Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Samuza ma'õkhõ me luo Sabato, me Itõrõ zinga nowi Yesu, ba lateteu ngalai wakhe ira nifahaõ-Nia. Lafarekha ba dangara wakhe andrõ ba la'a.
2 Ba so ndra Farizai'o õsa, lamane, "Hana wa milau ba luo Sabato nitegu ba gamakhoita agama khõda?"
3 Itema lira Yesu, "Hadia lõ irai mibaso nilau Dawido, me olofo ia awõ niha si fao khõnia?
4 Mõi ia bakha ba Nomo Zo'aya ba ihalõ roti nibe'e sumange khõ Lowalangi, ba i'a. Ba ibe'e gõi roti andrõ ba niha solo'õ ya'ia. Molo'õ amakhoita agama khõda, ha ira ere zi tola manga roti andrõ."
5 Aefa da'õ Imane Yesu, "Ono Niha andrõ no So'aya luo Sabato."
6 Me luo Sabato tanõ bõ'õ, mõi Yesu mamahaõ ba gosali. Ba da'õ so samõsa zi mate dambai tanga.
7 Ba so ba da'õ õsa ndra sangila amakhoita awõ ndra Farizai'o, somasi mangalui sala Yesu, ena'õ tola la'angadugõ Ia. Andrõ lõ mamalõ lahaogõ wamaigimaigi, hadia Ifadõhõ niha sofõkhõ andrõ ba luo Sabato.
8 I'ila gera'erara Yesu. Andrõ Imane ba niha si mate dambai tanga andrõ, "Aine, ozizio ba da'e fõna!" Maoso niha andrõ, ba muzizio ia ba da'õ.
9 Aefa da'õ Isofu Yesu ba niha si so ba da'õ, "Molo'õ huku agama khõda, hadia zi tola tafalua ba luo Sabato? Folau si sõkhi ma folau si lõ sõkhi? Mangorifi niha ma zui mamakiko?"
10 Ifakhõlõ Ia Yesu wamaigi ya'ira ba Imane ba zofõkhõ andrõ, "Oro'õ dangau." I'oro'õ dangania niha andrõ, ba dõhõ dangania.
11 Mofõnu sibai ndra sangila amakhoita awõ ndra Farizai'o, ba ibõrõtaigõ mamagõlõ ira ba wolau hadia ia khõ Yesu.
12 Me luo da'õ mõi Yesu ba hili, mangandrõ. Ba da'õ mangandrõ Ia khõ Lowalangi sara wongi manõ.
13 Ba me moluo, Ikaoni ndra nifahaõ-Nia, ba Ifili felendrua niha moroi ba gotaluara. Ifotõi zi felendrua andrõ Sinenge. Da'e fefu dõira:
14 Simoni (nifotõi Fetero gõi), Andrea talifusõ Zimoni; Yakobo ba Yohane, Filifo ba Batolomai'o,
15 Matai'o ba Toma, Yakobo ono Galifai'o, ba Simoni (nifotõi niha sibarani),
16 Yuda ono Yakobo ba Yuda banua Gariota si tobali si manga mbõli dania.
17 Aefa da'õ mõi mitou Yesu moroi ba hili awõ nifahaõ-Nia, molombase ira ba nahia salo'o tanõ. Ba da'õ so niha sato sibai solo'õ Ya'ia, ba ato niha si otarai gofu heza ba danõ ma'asagõrõ Yeruzalema, banua ba Diro awõ Zidona si so ba zinga nasi.
18 Tohare ira wamondrongo famahaõ Yesu, ba ena'õ Ifadõhõ wõkhõra gõi. Ya'ira nira'u fa'abõlõ zi lõ sõkhi mõi gõi ba wamadõhõ fõkhõra.
19 Omasi ira fefu lababaya Yesu, me so wa'abõlõ si otarai khõ-Nia ba wamadõhõ fõkhõra fefu.
20 Ifaigi nifahaõ-Nia Yesu ba Imane, "Ya'ahowu ami niha si numana, me ya'ami Nono mbanua Lowalangi!
21 Ya'ahowu ami solofo iada'e; me ni'abusoi'õ ami dania! Ya'ahowu ami sege'ege iada'e; me sa'iki ami dania!
22 Ya'ahowu ami na la'afõkhõi tõdõ ami, na latibo'õ ami, na la'o'aya ami, ba na law̃a'õ lõ sõkhi ami, bõrõ Nono Niha!
23 Na alua zi manõ akha somuso tõdõ ami ba mi'amarõga si fao fa'omuso dõdõ, bõrõ me ebua luomi ba zorugo. No lalau zi manõ gõi khõ ndra sama'ele'õ luo no ira tuara.
24 Alai ami niha si kayo iada'e; me no mirasoi zi sõkhi.
25 Alai ami sabuso iada'e; me solofo ami dania! Alai ami sa'iki iada'e; me sabu tõdõ ba sege'ege ami dania!
26 Alai ami, na lasuno ami niha fefu; bõrõ me si manõ ndra tuara ba wanunonuno sama'ele'õ sofaya luo no."
27 "Ya'ami samondrongo khõ-Gu iada'e, da'e goroisa-Gu khõmi: mi'omasi'õ zi fa'udu khõmi, ba milau zi sõkhi ba niha si fatiu tõdõ khõmi.
28 Mifahowu'õ niha sangelifi ya'ami. Ba mi'angandrõ salahi niha solau si lõ sõkhi khõmi.
29 Na latafari mbo'õmi si tambai, ba akha itafari mbo'õmi si tambai gõi. Na larabu nukhami, ba mibe'e gõi khõnia mbarumi.
30 Na so zangandrõ hadia ia khõu, ba be'e khõnia; ba na larabu zi so khõmi, ba bõi mi'andrõ mangawuli.
31 Hadia zomasi ami lalau khõmi niha, da'õ gõi milau khõra.
32 Na ha sangomasi'õ ya'ami mi'omasi'õ, hadia haremi? Niha sebua horõ gõi la'omasi'õ niha sangomasi'õ ya'ira!
33 Ba na ha milau zi sõkhi ba niha solau si sõkhi khõmi, hadia haremi? Niha sebua horõ gõi la'ila lalau zi manõ!
34 Na mibe'e nifalali gefemi ha ba niha si tola mamuli khõmi, hadia haremi? Niha sebua horõ gõi labe'e nifalali gefe ba niha si so horõ, ba lafuli la'andrõ mangawuli!
35 Tenga si manõ ami ena'õ! Mi'omasi'õ zi fa'udu khõmi ba milau zi sõkhi khõra. Mibe'e nifalali hadia ia, ba bõi mitõtõna mangawuli. Na si manõ, mitema dania mbuala sebua, ba tobali ami Ono Lowalangi Fondrege Zalaw̃a. No si sõkhi Lowalangi ba niha si lõ mangila mangandrõ saohagõlõ, ba sõkhi gõi Ia ba niha si lõ sõkhi.
36 Ya sahakhõ tõdõ ami si mane Amami andrõ sahakhõ tõdõ!"
37 "Bõi mihuku niha bõ'õ, ena'õ bõi Ihuku ami Lowalangi. Bõi mi'etu'õ huku ba niha, fabõi I'etu'õ hukumi Lowalangi. Mi'efa'õ zala niha bõ'õ, ena'õ I'efa'õ zalami Lowalangi.
38 Mibe'e ba niha, ena'õ Ibe'e khõmi Lowalangi; ba mitema dania mbuala nifozuzu awõ nisõsõ fanu'a. Su'asu'a ni'oguna'õmi ba niha bõ'õ, I'oguna'õ gõi Lowalangi dania ba wanu'a'õ khõmi."
39 Aefa da'õ Itutunõ khõra Yesu gamaedola andre, "Na i'ohe danga niha sau'a awõnia sau'a, lõ tola lõ alau ira bakha ba mbandra.
40 Lõ hadõi nifahaõ sabõlõ ebua moroi ba zamahaõ ya'ia. Ba nifahaõ si no awai manõrõ sekola, ba fagõlõgõlõ ia khõ gurunia.
41 Ba hana wa mi'ila rozi geu ba hõrõ dalifusõmi, ba boto geu ba hõrõmi samõsa lõ mi'ila?
42 Hewisa wa tola mimane khõ dalifusõmi, 'He talifusõ, aine, da uheta rozi geu andrõ ba hõrõu,' ba hiza sa, boto geu ba hõrõmi lõ mi'ila? He samini tõdõ! Miheta ua mboto geu andrõ ba hõrõmi, awena tola tara wangilami ba wangeheta rozi geu andrõ ba hõrõ dalifusõmi."
43 "Tõla geu si sõkhi lõ i'owua mbua si lõ sõkhi, si manõ gõi dõla geu si lõ sõkhi lõ i'owua mbua si sõkhi.
44 Fefu ngawalõ dõla geu ba mu'ila moroi ba mbuania. Manaze sodoi lõ i'owua mbua ara, ba sa'asa'a mao lõ i'owua mbua nagu.
45 Niha si sõkhi i'owua mbua si sõkhi ni'irõ'õnia bakha ba dõdõnia si sõkhi. Ba niha si lõ sõkhi i'owua mbua si lõ sõkhi ni'irõ'õnia bakha ba dõdõnia si lõ sõkhi. Bõrõ me hadia ia niw̃a'õ mbawa da'õ zi no fahõna bakha ba dõdõ."
46 "Hana wa mikaoni khõ-Gu, 'He So'aya, he So'aya,' ba lõ sa milau hadia ia zi no Uw̃a'õ khõmi?
47 Faoma hadia tebe'e dumaduma niha si mõi khõ-Gu, samondrongo fehede-Gu, ba samalua ya'ia? -- Sõkhi na Uforoma'õ khõmi --.
48 Hulõ zamazõkhi omo ia, sogao tanõ abakha, ba ifazõkhi danedanenia gowe. Na so molõ sanõrõ omo, lõ aso'a nomo, bõrõ me ba dete danedane saro so ia.
49 Ba niha samondrongo fehede-Gu ba lõ ifalua, hulõ niha samazõkhi omo ba dete danõ si lõ danedane. Na itõrõ molõ nomo andrõ, ba alio sibai aso'a; ba abõlõbõlõ sibai wa'atekikonia!"
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA