Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Domma buei namin halak na manlajou manuratkon barita ni na masa, na tarjadi i tongah-tongahta,
2 songon na pinadas hu banta marhitei sidea na mangidah ai humbani mungkahni, anjaha na dob gabe juakjuak bani Hata in;
3 anjaha ahu pe huputuskon do uhurhu manuratkon ai jojor bamu, ale Teopilus, na pinarsangapan, dob lobei hupareksa ganupan ai humbani mungkahni,
4 ase ibotoh ham hasintongan ni sagala pahara, na dob niajarhon bamu.
5 Sanggah si Herodes raja i tanoh Judea, adong ma sada malim humbani golongan ni si Abia, na margoran si Sakaria, ampa parinangonni, boru Aron, na margoran si Elisabet.
6 Pintor do sidea haduasi i lobei ni Naibata, anjaha iparlahouhon sidea do titah ampa aturan ni Tuhan in, seng dong sipandangon.
7 Seng dong anak bani sidea, ai na lambang do si Elisabet, anjaha domma matua sidea haduasi.
8 Jadi masa ma, sanggah si Sakaria, mangihutkon horin ni golonganni mandalankon horja hamalimon i lobei ni Naibata,
9 gabe ia ma masuk hu rumah ni Tuhan in manutung dahupa, dob marjomput na sinurat sidea mangihutkon hasomalan ni malim.
10 I darat do anggo halak na mabuei ai martonggo sanggah panorang manutung dahupa ai.
11 Jadi taridah ma hubani malekat ni Tuhan in, jongjong hampit siamun ni anjapanjap pardahupaan ai.
12 Tarsonggot ma si Sakaria mangidah ai anjaha mabiar.
13 Tapi nini malekat ai ma hu bani, “Ulang ho mabiar, ale Sakaria, ai domma hona tangihon tonggomu; tubuhkonon ni parinangonmu ma bam sada anak, anjaha bahen ma goranni si Johannes.
14 Malas ma uhurmu anjaha marmegah-megah, anjaha buei do halak na marmalas ni uhur halani partubuhni ai.
15 Ai banggal do ia i lobei ni Tuhan in. Seng siinum anggur ampa sagala minuman na koras ia, anjaha gokan ni Tonduy Na Pansing do ia humbani partapaan nari.
16 Buei do anak ni Israel pasuangonni bani Tuhan, Naibata ni sidea.
17 Anjaha ia ma parlobei ni Tuhan ibagas tonduy ampa hagogohon ni si Elias, laho pasuangkon uhur ni bapa bani anakni, ampa uhur na so ra mambalosi hubani uhur na bonar, laho pasirsirhon bani Tuhan in sada bangsa na torsa.”
18 Jadi nini si Sakaria ma bani malekat ai: “Hunja ma botohonku ai? Ai domma matua ahu, anjaha parinangonku pe domma matua.”
19 Nini malekat ai ma mambalosisi, “Si Gabriel do ahu, na jongjong i lobei ni Naibata, isuruh do ahu marsahap pakon ho, ampa mamboan ambilan malas ni uhur on bam.
20 Tapi longah ma ho, seng tarbahen ho be marsahap das bani ari parmasa ni ai, halani na so porsaya ai ho bani hatangkin, ai ma na sihol sipamasaon bani panorangni.”
21 Ia halak na mabuei ai, sai paima-imahon do bani si Sakaria, anjaha longang do sidea, mase sonai dokahni ia i rumah panumbahan ai.
22 Dob luar ia, seng be boi ia marsahapkon sidea, gabe mangahap ma sidea, na dob adong do nididahni i rumah panumbahan ai. Marusihan mando ia bani sidea, tapi anggo ia lanjar longah ma.
23 Ase dob gok panorangni marugas, mulak ma ia hu rumahni.
24 Seng piga dokah nari boratan rumah ma si Elisabet, parinangonni ai; marponop-ponop ma ia lima bulan dokahni.
25 Nini, “Pambahen ni Tuhan do on bangku, sanggah na kinawahkon-Ni ai ahu, laho mambuat habadoronku i lobei ni halak.”
26 Salpu onom bulan isuruh Naibata ma Malekat Gabriel hu sada huta i tanoh Galilea, na margoran Nasaret,
27 marayak sada anak boru, tunangan ni sada dalahi, na margoran si Josep, humbani ginompar ni si Daud; si Maria do goranni.
28 Masuk ma malekat ai marayaksi, anjaha nini ma, “Tabi ma bamu, ale na niidopan! Ihasomani Tuhan do ham!”
29 Tapi tarsonggot do ia pasal hata ai, anjaha iparuhurhon do, atap aha do arti ni hata tabi ai.
30 Jadi nini malekat ai ma hu bani, “Ulang ma mabiar ham Maria, ai dapotan idop ni uhur do ham humbani Naibata.
31 Tonggor ma, boratan rumah ma ham anjaha tubuhan anak; bahen ma goran-Ni Jesus.
32 Banggal do Ia use, goranon do Ia Anak ni Sitimbulan in; bereon ni Naibata do Bani paratas ni si Daud, bapa-Ni ai.
33 Rajaan-Ni do ginompar ni si Jakob sadokah ni dokahni, anjaha seng dong ujung ni Harajaon-Ni ai.”
34 Dob ai nini si Maria ma hubani malekat ai, “Sonaha ma parjadi ni ai, ai seng dong hutanda dalahi?”
35 Jadi nini malekat ai ma mambalosisi, “Sogopan ni Tonduy Na Pansing ma ham, anjaha linggoman ni hagogohon ni Sitimbulan in; halani ai Na Pansing do goranon na sihol tubuh in, Anak ni Naibata.
36 Anjaha tonggor ma, si Elisabet pe, sindohormu ai, na dob targoran lambang, domma boratan rumah, paonom bulankon ma nuan.
37 Ai seng dong na so boi bani Naibata.”
38 Jadi ihatahon si Maria ma, “Tonggor ma, jabolon ni Tuhan in do ahu. Sai saud ma hu bangku songon na hinatahonmu in!” Dob ai itadingkon malekat ai ma ia.
39 Bani panorang ai laho ma si Maria, ipapodas ma laho hu tanoh pardologan ai, hu sada huta na i Juda.
40 Masuk ma ia hu rumah ni si Sakaria, anjaha itabi ma si Elisabet.
41 Mambogei tabi ni si Maria ai mangunsal ma na etek-etek, na ibagas partapaanni ai, jadi gok Tonduy Na Pansing ma si Elisabet.
42 Marsora na gogoh ma ia, lanjar nini ma, “Ham do na pinasu-pasu i tongah-tongah ni parinangon, anjaha na pinasu-pasu do na pinarorotmu in.
43 Mase ma masa on bangku, inang ni Tuhanku roh marayak ahu?
44 Ai tonggor ma, ijin das sora ni tabimu ai bani pinggolhu, mintor mangunsal do dakdanak, na ibagas boltokku, halani malas ni uhurni.
45 Martuah ma ham, halani ihaporsayai ham, na maningon saud do na hinatahon ni Tuhan bamu!”
46 Jadi nini si Maria ma, “Ipatimbul uhurhu do Tuhan in!
47 Marmegah-megah do tonduyhu mangidah Naibata, Sipaluah ahu.
48 Ai itatap do haetekon ni jabolon-Ni on. Tonggor ma, ai olat ni on parhatuahon ni sagala sundut ma ahu.
49 Ai banggal do na binahen ni Pargogoh in bangku. Na Pansing do goran-Ni ai.
50 Ai marsundut-sundut do idop ni uhur-Ni bani na mangkabiari-Si.
51 Hagogohon do ihorjahon tangan-Ni; mambur merab do ibahen sigijang maruhur.
52 Ipaturun do siparkuasa humbani paratas ni sidea, tapi ipatimbul do halak na etek.
53 Na madear do igoki bani na loheian, tapi halak na bayak lumei do ipalaho.
54 Iurupi do Israel, juakjuak-Ni in, mardingat idop ni uhur-Ni ai,
55 songon na hinatahon-Ni bani ompungta, hubani si Abraham ampa hubani ginomparni sadokah ni dokahni.”
56 Hira-hira tolu bulan do si Maria marianan rap pakon si Elisabet, dob ai mulak ma ia hu rumahni.
57 Jadi gok ma panorang bani si Elisabet, ase tubuhan tuah ia, gabe itubuhkon ma sada anak.
58 Dob ibogei romban rumahni ampa sindohorni, na dob maridop ni uhur banggal Tuhan in hu bani, marmalas ni uhur ma sidea rap pakonsi.
59 Bani ari paualuhkon roh ma sidea, laho manunat na etek-etek ai; ibahen sidea ma goranni si Sakaria mangihutkon goran ni bapani.
60 Tapi nini inangni ai ma mambalosi, “Lang ai, si Johannes do goranni bahenon!”
61 Jadi nini sidea ma, “Seng dong na margoran sisonai sindohormu!”
62 Marusihan ma sidea mangindo humbani bapani, atap ise do goranni bahenon ipangindo uhurni.
63 Jadi ipangindo ma panuratan, isuratkon ma, “Si Johannes do goranni!” Jadi longang ma sidea ganup.
64 Anjaha mintor mungkab ma pamanganni, suang parsahapni, anjaha marsora ma ia mamuji Naibata.
65 Jadi mabiar ma ganup romban rumahni, anjaha isahap-sahapkon halak do na masa ai i sab pardologan Juda.
66 Anjaha ganup na manangar ai iparuhurhon do barita ai, nini sidea ma, “Na gabe aha ma holi nani dakdanak ai? Ai ihasomani tangan ni Tuhan do ia.”
67 Jadi gok Tonduy Na Pansing ma si Sakaria, bapani ai, gabe manjahai ma ia, nini ma,
68 “Pinuji ma Naibata ni Israel, halani itohu do bangsa-Ni anjaha ibahen partobusni.
69 Ipajongjong do banta tanduk haluahon i rumah ni si Daud, juakjuak-Ni ai,
70 songon na hinatahon-Ni marhitei pamangan ni nabi-Ni na susi in humbani sapari nari, ai ma:
71 Paluahon-Ni do hita humbani munsuhta, ampa humbani tangan ni sagala na marsogam ni uhur banta;
72 idopan-Ni do bapanta, anjaha ingaton-Ni do padan-Ni na mapansing ai.
73 Ai ma bulawan-Ni, na binulawankon-Ni bani si Abraham, bapanta ai,
74 paboa bereon-Ni do hu banta, ase hita, dob marhaluahon humbani tangan ni munsuhta, seng marhabiaran boi marugas i lobei-Ni,
75 ibagas hapansingon ampa hapintoron, sadokah hita manggoluh.
76 Ia ho, ale ambia, goranon do ho nabi ni Sitimbulan, ai parlobei ni Tuhan in do ho, laho patureihon dalan-Ni,
77 laho mambere bani bangsa-Ni habotohon pasal haluahon marhitei hasasapan ni dousa ni sidea,
78 halani idop ni uhur ni Naibatanta do mambahen roh sinalsal hun datas marayak hita,
79 laho manondangi halak na hundul ibagas hagolapan ampa linggom ni hamatean, anjaha patuduhkon langkahta bani dalan hadameion.”
80 Ia dakdanak ai lambin banggal do anjaha margogoh ibagas tonduy; anjaha sai i halimisan do ia das bani panorang talar ia bani bangsa Israel.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA