Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Tuang Teopilus inta mopia. Nobayongdon intau ain noramiji nomais kino-tompia kon soaáḷ mita inta ain nobalií kon sigad naton.
2 Onu im pinais monia tatua notongkaibií naí inta ino'uman ko'i naton i intau mita inta ain noko'ontong tontanií kon kinobaliían tua komintan nongkon pinomangkoianmai. Intau doman mita tatua inta minaya-mayak makow nopohabar kon onu inta ain nobalií tatua.
3 Tuamai naíonda im binalajarku muna intua komintan nongkon kinobaliíannya, pinikirku, mopiabií totok aka habar tatua paison kotompiaían kom bonu im buk bo ogoi ko'i tuang,
4 simbaí kota'auan i tuang kon onu inta ain sinunduí mita ko'i tuang in totu'ubií kon ain nobalií.
5 Wakutu ing ki Herodes nobalií raja kom butaí in Yudea, oyuíon imang, tangoinya ki Zakharia. Ki Zakharia na'a in imang nongkon kolompok inta sinangoian "kolompok Abia" (imang mita katurunan i Eliezer). Ki buḷoinya katurunan doman in imang, tangoinya ki Elisabet.
6 Kobobiag inayadua motonibuḷoi tua mokosanang kong gina i Allah, sin taya-dua in umuranbií dinumudui kom parentah bo atorang i Tuhan, diaíbií in sinaliban monia.
7 Tongaí mosia na'a diaí kogadií, sing ki Elisabet im bantoí bo taya dua na'a aindon mogoguyang doman.
8 Kon singgai tobatuí, wakutu ing kolompok i Abia na'a noko'ulií kon tonsilai tumu'ot kom Baḷoi Tuhan, daí ki Zakharia im minayak bo nogaid kon oaíidan in imang kon tayowon i Allah.
9 Si wakutu in inundi inta kabiasa'an monia monantuí kong ki ine in imang tumu'ot kom Baḷoi Tuhan mogaid kon oaíidan imang, daí sia ing kinopiliían tumu'ot bo motubaí kong kamanya kom bonunya.
10 Kon dodai im pinotuba'an kong kamanya, bayongan intau nosipun kon ḷuai bo nosambayang.
11 Bo ko wakutu in sia notubaí kong kamanya, malaekat i Tuhan nokipogontong ko'inia. Malaekat tatua sinimindog kon dotaí ing koḷanan meja pototuba'an kong kamanya.
12 Naonda in noko'ontongmai kom malaekat tatua, no'italikokog in sia bo inangoian in ondok.
13 Ta'e kain singog im malaekat tatua ko'inia, "Dika mo'ondok Zakharia, sim mintahangmu inindongogandon i Tuhan, daí ki Elisabet ki buḷoimu tua im mopolahirbií in adií ḷoḷaki, bo mustibií tangoianmu ki Yohanes in adií tatua.
14 Mosanang bo moḷunganga totok ing ginamu, naí doman tua, mobayong doman intau im mosang ing gina aka adií tatua mo'ilahirdon.
15 Sia im mobalií intau moḷoben kon tayowon mata i Tuhan, bo sia tua in diaíbií monginum kon anggur andeka o'inumon ibanea makow inta mokoḷoḷangu, bo sia in aing kinawasaan Roho i Allah nongkon bonupamai in sian i inaínya.
16 Mobarong in intau Israel diaannya bui mayak ko'i Tuhan, Allah monia.
17 Sia im mobalií totabaí i Tuhan inta moropot bo mokawasa naí ki Elia. Sia mopoyodame kong gina ing guyanga bo adií, bo intau mita inta raian monia diaí mo'itutui, potutuionnya bui. Tua im mangalenya kon sia im moposadia kon umat inta mo'ibog dumudui kom parentah i Tuhan."
18 Daí ki Zakharia noliboí kom malaekat tatua, "Nabi onda ing kobobalií intua komintan? Sedangkan kaminda motonibuḷoi tumpaḷadon nogoguyang!"
19 Daí guman malaekat tatua, "Aku'i na'a ing ki Gabril inta nobantung ko'i Allah, bo ki Allah tontanií in nopotabaí ko'inakoí mopoyaput in habar mopia tana'a ko'inimu.
20 Habar inta totu-totu'u kom mobalií kowakutu inta ain sinantuí i Tuhan, tongaí ikow bo diaí mopirisaya kon singogku na'a, daí ikow in diaídon mokosingog dapot intua komintan mobalií naí kain singogku."
21 Intau mobayong kon tua umuranpa doman mogoḷat makow ko'i Zakharia. Mosia noherang totok sim mo'onggotbií ante in sia kom bonu im Baḷoi Tuhan tua.
22 Naonda in sia iḷumuai, diaídon sia nota'au noyosingog in intau mita kon tua, sia dongkadon umuran monuḷadaí takin limanya sin umuranpa doman diaí mokosingog. Bain kino'onggotanea bo kinomangalean monia kon na'anta oyuíon inontongnya kom bonu im Baḷoi Tuhan tua.
23 Naonda in nopaḷutdon i wakutunya nopobayak in oaíidannya kom Baḷoi Tuhan, ki Zakharia nobuidon kom baḷoinya.
24 Diaí no'onggot kon tua, ki Elisabet ki buḷoinya sidiadon, bo lima nobuḷan sia diaí iḷumua-ḷuai kom baḷoi.
25 Ki Elisabet nosingog nana'a, "Pangabisannya sinuḷungan i Tuhan in aku'oi, ininggama'an-Nya onu inta moko'oyak ko'inakoí."
26 Naonda in onomdon nobuḷan sian i Elisabet, ki Allah bui nopotabaí ko'i malaekat Gabril minayak in Nazaret, tobatuí kotaí kong Galilea.
27 Pinotabaí-Nya im malaekat tatua minayak kon tobatuí mongodeaga inta aing kinantangan i Yusup, katurunan i Daud, ki Maria tangoi im bobay tatua.
28 Malaekat tatua sinumu'ot kom baḷoi i Maria bo poḷat noguman nana'a, "Salam ko'inimu inta binarakatan, ki Tuhan koyota-yotakinmu."
29 Nokodongogmai kon singog tatua ing ki Maria, no'italikokog in sia bo norai kom bonu ing ginanya, onu degaí mangale in salam tatua.
30 Daí malaekat tatua noguman ko'inia nana'a, "Dika mo'ondok Maria, sin ikow ing kinosanang gina i Allah.
31 Ikow mobalií sidia bo mopolahir in adií ḷoḷaki, bo musti tangoianmu ki Yesus in Sia.
32 Sia mobalií intau moḷoben bo tangoion ki Adií i Allah inta Totok im Moḷantud. Baliíon i Allah in Sia Raja naíonda bo ki Daud ki ḷaki-Nya.
33 Bo sia im mobalií doman Raja kon yuaí-yuaík in intau mita inta katurunan i Yakub modapot ing kopaḷutan in dunia. Karaja'an-Nya im mononoi."
34 Daí kai Maria, "Aku'oi na'a im mongodeagapa, yo naíonda in kobobalií intua komintan?"
35 Daí tubag im malaekat tatua ko'inia nana'a, "Roho i Allah takin kawasa-Nya inta totok im moḷantud mamangoi bo mongawasa ko'inimu. Tuamain Adií inta polahirmu tua in tongoion Mokudus, ki Adií i Allah.
36 Bo pokota'audon kong ki Elisabet inta ginaḷummu tua aindon doman sidia onom nobuḷan. Adií inta kom bonu in siannya tua adií ḷoḷaki, umpakah nogoguyangdon bo kain intau im bantoí.
37 Sin aka ko'i Allah, diaíbií in diaí mota'au aidan-Nya."
38 Kain singog i Maria doman, "Aku'oi na'a ka'asií in tongaíbií bobantung i Tuhan, daí onu ing kino'ibog i Tuhan mobalií ko'inakoí daí kobaliídon podudui in singogmu tanion." Onda intua malaekat tatua nonaḷaímai ko'i Maria.
39 Diaí no'onggot kon tua, ki Maria minayak in tobatuí kotaí kom buḷud in Yudea.
40 Sia minayak im baḷoi Zakharia. Naonda in sia sinumu'ot im baḷoi tatua, sia nobogoi in salam ko'i Elisabet,
41 naonda in dinongog i Elisabet i salam i Maria tatua, adií inta kom bonupa in siannya tua ilimiai noropot bo dodai doman intua ki Elisabet kinawasaan in Roho i Allah,
42 bo poḷat nosingog noropot, nana'a, "Binarakatandon ikow kon sigad im bayongan bobay! Binarakatan doman in adií inta polahirmu!
43 Ki inebií in aku'oi na'a nodapot ing ki inaí i Tuhan namangoi no'indoi ko'inakoí?
44 Sin totu'ubií kowakutu in dinongogku in singogmu, yo adií kom bonu in sianku na'a noliai sim mopia ing ginanya.
45 Kosanangdon ikow inta mopirisaya, sin onu inta aim pinoguman i Tuhan ko'inimu, totu-totu'ubií mobalií intua!"
46 Ki Maria nosingog nana'a, "Aku'oi modayow ko'i Tuhan,
47 bo mopia totok ing ginaku sing ki Allah im mopoposaḷamatku.
48 Sia nokotorop ko'inakoí, bobantung inta nobogaí! Mulai kon tana'a makow bayongan intau moguman kon aku'oi in totok mosanang.
49 Sing ki Allah inta mokawasa totok ain nogaid kon oaíidan inta totok moḷoben ko'inakoí. Mukudus totok in tangoi-Nya
50 Sia umuran mobogoi in totabi-Nya kom bayongan intau inta mo'ondok ko'i-Nia.
51 Takin kakuasa'an-Nya inta totok im moḷoben, Sia mopoyayit im bayongan intau inta mododia, bo momoguya'at kon roncana mita monia.
52 Raja mita in dunia na'a poponagon-Nya mita nongkon tampat pomomarentaían monia, ta'e intau mita inta mo'ompaí in dodia im poḷantudon-Nya.
53 Sia mobogoi im bayongan inta mopia kon intau mita inta ginogoy, ta'e intau mita inta no'oyuíon poguntunon-Nya bo diaí ogoian in onu bo onu.
54 Sia im motuḷung kon Israel inta simpaḷ-Nya, podudui in dandi inta pinodandi-Nya kon i mogoguyang naton.
55 Ki Tuhan diaí mokoliong kon dandi-Nya, bo umuran mosanang ing gina-Nya ko'i Abraham bo katurunannya mita dapot ing kopaḷutan dunia na'a."
56 Bo ki Maria nogutun toḷumai nobuḷan degaí takin i Elisabet, onda intua sia nobui kom baḷoinya.
57 No'iduduimai kon tua nodapotdon singgai pononggadiían i Elisabet, sia nopolahir in adií ḷoḷaki.
58 Bo naonda in topodiugnya mita bo ginaḷumnya mita nokodongog kong ki Tuhan ain nopo'ontong in totabi-Nya inta totok im moḷoben, daí nopia totok ing gina monia, natua doman gina i Elisabet.
59 Wakutu in waḷudon nosinggai in adií mo'intok tatua, mosia namangoi sim mokisunat in adií tatua, bo ibogon monia in adií tatua tangoian ki Zakharia podudui kon tangoi i amaínya,
60 ta'e kai inaínya in, "Donaíai! Sia im mustibií tangoian ki Yohanes."
61 Daí kain tubag doman monia ko'i Elisabet, "Diaíbií in tangoi natua kon sigad i utatmu mita."
62 Bo mosia nonuḷadaí noliboí ko'i amaínya mongo ki'ine im ponontangoinya ko'i adiínya tatua.
63 Ki Zakharia no'igum kom batu pomomais bodongka nomais nana'a, "Tangoinya ki Yohanes." Bo mosia noherang komintan.
64 Kon dodaipa doman intua sia nokosingogdon bui bodongka nodayow ko'i Allah.
65 Daí intau mita topodiugmai kon tua komintan inangoian in ondok. Onu inta ain nobalií tatua, nobalií o'uman kom bayongan lipuí in Yudea.
66 Bo komintan intau inta nokodongog kon o'uman tatua nolibo-liboían kom bonu ing gina, "Mobalií onu degaí in adií tatua ing kon singgai mo'iduduimai?" Sin sia kokapi-kapit i Tuhan.
67 Ki Zakharia, ki amaí in adií tatua kinawasaan in Roho i Tuhan bo sia nopoyaput in habar nongkon i Tuhan. Nana'a ing kainia,
68 "Dinayo-dayowdon ing ki Tuhan, ki Allah Israel! Sia ain notuḷung kon umat-Nya bo nongginggamaí doman kon roriga monia.
69 Sia nobogoi im mopoposaḷamat ko'i naton nongkon katurunan i Daud, simpaḷ-Nya.
70 Naí inta aim pinodandi-Nya pinongin nabi-Nya mita inta aim pinilií-Nya.
71 Sim mopoposaḷamat ko'i naton nongkon saturu mita naton bo nongkon kawasa in intau mita inta moya'at ing gina ko'i naton.
72 Sim mopo'ontong in totabi-Nya kon i mogoguyang naton podudui in dandi-Nya. Sin dandi-Nya tua in umuranbií kinotoropan-Nya.
73 Sin tuata in ibot-Nya ko'i Abraham ki amaí naton, Sia in nodandi kom moposaḷamat ko'i naton nongkon saturu naton, simbaí kita diaí koaíputan in ondok mobantung ko'i-Nia.
74 (1:73)
75 Kita umuran mogaid kon onu ing kino'ibog bo inta kino'sanang ing gina-Nya ko wakutu im mobiagpa.
76 Bo ikow, adií-Ku in tangoion nabi i Allah inta totok im Moḷantud. Ikow im pinotabaí umuna ko'i Tuhan sim moposadia in daḷan bayaían-Nya.
77 Bo ikow mopota'au kon umat-Nya, kom mosia im posaḷamaton i Allah aka taḷaí mita monia bo ampungan-Nyadon.
78 Ki Tuhan naton mopia ing gina bo motabi doman totok. Sia mamangoi simbaí mosaḷamat ing kita. Sia naíonda bo mata in singgai inta momukaí doḷo-doḷom,
79 natua in Sia monimbayag kom bayongan intau inta nobiag kon sindip bo inta umuran mo'ondok. Sia in nodia ko'i naton mayak mongin daḷan inta mopobayak in tampat inta mopia."
80 Ki adií i Zakharia tatua kodugang-kodugangdon ing koḷobennya bo rohonya ing koropot-koropot domandon. Bo sia umuran nogutun kom padang gurun nodapot in singgai inta aindon sinantuí kom pokipogontongnya kon intau in Israel.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA