalaneh nan tamanneh, 'Tuda' lak kinioneh ui ngakem kuanmu nateh ui nengelaba sebuleng ukummu; idi nateh iko nemaré aceh anak amék, pad ui irau dengan lun rurumku.
30 Iamo' kareb anakmu ini luk pangeh nengabud binawehmu ineh ku decur luk mesawa' nelemubed, idi iko nengeret anak sapi' luk melamu kuanneh.'
31 Idi kebala tamanneh, 'O anakku, iko megéi' idi denganku, idi amung-amung babpatku ineh mangun ku babpatmu.
32 Do' tau irau idi mawang niat, ngaceku kinanakmu ini pangeh naté idi muli' mulun; ieh pangeh neraruh idi nelemubed teh.'"
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA