Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Suatu rani Sabat, waktu Isa liu di kebun gandum, jelma-jelma sai nutuk Ia ngakuk gandum. Tian ano ngegusuk-gusuk gandum ano delom culukni tian, kak raduni dikanik tian.

² Wat jelma Farisi ngeliakni rik cawa, "Mengapi keti ngelanggar hukum agama rik ngeguaiko sai dilarang waktu rani Sabat?"

³ Isa ngejawab, "Makkung pernah kedo keti ngebaca tentang sai diguaiko Daud, waktu ia jama kantik-kantikni mebetoh?

⁴ Ia kuruk mik delom Lamban Ibadah rik ngakuk ruti sai radu dipersembahko jama Allah, kak raduni dikanikni. Dikenini juga ruti seno jama kantik-kantikni. Padahal nurut hukum agama angkah imam-imam gaoh sai dapok nganik ruti seno."

⁵ Isa cawa, "Anak Manusia bekuasa atas rani Sabat!"

⁶ Waktu rani Sabat, Isa ngajar di lamban ibadah. Di disan wat jelma sai culukni lumpuh kebelah.

⁷ Wat pira guru agama rik ulun Farisi haga nyepok kesalahan Isa in tian dapok ngaduko Isa. Tian terus ngemerhatiko api Ia haga ngubati jelma waktu rani Sabat.

⁸ Kidang Isa pandai ngebaca pikeran tian. Ia cawa jama jelma sai culukni lumpuh ano, "Ija cecok di hadap ajo!" Jelma seno minjak, terus cecok di hadap.

⁹ Kak raduni Isa betanya jama jelma-jelma sai di disan, "Menurut agama, neram dapok mawat ngelakuko api gaoh di rani Sabat? Ngelakuko sai betik atau jahat? Nulung jelma atau ngecelakako?"

¹⁰ Isa ngeliak jama tian sunyinni, Ia cawa jama jelma lumpuh ano, "Ijako culukmu." Jelma seno ngeniko culukni, rik culukni pun munyai.

¹¹ Guru-guru agama rik ulun-ulun Farisi ano butong nihan, tian mulai berunding repa cara ngecelakako Isa.

¹² Waktu seno Isa cakak mik sai bukit untuk bedua. Ia bedua jama Allah sebingi agat.

¹³ Waktu rani radu terang, Ia ngurau jelma-jelma sai nutuk Ia, kak raduni milih rua belas jelma jak tian. Ia ngeni gelar kerua belas jelma udi rasul-rasul. Tian yakdo:

¹⁴ Simon (sai disebutni juga Petrus), rik Andreas puarini Simon; Yakobus rik Yohanes, Filipus rik Bartolomeus,

¹⁵ Matius rik Tomas, Yakobus anakni Alfeus, rik Simon (sai disebut Pejuang),

¹⁶ Yudas anak Yakobus rik Yudas Iskariot sai akherni jadi pengkhianat.

¹⁷ Kak raduni Isa regah jak bukit jejama rasul-rasul ano, raduni taru rik cecok di sai rang sai rato. Di dudi wat juga jelma-jelma sai nutuk Ia rik jelma sai bareh ratong jak seluruh Yudea, Yerusalem, rik kota-kota Tirus rik Sidon sai di pingger lawok.

¹⁸ Tian ratong untuk ngedengi Isa, rik untuk berubat jama Isa atas penyakik-penyakikni. Tian sai kekurukan ruh jahat ratong juga rik munyai.

¹⁹ Sunyinni jelma berusaha nyating Isa, mani wat kuasa sai luah jak badan-Ni sai dapok ngunyaiko penyakik tian unyinni.

²⁰ Isa ngeliak jelma-jelma sai nutuk Ia kak radu cawa, "Bebahagiado keti jelma-jelma sai mejerih, mani keti yakdo anggota umat Allah!

²¹ Bebahagiado keti sai mebetoh tano; keti haga dibetongkoni! Bebahagiado keti sai miwang tano; keti haga lalang!

²² Bebahagiado keti sai dinyuohko ulun, ditulak, dihina, difitnah mani ulihni Anak Manusia!

²³ Nabi-nabi pada zaman tumbai diperlakuko injuk reno juga. Kik inji tejadi, sebaikni keti riang gaoh, nari-nari mani balak nihan upah keti di surga kanah.

²⁴ Kidang celakado keti sai mebatin tano; mani keti radu ngerasako kenikmatan!

²⁵ Celakado keti sai mebetong tano; mani keti haga kebetohan! Celakado keti sai lalang tano; mani keti haga sedih rik miwang!

²⁶ Celakado keti, kik unyinni jelma mujimu; mani reno juga nenek muyang tian muji nabi-nabi palsu zaman tumbai."

²⁷ "Kidang untuk keti unyinni sai ngedengi Nyak tano, Kuluhotko jama keti: sayangi musuh-musuhmu, rik ngelakuko sai betik jama jelma sai nyuoh jama niku.

²⁸ Berkati jelma sai ngutuk niku, rik duako jelma sai jahat jama niku.

²⁹ Kik wat ulun nampar bihammu kebelah, tagando ia nampar bihammu kebelah lagi. Kik jubahmu diakuk ulun, keniko muneh kawaimu juga.

³⁰ Kik ulun ngilu api gaoh jama niku, keniko jama ia; kik milikmu dirampas dang dikilu lagi.

³¹ Perlakuko ulun bareh injuk keti haga diperlakuko ulih tian.

³² Rik kik keti ngebalos sayangni jelma sai radu mena sayang jama keti, api jasamu? Ulun bedusa pun sayang jama jelma sai radu lebih mena nyayangi tian!

³³ Kik keti bebuat baik jama jelma-jelma sai bebuat baik jama keti, api jasamu? Ulun bedusa pun bebuat injuk reno muneh!

³⁴ Kik keti nginjamko duit jama jelma sai dapok ngebayarni, api pahalamu? Ulun bedusa pun nginjamko duit jama jelma bedusa raduni ngiluni luot.

³⁵ Seharusni dang injuk reno! Keti sebalikni ngasihi musuhmu rik ngelakuko sai betik jama tian. Keti haga ngeni pinjaman, rik mak ngeharap dibayarni. Kik injuk reno, pahalamu balak nihan rik keti jadi anak-anak Allah Sai Mahatinggi. Mani Allah betik hati jama jelma sai mak pandai beterima kasih, rik jama jelma sai jahat juga.

³⁶ Hagani keti wat rasa kesian, injuk Tuhan juga ngedok rasa kasihan."

³⁷ "Dang ngehakimi ulun bareh, in keti mak dihakimi ulihni Allah. Dang ngehukum jelma bareh, in keti mak dihukum Allah juga. Ampuni ulun bareh, in Allah juga ngampuni keti.

³⁸ Kenido jama ulun bareh, in Allah juga ngeni jama keti; keti haga nerima pahala sai belimpah-limpah sai radu ditakar padat-padat untuk niku. Mani takaran sai keti pakai untuk ulun bareh haga dipakai Allah untuk niku."

³⁹ Kak raduni Isa nyeritako jama tian perumpamaan injuk sinji, "Kik jelma buta mimpin jelma buta sai bareh, pasti tian rua ano haga tumbak delom siring.

⁴⁰ Mak ngedok murid sai lebih balak jak guruni. Kidang murid sai radu tamat belajar, haga jadi injuk gegoh injuk guruni.

⁴¹ Mengapi keti ngeliak secuil kayu di mata puarimu, sedang balok di matamu tenggalan mak keti perhatiko?

⁴² Repa keti dapok ngucakko jama puarimu, 'Ija, puari, nyak ngeluahko secuil kayu jak matamu ano,' sedang delom matamu tenggalan wat balok mak keti liak? Hai munafik! Luahko pai balok sai wat di matamu tenggalan. Ampai keti dapok ngeliak jelas rik ampai dapok ngeluahko secuil kayu jak mata puarimu."

⁴³ "Batang sai subor mak ngehasilko uah sai burak. Reno muneh batang sai mak subor mak ngehasilko uah sai betik.

⁴⁴ Unggal batang dikenal jak uahni. Semak keruwi mak ngehasilko uah ara, rik semak keruwi mak ngehasilko uah anggor.

⁴⁵ Jelma sai betik ngeluahko hal-hal sai betik mani hatini latap jama kebaikan. Ulun sai jahat ngeluahko hal-hal sai jahat mani hatini latap jama kejahatan. Api sai dicawako ulihni banguk senodo sai luah jak hati."

⁴⁶ "Ngapi keti ngurau Nyak, 'Tuhan, Tuhan,' kidang keti mak ngeguaiko api sai Kucawako jama keti?

⁴⁷ Jama sapa dapok ram gegohko jelma sai ratong jama Nyak, rik ngedengi cawa-Ku rik ngelakukoni? -- Nyak haga nunjukko jama niku --.

⁴⁸ Ia injuk jelma sai waktu ngebangun lamban ngegali relam-relam, kak raduni nyani pondasi jak batu. Waktu wat banjer rik way ngelanda lamban seno lamban seno mak dapok diguyangkon mani radu dibangun di atas pondasi sai betik.

⁴⁹ Kidang jelma sai ngedengi cawa-Ku rik mak ngeguaikoni, injuk jelma sai ngebangun lamban tanpa pondasi. Kik banjer ratong, lamban seno geluk rubuh; rik cadangni hibat nihan!"

Lukas

Video Lukas 06

Ikuti Kami:

KONTAK | PARTISIPASI | DONASI