Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Wali re’e seore, ri Eo Rapandoo, i Yesu pasi anaguruNya sira malinja. Sira mangalulu jaya to liu ri raya nawu ntau. Wali tempo sira ri raya mpalinjanya etu, anaguru i Yesu mangkisu-ngkisu wua nu labu gando. Sira mampojojo pae etu panewa mangkoni weanya ri raya nawu ntau etu.
2 Wali tempo etu re’e to Yahudi to aliran Parisi sira mangkita anaguru i Yesu mangkisungkisu wua nu labu gando etu. Wali sira manganto’o, “Maka pei komi mangkisu-ngkisu wua nu labu gando? Etu sewaju ewa tau mapalaong. Pei ane ewa porenta i Musa, tau taa maya mangika palaong ri Eo Rapandoo.”
3 Wali i Yesu manganto’oka sira, to’oNya, “Wimba, komi bara tare mangabasa ri tuntu i mPue Allah mangkonong kesaa to naika i Makole Daud tempo owi, tempo ia pasi joanya moro kompo nsira?
4 Tempo etu i Daud masua ri raya banua i mPue Allah panewa ia mangkoni roti to roomo rapampueka resi i Pue Allah. Roti etu ane ewa porenta i Musa ojo patanya to pampue maya mangkoni. Ane tau to yusa taa maya. Pei i Daud ia mangkoni roti etu pasi ia mangawaika seja joanya roti etu, wali sira mangkoni pei sira taa rato’oka sala.”
5 Wali roo see i Yesu manganto’oka wo’u sira, to’oNya, “Aku, Wiyaa nto Lino, Aku semo to re’e kuasa manganto’o kesaa to masipato daraika ri Eo Rapandoo.”
6 Wali yako etu, rata wo’u Eo Rapandoo. Eo etu i Yesu yau njo’u banua to napampotunde nto Yahudi. Rata nja’u ria Ia masua ri raya banua etu pei mampotunde tau to nja’u ria. Tempo Ia mampotunde etu, re’e samba’a tau to mapongko palenya sambali, ngkai etu nja’u seja ri raya banua etu.
7 Pasi re’e seja bara sawei mba’a to Yahudi to aliran Parisi pasi tau to mampoguru porenta i Musa, sira mangalo’aka kojo i Yesu. Sira rani kojo mangkita i Yesu bara wimba, bara Ia damampakatao muni tau to mapongko palenya etu ri Eo Rapandoo, apa sira rani mangarata jaya mampakasala Ia.
8 Pei i Yesu mangansani pampobuuka nsira etu, see naka Ia manganto’oka ngkai to mapongko palenya, Ia manganto’o, “Pakore pei mai ri tangonya si’i.” Wali ngkai etu makore pei yau ri tango ntau boros.
9 Roo see i Yesu manganto’oka tau to mangalo’aka Ia etu, Ia manganto’o, “Si’i pampotanakangKu resi komi. Ane ewa porenta i Musa to imba to tao-tao daraika ri Eo Rapandoo? Mangika to matao bara mangika to maja’a? Bara mampakatao muni sa’e bara mampopate sa’e?”
10 Ojo karoonya i Yesu manganto’o gombo etu, Ia mangalo’aka resi sira samparia samba’a pei samba’a. Roo see Ia manganto’oka ngkai to mapongko palenya etu, “Tonjuka palemu.” Wali ngkai etu mangantonjuka palenya panewa palenya etu rapakatao muni sewaju ewa palenya to sambali.
11 Wali ojo pangkita nto Yahudi to aliran Parisi pasi tau to mampoguru porenta i Musa palaong to mawali etu, sira maja’a kojo rayanya. Wali sira magombo-gombo mangkonong i Yesu bara kesaa to danaika nsira resi Ia.
12 Wali yako etu re’e seore i Yesu yau nto’u rapa mpantana, yau damakai-kai resi i Pue Allah. Wali ndate ria Ia makai-kai rataka yau wuro.
13 Wali ojo kaeonya rao etu, Ia mampokio anaguruNya panewa Ia mangampilis sampuyu pei dua mba’a tau yako ri oyo nsira. Tau to sampuyu pei dua etu Ia manganto’oka pomakauNya.
14 Wali tau to sampuyu pei dua ipilisiNya etu, sanganya samba’a etumo i Simon. Ia nasangaka wo’u i Yesu i Petrus. Pasi re’e seja i Andreas to sintua’i pei i Simon etu. Pasi re’e seja i Yakobus, Yohanes, Pilipus, Bartolomeus,
15 Matius, Tomas, Yakobus to ana i Alpeus, pasi i Simon to seore nangewa to Roma to mamporentang to Yahudi.
16 Pasi re’e seja i Yudas, ana i Yakobus pasi Yudas Iskariot to mamposora yau i Yesu resi baliNya.
17 Wali ojo karoonya i Yesu mangampilis tau sampuyu pei dua etu, Ia malonso yako ri rapa mpantana etu sindara-ndara pei sira. Sira rata ri tampa to lempe to nja’u tau boros kojo. Tau boros etu singga’a anaguru i Yesu seja pasi re’e seja tau to yako sambawo propinsi Yudea, pasi to yako ri kota Yerusalem, pasi to yako ri kota Tirus pasi Sidon to nja’u wii ntasi.
18 Naka pei tau boros etu ma’i mangampago tampa etu apa rani mangandonge gombo i Yesu pasi rani rapakatao muni yako ri panyaki nsira. Pasi tau to nasesang measa, sira rapakatao muni seja.
19 Wali samparia tau boros etu rani mampotaka i Yesu, apa re’e kuasa to masuwu yako ri koroNya, kuasa etu mampakatao muni panyaki nsira samparia.
20 Wali i Yesu mangalo’aka resi anaguruNya pei manganto’oka sira, Ia manganto’o, “Masanang komi to masiasi apa komi mawali tau to Makolenya i Pue Allah.
21 Masanang komi to moro kompomu ri tempo si’i apa komi darapakabosu. Masanang komi to tumangi ri tempo si’i apa komi damagele.
22 Masanang komi ane sa’e maja’a nakita komi, pasi bo’onya mampogalungika komi, pasi ane sira mangarowis komi pasi manganto’o maja’a komi apa saba komi mangaya Aku, Wiyaa nto Lino.
23 Apa ewa wetu seja naika buebue ntau etu resi to pantuntu tuntu i mPue Allah tempo owi. Wali nempo palaong etu mawali resi komi, pakasanang. Masipato ndende kojo raya ngkomi, apa bae kojo ntanapa to danawaika i mPue Allah komi ndate saruga.
24 Pei ane komi to sugi, to ojo kasugimu etu to bae batuanginya resi komi, kasesa danurata ngkomi apa ojo ri tempo si’i semo komi darapakalindo.
25 Pasi komi to mangepe tare kesaa to nupoipu ri tempo si’i, kasesa danurata ngkomi apa komi damoro kompomu ri tempo to darata. Pasi komi to ojo magele-gele mampakasanang ri tempo si’i, kasesa danurata ngkomi apa komi damawo kojo pasi datumangi ri tempo to darata.
26 Pasi komi to ojo mangamomis tau, see naka samparia tau mangabarong komi, kasesa danurata ngkomi. Apa bue-bue ntau to mangabarong komi etu, sira mangabarong seja to pantuntu tuntu to taa monso tempo owi, pei roo see to pantuntu tuntu to taa monso etu mangarata kasesa. Wali komi to ojo rani rabarong, komi ewa to pantuntu tuntu to taa monso etu, see naka komi seja damangarata kasesa.”
27 Wali i Yesu manganto’o wo’u, to’oNya, “Pei ane komi to mampodongeka gombongKu, Aku manganto’oka komi porayang balimu, pasi ika to matao resi tau to maja’a nakita komi.
28 Pasi porapika resi i Pue Allah see Ia damanoto resi tau to mantanaa yau komi, pasi pokaika seja tau to mampoja’a komi.
29 Pasi ane rapanya re’e tau to mangantopo panganamu to tondo ngkana, waika wo’u panganamu to tondo ngkii napontopo seja. Pasi ane re’e tau to mangoko yau jubamu, waika ia mangoko bajumu wo’u.
30 Pasi ane re’e tau to mamporapi bara kesaa resi komi, waika tau etu anu to naporapi etu. Pasi ane re’e tau mangoko yau anu to komi puenya, ne’e manganto’oka ia pawolili muni.
31 “Wali anu to nuporani ngkomi sa’e damangika resi komi, etu semo to matao nuika ngkomi resi sa’e.
32 Ne’e ojo mamporayang tau to mamporayang komi, apa ane ewa see nuika ngkomi taa masipato komi rabarong. Apa sakowa tau to madosa kojo sira mamporayang seja tau to mamporayang sira.
33 Pasi ne’e ojo mangika matao resi tau to mangika matao resi komi, apa ane ewa see nuika ngkomi taa masipato komi rabarong. Apa sakowa tau to madosa kojo sira mangika palaong to matao resi tau to mangika matao resi sira.
34 Pasi ane komi ojo mampapongadaka doi resi tau to matantu kojo damampawolili muni doi etu, taa masipato komi rabarong. Apa sakowa tau to madosa kojo sira mampapongadaka doi resi yunu nsira to madosa seja ane sira mansarumaka ia matantu kojo damampawolili muni doi etu.
35 Pei Aku manganto’oka komi porayang balimu pasi ika matao resi sira. Pasi ane sira rani mangada bara kesaa, papongadaka sira, nempo komi taa mansarumaka sira damampawolili muni anu to naada nsira etu. Ika ewa wetu apa ane ewa see komi damangarata ntanapa to bae kojo pasi damiyala monso pu’u komi ngana i mPue Allah to makuasa kojo. Apa i Pue Allah, Ia seja manoto resi tau sakowa tau to taa mangansani manganto’o tarima matao, pasi sakowa tau to maja’a.
36 Wali porayang sa’e ewa naika mPa’a ngkita mamporayang tau.”
37 Wali yako etu i Yesu manganto’o wo’u, to’oNya, “Tempo komi mangabotus sa’e, ne’e mampakasala sira see komi taa seja darapakasala. Pasi ne’e manganto’o sa’e masipato darahuku see komi taa darahuku. Kasimbalinya yako etu, ane sa’e mangika sala resi komi, lapa salanya etu see komi daralapa seja salamu.
38 Wali see naka to tao-tao manoto raika tempo mangabotus sa’e. Apa ane komi ojo mampakasala sa’e, ane ewa see, komi darapakasala seja. Pei ane komi mangika manoto tempo mangabotus sa’e, ane ewa see komi damangarata seja kanoto. Kanoto to danurata ngkomi etu maya raporapaka ewa pae to roomo raukur buke kojo pasi njeemo to darawaika resi komi.” Etu semo gombo i Yesu.
39 Pei roo see i Yesu manganto’oka sira rapa mampatiendoka wo’u sira taa matao ane mampakasala sa’e, Ia manganto’o, “Ane komi sangkani mampakasala sa’e, ane ewa see komi ewa taa mangkita sala to si komi. Wali komi raporapaka ewa tau buta to mampeyaa mangansawang tau to buta seja, pei taa kojo mawali. Apa kita mangansani ane tau buta taa mawali mangankentar tau to buta seja, apa ane ewa see sira dua paka damasou lo’u raya mbayau.
40 Wali masipato komi mangalulu lengko to si Aku, Guru ngkomi, apa Aku taa kojo mampakasala sa’e. Wali ne’e mampobuuka komi semo to bae-bae anggamu pei Aku, see naka komi maya mampakasala sa’e. Ne’e mampobuuka ewa wetu apa kita mangansani ane anaguru, si’a ia to bae-bae angganya pei gurunya. Pei ane ia roomo maguru samparia to napotundeka nggurunya ia, tempo etu ia damawali sewaju kojo pei gurunya etu.
41 “Pasi ane mangkonong mampakasala sa’e, maka pei komi mampakasala yunumu tempo ia mangika dosa to maya raporapaka ewa yoba ngkaju to nja’u raya matanya? Pei ane dosa to nuika ngkomi, dosa etu maya raporapaka ewa tinja to mampakabuta mata to si komi, pei komi taa mangepe dosamu to bae etu!
42 Wali ane re’e tinja ri raya mata ngkomi, taa masipato komi manganto’oka yunumu, ‘Mai, aku damangayali yau yoba ngkaju yako ri raya matamu.’ O komi to ojo gombomu manoto, ne’e masara mampakasala yunu ngkomi! Yali yau ruyu tinja yako ri raya nu matamu panewa roo see komi bara mayoasimo mangkita see maya mangayali yau yoba ngkaju yako ri mata nu yunumu.”
43 Wali i Yesu manganto’o wo’u, “Wali raya ntau maya raporapaka ewa kaju apa kita mangansani ane kaju matao, kaju etu taa maya mampowuaka wua to maja’a. Pasi kaju to maja’a taa maya mampowuaka wua to matao.
44 Wali yako ri wua ngkaju semo naka pei kita mangansani pasisalanya kaju. Apa tau taa mangarata wua ntaripa yako ri kaya to marui. Pasi taa seja mangarata wua loka yako ri kaju to marui.
45 Wali ewa see seja ane tau. Apa ane tau to matao, ia mampobuuka anu to matao, see naka matao seja gombo ntau etu. Pei ane tau to maja’a, ia mampobuuka anu to maja’a, wali see naka maja’a seja gombo ntau etu. Wali ewa wimba raya ntau, etu semo mawali pu’u nu gombo to masuwu yako ri nganganya.”
46 Wali yako etu i Yesu manganto’oka wo’u sira, to’oNya, “Tare batuanginya ane komi manganto’oka Aku ‘Pue,’ pei komi taa mangaluluka anu to Kuto’oka komi.
47 Pei i sema-sema tau to mai resi Aku pei mampodongeka gombongKu, panewa mangampolengkoka, tau etu pande. Ia maya raporapaka ewa tau to mangawangu banua. Wali ia mayombu raika mangkeke ruyu tana rata lo’u rapa mbatu to bae. Panewa rapa mbatu etu mawali pondasi banuanya etu. Wali karoonya ia mangawangu banuanya, ma’i ue mowo kono banuanya etu. Pei banua etu taa mapuka yau apa rapa mbatu semo pondasinya.
48 (6:47)
49 Pei i semasema tau to mangandonge gombongku pei taa mangampolengkoka, tau etu madoyo. Wali ia maya raporapaka ewa tau to mangawangu banuanya ri wawo ntana, pei ia taa mangkeke ruyu tana etu damangika pondasinya ri rapa mbatu. Wali karoonya ia mangawangu banuanya, ma’i ue mowo kono banuanya etu. Wali maja’a yau banua etu. Tamore toronya to taa maja’a apa tare pondasinya.”
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA