Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Lẽq waktu Petrus dait Yahya masih bebaos kance dengan-dengan nike, imam-imam kepale dait kepale pengawal Gedẽng Allah kance dengan-dengan Saduki dateng ojok Petrus dait Yahya.

² Ie pade menggah gati sẽngaq Petrus dait Yahya bebase lẽq dengan-dengan bahwe Deside Isa sampun idup malik lẽman ninggal. Dait nike buktiang bahwe dengan ninggal gen idup malik.

³ Make ie pade bau kedue rasul nike beterus tamaqne ojok dalem bui. Dait lantaran sampun peteng, make Petrus dait Yahya tetahen lẽq derike jangke jemaqne.

⁴ Laguq dengan-dengan saq sampun dengah pengajahan rasul-rasul nike, luwẽq saq percaye. Make sayan luwẽq jumlah ie pade, jangke kire-kire lime iyu dengan.

⁵ Jemaqne tokoh-tokoh Mahkamah Agame, pemimpin-pemimpin Yahudi dait ahli-ahli Taurat bekumpul lẽq Yerusalem.

⁶ Ie pade bedait kance Imam Agung Hanas, Kayapas, Yahya, Aleksander, dait selapuq saq termasuk keluarge Imam Agung nike.

⁷ Petrus dait Yahya tejauq ngadep ie pade, terus ie pade beketuan, "Berembẽ entane side pade nyelahang dengan kẽpaq nike? Kadu kekuatan napi atao kadu kekuasean lẽman sai side pade laksaneang nike?"

⁸ Petrus, saq tekuasein siq Roh Suci, bejawab, "Bapaq-bapaq, pemimpin-pemimpin bangse dait pemimpin-pemimpin Yahudi!

⁹ Tiang pade teadilin jelo niki lantaran ngelaksaneang hal saq kenaq jari nulung sopoq dengan kẽpaq, dait lantaran Bapaq-bapaq mẽlẽ nenaoq berembẽ dengan nike teselahang.

¹⁰ Nah, Bapaq-bapaq senamian harus nenaoq, selapuq bangse Israel ẽndah harus nenaoq bahwe dengan niki nganjeng mangkin niki siq awak saq sẽhat lantaran teselahang dalem pesẽngan Deside Isa, dengan Nazaret nike. Bapaq-bapaq sampun pakuq Deside Isa lẽq kayuq salib, laguq Allah sampun ngidupang Ie malik.

¹¹ Deside Isa niki saq temaksut siq ayat dalem Kitab Suci, 'Batu saq tetetẽh siq side tukang-tukang bangunan, sampun jari batu saq paling utame.'

¹² Cume langan Deside Isa doang dengan teselametang. Sẽngaq lẽq seantẽro dunie lẽq antare manusie ndẽq araq sopoq dengan lain juaq saq mauq kekuasean lẽman Allah jari nyelametang ite."

¹³ Anggote-anggote Mahkamah nike bengaq serioq ketabahan Petrus dait Yahya, sẽngaq ie pade nenaoq bahwe kedue rasul nike dengan-dengan biase saq pendidikanne rendah. Beterus ie pade sadar bahwe kedue rasul nike dengan-dengan saq ngiring Deside Isa.

¹⁴ Laguq ie pade ndẽq bau ngucapang napi-napi, sẽngaq dengan saq sampun teselahang nike araq nganjeng lẽq derike lẽq julun ie pade bareng kance Petrus dait Yahya.

¹⁵ Make ie pade suruq kedue rasul nike sugul lẽman ruang sidang, beterus ie pade berunding.

¹⁶ Ie pade bebase, "Napi saq harus ite piaq tipaq dengan-dengan niki? Selapuq dengan saq ndot lẽq Yerusalem sampun nenaoq bahwe keajaipan saq luar biase niki, telaksaneang siq deduaqne. Ite ndẽq bau tilas nike.

¹⁷ Laguq adẽq hal nike ndaq sayan nyebar lẽq antare dengan-dengan, silaq ite ancem ie pade adẽq ndẽq kanggo malik bebaos tipaq sopoq dengan juaq siq pesẽngan Deside Isa."

¹⁸ Make ie pade ngempoh kedue rasul nike tame malik, dait badaqang bahwe ie pade ndẽq kanggo gati nyebut malik atao ngajahang siq pesẽngan Deside Isa.

¹⁹ Laguq jawab Petrus dait Yahya, "Silaq pikir mẽsaq napi saq kenaq lẽq arepan Allah: turut prẽntah Bapaq-bapaq atao turut prẽntah Allah.

²⁰ Sẽngaq tiang pade ndẽq tao engkah ngeraos mengenai napi saq sampun tiang pade serioq dait dengah mẽsaq."

²¹ Anggote-anggote Mahkamah nike ndẽq mauq sopoq alasan jari ngukum Petrus dait Yahya. Jari ie pade ngancem kedue rasul nike, beterus deduaqne telepas, sẽngaq selapuq dengan mulieang Allah lantaran keajaipan nike.

²² Dengan saq teselahang siq muqjizat nike sampun petang dase taun lebih umurne.

²³ Sesampun Petrus dait Yahya tebẽbasang, ie pade tulak ojok batur-batur ie pade dait nyeriteang selapuq saq tesampẽang siq imam-imam kepale dait pemimpin-pemimpin Yahudi nike lẽq ie pade.

²⁴ Sesampun batur-batur ie pade dengahang hal nike, siq sopog angen ie pade bedo'e tipaq Allah. Ie pade matur, "Tuhan, Deside saq cipteang langit dait gumi, segare dait selapuq isine.

²⁵ Siq Roh Suci, Deside sampun bemanik langan leluhur tiang pade, Daud, nike hambe Deside; Deside bemanik, 'Kembẽq bangse-bangse sili; kembẽq suku-suku bangse miaq rencane saq ndẽq araq manpaatne?

²⁶ Raje-raje dunie besiep-siep gen perang, dait pare pemimpin besopoq ngelawan Tuhan dait ngelawan Almasih-Ne.'

²⁷ Sẽngaq mule Herodes dait Pontius Pilatus sampun ngaraqang sangkep kance dengan bangse-bangse lain dait kance dengan-dengan Israel lẽq kote niki. Ie pade bedait jari ngelawan Deside Isa, Hambe Deside saq suci nike, saq sampun Deside sahang jari Almasih.

²⁸ Ie pade besopoq jari ngelaksaneang selapuq hal, saq Deside sampun tentuang bejulu bahwe nike gen telaksane. Dait Deside tentuang nike siq kekuasean dait pekayunan Deside mẽsaq.

²⁹ Mangkin, Tuhan, cingakin berembẽ ie pade ngancem tiang pade. Dait ijinang tiang pade, hambe-hambe Deside niki, nẽnten takut beriteang Manik Deside nike.

³⁰ Tunas adẽq tiang pade bau nyelahang dengan sakit dait miaq keajaipan-keajaipan dait tande-tande siq pesẽngan Deside Isa, Hambe Deside saq suci nike."

³¹ Sesampun ie pade inggas bedo'e, taoq ie pade bekumpul nike inggur. Ie pade selapuq tekuasein siq Roh Suci, dait mulai bani ngeraos mengenai Manik Allah.

³² Selapuq dengan saq percaye nike idup sopoq angen dait sopoq jiwe. Ndẽq araq sopoq dengan juaq lẽman ie pade anggep bahwe napi saq ie ẽpẽang jari dowẽne mẽsaq. Napi juaq saq araq lẽq ie pade, ie pade kadu bareng-bareng.

³³ Siq kuase saq belẽq, rasul-rasul nike ngebẽng kesaksian bahwe Junjungan Saq Mulie Deside Isa sampun idup malik. Make ie pade idup dalem rahmat saq belimpah-limpah.

³⁴ Dait ndẽq araq sopoq dengan juaq lẽq antare ie pade saq kekurangan napi-napi. Sẽngaq ie pade saq bedowẽ tanaq atao balẽ, jual tanaq atao balẽ ie pade; beterus kẽpẽng lẽman hasil jual tanaq atao balẽ nike ie pade jauq

³⁵ dait ie pade serahang ojok rasul-rasul. Beterus kẽpẽng nike tebagi-bagiang tipaq sebilang dengan saq merluang.

³⁶ Maraq nike ẽndah Yusup. Ie jual tanaqne, beterus kẽpẽngne ie jauq dait serahangne ojok rasul-rasul. Yusup nike sopoq dengan keturunan Lewi lẽman Siprus; ie ẽndah tesebut siq rasul-rasul nike Barnabas (artine Penghibur).

³⁷ (4:36)

Kisah Para Rasul

Video Kisah Para Rasul 4

Ikuti Kami:

KONTAK | PARTISIPASI | DONASI