Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Wali tongo-tongonya i Petrus sira dua i Yohanes mampogomboka tau boros etu, rata sawei mba’a to pampue pasi kepala to mampasilonga tau to mangajagang banua i mPue Allah, pasi re’e seja sawei mba’a to Yahudi to aliran Saduki.
2 Sira maja’a kojo rayanya resi i Petrus dua i Yohanes apa sira dua mampotundeka tau boros sira manganto’o, “I Yesu nambangu muni yako ri kapateNya, wali see naka kita mangansani monso pu’u samparia tau damambangu muni seja yako ri kapatenya.” Etu semo to to’o nsira dua.
3 Wali see naka to pampue pasi yunu nsira etu mangansoko sira dua pasi mangantarungku. Tempo sira dua rasoko etu damawengimo rao, wali sira ojo ratarungku mangampea darabotus ane ratamo eo rao.
4 Pei tau to roomo mangandonge anu to napotundeka nsira dua ri katawanya sira ratarungku etu, boros to mangaya i Yesu. Wali tau to mangaya tidugang wo’u kaborosinya kira-kira lima nsowu owo to langkai.
5 Wali ojo kaeonya rao kepala-kepala nto pampue pasi tau tu’a nto Yahudi pasi tau to mampoguru porenta i Musa, sira siromu ri Yerusalem.
6 Sira siromu sindara-ndara pei kepala nto pampue to bae angganya, sanganya i Hanas, pasi re’e seja i Kayapas, i Yohanes, i Aleksander pasi samparia tau to yusa to ja’i ngkepala nto pampue to bae angganya etu.
7 Wali i Petrus sira dua i Yohanes rakeni mangampotango kepala-kepala etu. Pasi ngkai to napakaroso nsira witinya wengi, ia re’e seja nja’u ria. Wali kepala-kepala etu mampotanaka resi i Petrus dua i Yohanes, sira manganto’o, “Kuasa kesaa to nupake ngkomi dua mampakaroso witi ngkai si’i? Pasi sema to mangawaika komi kuasa to etu?”
8 Wali i Petrus bae kojo karoso ndaya to nawaika i Nosa Mapasing ia, wali ia mampogomboka sira, to’onya, “Kepala-kepala pasi tau tu’a nto Yahudi!
9 Ane komi mangabotus kami seo si’i mangkonong palaong to matao to kami mangika resi ngkai to malulu witinya wengi, pasi mangkonong ewa wimba ia rapakaroso witinya,
10 ane ewa see, padongeka gombongku si’i. Aku mampaponsanika komi pasi samparia to Israel, ngkai si’i rapakatao pasi ia marosomo makore ri tango ngkomi seo si’i apa saba kuasa to yako i Yesu Kerisitu to Nasaret. I Yesu etu, Ia semo to komi mangampaku ri kaju pasape seore, pei i Pue Allah roomo mangawangu muni Ia yako ri kapateNya.
11 Wali re’e to ratulis ri raya ntuntu i mPue Allah mangkonong Ia pasi mangkonong komi. Ia raporapaka ewa watu pasi komi raporapaka ewa tau to mangawangu banua, to’onya, ‘Re’e tau to mangawangu banua watu, tau etu mangantaji yau songu watu apa sira mampobuuka watu etu taa masipato rapake ri banua etu. Pei i Pue Allah mamporani watu etu semo to rapake mangawangu banua etu, see naka watu etu rapake muni. Wali i Pue Allah mangampake watu etu panewa watu etu semo to mawali yau watu to bae kojo batuanginya ri banua to etu.’ Etu semo to ratulis ri raya ntuntu i mPue Allah mangkonong i Yesu.
12 Wali tare tau to yusa to maya mampalaes kita kasimbalinya yako i Yesu etu. Apa ri sambawo lino tare kasimbalinya wo’u to nawaika i mPue Allah kita to lino, ojo patanya i Yesu, Ia semo to mampalaes kita.” Wali etu semo gombo i mPetrus.
13 Wali kepala-kepala nto pampue pasi yunu nsira etu sira ipu rayanya mangkita i Petrus sira dua i Yohanes sira dua taa kojo meka mampotango sira. Naka pei ipu raya nsira mangkita apa sira nansani tau dua etu ojo tau biasa, taa malangan sekolanya. Panewa sira mangendo tau dua etu re’e mangalulu i Yesu seore.
14 Wali kepala-kepala etu rani kojo mangansapu palaong to taa rapobiasa to naika nsira dua etu, pei taa mawali apa sira mangkita ngkai to rapakatao witinya etu makore mampotango sira sindara-ndara pei Petrus dua i Yohanes. Wali tare bara kesaa to maya nato’o nsira mangansapu palaong to etu.
15 Wali sira manganto’oka i Petrus sira togo, “Piyai ruyu yako ri tampa nto pabotus si’i.” Pei ojo kayako ntau togo etu sira magombo-gombo samba’a pei samba’a.
16 Sira manganto’o, “Kesaa dataika resi tau dua etu? Kita taa maya mangansapu palaong etu apa samparia tau ri Yerusalem si’i mangansani tau dua etu semo to mangika palaong to taa kojo rapobiasa etu.
17 Pei kita taa rani kareba mangkonong palaong etu datikarebaka wo’u ri tau boros. Wali anu kita mamporentang kojo sira dua manganto’oka sira ne’e kojo manto’oka wo’u tau mangkonong i Yesu.”
18 Wali yako etu sira mampokio wo’u i Petrus sira dua i Yohanes pei manganto’oka sira, “Komi tamo maya mampogomboka wo’u tau mangkonong i Yesu, pasi ne’emo seja mampotundeka tau mangkonong Ia.”
19 Pei i Petrus dua i Yohanes mangansono, sira manganto’o, “Wimba, ane ewa pampobuuka ngkomi, to imba to singkonong pei i Pue Allah kami mangika, bara mampalaika komi, bara mampalaika i Pue Allah?
20 Ane ewa pampobuuka mami dua, kami taa maya mampalaika porenta ngkomi etu. Apa kami taa maya mampandooka manganto’oka tau mangkonong palaong to naika i Yesu seore to kami re’e mangkita, pasi mangkonong gombo to ito’oNya seore to kami re’e mangandonge.”
21 Wali ojo karoonya sira dua magombo, kepala-kepala etu mangarai wo’u sira panewa mangalapa muni sira. Kepala-kepala etu taa mangarata jaya mangahuku sira dua apa tau boros samparia paka mangabarong i Pue Allah saba mangkita palaong to taa rapobiasa to nika ntau dua etu.
22 Tau mangabarong i Pue Allah apa ngkai to rapakatao witinya yako ri palaong to taa rapobiasa etu, ngkai etu yabi opo mpuyu nto’umo umurnya. Wali ane ewa see manasa kojo ojo kuasa i mPue Allah semo to nakurang mampakatao witinya etu.
23 Wali ojo karoonya i Petrus sira dua i Yohanes ralapa muni, sira yau siromu sindara-ndara pei yununya. Panewa sira mampakarebaka yununya etu mangkonong anu to nato’oka ngkepala-kepala sira dua.
24 Wali ojo karoonya yununya mangandonge anu to napakarebaka nsira dua etu, sira makai-kai sindara-ndara manganto’oka i Pue Allah, “O Pue anu Makuasa, Komi semo to mampapowali yangi, lino, tasi pasi samparia bananginya.
25 O Pue, gombo ngKomi re’e ratulis ri raya ntuntuMu. Gombo etu nato’oka i Nosa Mapasing tempo owi mangampake nganga i Makole Daud, wali gomboMu etu manganto’o, ‘Maka pei maja’a raya ntau to si’a to Yahudi? Pasi maka pei to Yahudi mangika songka to tare batuanginya?
26 Makole-makole nto lino mampakaroso damamusu, pasi samparia tau to mangkuasang to lino sira siromu damangewa i Pue pasi i Kerisitu, Makole parajanji i mPue Allah.’
27 O Pue, tibanang kojo gombomu etu apa i Makole Herodes pasi i Pontius Pilatus sira siromu ri kota si’i seore sindara-ndara pei tau to Yahudi pasi to si’a to Yahudi. Tempo etu sira mansongka mangewa i Yesu, to papolaong ngKomi to mapasing to nupilis ngKomi damawali Makole.
28 Pei kamonsonya songka nsira etu mangalulu kojo songka ngKomi. Songka ngKomi etu Komi room mampakatantuka yami yako ri kuasaMu pasi pamporaniMu.
29 Wali si’i-si’i Pue, kami mamporapika resi Komi see Komi mampobuuka ewa wimba naika nsira mangarai kami. Pasi waika kami gana karoso ndaya mami see kami taa meka mampakarebaka sa’e tuntuMu.
30 Pasi kuporapika seja resi Komi see Komi damampaponsanika tau kuasaMu tempo sira mangkita tau to rapakatao muni yako ri panyaki, pasi tempo sira mangkita palaong to yusa to taa rapobiasa to mawali tondong resi sira pasi palaong to mampakaipu raya nsira. Palaong to etu damawali saba yako kuasa i Yesu, to papolaong ngKomi to mapasing.” Etu semo pakai-kai nu yunu i mPetrus sira dua i Yohanes.
31 Wali ojo karoonya sira makai-kai etu, kalengko-lengko banua nakasiromu nsira etu, pasi sira samparia bae kojo karoso ndaya to nawaika i Nosa Mapasing sira. Panewa sira mula mampakarebaka tuntu i mPue Allah, pasi tempo sira mampakarebaka etu sira taa kojo meka rayanya.
32 Wali songonya tau to mangaya i Yesu etu, sira samba’a pampobuukanya pasi samba’a raya. Tare pasi samba’a sira to manganto’o, “Ngaya-ngaya to si’i akuja puenya.” Wali samparia to re’e resi sira, paka sira samparia puenya.
33 Wali bae kojo kuasa mpomakau i mPue Yesu tempo sira mampakarebaka tau, manganto’o, “I Pue Yesu Ia mambangu muni yako ri kapateNya.” Pasi tau to mangaya etu bae kojo kanoto i mPue Allah to re’e resi sira.
34 Wali tare tau to ri oyo nsira to taa gana to napake. Apa i sema to re’e tana bara banua, sira mampobalu yau panewa olinya etu sira mangkeni
35 pei mamposaka ri tango mbiti mpomakau i mPue Yesu. Panewa doi etu ratilaka yau resi tau to taa gana anu to napake.
36 (4:35)
37 Wali ewa wetu seja naika ntau to sanganya i Yusup. Ia mampobalu yau seja tananya, panewa doi oli ntana etu ia mangkeni seja ri tango mbiti mpomakau i mPue Yesu. I Yusup etu ia semo to Yahudi to yako ri wiyaa i Lewi pasi ia yako ri pulo Siprus. Ia seja nasangaka mpomakau etu i Barnabas. Barnabas batuanginya, “tau to mampakaroso raya nsa’e.”
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA