Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Tabea 'Aba Teofilus! Manga gudaiou de manga singina ma gou-goungu yolefo yosidi-diai 'okia naga gee 'idadi-dadiokau naga ngoneka, ge'ena la 'o Yesus 'awi 'ahu de 'awi manarama.

² 'Ona yalefo moteke kokia naga 'inasitotarino 'o nyawa gee 'onau ma sirete yamake-makekau ge'ena ka ma guruenosi, de 'onau ge'ena yositota-totara ma Habari ma Owa ge'ena.

³ Gee ngoi talega ma diaioka ma gurueka de 'isikaino, tamaoku yaowa tonisitotara ngonaka 'Aba, talefo tosidi-diai.

⁴ Ngoi todiai koge'ena, la nanako 'okia naga gee nisidotokokau ngonaka ge'ena ma gou-goungu 'itiai.

⁵ De koneda ma Habari ma Owa ge'ena ma gurueka de 'isikaino: Ma 'orasi 'o Herodes wokoanuku 'o Yudeaka, 'ena ma 'imam wimoi wi ronga 'o Zakharia. 'Una ge'ena 'o Yahudioka manga 'imam 'o bolu moino gee manga balusu 'o Abia. Ma Zakharia ma wekata mi ronga ngo Elisabet, muna mita 'ami 'asali ma 'imam 'o Harunino.

⁶ 'O giabereki go'ona manga 'ahu 'itiai ma Jo'oungu ma Dutu wi bionoka. 'Ona yakokimoteke ma Jou 'awi pareta de 'awi besesongo so koi'iwa yaparene.

⁷ Ma 'ona manga ngowaka koi'iwa sababu ngo Elisabet koma'iwa miroesoka, de 'ona yamididi yoperekiokau so koyonganonuawau 'ato de manga ngowakosi.

⁸ Ma moi ge'ena, 'o 'imam gee manga balusu 'o Abia manga 'orasi yoleleani ma Jou 'awi Woaka, 'o Zakharia wadiai 'o 'imam ma manarama ma Jou wi bionoka.

⁹ Ma ngale yositantuu nago'ona yowosama ma Jou 'awi Woaka 'o manyanyi yotuuku ge'ena yodu'undi 'isoka gee biasa 'o 'imam yodi-diai. Yo'undi de 'o Zakharia widaene.

¹⁰ 'O Zakharia 'o manyani wotuuku ma gu-gudaioka, 'ena 'o nyawa yoku-kudai doka ma dudunoka yomalahidoa.

¹¹ Ma 'orasi ge'ena ma Jou wi mala'ekati 'imasidumutu 'o Zakhariaka. 'O mala'ekati ge'ena 'ima'okode 'o manyani yodu-dutuuku ma ngiioka 'ena 'o ginirakika.

¹² Ma Zakharia gee wamakeka 'o mala'ekati ge'ena, de kowomasinakowau ma de wimodongo.

¹³ Ma 'o mala'ekati ge'ena 'ingose 'ato, "Ee Zakharia, 'uwa nimodongo sababu ma Jo'oungu ma Dutu wadawongokau 'ani lahidoa. So 'ani wekata ngo Elisabet dua momaku'arene 'ani ngowaka 'o nauru moi salingou 'awi ronga 'o Yohanes.

¹⁴ Ngona dua posironga nomorenoka, de 'o nyawa manga gudai mita dua kayomore-morene ngano ni ngowaka ge'ena 'ilahiri.

¹⁵ Sababu 'una 'asa wodadi 'o nyawa ma amoko ma Jou wi bionoka. De 'una dua kowo'oke-'okeruwa 'o 'anggur bolo 'o daluku ma gosaka. De kawosidoboanosi 'o Ngomasa 'Itebi-tebini 'awi singina yaparetano.

¹⁶ 'O Israeloka manga gudai 'asa wakituda yolio ma Jo'oungu ma Dutuka, to 'ona manga Jouka.

¹⁷ 'Una 'asa wodadi ma Jou 'awi su-suloko so 'una wosirano ma ngale wodiai ma Jou 'awi ngekomo. De 'o guata ma de 'o kuasa so 'una 'isoka ma sira ma nabii Elia. 'Una 'asa wosikatiai 'o dea de 'o ngowaka, de 'o nyawa gee koyosingou-ngounuwa ma Jouka, 'asa wakisi'asa yolio ma Jouka de yamoteke 'o di-dibangi 'iti-tiai. Koge'ena ma ngekomo 'una 'asa wadiai 'o kawasa widawongo de wisingounu ma Jou."

¹⁸ 'O Zakharia wosano ma mala'ekatika ge'ena, "Kokia ngoi tanako 'ato ge'ena dua ma goungu 'idadi? Ngoi de 'ai wekata mioperekiokau."

¹⁹ 'O mala'ekati ge'ena 'isango, "Ngoi ne'ena 'o Gabriel, ma Jo'oungu ma Dutu towile-leleani, de 'unau wosuloko tositotara 'o Habari ma Owa ne'ena ngonaka.

²⁰ Tonisidemo ne'ena, 'okia naga tongosekau gee dua ma 'orasi ya'adono de 'idadi. Ma konongakuwa, so dua nomouokau sigado ge'ena 'iodumu 'idadioka."

²¹ 'Ena 'o nyawa yoku-kudai 'ona koge'ena wida-damaa 'o Zakharia. 'Ona yatiba-tibangiou 'ido'oa so 'o Zakharia koge'ena wido'ingoka ma Jou 'awi Woaka.

²² De wosupu 'ena koidadiwau wobicara 'onaka, so ka wi giamou wosikakatumu-tumutu koge'ena womoukou so. So 'o nyawa mita yanako 'ato 'una wamake 'o no-nako 'ihera-herangi moi ma Jou wi Woaka.

²³ Gee wi manarama wakokiduangokau ma Jou wi Woaka de ma Zakharia wolio to 'una wi woaka.

²⁴ Ge'enaka de koito'ingowa 'ena ngo Elisabet miroesokau, so ka 'o woaka 'o mede motoano.

²⁵ Muna kamongosekau, "'Alele! Ne'ena ge'ena ma Jo'oungu ma Dutu woisimara'ai so 'o ngowaka tamake, so 'o nyawa koisimae-maekuawau."

²⁶ Ma 'orasi ngo Elisabet miroesoka mi mede butangau, de ma Jo'oungu ma Dutu wi mala'ekati 'o Gabriel wasuloko 'itagi daukuku 'o soana moiku 'o Galilea ma daeraaka ma ronga 'o Nazaret.

²⁷ 'O mala'ekati ge'ena 'itagi ngo Mariaka 'o mosolese mimoi 'o nauru komanakowasi. To muna 'ami baingi wi ronga 'o Yusuf, 'o demo ma 'iputusokau. 'O Yusuf 'awi 'asali ma Koana 'o Dautino.

²⁸ Ma mala'ekati ge'ena 'iboa munaka de kaingosekau, "Tabea, ngona gee ma Jo'oungu ma Dutu wonisiboso-bosono de posironga wonisibarakatioka! Ma Jou naga de de ngona!"

²⁹ Ma muna kaifoloi mododato so mi singina ma dodaka matiba-tibangi 'o demo ge'ena ma ngale 'ido'oa.

³⁰ Ge'enaka de 'o mala'ekati ge'ena 'ingoseli munaka, "Maria, 'uwa nimodongo. Sababu ngona ma Jo'oungu ma Dutu wonisibosono so wonikula 'o barakati posironga ma amoko.

³¹ De dua ngona 'asa niroesoka de nomaku'arene 'ani ngowaka 'o nauru wimoi, salingou wonisironga 'o Yesus.

³² 'Una 'asa wodadi 'o nyawa 'ila-laagomo de 'asa wisi'asoko ma Jo'oungu ma Dutu wokuru-kurutie 'awi Ngowaka ma Dutu. So ma Jo'oungu ma Dutu 'asa wigoraka 'una wodadi Koana 'isoka ma Koana 'o Dautu, to 'una wi topora.

³³ 'Una 'asa wokoana de wakipareta 'o Israeloka kaisi'ado-'adonika, de 'awi pareta 'asa koitogu-togumuawau."

³⁴ Ge'enaka de ngo Maria kamongosekau, "'Etei so ngoi ka 'o mosolesosi, de 'o nauru ma kotomasiganuwasi de kokia so 'o ngowaka moi 'asa tamake?"

³⁵ De 'o mala'ekati ge'ena 'isango, "'O Ngomasa 'Itebi-tebini 'asa nidugutiku de ma Jo'oungu ma Dutu wokuru-kurutie 'awi kuasa niriwo, so dua niroesoka de nomaku'arene. De 'ani ngowaka wotebi-tebini gu'una 'asa 'o nyawa wisi'asoko ma Jo'oungu ma Dutu wokuru-kurutie 'awi Ngowaka ma Dutu.

³⁶ Nongano-nganono ngo Elisabet 'ani 'esa moi gumuna, muna miroesoka mi mede butangau ngaro moperekiokau ma, de ngaro 'o nyawa yongose 'ato muna ma sira mi ngowaka koi'iwa ma.

³⁷ So 'uwa pongose 'ato koidadiwa, sababu ma Jo'oungu ma Dutu 'okia sonaa 'iodumu wa'akunu."

³⁸ Ge'enaka de ngo Maria kamongosekau, "Ngoi ne'ena ma Jo'oungu ma Dutu wi ro-riwo; so madaka la 'idadi ngoioka moteke 'isoka ngona nongosekau." Ge'enaka de 'o mala'ekati ge'ena ngo Maria mimadakau.

³⁹ Kage'ena 'iduangino de ngo Maria motagi 'o kota moika 'o Yudea ma daeraa 'igi-gigieka.

⁴⁰ Maika 'o Zakharia wi woaka, so gee mowosama de mitabea ngo Elisabetika.

⁴¹ De ngo Elisabet mo'isenoka ngo Maria mitabea, de 'o ngowaka gee mi dodaka 'imaitiri. So ngo Elisabet 'o Ngomasa 'Itebi-tebini 'ami singina yaparetano,

⁴² de mosigasokie kamongosekau ngo Mariaka, "Naga 'o nge-ngeweka 'iodumoka ngona 'ifoloi ma Jo'oungu ma Dutu wonisibarakati! De wisibarakati 'o ngowaka gee doka ni dodaka!

⁴³ Posironga tosanangioka sababu 'ai Jou ma 'esa moboa ngoino, ngaro ngoi ka 'okiawa 'idaene ma.

⁴⁴ Sababu ma gou-goungu gee to'isenoka 'ani tabea, de 'o ngowaka 'ai dodaka gee 'imaitiri 'imorene.

⁴⁵ Nosanangioka ngona sababu nongaku 'ato 'okia naga gee ma Jou wongosekau ngonaka ge'ena dua 'idadi."

⁴⁶ Deika ngo Maria mongose, "Ngoi towisiarene ma Jou,

⁴⁷ de tomorene sababu ma Jo'oungu ma Dutu 'ai Ro-riwo Wosilaha-laha.

⁴⁸ 'Una kawoisi-singina 'awi ro-riwo kokiawa 'idae-daene ne'ena. Ne'enau de 'isikaika 'o nyawa 'iodumu 'asa yongose 'ato ngoi tosanangi,

⁴⁹ ngano ma Jo'oungu ma Dutu gee 'awi kuasa ma batingi koi'iwa gu'una wodiai 'okia sonaa 'ila-laagomo ngoioka. 'Una posironga wotebinoka.

⁵⁰ De 'awi dora kaisi'ado-'adonika 'o nyawa-nyawaka gee wisingou-ngounu 'unaka.

⁵¹ 'Una wosidumutu 'awi kuasa naga 'awi manaramoka, de wakisibiakoroka 'o nyawa gee manga singina 'ikuru-kurutie.

⁵² 'Una 'o koa-koana wakisiogoro yopareta, de gee kokiawa yakidae-daenuku wakigoraka yopareta.

⁵³ 'O nyawa yakisawi-sawini wakisidugaka de 'okia sonaa yaowa-owa. 'O nyawa yokaya-kaya wakisuloko yotagi ko manga kia-kiawa.

⁵⁴ 'Una wakiriwo 'o Israeloka to 'una 'awi kawasa, moteke wojajiokau to ngone nanga edete de nanga dotumika.

⁵⁵ Ma Jou kowamongoruwa 'awi jaji; 'una wi singina 'isure 'o Abrahamuka, de 'awi ngowaka de wi dangonuku kaisi'ado-'adonika."

⁵⁶ De ngo Maria poilia 'o mede sa'angeno momanoa de ngo Elisabet, 'asa de molio.

⁵⁷ Ngo Elisabet mi 'orasi ya'adono momaku'arene, de momaku'arene mi ngowaka 'o nauru wimoi.

⁵⁸ 'Ami woa ma sidateke, mi ma-manai de mi 'esa moi yo'isenoka 'ato ma Jou 'awi singina koge'ena ma sure ngo Elisabetika, de 'ona mita kayomore-morene de de muna.

⁵⁹ Gee 'o ngowaka ge'ena ma 'umuru 'o wange tuangerou, de 'ona yoboa wisuna. 'Ona yomau 'o ngowaka ma dingoono gu'una wisironga 'o Zakharia moteke ma dea wi ronga.

⁶⁰ Duga ma 'esa mongose, "Ko'uwa! 'Una salingou wisironga 'o Yohanes."

⁶¹ De 'ona yongose munaka, "'Ani 'esa moi komoiwa manga ronga koge'ena."

⁶² Ge'enaka de 'ona yosano 'o Zakhariaka kayoakotawi 'okia wisironga 'awi ngowaka gu'una.

⁶³ 'O Zakharia woga'asoko 'onaka 'o teto yatuli-tulisi moi de watulisuku, "'Awi ronga 'o Yohanes." 'Ona yoodumu yoherangi.

⁶⁴ Kage'ena ma 'orasi de 'o Zakharia 'idadiokauoli wobicara de wisiarene ma Jo'oungu ma Dutu.

⁶⁵ So manga sidateke de manga ma-manai de manga 'esa moi yakikokimodongo de wihoromati ma Jou. De gee 'idadi-dadiokau ge'ena ka manga 'uru ma doe ge'ena 'o Yudea ma daeraa 'igi-gigieka yasuluunuku.

⁶⁶ 'O nyawa yoodumu gee yo'ise-'isene ge'ena yatiba-tibangi de kayongosekau, "'O ngowaka nu'una ma rai wodadi 'o nyawa 'iba-baraguna," sababu ma Jou de de 'una.

⁶⁷ 'O Zakharia 'o ngowaka ge'ena ma dea, 'o Ngomasa 'Itebi-tebini 'awi singina yaparetano wosidemosira kawongosekau,

⁶⁸ "Nou, ngone powisiarene 'o Israeloka nanga Jo'oungu ma Dutu sababu 'una woboakau ma ngale wonariwo watuusu wonasipidili 'awi kawasa 'o dorouoka.

⁶⁹ 'Una wonakulakau nanga Ro-riwo Wonasilaha-laha wokua-kuata, wi 'asali 'o Dautino, to 'una wi gilaongo.

⁷⁰ Ka ma sirasi ma Jo'oungu ma Dutu wojajiokau 'awi nabii yotebi-tebinika

⁷¹ ma ngale wonasipidili nanga musuoka de 'o nyawa 'inadu-du'uduku manga pareta ma sigoronaka.

⁷² 'Una koge'ena wodiai ma ngale wakisimara'ai nanga edete de nanga dotumu de ma ngale wagoungu 'awi jaji 'itebi-tebini.

⁷³ 'Una wojajiokau sigado wosasi nanga dea 'o Abrahamuka, ma ngale wonariwo wonasipidili nanga musuoka la ngone 'uwa 'inamodongo powileleani

⁷⁴ (1:73)

⁷⁵ de nanga 'ahu 'itebi-tebini 'awi bionoka sigado posongenoka.

⁷⁶ Ee ngona 'ai ngowaka, 'asa nisi'asoko ma Jo'oungu ma Dutu wokuru-kurutie 'awi nabii. Ngona de ma Jou dua ngona nosirano ma ngale 'awi ngekomo nodiai,

⁷⁷ de nakisisahe 'awi kawasaka 'ato 'ona 'asa yakisilaha, ma titi ma Jo'oungu ma Dutu kowosi-singinawau manga so-sowono.

⁷⁸ To ngone nanga Jou 'awi singina 'isure de 'awi dora 'iamoko. Ge'enau so 'una woboa wonariwo wonasilaha. 'Una waino matero 'o wange 'ipootekie 'o ngoru-ngorumika.

⁷⁹ 'Una wokula 'awi darangi 'o nyawa 'iodumika gee yo'ahu 'o darusoka de gee yakimodo-modongo yosongene. 'Una wonasingekomo posikaika 'isa-sanangika."

⁸⁰ 'O Zakharia wi ngowaka gu'una kawofero monga de kaifoloi monga wo'ahu de ma Jo'oungu ma Dutu. Gee woamokokau de womanoa 'o ngii 'irii-riidoka 'o tonaka 'ika-kakasaka sigado ma 'orasi ya'adono womasidumutu 'o Israel ma nyawaka.

Lukas

Video Lukas 1

Ikuti Kami:

KONTAK | PARTISIPASI | DONASI