Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Wali re’e seore ma’i to pantagi asele pasi tau to yusa to nato’o seja nsa’e tau madosa, sira siromu damangandonge gombo i Yesu.
2 Pei to Yahudi to aliran Parisi pasi tau to mampoguru porenta i Musa, sira sakambumbu manganto’o, “Gete, taa matao tau si’i mampogalungika tau to madosa pasi mangkoni sindara-ndara pei sira.”
3 Wali i Yesu manganto’oka sira rapa apa rani mampaponsanika sira pasisalanya sira to mampobuuka tare dosanya pasi tau to monso pu’u majea. Ia manganto’o,
4 “Rapanya re’e komi to pue domba to satu kaborosinya, pei samba’a dombanya etu pusa yau. Kesaa danaika mpue nu domba etu? Ia damampiyaika dombanya to sio mpuyu pei sio nja’u pada pei dayau mangaliwu muni dombanya to pusa etu sampe mangarata muni.
5 Wali tempo ia mangarata domba etu ia ndende kojo rayanya mamposa’a
6 pei mangkeni muni. Panewa rata ri banuanya ia mampasiromunaka samparia galunginya pasi yununya to maroo ri awenya pei manganto’oka sira, ‘Pakandende raya ngkomi sindarandara pei aku, apa aku roomo mangarata muni dombangku to pusa.’ Etu semo rapa.
7 Wali Aku manganto’oka komi, ewa see seja to mawali ndate saruga. Apa ane re’e samba’a tau to madosa to majea, bae kojo kandende ndaya nto saruga. To sana-sanang sira mampobuuka tau to samba’a to majea etu sakowa mampobuuka tau to sio mpuyu pei sio to taa majea. Naka pei tau etu taa majea apa mampobuuka tare dosanya.”
8 Panewa i Yesu magombo wo’u, Ia manganto’o, “Pasi si’i wo’u rapa, rapanya re’e tau we’a to re’e doi pera sampuyu ngkomba pei tibute yau sangkomba doi etu. Kesaa danaika ntau we’a etu? Ia damangantuni pansona pei mangansai banuanya pei madota kojo naika mangaliwu doi etu sampe mangarata muni.
9 Panewa tempo ia mangarata doi etu, ia mampasiromunaka samparia galunginya pasi yununya to maroo ri awenya pei manganto’oka sira, ‘Pakandende raya ngkomi sindarandara pei aku, apa aku roomo mangarata muni doingku to tibute yau.’ Etu wo’u rapa.
10 Wali Aku manganto’oka komi, ewa see seja kandende ndaya mpomakau i mPue Allah ndate saruga tempo re’e samba’a tau madosa to majea.”
11 Wali yako etu i Yesu manganto’oka wo’u sira rapa damampakanasaka wo’u sira sabanya naka pei Ia mampogalungika tau to madosa etu see tuwu-tuwuja re’e sira to damajea pei mampakandende raya nto saruga. Wali Ia manganto’o, “Re’e samba’a tau to dua ananya to langkai.
12 Wali re’e seore ana to kadua manganto’oka pa’anya, ‘Pa’a, waika ruyu aku tilangku ri kasugi ngkita.’ Wali pa’anya mangantilaka yau kasuginya resi ananya to dua etu.
13 “Wali tawa masae yako etu, ana to kadua etu mamporomung samparia to ia puenya pei yau njo’u tana to longko. Rata nja’u ria ia mangampake yau samparia kasuginya ri lengko ngkatuwu to taa masipato raika.
14 Wali tempo puramo kasuginya, tempo etu ratamo oro juku ri tana etu. Wali ngkai etu taa kojo gana to rapake.
15 See naka ia mawali yau to papolaong ntau to maroo ri tana etu. Wali tau puenya etu mampokau ia yau njo’u pada damangkampang wawu.
16 Wali ia yau mangika palaong to etu. Ri rayanya mangika palaong to etu ia moro kojo kamponya see naka ia rani mangkoni seja pangkoni mbawu. Pei nempo ewa wetu kasiasinya, tare tau to mangawaika ia pangkoni.
17 “Wali yako etu ia masilonga muni pampobuukanya wali ia mampobuuka, ‘Gete, samparia to papolaong mpa’angku mayabi kojo pangkoni nsira, pei aku damate moro!
18 Wali aku damayoko damawolili muni resi pa’angku pei damanganto’oka ia, “Pa’a, aku re’e mangika dosa resi i Pue Allah pasi resi komi.
19 Wali tamo masipato aku rato’oka anamu. See naka biakamo aku mawali yau ewa to papolaong ngkomi.”’ Ewa wetu pampobuuka ngkai etu.
20 Wali ia mambangu pei mayoko damawolili muni resi pa’anya. “Pei tempo ia longkowa sangkodi yako ri banuanya, pa’anya re’e mangkita ia. Ia mamporayang kojo ananya etu, see naka ia maripo mangampago ia. Rata resi ananya etu ia mangansokowaka pei manganengu ia.
21 “Panewa ananya manganto’oka ia, ‘Pa’a, aku re’e mangika dosa resi i Pue Allah pasi resi komi. Wali tamo masipato aku rato’oka anamu.’
22 “Pei pa’anya manganto’oka to papolaonginya, “Pakagasi mangoko pake to magaya kojo pei paposunsuka ia. Pasi paposunsuka sinsi ri karamanya pasi sandale ri witinya.
23 Pasi oko ana nsapi to roomo rapakaboko pei sambale yau. Anu kita mangika roa pei mampakasanang!
24 Apa anangku si’i ewa namate yau, pei si’i-si’i ia tuwu muni. Pasi ia ewa pusa pei si’i-si’i ia rarata muni.’ Wali sira mula mampakasanang.
25 “Pei tempo palaong etu mawali, ana to tu’angi nja’u nja’u nawu. Tempo ia yau muni ri banua, tawa rata nja’u ria ia mangandonge loo ntau to mataro-taro.
26 Wali ia mampokio samba’a to papolaong pei mampotanaka resi ia, ‘Kesaa to naika ntau ri banua?’
27 Wali to papolaong etu manganto’o, ‘Rata muni tua’imu, see naka pa’amu mangansambale ana nsapi to roomo rapakaboko, apa ananya rata muni resi ia pei tare mangarata salaka.’
28 “Wali ojo pangandonge ngkai etu kareba etu, ia maja’a kojo rayanya pei bo’onya masua ri raya banua. See naka pa’anya yau mamporapika kojo resi ia see ia damasua.
29 Pei ia mangansono pa’anya, ia manganto’o, ‘Gete, malagi nto’umo aku mangansawang komi, pasi tare pasi sangkani aku mangewa porentamu. Pei tare pasiwa ana nu bembe to nuwaika ngkomi aku damangika roa dakudinsika galungingku.
30 Pei ojo karata muni anamu etu to roomo mangampake yau kasugimu resi lonte, panewa komi mangansambaleka ia ana nsapi to roomo rapakaboko!’
31 “Wali pa’anya manganto’o, ‘Anangku, korom sangkani re’e resi aku, pasi samparia to aku puenya paka korom seja puenya.
32 Pei masipato kita mangika roa pei mampakasanang, apa tua’imu etu ruyu ewa namate yau pei si’i-si’i ia tuwu muni. Pasi ia ewa pusa pei si’isi’i ia rarata muni.’ Ewa wetu nato’o mpa’a ngkai etu.” Wali yako etu i Yesu manganto’o, “Wali ewa wetu Aku, Wiyaa nto Lino, apa naka pei Aku ma’i ri lino si’i damampalaes tau to raporapaka ewa tau to pusa yau, wali see naka Aku mampogalungika tau to madosa.”
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA