Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Sanggah na marsahap ai ope sidea bani na mabuei ai, roh ma mandorab sidea malim, kopala ni rumah panumbahan ai ampa halak Sadukei,
2 marah halani iajari sidea na mabuei ai, anjaha iambilankon sidea parpuhoon humbani na matei ibagas Jesus.
3 Itangkap ma sidea, anjaha ipamasuk hubagas tutupan ronsi patar ni ai, ai domma bod ari.
4 Tapi buei do na manangar ambilan ai, gabe porsaya, anjaha adong do bilangan ni dalahi na gabe porsaya lima ribu halak.
5 Patarni ai martumpu ma i Jerusalem pangintuai-pangintuai ampa sibotoh surat,
6 rap pakon si Hannas, sintua ni malim ai, si Kayapas, si Johannes, si Aleksander ampa haganup sindohor ni sintua ni malim ai.
7 Jadi ipajongjong ma sidea hu tongah-tongah anjaha isungkun ma sidea, “Marhitei kuasa aha atap marhitei goran ni ise do ibahen nasiam ai?”
8 Jadi gok Tonduy Na Pansing ma si Petrus, ihatahon ma bani sidea, “Nasiam pambobai ampa pangintuai-pangintuai ni bangsa on.
9 Anggo pareksaon ma hanami sadari on, halani pambahenan na madear bani sada halak na boritan, atap marhitei aha do ia, ase malum,
10 botoh nasiam ma haganup ampa haganup bangsa Israel, ʻMarhitei goran ni Jesus Kristus na hun Nasaret ai do, ai ma na pinarsilangkon nasiam, tapi na pinapuho ni Naibata humbani na matei, marhitei ai do, ase jongjong halak on malum i tongah-tongah nasiam.ʼ
11 Ia do in, batu na niambukkon ni nasiam tukang, na dob gabe batu parsuhi.
12 Anjaha seng dong haluahon ibagas atap ise na legan, ai seng dong goran na legan i toruh ni langit ibere bani jolma, parhiteianta hu haluahon.”
13 Dob ididah sidea hinsah ni uhur ni si Petrus ampa si Johannes ai, anjaha ibotoh homa, sedo halak sijamah surat sidea, tapi jolma na somal do, gabe longang ma uhur ni sidea; itanda do sidea, ai ma na rap pakon Jesus do sidea hinan.
14 Anjaha ididah sidea do homa jongjong ijai rap pakon sidea halak na dob pinamalum ai, gabe seng tarhatahon sidea be atap aha pe.
15 Ihatahon sidea ma, ase luar sidea lobei hun parrapotan ai, gabe manriah ma sidea samah sidea,
16 “Aha ma sibahenonta bani halak on? Ai torang do, talar na binahen ni sidea ai, ibotoh ganup parhuta Jerusalem, seng tarporsou hita.
17 Tapi, ase ulang lambin rarat ai bani halak na mabuei in, gogoh ma sidea palumba hita, ase ulang be sidea marsahap atap hubani ise pe marhitei Goran ai.”
18 Dob ai idilo ma sidea, anjaha ilarang ma, na so bulih be sidea marsahap atap mangajari marhitei goran Jesus.
19 Tapi nini si Petrus ampa si Johannes ma mambalosi sidea, “Nasiam ma manimbangi, atap na pintor ma ai i lobei ni Naibata, anggo balosan hanami bani nasiam ase bani Naibata.
20 Ai seng tarbahen hanami lang mangkatahon na dob ididah ampa ibogei hanami.”
21 Jadi dob ipalumba sidea gomos, ipaluah ma sidea, ai seng jumpah sidea dalan, laho manguhumi sidea halani na mabuei ai, ai haganup do mamuji Naibata halani na masa ai.
22 Ai lobih ma ompat puluh tahun umur ni halak na pinamalum ai marhitei tanda halongangan ai.
23 Dob maluah sidea, laho ma sidea marayak hasoman ni sidea, anjaha ibaritahon ma bani sidea haganup, na hinatahon ni sintua ni malim ampa pangintuai ai bani sidea.
24 Jadi dob ibogei sidea ai, sasora ma sidea martonggo bani Naibata, nini ma, “Ham Tuhan, Ham do manjadihon langit, tanoh pakon laut ampa haganup isini!
25 Ham do marsahap marhitei Tonduy-Mu, humbani pamangan ni ompungnami si Daud, juakjuak-Mu ai, sonon, ʻMase oga-oga bangsa parbegu, anjaha na so marguna ipingkiri bangsa-bangsa?ʼ
26 Jongjong do raja-raja ni tanoh on, anjaha martumpu do siparkuasa, laho mangimbang Tuhan in, ampa na mininakan-Ni.
27 Ai tongon do, na dob martumpu do i huta on si Herodes, si Pontius Latus, rap pakon bangsa parbegu ampa bangsa Israel, laho mangimbang Jesus, juakjuak-Mu Na Pansing in, na dob mininakan-Mu in,
28 laho pasaudkon, na dob tinontuhon-Mu hinan marhitei kuasa-Mu ampa sura-sura-Mu.
29 Ai pe, Ham Tuhan, tonggor Ham ma asup-asup ni sidea in, anjaha bere Ham ma bani jabolon-Mu hinsah ni uhur, laho mangkatahon hata-Mu!
30 Surdukkon Ham ma tangan-Mu, laho mambahen hamalumon, tanda ampa halongangan marhitei goran ni Jesus, juakjuak-Mu Na Pansing in!”
31 Jadi dob martonggo sidea, dugur ma ianan partumpuan ni sidea ai, anjaha gok Tonduy Na Pansing ma sidea haganup, gabe marhinsah ni uhur ma sidea mangkatahon hata ni Naibata.
32 Ia halak na porsaya na satumpuan ai sauhur do anjaha sada tonduy. Seng dong humbani sidea na mangkatahon ia sandiri simada na dong bani, tapi parbagianan rup do ai ihira.
33 Anjaha marhagogohon banggal do apostel ai manaksihon parpuhoon ni Tuhan Jesus, anjaha igoki idop ni uhur banggal do sidea haganup.
34 Ai seng dong atap ise sidea na hurangan; ai haganup siparjuma atap siparrumah, ijual do ai, anjaha iboan ma boli ni na jinual ni sidea ai,
35 itibalhon ma ai hu lobei ni apostel ai, dob ai ibagihon hubani na hurangan.
36 Umpamani si Josep, na ginoran ni apostel-apostel ai si Barnabas, artini anak ni pangapohon, sada halak Lepi, hun Pulou Kiprus,
37 ijual do jumani, anjaha iboan ma bolini ai lanjar itibalhon ma i lobei ni apostel ai.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA