Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Teopilus saq budiman, Luwẽq dengan sampun berusahe nulis secare teratur peristiwe-peristiwe saq sampun telaksane lẽq tengaq-tengaq ite.

² Ie pade nulis sesuai maraq saq tesampẽang tipaq ite siq dengan-dengan saq serioq mẽsaq peristiwe-peristiwe nike lẽman penembẽq dait sesampun nike nyiarang kabarne.

³ Sesampun tiang selidik secare teliti selapuqne nike lẽman penembẽqne, tiang anggep solah jari nulis sopoq laporan saq teratur umaq side.

⁴ Tiang ngelaksaneang nike, adẽq side nenaoq bahwe napi saq sampun teajahang tipaq side mule kenaq.

⁵ Sewaktu Herodes jari raje negeri Yudea, araq sopoq imam aranne Zakaria. Ie termasuk golongan imam-imam Abia. Sebiniqanne ẽndah asalne lẽman keturunan Harun, aranne Elisabet.

⁶ Kehidupan senine-semame nike nyenengang Allah. Deduaqne taat lẽq selapuq prẽntah dait hukum-hukum Tuhan secare sempurne.

⁷ Ie pade ndẽq bedowẽ bije sẽngaq Elisabet bangkol dait deduaqne sampun lingsir.

⁸ Lẽq sopoq jelo, sewaktu golongan Abia mauq giliran, Zakaria ngelaksaneang tugas sebagẽ imam lẽq arepan Allah.

⁹ Siq undian, saq biasene telaksaneang siq imam-imam, Zakaria tetugasang tame ojok dalem Gedẽng Allah dait tunuq menyan.

¹⁰ Lẽq waktu upacare tunuq menyan telaksaneang, dengan luwẽq bedo'e lẽq luah.

¹¹ Lẽq waktu nike malaẽkat Tuhan nyatayang diriq tipaq Zakaria. Malaẽkat nike nganjeng lẽq sedi kanan mẽje taoq tunuq menyan.

¹² Sewaktu Zakaria serioq malaẽkat nike, ie bingung dait takut.

¹³ Laguq malaẽkat nike bebase, "Ndaq takut, Zakaria! Allah sampun pireng do'ende. Elisabet, seninende gen bijeang sopoq kanak mame. Side harus aranin ie Yahya.

¹⁴ Side gen bahagie dait cemoh gati, dait luwẽq dengan gen besukecite lamun kanak nike tebijeang!

¹⁵ Ie gen jari dengan belẽq lẽq arepan Tuhan, dait ie ndẽq gen nginem anggur atao ineman keras. Ie gen tekuasein siq Roh Allah lẽman tepetianang siq inaqne.

¹⁶ Luwẽq dengan Israel gen ie bimbing tulak tipaq Allah, Tuhan ie pade.

¹⁷ Siq roh dait kuase Elia ie gen jari utusan Tuhan. Ie gen damẽang dengan toaq kance bijene, dait dengan saq ndẽq taat gen ie pimpin tulak ojok pikiran saq kenaq. Siq care nike ie nyiepang sopoq umat saq patut bagi Tuhan."

¹⁸ "Berembẽ tiang nenaoq bahwe hal nike gen telaksane?" Zakaria metakẽn lẽq malaẽkat nike. "Tiang sampun toaq dait senine tiang ẽndah sampun toaq."

¹⁹ Jawab malaẽkat nike, "Tiang niki Jibril. Tiang ngelayanin Allah dait Ie saq ngutus tiang nyampẽang kabar solah niki tipaq side.

²⁰ Napi saq tiang sampẽang gen telaksane lẽq waktune. Laguq lantaran side ndẽq percaye, side ndẽq tao ngeraos; side gen pakoq jangke napi saq tiang sampẽang nike telaksane."

²¹ Lẽq waktu nike, dengan-dengan tetep ngantih Zakaria. Ie pade bengaq kembẽq ie ngonẽq gati lẽq dalem Gedẽng Allah.

²² Dait lẽq waktu ie sugul, ie ndẽq tao ngeraos kance ie pade. Ie tetep doang ngebẽng isarat kadu imene, dait tetep pakoq. Make dengan-dengan ẽndah nenaoq bahwe Zakaria sampun serioq sopoq hal saq ajaip lẽq dalem Gedẽng Allah.

²³ Sesampun tutuq mase tugasne lẽq Gedẽng Allah, Zakaria ulẽq ojok gedẽngne.

²⁴ Ndẽq ngonẽq sesampun nike, Elisabet seninene betian, terus ndẽqne sugul-sugul lẽman lime bulan ngonẽqne.

²⁵ Elisabet bebase, "Ahirne Tuhan nulung tiang dait ngapus kehinean tiang lẽq julun dengan."

²⁶ Sewaktu Elisabet sampun betian enem bulan, Allah ngutus malaẽkat Jibril lumbar ojok Nazaret, sopoq kote lẽq daẽrah Galilea.

²⁷ Jibril teutus tipaq sopoq dedare genten, aranne Mariam. Mariam nike sampun betunangan kance sopoq dengan aranne Yusup, keturunan Raje Daud.

²⁸ Malaẽkat nike rauh tipaq Mariam dait bebase, "Salam, side saq teican paice! Tuhan bareng kance side!"

²⁹ Sewaktu dengah basen malaẽkat nike Mariam tinjot, sehingge beketuan-tuan dalem angenne napi arti salam nike.

³⁰ Make malaẽkat nike bebase lẽq ie, "Ndaq takut Mariam! Sẽngaq side sampun mauq paice lẽman Allah.

³¹ Side gen betian dait bijeang sopoq kanak mame. Harus side aranin Isa.

³² Ie gen jari agung dait tesebut Bije saq asalne lẽman Allah Saq Maheagung. Allah, Tuhante gen jariang Ie raje maraq Raje Daud, leluhur-Ne.

³³ Dait Ie gen mrẽntah jari raje lẽq keturunan Yakub selaẽq-laẽqne. Kerajaan-Ne ndẽq gen tutuq."

³⁴ "Laguq tiang masih dedare genten," basen Mariam tipaq malaẽkat nike, "berembẽ hal nike bau telaksane?"

³⁵ Jawab malaẽkat nike, "Roh Suci gen rauh tipaq side, dait kuase Allah Saq Maheagung gen nguasein side. Keranaq nike bije saq gen tebijeang nike gen tesebut suci, Bije saq asalne lẽman Allah.

³⁶ Setetune Elisabet, sanakde nike sampun betian enem bulan, timaq ie sampun lingsir dait dengan paran ie bangkol.

³⁷ Sẽngaq bagi Allah nẽnten araq saq mustahil."

³⁸ Beterus Mariam bebase, "Tiang niki pelayan Tuhan; menengang telaksane lẽq tiang maraq saq pelungguh sampẽang." Beterus malaẽkat nike lumbar bilin Mariam.

³⁹ Pire waktu sesampun nike, Mariam lumbar ojok sopoq kote lẽq Yudea lẽq daẽrah pegunungan.

⁴⁰ Ie lumbar ojok gedẽng Zakaria, dait sewaktu ie tame, ie ngucapang salam tipaq Elisabet.

⁴¹ Dait sewaktu Elisabet dengah salam Mariam, bebẽaq saq lẽq dalem tianne nike berunjaq-runjaq. Make Elisabet tekuasein siq Roh Suci,

⁴² terus bebase siq suare saq belẽq, "Side saq paling teberkahin lẽq antare selapuq dengan nine! Teberkahin bebẽaq saq gen side bijeang nike!

⁴³ Sai tiang niki sehingge mamiq bini Junjungan tiang Saq Mulie rauh tipaq tiang?

⁴⁴ Sewaktu tiang dengah salamde, bebẽaq dalem tian tiang berunjaq-runjaq saking cemohne.

⁴⁵ Bahagie side, sẽngaq percaye bahwe napi saq temanikang siq Tuhan tipaq side gen telaksane!"

⁴⁶ Mariam bebase, "Atẽn tiang mulieang Tuhan,

⁴⁷ dait jiwen tiang besukecite sẽngaq Allah, Juruselamet tiang.

⁴⁸ Ie iling lẽq tiang, hambe-Ne saq hine! Mulai mangkin selapuq bangse bebase tiang bahagie.

⁴⁹ Sẽngaq Allah Saq Mahekuase ngelaksaneang hal-hal belẽq lẽq tiang. Pesẽngan-Ne nike suci.

⁵⁰ Keturunan demi keturunan Ie ngicanin rahmat tipaq dengan saq takut lẽq Ie.

⁵¹ Siq gading-Ne saq perkase Ie miaq buyar dengan saq sombong, dait oreang rencane ie pade.

⁵² Raje-raje turunang-Ne lẽman tahte dait dengan hine teatasang kedudukanne.

⁵³ Dengan lapah tepuasang siq selapuq kebajikan, dengan sugih tesediq nẽnten teicanin jauq napi-napi.

⁵⁴ Ie nulung Israel, hambe-Ne, sẽngaq Ie iling lẽq rahmat-Ne,

⁵⁵ maraq saq Ie janjiqang tipaq leluhurte, tipaq Ibrahim dait keturunanne jangke selaẽq-laẽqne."

⁵⁶ Kire-kire telu bulan ngonẽqne Mariam ndot bareng Elisabet, baruq ie ulẽq ojok gedẽngne.

⁵⁷ Sampun waktune Elisabet bebije. Ie bijeang sopoq kanak mame.

⁵⁸ Tetangge-tetanggene dait kadang jarine dengah bahwe Tuhan sampun nyatayang rahmat-Ne saq belẽq gati lẽq Elisabet, ie pade ẽndah milu besukecite bareng kance ie.

⁵⁹ Sewaktu bebẽaq nike beumur baluq jelo, ie pade dateng jari sunat kanak nike. Ie pade mẽlẽ ngaranin bebẽaq nike Zakaria, maraq aran bapaqne,

⁶⁰ laguq Elisabet bebase, "Ndaq, ie harus tearanin Yahya!"

⁶¹ "Ndẽq sopoq dengan juaq lẽq antare keluargende bedowẽ aran maraq nike," basen ie pade lẽq Elisabet.

⁶² Beterus kadu isarat ie pade beketuan lẽq Zakaria aran napi saq mẽlẽ ie bẽng tipaq bebẽaq nike.

⁶³ Zakaria tunas sopoq batu tulis, terus nulis, "Aranne Yahya." Ie pade selapuq bengaq.

⁶⁴ Waktu nike ẽndah Zakaria tao ngeraos malik beterus ie mulieang Allah.

⁶⁵ Tetangge-tetanggene selapuq takut, dait kabar nike nyebar ojok selapuq wilayah pegunungan Yudea.

⁶⁶ Selapuq dengan saq dengah berite nike beketuan lẽq dalem angenne, "Jari napi bebẽaq nike ẽraq?" Sẽngaq Tuhan araq bareng kance ie.

⁶⁷ Zakaria, bapaq bebẽaq nike tekuasein siq Roh Suci, sehingge ie nyampẽang pesen lẽman Tuhan. Ie bebase,

⁶⁸ "Silaq ite memuji Allah, Tuhan bangse Israel, sẽngaq Ie sampun rauh tipaq umat-Ne dait bẽbasang ie pade.

⁶⁹ Ie ngicanin ite penyelamet saq perkase, lẽman keturunan Daud, hambe-Ne.

⁷⁰ Jaman laẽq, langan nabi-nabi-Ne saq suci, Ie sampun ngicanin janji-Ne

⁷¹ jari nyelametang ite lẽman musuhte, dait lẽman kuase dengan-dengan saq meriq lẽq ite.

⁷² Jari nyatayang rahmat-Ne tipaq leluhurte, janji-Ne saq suci nike gen Ie tepatin.

⁷³ Ie besumpah tipaq Ibrahim, bapaq leluhurte, dait bejanji jari nyelametang ite lẽman musuhte, adẽq ite ndẽq takut ngelayanin Ie,

⁷⁴ (1:73)

⁷⁵ tetep suci dait tejariang kenaq lẽq arepan-Ne seumur idupte.

⁷⁶ Side, anak tiang, gen tesebut nabi Allah Saq Maheagung, sẽngaq side teutus juluan lẽman Tuhan jari nyiepang Ie langan,

⁷⁷ dait jari ngebẽng pengertian tipaq umat-Ne mengenai keselametan saq tedasarang pengampunan dose-dose ie pade,

⁷⁸ siq rahmat dait belas kasihan lẽman Allahte, Ie rauh jari nyelametang ite. Maraq jelo saq tiwoq lẽq kelẽmaq aru,

⁷⁹ maraq nike Ie ngicanin cahaye-Ne tipaq selapuq dengan saq idup lẽq dalem peteng dait ketakutan. Ie pimpin ite tipaq langan damẽ sejahtere."

⁸⁰ Bije Zakaria nike sayan belẽq dait sayan kuat rohne. Ie ndot lẽq padang gurun, jangke dateng waktune ie harus nyatayang diriqne tipaq bangse Israel.

Lukas

Video Lukas 1

Ikuti Kami:

KONTAK | PARTISIPASI | DONASI