Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ama Teofilus, Hataholi ba'u ka sanga basa enok fo ala sulak latalolole la'eneu basa manda'dik fo ala da'di nai ita tala'da so.

² Ala sula kana nandaa no basa hata fo nanatuik neu ita neme hataholi fo lita matan manda'dik sila la neme makasososa na mai, de basa boema ala tui-bengan.

³ Au palisak matalolole basa dede'ak sila la neme makasososa na mai, de au afa'da ae, malole soaneu au sula ka hala nafa'dak esa no malole soaneu Tuan.

⁴ Au tao ndia fo ela Tuan bubuluk nae, hata fo nanananoli basak neu Tuan ndia, memak tete'e ka.

⁵ Lelek fo Herodes da'di manek nai nusa Yudea, hapu imam esa na'de Zakaria. Ana masok nai imam-imam Abia nakabua na. Saoina na na'de Elisabet, fo tititi-nonosin imam boe.

⁶ Saotouk saoinak ia la so'da nala nandaa no Manetualain dale na. Duas tunga basa paleta ma Manetualain hoholo-lalanen no dale katematuak.

⁷ Tehu duas anan ta, nana Elisabet kalate'dis ma duas boeo lamalasi so.

⁸ Faik esa fo nai lelek Abia nakabua na hapu baba'ek soaneu lalalau-laoono boema, Zakaria nakalala'ok bela ba'un da'dileo imam nai Manetualain matan.

⁹ No tu'u batu fo imam-ima mala biasa taon, boema Zakaria nananatu'duk soaneu masok leo Manetualain Uman dale neu fo ana tunu boominik.

¹⁰ Ana bei ito-ato tutunu boomini ka te, hataholi ba'u ka hule-haladoi lai deak,

¹¹ No kaiboik, Manetualain ata nusa so'da na natu'du ao na neu Zakaria. Ata nusa so'dak ndia napadeik nai mei tutunu boomini ka boboa kona na.

¹² Lelek fo Zakaria nita ata nusa so'dak ndia boema, napangamak ma ana bii.

¹³ Tehu ata nusa so'dak ndia nafa'da nae, "Boso bii, Zakaria! Manetualain namanene basa o huhule-haladoim so. O saoinam Elisabet, neukose ana bongi na ni'iana touanak esa, fo o muse foin na'de Yohanis.

¹⁴ Neukose o mamahoko manseli, ma hataholi ba'u ka neukose lamahoko-setelee metema ni'iana ndia mahani te nanabongik!

¹⁵ Neukose ana da'di hataholi matua, nai Manetualain mata memete na, ma neukose ta ninu angol do nininuk fo nini mamafuk fa. Neukose Manetualain Dula Dale na koasa nan, neme bongin nana mai.

¹⁶ Neukose ana hela-nole hataholi Israel ba'u ka fali leo Manetualain fo sila senedo'o ka.

¹⁷ Neukose ana da'di Manetualain hataholi nadedenu balakain, ma nanuu koasa sama leo Elia. Neukose ana mole-dame ama ka no ana ka, ma hataholi manatunga ta kala, neukose ana hela-noles fali leo dudu'a-aafik fo ndoo sa leu. No enok ndia, ana sadia hataholi kamahehelek bubuak esa fo laheheleaon basa, soaneu Lamatua ka so."

¹⁸ "Tao leo beek fo au bubuluk ae dede'ak ndia ana da'di? Zakaria natane ata nusa so'dak ndia. Au ia amalasi so, ma au saoina nga boeo namalasi so."

¹⁹ Ata nusa so'dak ndia nataa nae, "Au ia Gabrial. Au alalau-aoono Manetualain, ma Ndia nde nadenu au anduku-alosak hala malole ia neu o.

²⁰ Hata fo au afa'dan, neukose ana da'di neu fai na. Tehu hu ka nde o ta nau mamahele fa de, mahani te o ta hapu kokolak fa. Neukose o da'di hala tak losa hata fo au afa'dan ia, ana da'di."

²¹ Ndia te, hataholi la lahani lahele Zakaria. Ala dodoo doa kana, tao le'e de ana doo doo basa ia nai Manetualain Uman dale.

²² Ma nai lelek fo ana kalua mai te, ana ta hapu kokolak nos so'on. Ka'da ana fe ta'du nakandoo ninik lima na, ma hala tak nahele. Boema hataholi la boeo ala bubuluk lae, ana nita basa ninitak esa nai Manetualain Uman dale so.

²³ Basa lau-onon nai Manetualain Uman, boema Zakaria fali ne'un leo uman neu.

²⁴ Beita doo ka boen te, Elisabet fo saoina na nailu, boema ana ta kalua uma, bulak lima dale na.

²⁵ Ana nafa'da nae, "Mate'e na, Manetualain tulu-fali au, ma Ana loseheni au taidae nga."

²⁶ Lelek Elisabet nailu bulak ne boema, Manetualain nadenu ata nusa so'dan Gabria la neu leo kota Nazaret neu fo nai nusa Galilea.

²⁷ Nadenu Gabrial neu leo anafe'oana matatema esa, na'de Maria. Ana fe'oana matatema ndia, tonangan no touk esa na'de Yusuf, fo Mane Dau ka tititi-nonosin ndia.

²⁸ Ata nusa so'dak ndia neu leo Maria neu, de nafa'dan nae, "So'da-molek neu o fo te'e-te'e Manetualain ba'e-pala o! Manetualain sama-sama no o!"

²⁹ Nai lelek Maria namanene ata nusa so'dak ndia kokola na boema, ana nggenge la ma tane-tane nai dalen dale nae, so'da-molek ndia sosoa na hata.

³⁰ Boema ata nusa so'dak ndia nafa'dan nae, "Boso bii Maria, nana o mandaa mo Manetualain dale na.

³¹ Neukose o mailu, fo o bongi ni'iana esa, fo o muse foin na'de Yesus.

³² Neukose Ana da'di namatutua-namadedemak, ma neukose loken lae, Manetualain Anan Fo Madema Ina Nanseli. Neukose Amak Manetualain taon da'di manek, sama leo Mane Dau ka fo ba'ikai na.

³³ Ma neukose Ana paleta sama leo manek neu Yakob tititi-nonosin losa dodoo na. Nusa na neukose ta hapu mate'e na fa."

³⁴ "Tehu au bei matatema", Maria nafa'da ata nusa so'dak ndia, "tao leo bee fo dede'ak ndia bisa da'di?"

³⁵ Ata nusa so'dak ndia nataa nae, "Manetualain Dula Dale na neukose ana mai neu o, ma Manetualain koasa na neukose poti na o. Hu ka nde ndia de, ni'iana fo neukose o bongin ndia loken lae, Malalaok, Manetualain Anan.

³⁶ Mafandendelek: Te Elisabet fo o tolanoom ndia nailu bulak ne ia so, leomae namalasi so, ma hataholi la lafa'dan lae, ndia ina kalate'dis.

³⁷ Nana ba'eneu Manetulain soona, ta hapu hata fo ana ta da'di fa."

³⁸ Boema Maria nae, "Au ia Manetualain atan; neme na fo ana da'di tunga hata fo o mafa'da ka." Boema ata nusa so'dak ndia la'oela Maria.

³⁹ Basa ndia de beita doo ka boen te Maria neu leo kota esa nai Yudea, fo nai nggolo letelepa na.

⁴⁰ Neu leo Zakaria uman neu. Nai lelek ana masok nala uma dale boema, nate'a Elisabet.

⁴¹ Ma leondiak Elisabet namanene Maria nate'an ndia, tutika ni'iana manai Elisabet ilun dalen ndia nakababale. Boema Manetualain Dula Dale na koasa na Elisabet,

⁴² de nalo ma nae, "O nde nanaba'e-palak ba'u na seli nai basa ina kala! Nanaba'e-palak neu ni'iana fo neukose o bongin ndia!

⁴³ See au ia, de nalosa Lamatua ka inan mai leo au mai?

⁴⁴ Leondiak au amanene o nate'a ma tutika ni'iana manai au ilung dale ia nakababale fo ta'du na nae namahoko.

⁴⁵ Maua-manalek neu o, hu ka nde o mamahele mae hata fo Manetualain nafa'dan neu o a neukose ana da'di!"

⁴⁶ Maria nae, "Au dale nga koa-kio Manetualain,

⁴⁷ ma au samane nga namahoko-setelee nana Manetualain au Manasoi-Manatefa nga.

⁴⁸ Ana nafandele au fo atan matasi'da-matasaik ia! Mulai besak ia, basa leoina la lafa'da lae, au aua-anale.

⁴⁹ Nanahu Manetualain, Fo Mana Koasa nanseli a Ana tao-no'i dede'a matuaina la neu au. Na'de na malalaok.

⁵⁰ Neme tititi-nonosik leo tititi-nonosik neu Manetualain tao dale susue na neu hataholi fo manabii neu na.

⁵¹ No lima balakai na, Ana tao tapasasala hataholi mana koao-ndaeao ka, ma Ana tao tasibu dale tutu'u nala.

⁵² Nakonaheni mane-mane kala leme kandela mane nala lain mai ma hataholi matasi'da-matasai kala nanatao namadedemak.

⁵³ Hataholi kamala'a-kamandoe kala, Ana tao nakabetes ninik basa malole lala'ena, tou kamasu'i-makabete ka, nanausik no limalouk.

⁵⁴ Ana tulu-fali Israel Ata na, tunga hehelu-balatak, fo Ana taon no ita bei-ba'ikai nala.

⁵⁵ Manetualain ta nafandeleheni hehelu-balataan fa, Dale na malole neu Abraham ma tititi-nonosi nala, losa dodoo na."

⁵⁶ Fafa'ka ma bulak telu dale na, Maria leo no Elisabet, besa ka ana fali leo uman neu.

⁵⁷ Fai na losa ba'eneu Elisabet soaneu ana bongi. Ana bongi na niana touanak esa.

⁵⁸ Uma titia-tatai nala, ma tolanoo-ka'a fa'di nala, lamanene Manetualain malole nanseli no Elisabet, de sila boeo lamahoko-setelee lon.

⁵⁹ Lelek fo ni'iana ndia teu na faik falu, boema ala lon fo soaneu suna tana. Ala nau foi ni'iana ndia na'de Zakaria, fo tunga aman na'de na, fo Zakaria,

⁶⁰ tehu inan nae, "Ta! muse foin na'de Yohanis,"

⁶¹ Tehu lafa'dan lae, "Ta hapu hataholi esa boen neme sila tolanoo ka'a-fa'di nala na'de na leondiak fa,"

⁶² Boema latane Zakaria ninik ta'du-tana, fo ana foi ana na na'de see.

⁶³ Zakaria noke fen batu lei esa, boema ana sula kana nae, "Na'de Yohanis." Basa-basas dodoo doa kana.

⁶⁴ Nai lelek ndia boe, Zakaria hapu kokolak seluk, boema ana koa-kio Manetualain.

⁶⁵ Uma titia-tatai nala basa-basas ala bii beno'u. Boema halak ndia sipela leo basa nusak manai Yudea letelepa nala neu.

⁶⁶ Basa hataholi fo lamanene dede'ak ndia, betane nai dale nala dalek lae, "Neukose ni'iana ndia ana da'di beek?" Nanahu Amak Manetualain no kana.

⁶⁷ Manetualain Dula Dale na koasa na Zakaria fo ni'iana ndia aman, de nalosa nanduku-nalosak hala heheluk maneme Manetualain mai nae,

⁶⁸ "Mai fo ata koa-kio Manetualain, fo leoina Israe la sene-do'o ka! Ana mai tulu-fali hataholi kamahehele nala so ma Ana soi-po'is.

⁶⁹ Ana fe ita manasoi-tefa balakai lea, Dauk fo ata na tititi-nonosin.

⁷⁰ Makahulun eli, tunga nabi-nabi nanahele nala, Manetualain fe basa hehelu-balataan

⁷¹ soaneu soi-tefa nala ita teme ita musu no nala mai ma neme hataholi-hataholi fo lakamu-lakadau ita,

⁷² Soaneu natu'du dale malole na neu ita bei ba'ikai nala, de neukose Ana tao natetu hehelu-balataa malalaon ndia.

⁷³ Ana soo-supa no Abraham fo ita aman, ma Ana helu soaneu Ana soi-tefa na ita teme ita musu no nala mai, fo ela ita talalau-taoonon boso no bibii-namata'uk.

⁷⁴ (1:73)

⁷⁵ takaluku-takatele neun tataas esa ma tao tamahoko dale na nai ita fai maso'da manalu na dalek.

⁷⁶ O, hei Au anango nei, neukose O nanasseik Manetualain fo Matua Madema Ina nabin. O nananadenuk nakahuluk neme Lamatua ka mai soaneu o oti enok ba'eneun,

⁷⁷ soaneu tui-benga neu hataholi kamahehele nala mae, neukose sila nanasoi-tefak, metema Manetualain fe basa do'o do ampon neu sila sala-singo nala.

⁷⁸ Ita Manetualain dale malole, bai te manasue-laik; soaneu Ana soi-tefa ita de Ana mai. Sama leo le'do tii nai fai fafai na,

⁷⁹ leondiak boe, Ana fe mangale'do na neu basa hataholi fo laso'da nai makahatu ka dalek ma bibii-namata'u ka. Ana hela-nole ita leo enok fo manaleo mole-dame neu."

⁸⁰ Zakaria anan ndia boetai namatua ka, ma dula dale na boetai balakaik. Ana leo nai mo maloa, losa fai na losa, natu'du aoina na neu leoina Israe la.

Lukas

Video Lukas 1

Ikuti Kami:

KONTAK | PARTISIPASI | DONASI