Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Tempo i Petrus bo i Yohanes da notesa ka todea riara Banua nu Alatala, nakava bara sako-ndua *topanggeni pesomba, pakeni ntopojaga Banua nu Alatala, bo *toSaduki.

² ToSaduki ledo nomparasaya tomate matuvu mpanjili. Jadi narau mpuu ira nangepe i Petrus bo Yohanes nompatuduki ka todea i Yesus natuvu mpanjili lako ri kamateNa. Sabana, pepatudukira haitu nompakalanto tomate matuvu mpanjili.

³ Jadi nisakara randua suro haitu bo nisuarakara riara ntarunggu. Tempo haitu nabongimo, dopa namala ira ratangara. Jadi i Petrus bo i Yohanes nitaha ri sia sampe maile mpadondo.

⁴ Tapi topangepe pepatuduki nu suro-suro pangane, nadeamo nomparasaya i Yesus. Jadi kadea ntopomparasaya i Yesus nantambai sampe nitasere lima-njobu tonana.

⁵ Naeo mpadondo, pakeni-pakeni agama Yahudi, totua-totua *ntoYahudi bo *guru-guru agama nolibu ri Yerusalem.

⁶ Ira nolibu ante Pakeni nTopanggeni Pesomba, iamo i Hanas, bo muni ante sampesuvuna i Kayafas, i Yohanes, i Aleksander, bo sampesuvu-sampesuvuna ntanina.

⁷ Nasiromu purapa ira, nipekikeniramo i Petrus bo i Yohanes mantingayo ira pura-pura. Jadi nompamulamo ira nomparesa i Petrus bo i Yohanes ante nekutana, "Berimba komiu nompakabelo topunggu hitu? Ante kuasa nuapa, ante kuasa isema nipakemiu nompakabelo ia?"

⁸ Jadi i Petrus nikuasai nu Nosa Gasa nu Alatala, bo nesanamo ia, "Totua-totua, pakeni ntodea bo pakeni agama.

⁹ Kami nitangara sii-sii, sabana kami nantulungi saito topunggu, bo komiu madota mangisani berimba sampe tona hitu nipakabelo.

¹⁰ Jadi ala rasanimiu bo ala rasani nu sampesuvuta *toIsrael pura muni, kami manguli ka komiu, tona hitu nipakabelomo bo ia neangga ri ngayomiu pura-pura sabana kuasa lako nte i Yesus Kristus toNazaret. Komiu nombapaku i Yesus ri *kayu salib sampe namate, tapi Alatala nompakatuvu Ia mpanjili.

¹¹ I Yesusmo niuli vatu ri Buku Gasa ivei: 'Vatu nitedaka ntopovia banua, vatu haitumo nopokopa ka banua haitu.'"

¹² I Petrus nompapola tesana, "Aga i Yesus namala mompakasalama manusia, sabana ri njumangu dunia ledo ria saitoa tona ntanina nipakakuasa nu Alatala mompakasalama manusia, aga i Yesus saitoNa."

¹³ Topolibu haitu nokumaa pura-pura nanggita kabia i Petrus bo i Yohanes notesa, nemopa nisanira randua suro haitu aga tona biasa anu ledo nosikola nalanga. Lako rahaitu nisanira mpuumo randua suro haitu nosamporoa nte i Yesus bara ipia.

¹⁴ Topolibu ledo namala nompoara tesa i Petrus bo i Yohanes, sabana topunggu nipakabelo haitu neangga ri ngayora nosanggani-nggani ante i Petrus bo i Yohanes.

¹⁵ Jadi nitudura suro haitu rakeni hau ri savalikuna sampalai, bo topolibu pangane nosimpekutana,

¹⁶ "Nuapa rapoviata ka tona randua haitu? Nisani ntoponturo ri ngata Yerusalem pura kabaraka nipokumaaka nipoviara. Ledo mamala rapoarata kajadia haitu.

¹⁷ Tapi ala kareba hitu domo matolele hanupa, aginamo raparanggata ira randua bo raulita ka ira nee mpuu ratesamiu i Yesus ka tona ntanina."

¹⁸ Naupu haitu nirondera mpanjili randua suro pangane bo niulikara, "Tumo motesa atau mompatuduki i Yesus ka tona!"

¹⁹ Tapi nesana i Petrus bo i Yohanes, "Pekirimiu mbotomo mbana masipato rapovia kami ri panggita nu Alatala, mangoseaka parentamiu atau mangoseaka parenta nu Alatala.

²⁰ Kami hii ledo mamala menonto motesa anu nikita kami bo anu niepe kami mboto."

²¹ Ledo nikava ntopolibu anu masipato rahuku ka i Petrus bo Yohanes. Jadi niparanggara vaimo randua suro haitu pade nikabasakaramo, sabana naeka ira ka todea. Apa pura-pura todea nantoiya Alatala sabana kabaraka haitu.

²² Nokumaa mpuu todea sabana topunggu nipakabelo haitu, nelabimo patapulu-mpae umuruna.

²³ Naupu i Petrus bo Yohanes nikabasaka, nanjilimo ira hau ri ponturo nu roara. Nakava ri sia, nitesara ka roara pura-pura anu niuli ntopolibu ka ira, haitumo balengga-balengga ntopanggeni pesomba bo pakeni-pakeni ntoYahudi ntanina.

²⁴ Naupu roara nangepe tesara haitu, pura-pura ira nosangu rara nekakai nte Alatala. Niulira, "Pue, Komiumo Topompajadi langi, tana, tasi, bo pura-pura isina.

²⁵ Komiu nombadekei tesa ka totua kami nggaulu Magau Daud. I Daud batuaMiu bo ante kuasa Nosa GasaMiu nitesana mami manusia mangeva i Yesus, ivei: 'Narau todea anu ledo nosisani nte Alatala. Bo todea-todea novia nia anu ledo ria gunana.

²⁶ Magau-magau ri dunia nasiromu nasadia meeva, bo totua-totua ngata nasintuvu mangeva Alatala bo Magau Topepakasalama nipelisiNa.'

²⁷ O Pue, dopa nasae ri ngata hitu, Magau Herodes bo i Pontius Pilatus nasiromu ante toIsrael bo tona ledo nosisani nte Komiu. Patujura mangeva i Yesus, BatuaMiu nagasa, anu nipelisiMiu majadi Magau Topepakasalama.

²⁸ Ira nasintuvu nompatesi i Yesus. Tapi kakanana anu nipoviara aga nompakadupa anu nipakatantuMiu mami lako ri pamulana nangoseaka kuasaMiu bo dotaMiu.

²⁹ Pue, epemo tesara nomparangga kami. Kami batuaMiu, bo kami merapi tulungi nte Komiu ala kami ledo maeka mompatolele tesaMiu.

³⁰ Tulungi, Pue, ala tona nadua mamala rapakabelo bo kabaraka bo tanda nipokumaaka majadi ante kuasa i Yesus, BatuaMiu nagasa."

³¹ Naupu ira nosambaya, banua nikasiromura haitu nogoya. Ira pura-pura nikuasai nu Nosa Gasa nu Alatala, bo nipatolelera tesa nu Alatala bo domo ntoto naeka rarara.

³² Pura-pura topangoseaka i Yesus natuvu nosangu rara bo nosangu pekiri. Ledo ria saitoa nanguli mbara-mbarana anuna mboto. Anu naria ante ira, anura mpasanggani-nggani.

³³ Suro-suro ledo naupu-upu nompatolele kareba i Pue Yesus natuvu mpanjili, bo naroso mpuu tesara. Bo Alatala nabelo mpuu nte ira pura-pura.

³⁴ Ledo ria saitoa ira nakura nuapa-nuapa, sabana isema naria tanana bara banuana nipobaluna, nikenina ali nu tana bara banua haitu ka suro-suro rapake ka todea. Doi haitu nibagi-bagi nu suro-suro ka isema-sema naria paraluu.

³⁵ (4:34)

³⁶ Ivesia muni nipovia i Yusuf. Nipobaluna tanana bo doi haitu nikenina bo nidekeina ka *suro-suro i Yesus. I Yusuf haitu *toLewi lako ri levuto Siprus. Suro-suro nombadae ia i Barnabas, batuana, "topompakavoe rara ntona."

³⁷ (4:36)

Kisah Para Rasul

Video Kisah Para Rasul 4

Ikuti Kami:

KONTAK | PARTISIPASI | DONASI