Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ee, kamu' to puang! La maruruh kamu' lako kaunanmi, danggi' mipasilaenanni. Ingaranni kumua te'da na kamu' manda to la dipekapuangngi, apa den toda Puangmi jao suruga.

² Danggi' mipajaii massambajang lako Puang Allataala. Na ia ke massambajang kamu' mangkurru sumanga' too kamu'.

³ Passambajangankan, anna benkan wattu Puang Allataala mpangpeissenan akkatta-Na, to jolona tangnaissenpa tau, to napugaukmo Almaseh. Na iamora joo kuditarungku.

⁴ Passambajanganna', angkukullei mpangpeissenanni anna pahangngi tau, nasaba' iamora jamanku'.

⁵ La macca kamu' ke sola kamu' totangnturu' Puang. Na la mipake to wattu diben kamu' mpangpeissenanni to karebanna Almaseh umbo-umbo minii.

⁶ Ia ammimangkada la napumasannang to tossa'dingngi. Mebali melo kamu' ke denni tau ngkutanai kamu'.

⁷ Sininna to apa jaji lako kaleku' la napauan kamu' padanta' tomatappa' Tikhikus to tapakamoja'. Ia to Tikhikus sangpangjamanku', to tatta' mpangjaman Puang Allataala.

⁸ Kusuai male mati' la mpauan ngasan kamu' kumua matumba-tumba unakan anna pakatana kamu'.

⁹ Ia to padanta' tomatappa' Onesimus la male toda mati'. To-Kolosei, to tatta' matappa' na kipakamoja' tongan. Iamora joo sola duai la mpauan kamu' kumua matumba-tumba unakan.

¹⁰ Sallangna mati' Aristarkhus, to kusolan ditarungku. Sallangna toda Markus, sampu pissenna Barnabas. Susi to kuuki' jolo, la mitarima melo ke malei mati'.

¹¹ Sallangna mati' Yesua, to disanga toda Yustus. Ia mandara tee tau sola tallu jio mai to-Yahudi, to matappa'mo lako Puang, kusolan mpangjaman Puang Allataala. Na iamora mpamasumanga'na'.

¹² Sallangna Epafras mati', mesa' to-Kolose, pangjama-Na Puang Isa Almaseh. Te'da napajaii mpellao doangan kamu' sola ngasan, dikua ammisamawatang-watangnamo susi mesa' tomasaranian, ammituli nturu'i to pakkaeloran-Na Puang Allataala.

¹³ Mangka aku' kukita liwa' mattongan-tongan mpangjaman kamu' sola to-Laodikia na to-Hierapolis.

¹⁴ Padanta' tomatappa' dottoro' Lukas, to tapakamoja', ngkiring sallangna mati', susi toda Demas.

¹⁵ Paratuankan sallangki' lako tomatappa' jio kota Laodikia. Sallangki' lako Nimfa sola jamaa to sirempun jio bolana.

¹⁶ Ia ammimangka mbacai tee sura'ku', la miben todai jamaa jio kota Laodikia nabacai. Susi too to sura'ku' lako to-Laodikia la mibaca tooi ke nakiringan kamu'.

¹⁷ Pauanni Arkhipus anna jama melo jamanna to napabarakkananni Puang Allataala.

¹⁸ Sallangku' Paulus. Aku' nnuki'i tee passallang. Danggi' mikalupaii kumua lan unapa' pangtarungkuan! Dennaa upa' nabarakka'i kamu' Puang Allataala. Padamo jolo' too. Sallangki' mati', Paulus.

Kolose

Video Kolose 4

Ikuti Kami:

KONTAK | PARTISIPASI | DONASI