Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Wali komi to pue mbatua, waika watua ngkomi anu to singkonong pei i Pue Allah pasi to masipato rawaika sira. Ika resi sira sewaju ewa komi rani i Pue Allah mangika resi komi apa komi mangansani re'e seja Pue ngkomi ndate saruga.

² Wali pakadota raya makaikai resi i Pue Allah, pasi pakakoro makai-kai etu. Pasi to'oka Ia tarima matao.

³ Pasi pokai-kaika seja kami see i Pue Allah damangawaika kami jaya damampakarebaka tau tuntuNya to mampakanasa songkaNya to tawa nansani ntau. SongkaNya etu mangkonong i Kerisitu semo. Wali pokaika aku see aku maya mampakanasaka kojo resi tau tempo aku mampakarebaka songka i mPue Allah etu. Apa masipato aku mangika ewa wetu. Kamonsonya aku re'e mampakarebaka resi tau mangkonong i Kerisitu, see naka aku ri raya ntarungku si'i-si'i.

⁴ (4:3)

⁵ Wali ri raya ngkasintuwu ngkomi resi tau to taa mangaya, pake kapande to nawaika i mPue komi. Pasi pakayoaka mangika palaong to bae batuanginya.

⁶ Pasi tempo komi mampogomboka tau to taa mangaya etu, to tao-tao komi sangkani manganto'o gombo to manoto pasi gombo to bae batuanginya to raporapaka ewa bure. Pasi pobuuka kojo ewa wimba danuika ngkomi mangansono gombo nsira samba'a pei samba'a see komi damanganto'o sono to masipato danuto'o ngkomi.

⁷ Wali aku damampokau i Tikhikus dayau resi komi damampakarebaka komi samparia kareba mangkonong aku. I Tikhikus etu ia samba'a a'i ngkita anu raporayang. Ia seja to papolaong i mPue pasi ia maya rasarumaka mangangika palaong i mPue etu.

⁸ Wali see naka aku mampokau ia yau resi komi, see ia damangansani ewa wimba kareba yako resi komi si'isi'i, pasi damampakaroso raya ngkomi.

⁹ Pasi aku mampokau seja i Onesimus yau seja sindara-ndara pei ia. I Onesimus etu ia samba'a tau to yako ri lipu ngkomi semo. Ia seja a'i ngkita anu raporayang, pasi ia seja maya rasarumaka. Wali tau dua to kupokau etu, sira damampaponsanika komi mangkonong samparia palaong to mawali rire.

¹⁰ Wali i Aristarkus, to ratarungku seja sindara-ndara pei aku, ia taa mangkalingan komi. Pasi ewa see seja nato'o i Markus, pinuana i Barnabas. Komi roomo mangantima patuu mangkonong i Markus etu. Patuu etu manganto'oka komi mangantima ia ri kasanang ndaya ane ia rata resi komi.

¹¹ Wali i Yesu to rato'oka seja i Yustus, ia taa seja mangkalingan komi. Wali ane tau to Yahudi, ojo patanya i Aristarkus, i Markus pasi i Yustus etu to mapalaong sindara-ndara pei aku mangika palaong i mPue Allah, Makole ngkita. Pasi sira togo mampakaroso kojo rayangku.

¹² Wali i Epapras, to yako ri lipu ngkomi, ia taa seja mangkalingan komi. Ia seja to papolaong i ngKerisitu, pasi ia sangkani maroso rayanya mampokaikaika komi. Ia mamporapika resi i Pue Allah see Ia mampakaroso pangaya ngkomi pasi mampasilonganaka pansarumaka ngkomi mangkonong samparia pamporani to si Ia.

¹³ Pasi aku mawali matamanasa mangkonong palaong to matao to naika i Epapras etu. Ia maroso kojo mapalaong mangansawang komi pasi mangansawang seja pua'i ngkita to nja'u kota Laodikia pasi nja'u kota Hierapolis.

¹⁴ Wali i Dokter Lukas anu raporayang, pasi i Demas, sira dua taa seja mangkalingan komi.

¹⁵ Wali to'oka pua'i ngkita to samba'a pangaya to nja'u kota Laodikia aku taa mangkalingan sira. Pasi to'oka seja i Nimpa pasi tau to mangaya to siromu nja'u banuanya aku taa seja mangkalingan sira.

¹⁶ Pasi ane komi roomo mangabasa surangku si'i, waika seja resi tau to mangaya to siromu nja'u Laodikia pei to'oka sira mangabasa. Pasi sura to kupokatuka tau to nja'u Laodikia etu komi seja mangabasa.

¹⁷ Wali to'oka i Arkhipus ewa si'i, to'oka, "Pakadota mampakaroo palaong to nawaika i mPue korom apa saba korom samba'a pei Ia."

¹⁸ Wali aku, i Paulus, taa seja mangkalingan komi. Pasi gombo to mangantabea komi si'i aku semo mangantulis. Wali ne'e kalingan aku re'e ri raya ntarungku si'i-si'i. Pasi aku makai-kai resi i Pue Allah see Ia damampaponsanika komi kanotoNya. Amin. Ungkanyamo ruyu gombongku si'i.

Kolose

Video Kolose 4

Ikuti Kami:

KONTAK | PARTISIPASI | DONASI