Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Kam leú et ka kam, ale Sasaraina, sipuoni tai tuan! Kau bulat ienungi enungannia, nupupagugulet'aké kam sia, sapaguguletmui, ka siripokatnia samba ka adil. Kau nurepdem kam, beri kam leú et ka kam, ai leú sara majikanmui ka manua.
2 Kau imariu-riu nupaniddou kam ka tubut Taikamanua; samba leú kau imariu-riu tarek tubumui, tápoi sialei pusurakat ka tubut Taikamanua.
3 Iageti tiddouaké leú et kam kai, ka kai, bulé iaké ka kai oggak simaerú, ioi kuei kai masipakakra Katuareman Simaerú, iaté pagalaiat keleat Kristus. Aipoí kalulut néné te akutuukum kineneiget, ka bagat penjara.
4 Tiddou kam ka tubut Taikamanua, bulé ioi kukolouaké keleat néné, bulat simakolou, ka siripot enungnia.
5 Ka paaleiatmui leú, ka tubudda saaleimui sitaimatonem baga peilé ka tubut Tuhan Jesus, kau bulat sipinagaba samba pakei kam sangamberinia tetre simaerú, bulat sipulelelek.
6 Kau iobá samba ialá bagadda sangamberi sikuamui. Pasiaalegimui nga-nganda leú et, bulat kau sipinagaba.
7 Oto ai leú isegéaké nia si Tihikus, sangamberinia sipuaaili ka tubukku, kineneiget. Bulat matopit nia ipaalei kai mugalai, ka galajet Tuhan.
8 Lulunia geti akugugluaké nia ioi ka tubumui, iaté, bulé nuagai kam nia, kipangan kai kineneiget, ibara pusuibiat bagamui.
9 Ai leú si Onesimus alei Tihikus; aipoí nia ka sia néné, sikaumamui leú et. Simatopit lé nia; manuntu bagamai ka tubunia. Si Onesimus sambat si Tihikus'an lé masisesegéaké ka matamui, sangamberinia sibabara ka kudduatku néné.
10 Oto beri leú et ka sia, si Aristarkus, aleiku ka bagat penjara, segé salamnia ka tubumui, sambat salamnia ka sia si Markus, taluban Barnabas. (Aiakéan leú te katuareman kaooinia, bulé nusiló kam kaooinia.)
11 Iageti segé leú et salam nia, ka sia Jesus, sipuoni leú si Justus. Iaté sibara ka talagadda tai Jahudi, simatonem baga ka tubut Tuhan Jesus. Teludda néné lé, aleiku kineneiget mugalai, masigalaiaké galajet, sibara ka Taikamanua. Bulat ararop'akéan aku simakopé, mugalai galajet.
12 Segé leú et salamnia, ka sia si Epapras, ka tubumui. Nia néné leú et, sibara ka mungkuatmui. Nia ka sia néné, pagugulet Jesus Kristus, sitaipuaari maniddou, masitiddouaké kam, ka tubut Taikamanua. Itiddou simakopé ka tubut Taikamanua, bulé memei maroron tonem bagamui samba memei masisikebbukat pupaatuananmui, imamuiné nuretdet kam siobat bagat Taikamanua.
13 Bulat matakkungan amasiigbuk momomoakéna tubunia mugalai kalulumui, sambat kaluludda tai Laodikea, elé kaluludda tai Hierapolis.
14 Kisedda leú ka sia ruadda néné, iaté si Dokter Lukas sambat si Demas, segé leú et salamra, ka tubumui.
15 Segéaké leú kam salammai ka tubudda saaleita tai Kariten ka Laodikea, sambat kai Nimpa, samba leú et ka tubudda sapaamian siparururú maniddou, ka lalepnia.
16 Oto ké lepá nubatsaaké kam nia suratku néné, ka tubumui ka kam, gabamuian enungan masitaroaké suratku néné, ka tubudda tai Laodikea, bulé rabatsaaké nia ka sia, ka paamianda. Kisedda leú et kam ka kam, buítá nubatsa kam surat kirim'akenenda tai Laodikea, ka tubumui.
17 Kua kam ka matat Arkipus, "Lepáaké galajet, sisegéakenen ka tubum, siripot galajetnu masipuukú galajet Tuhan."
18 Iageti segé leú et salamku kaku, iaté, aku sipuoni si Paulus, ka tubumui. Bulat tubukku té, amugalai surat néné. Buí leú nukalipogi kam; kineneiget ai peilé aku ka bagat penjara! Bulé ipanukani kam si Tuhan, sangamberimui. Harmatmai, Paulus
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA