Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Lẽq sopoq jelo, waktu nike jelo Sabat, Deside Isa kance pengiring-pengiring-Ne bemargi lẽq lendang gandum. Pengiring-pengiring-Ne pade bau gandum. Ie pade osok gandum nike kadu imene, terus ie pade kelorang.

² Dengan-dengan Parisi bebase, "Kembẽq side pade piaq hal saq ndẽq tekanggo telaksaneang lẽq jelo Sabat?"

³ Jawab Deside Isa, "Napi side pade ndẽq uwah bace napi saq telaksaneang Daud, sewaktu ie dait dengan-dengan saq ngiring ie lapah?

⁴ Daud tame ojok dalem Gedẽng Allah terus bait ruti saq sampun teaturang tipaq Allah, terus kelorangne dait bẽngne tipaq pengiring-pengiringne, padahal ruti nike ndẽq kanggo tekelor kecuali siq imam-imam?"

⁵ Terus Deside Isa bemanik, "Bije Manusie nike Penguase jelo Sabat!"

⁶ Lẽq jelo Sabat saq lain, Deside Isa lumbar ojok balẽ ibadah terus ngajahang. Lẽq derike araq dengan saq ime kananne matẽ setowẽq.

⁷ Ahli-ahli Taurat dait dengan Parisi mẽlẽ boyaq kesalaqan Deside Isa adẽqne bau ngelaporang Ie. Jari ie pade tetep merhatiang napi Ie gen nyelahang dengan lẽq jelo Sabat.

⁸ Laguq Deside Isa wikan pikiran ie pade. Make Deside Isa bemanik lẽq dengan saq matẽ setowẽq imene nike, "Silaq nganjeng lẽq deriki lẽq julu!" Dengan nike ures, terus nganjeng lẽq derike.

⁹ Beterus Deside Isa beketuan lẽq dengan-dengan saq araq lẽq derike, "Mbẽ saq tekanggoang lẽq jelo Sabat, solah atao gawẽq hal saq jahat, nyelametang nyawe dengan atao nyematẽq dengan?"

¹⁰ Deside Isa cingakin sekelining ie pade selapuq, terus bemanik tipaq dengan nike, "Ulurang imende." Dengan nike ngulurang imene, terus imene jari selah.

¹¹ Laguq ahli-ahli Taurat dait dengan-dengan Parisi nike sili gati, terus ie pade berunding, napi saq gen ie pade bau laksaneang tipaq Deside Isa.

¹² Lẽq waktu nike Deside Isa taẽk ojok sopoq bukit jari bedo'e. Lẽq derike Ie bedo'e tipaq Allah sekeleman.

¹³ Sesampun menah, Ie ngemanikang pengiring-pengiring-Ne, terus pilẽq due olas dengan lẽman ie pade, Deside Isa aranin due olas dengan nike rasul-rasul. Aran dengan-dengan nike:

¹⁴ Simon (saq Ie sebut ẽndah Petrus), dait Andreas semetonne Simon; Yahya dait Yakub, Pilipus, Bartolomeus,

¹⁵ Matius dait Tomas, Yakub bijene Alpeus, dait Simon (saq tesebut dengan Zelot),

¹⁶ Yudas bijene Yakub dait Yudas Iskariot saq beterus jari penghianat.

¹⁷ Beterus Deside Isa turun lẽman bukit nike teiring siq rasul-rasul nike, terus mentelah dait nganjeng lẽq sopoq taoq saq lendek. Lẽq derike araq ẽndah luwẽq pengiring-pengiring-Ne saq lain dait luwẽq dengan saq dateng lẽman selapuq wilayah Yudea, Yerusalem dait kote-kote Tirus dait Sidon saq lẽq sedin segare.

¹⁸ Ie pade dateng jari dengahang Deside Isa, dait jari teselahang lẽman penyakit-penyakit ie pade. Ie pade saq tekuasein siq roh jahat dateng ẽndah dait teselahang.

¹⁹ Selapuq dengan berusahe jamah Deside Isa, sẽngaq araq kuase saq sugul lẽman diriq-Ne saq nyelahang ie pade selapuq.

²⁰ Deside Isa perhatiang pengiring-pengiring-Ne terus bemanik, "Bahagie side pade dengan-dengan miskin, sẽngaq side pade saq dowẽang Kerajaan Allah!

²¹ Bahagie side pade saq lapah mangkin; side pade gen tepuasang! Bahagie side pade saq nangis mangkin; side pade gen kelelẽq!

²² Bahagie side pade, lamun lantaran Bije Manusie side pade temeriq, tetolaq, tehine dait tepitnah!

²³ Nabi-nabi jaman laẽq teperlakuang maraq nike ẽndah. Lamun hal nike telaksane, side pade harus terimaq secare ihlas, dait tetep besukecite, sẽngaq upaq side pade belẽq lẽq sorge.

²⁴ Laguq celake side pade saq sugih mangkin niki; sẽngaq side pade sampun ngalamin kenikmatan!

²⁵ Celake side pade saq besuh mangkin niki; sẽngaq side pade gen kelapahan! Celake side pade saq kelelẽq mangkin niki; sẽngaq side pade gen asẽq dait nangis!

²⁶ Celake side pade lamun selapuq dengan puji side pade; sẽngaq maraq nike ẽndah leluhur ie pade sampun perlakuang nabi-nabi palsu."

²⁷ "Laguq tipaq side pade saq dengahang Tiang mangkin niki, Tiang sampẽang pesen niki: Kasihin musuh-musuhde, dait laksaneang saq solah tipaq dengan saq meriq lẽq side.

²⁸ Berkahin dengan saq ngutuk side, dait do'eang dengan saq aniaye side.

²⁹ Lamun dengan nempẽlẽk sangkẽpde saq sopoq, alurang ie nempẽlẽk sangkẽpde saq sopoqne ẽndah. Lamun jubahde terampas, bẽng ẽndah kelambinde.

³⁰ Lamun araq dengan saq nunas lẽq side, bẽng ie; dait lamun dowẽnde terampas, ndaq lakoq ie malik.

³¹ Perlakuang dengan lain maraq side pade melẽt teperlakuang siq ie pade.

³² Lamun side pade ngasihin dengan-dengan saq ngasihin side pade, napi saq gen jari upaqde? Dengan bedose ẽndah ngasihin dengan-dengan saq ngasihin ie pade!

³³ Dait lamun side pade solah tipaq dengan-dengan saq solah lẽq side, napi upaqde? Dengan bedose ẽndah piaq maraq nike!

³⁴ Dait lamun side pade nyinggaqang kẽpẽng cume tipaq dengan-dengan saq bau nulakang, napi upaqde? Dengan bedose ẽndah nyinggaqang kẽpẽng tipaq dengan bedose, terus ie tagih malik!

³⁵ Seharusne ndẽq maraq nike! Sebalikne side pade harus ngasihin musuhde dait solah lẽq ie pade. Side pade harus bẽng nyinggaq, dait ndaq harepang tetulakang malik. Lamun maraq nike, upaqde gen belẽq dait side pade gen jari bije-bije dowẽn Allah Saq Maheagung. Sẽngaq Allah nike murah atẽ lẽq dengan saq ndẽq tao betampi asih, dait tipaq saq jahat ẽndah.

³⁶ Side pade harus murah atẽ, pade maraq Bapa side murah atẽ."

³⁷ "Ndaq side pade hakimin dengan lain, make side pade ndẽq gen tehakimin. Ndaq side pade hukum dengan lain, make side pade ndẽq gen tehukum; ampunin dengan lain dait side pade gen teampunin.

³⁸ Pade bẽng tipaq dengan lain, dait side pade gen tebẽng: Sopoq takahan saq solah, saq tepadetang, saq tegerik dait saq tumpah ojok luah gen tebẽng tipaq side pade. Sẽngaq ukuran saq side pade kadu lẽq dengan lain, nike ẽndah gen tekadu siq Allah lẽq side pade."

³⁹ Beterus Deside Isa nyampẽang malik tipaq ie pade sopoq perumpamean: "Lamun dengan bute pimpin dengan bute saq lain, pasti deduaqne gen geriq ojok longkak.

⁴⁰ Sopoq murit ndẽqne belẽqan lẽman gurune, laguq murit saq sampun tamat gen jari pade maraq gurune.

⁴¹ Kembẽq side pade pedaseng bubuk kayuq lẽq dalem penenteng semetonde, padahal balok lẽq dalem penentengde, ndẽq side pade perhatiang?

⁴² Berembẽ side pade bau bebase lẽq semetonde, 'Tunas, semeton, tiang sugulang bubuk kayuq lẽq penentengde nike,' padahal dalem penentengde mẽsaq araq balok saq ndẽq side pade serioq? Hai dengan munapik! Sugulang juluq balok saq araq lẽq penentengde mẽsaq, baruq side pade pedas serioq dait bau nyugulang bubuk kayuq lẽman penenteng semetonde."

⁴³ "Lolo saq solah ndẽqne mungkin ngasilang buaq saq ndẽq solah. Maraq nike ẽndah lamun lolo nike ndẽq solah, ndẽqne mungkin ngasilang buaq saq solah.

⁴⁴ Sebilang lolo tetaoq lẽman buaqne. Bebenes saq beduwi ndẽq ngasilang buaq are, dait pupaq saq beduwi ndẽq ngasilang buaq anggur.

⁴⁵ Dengan saq solah nyugulang hal-hal saq solah sẽngaq atẽne penoq siq hal-hal saq solah. Dengan saq jahat nyugulang hal-hal saq jahat sẽngaq atẽne penoq siq hal-hal saq jahat. Sẽngaq napi saq teucapang siq biwih tetentuang siq isi atẽne."

⁴⁶ "Kembẽq side pade ngempoh Tiang, 'Junjungan Saq Mulie, Junjungan Saq Mulie,' laguq ndẽq ngelaksaneang napi saq Tiang manikang lẽq side?

⁴⁷ Kance sai bau ite padeang dengan saq dateng tipaq Tiang dait dengahang manik Tiang terus ie laksaneang manik nike? -- Tiang badaq side pade --.

⁴⁸ Ie pade maraq dengan saq kenyeke penganjeng balẽ, kaliqne dalem-dalem, terus miaq dasar balẽ nike kadu batu. Waktu araq belabur dait aiq kokoq dateng babar balẽ nike, balẽ nike ndẽq iniq inggur, sẽngaq tepenganjeng lẽq atas dasar saq kuat.

⁴⁹ Laguq dengan saq dengah manik Tiang dait ndẽq ie laksaneang, pade maraq dengan saq penganjeng balẽ ndẽq kadu dasar. Waktu tebabar siq belabur, balẽ nike becat ruk; dait luwẽq gati sẽdene!"

Lukas

Video Lukas 06

Ikuti Kami:

KONTAK | PARTISIPASI | DONASI