Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Hit ap suwon henemingmingangge werehon fahet hunubam tot imin: Nenemingmingangge fam tuk teg ane eneg tul peruk lit fano ane turuk lamuhup. Fano ane turuk lit nir oho Ninikni suwon poholma wereg ulug honoluk toho welamuhup.
2 Hundig-hundig sembahyang uruk lit hinindimu honoluk toho wereg lit Allah fam Ninikni uruk lit wel turuk lamuhup.
3 Allahn inisanggo hur enebuhumu wene fano holuhuben Kristus fam Allahn hirako foroho ane fahet fag toho hiyag isaruk lamuhuken nit fahet sembahyang uruk lamuhup. Kristus fam Allahn hirako foroho ane fahet penjara kilap naptusa.
4 Fag toho hiyag isa rohon hikit toho hiyag isaruk laruhuken hiren an fahet sembahyang uruk lamuhup.
5 Ap selma werehon wene holtuk eleg inap iniline turuk lahep ane fuki roho wenggel halug turuk lamuhup. Tul peruk lahep ane tehep ha fug nowen li weregma ariya turuk lamuhup.
6 Henele al waroho ap unubam hiyag isaruk lamuhupmu saho unduk fano hag toho aben hit henele fano ulug holuhup. Aben hinog-og hisahubon fahet nangginoho hiyag isahuk ulug hinindi anggat toho wereg lit wenggel haruk lamuhup.
7 An wereg lit turuk lahi ane fahet nenere Tikhikus ninindi reg laheyon an let naptuk lit Allah amingmingangge wereg lit fano roho werehon ino hit henembeg waruhureg hiyag hisahu.
8 An welahi ane fahet ari roho wereg ulug hit fam hiyag hisaruk lit hinindi seyap henebuhuwen anden hit henembeg at monde fik waruhuk.
9 Hit Kolose hinap henesehelimuwon nenere indi fanowon Onesimus ninindi reg laheyon ino men ambiyeg mon enebik waruhuk. Mun ane man ane tuman inam atisi ane iren hiyag hisaruk lamuhup.
10 Aristarkhus an nim penjara werehon ino men Barnabas are Markus ino menen nori uruk lit hi heneptuk. Markus ino waruhu ane fahet anden tam hiyag hisarikikon ino henembeg waruhu halug nenere ulug hondohokup.
11 Yustus unuk eke Yesus inowen oho hi heneptuk. It hinahan nonori hinahan itano eneg ambilahap paleg inap wereg angge famen an let naptuk lit Allah wene hiyag isaruk. It itanowen an nindi yuwahap naptuk lit wereg.
12 Hun Epafras inowen oho hit fahet eke nori ulug hi heneptuk. At ino henere hit sehelimuwon Yesus Kristus amingmingangge wereg lit hit hinine roho welamag ulug hit fahet likiya hupmu sembahyang uruk lit wereg. Allahn peruk ane fahet hinindi anggat toho wereg lit fano ane turuk lamuhup ulug Allah fam heng turuk.
13 At inowen hit Kolose hinap men Laodikia inap men Hierapolis inap men fahet let heneptuk lit lisag toho turukmu haruk lahi.
14 Ap hihir eneptuk ahun Lukas nindi reg lahiyon inowen oho Demas inowen oho nori ulug hi heneptuk.
15 Nonori Laodikia werehon hi eneptuk lahe ane aru hiyag isahup. Nenerek Nimfa men Allah wene holtul ulug at ibam palu arik kurukon men arimano oho hi eneptuk lahe.
16 Suwesingga emberuk lahiyon aru hiren kim hahupteg honoluk aruhumu Laodikia inaben oho kim hawag ulug og isa lahup. Og isa lahupmu it fahet emberuk lahiyon oho hiren kim hahuben heng enebuhup.
17 Hun Arkhipus hiyag utuk lit yabuk Allahn hiyag hitisiyon ino fano roho wituk laruhunen yet teg lamok ulug komo haptisi ulug hiyag omok.
18 Hi heneptuk lahi ane aru an Paulus ninggareg ninggik fam hahatuk lahi. An hele wat naptusa ane fahet honoluk toho welamuhup. Allahn hit fahet Indi henesug lit fet henesug laruhuwen sembahyang uruk lahi.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA