Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Saellana epotossagi ja’ sengko’ ban en-laenna kodu alajar ka Italia, Paulus ban reng-oreng tahanan se laen epassra’agi ka Yuliyus, parwirana pasukanna tantara Roma se enyamae "Resimen Kaisar".

² Sengko’ kabbi ongga ka kapal se dhateng dhari Adramitiyum, saellana jareya laju mangkat nompa’ kapal jareya se la alajara ka palabbuwan-palabbuwan e propinsi Asia. Badha oreng Makedoniya se dateng dhari Tesalonika, nyamana Aristarkhus, noro’ alajar bareng sengko’ ban en-laenna.

³ Kalagguwanna la napa’ ka Sidon. Yuliyus ce’ becce’na ka Paulus. Paulus eedine manggi’i ca-kancana sopaja ca-kancana jareya bisa aberri’ ka Paulus pa-apa se ekabuto salerana.

⁴ Dhari jadhiya sengko’ kabbi nerrossagi se alajar. Angen dhateng dhari adha’, daddi kapal jareya alajar terros noro’ penggirra tase’ polo Siprus se abak kaaddhangan dhari angen.

⁵ Saellana jareya pas alajar ngalebadi tase’ se dhep-adhebban ban Kilikiya sarta Pamfiliya, laju napa’ ka Mira e nagara Likiya.

⁶ E jadhiya parwira gella’ nemmo kapal dhari Aleksandriya se alajara ka Italia. Daddi sengko’ ban en-laenna ealle ka kapal jareya.

⁷ Se alajar jareya sampe’ pan-barampan are ce’ lerena, tape maske ce’ malaradda, dhi-budhina napa’ ka kottha Knidus. Saellana jareya, sarrena angenna gi’ ta’ nyaman keya, sengko’ kabbi padha ta’ bisa nerrossagi parjalanan ka tojjuwan se dha’-adha’na. Daddi sengko’ kabbi pas alajar ka lao’na polo Kareta lebat Tanjung Salmone sopaja ta’ ekennenga tambu angen.

⁸ Sengko’ kabbi terros alajar ce’ malaradda lebat penggir serengnga polo jareya sampe’ dhi-budhina napa’ ka settong kennengngan se anyama Palabbuwan Indah, se ta’ saapa jauna dhari kottha Laseya.

⁹ E bakto jareya Are Raja Panebbusanna Dusana oreng Yahudi la lebat. La bannya’ bakto se tabuwang, daddi babaja mon alajar terros. Daddi Paulus apareng petodu kantha reya ka sengko’ kabbi,

¹⁰ "Tan-taretan, noro’ pamanggi kaula babaja mon alajar terros. Rogi se bakal etanggunga sampeyan sareng kaula banne pera’ mowadan sareng kapal, namong jugan nyaba daddi tarowanna."

¹¹ Tape parwira gella’ aparcaja’an ka jurmoddhi etembang ban ka Paulus.

¹² Palabbuwan e jadhiya pajat ta’ becce’ mon ekennengnge kapal e mosem cellep. Daddi kabannya’an bandhigana mopakat alajara pole, aehteyara sopaja napa’ ka Feniks ban ennengnga e jadhiya saabidda mosem cellep. Feniks jareya palabbuwan e Kareta se addhep ka bara’ dhaja ban bara’ lao’.

¹³ E bakto jareya angen lao’ ser-kalesserran. Daddi reng-oreng kapalan padha nyangka la bisa nerrossagi se alajar. Daddi laju abungkar jangkar sarta pas alajar noro’ penggir serengnga polo Kareta.

¹⁴ Tape ta’ abit saellana jareya laju dhateng kaleng busbus — se enyamae angen Temor Lao’ — ce’ tandhessa dhari tenggangan,

¹⁵ mokol kapal se etompa’ sengko’ kabbi jareya. Sarrena kapal jareya ta’ kera bisa terros alajar ngadhebbi angen, daddi sengko’ kabbi padha passra, kapal epanneng elanyo’ aeng egiba angen.

¹⁶ Kapal jareya abak katotoban sakone’ e bakto lebat e lao’na polo Kauda se kene’ jarowa. E jadhiya sengko’ kabbi ahasel ngobasae sakocina kapal maske ce’ malaradda.

¹⁷ Saellana sakoci jareya epaongga ka kapal, kapal jareya dibi’ epakoko bi’ tale se ele’le’agi ka kapalla. Sarrena tako’ ame’ kapal jareya kandhas e dhasarra beddhi Sirtis se nengke’, lajar epatoron, ban kapal epanneng noro’agi angen.

¹⁸ Angen terros ngamok, sampe’ kalagguwanna mowadanna kapal jareya molae ebuwang ka dhalem tase’.

¹⁹ Kalagguwanna pole kas-pakakassa kapal jareya ebuwang keya ka dhalem tase’ bi’ para bandhigana dibi’.

²⁰ Sampe’ ban-barampan are abidda sengko’ kabbi padha ta’ nangale’e are ban bintang, dineng angen terros ngamok. Sampe’ dhi-budhina sengko’ kabbi padha ta’ andhi’ pangarebban se salamedda.

²¹ Saellana abit reng-oreng se alajar ta’ kalaban ngakan pa-apa, Paulus ngadek e nga’-tengnga’anna oreng jareya kabbi, laju adhabu, "Tan-taretan! Ja’ sakenga sampeyan padha atoro’ ka oca’ kaula ban ta’ alajar dhari Kareta, tanto ta’ kera ngalame karosagan sareng karogiyan se kantha paneka.

²² Tape samangken kaula nyo’ona ka sampeyan sadaja sopaja padha’a raja ate. Sampeyan ta’ kera badha se kantos seda maske settonga; sampeyan pera’ kaelangana kapal paneka.

²³ Sabab malemma malaekadda Allah se esemba kaula, enggi paneka Allah se kaagungan kaula paneka, rabu ka kaula.

²⁴ Malaekat gapaneka adhabu, ‘Ta’ osa tako’, Paulus! Sabab ba’na ngadhebba ka Kaisar. Ban dhari kabecce’anna Allah ka ba’na, oreng se alajar ban ba’na bakal salamedda kabbi polana ba’na.’

²⁵ Daddi, tan-taretan, ngereng padha paraja ate! Sabab kaula parcaja ka Allah ja’ sadajana bakal kadaddiyana akadi se ampon edhabuwagi ka kaula.

²⁶ Namong dhaggi’ sampeyan sareng kaula bakal padha’a kandhas e paseserra settong polo."

²⁷ E malem se kapeng pa’ bellas sengko’ ban en-laenna padha bang-kambangan e Tase’ Adriya. Ra-kera tengnga malem para bandhiga arassa kapal teppa’na para’ napa’a ka tenggangan.

²⁸ Daddi reng-oreng jareya laju ngolor tale se ekattonge bato, ngokora dhalemma tase’. Laju etemmo ja’ e jadhiya dhalemma para’ pa’ polo meter. Ta’ abit saellana jareya dhalemma tase’ jareya laju eokor pole, ban etemmo ja’ tase’ e kennengngan jareya dhalemma para’ tello polo meter.

²⁹ Reng-oreng jareya padha tako’ kapalla kandhas ka karang, daddi laju matoron jangkar pa’-empa’ dhari bagiyan budhina kapal, sambi ngarep mandar duliya laggu.

³⁰ Para bandhigana ta’ asa’-kasa’ ngoddi buruwa dhari kapal; reng-oreng jareya matoron sakoci ka aeng, tha-kantha masanga jangkar dhari bagiyan adha’na kapal.

³¹ Tape Paulus adhabu ka parwira ban ka rit-parjurit se badha e kapal jareya, "Manabi para bandhiga paneka ta’ paggun enneng e kapal, sampeyan ta’ kera salamet sadaja."

³² Daddi bi’ rit-parjurit jareya talena sakocina eketthok, sampe’ sakocina elanyo’ aeng.

³³ Sabellunna pajjar ngombar, Paulus menta ka reng-oreng se badha e kapal jareya sopaja ngakan kabbi. Dhabuna, "Ampon pa’ bellas are abidda sampeyan padha anante’ e dhalem kabadha’an kobater, ta’ adha’ar pa-ponapa sakale.

³⁴ Daddi ngereng, adha’ar maske sakone’; ganeka parlo sopaja sampeyan kowat pole. Sabab sampeyan bakal salamedda sadaja, ta’ kera apa-ponapa."

³⁵ Saellana adhabu kantha jareya Paulus mondhut roti, laju asokkor ka Pangeran e adha’na reng-oreng se badha e kapal jareya kabbi. Saellana jareya rotina laju egi-bagi, pas edha’ar.

³⁶ Daddi reng-oreng jareya kabbi pas tegger pole atena, laju padha noro’ ngakan.

³⁷ Reng-oreng e kapal jareya bannya’na kabbi dhu ratos pettong polo ennem.

³⁸ Saellana padha ngakan sacokobba reng-oreng jareya laju mowang gandum ka tase’ sopaja kapalla dhammanga.

³⁹ E bakto are la seyang, para bandhigana kapal jareya nangale’e tenggangan, tape ta’ tao tenggangan apa jareya. Tape reng-oreng jareya nangale’e tellu’ ban penggir serengnga, daddi laju amaksod maambuwa kapalla e jadhiya mon bisa.

⁴⁰ Daddi le-talena jangkarra eketthok, dineng jangkarra edina epatasellem ka tase’. Le-talena dhi-kamoddhi ebukka’ kabbi. Saellana jareya lajar e bagiyan adha’na kapal epasang, sopaja kapal jareya esothoga angen ka paseser.

⁴¹ Tape kapal jareya tabentor ka dhasarra beddhi. Bagiyan adha’na kapal jareya kandhas ka beddhi ban ta’ bisa aguli, dineng bagiyan budhina ancor ekenneng omba’ se banter.

⁴² Rit-parjurit e kapal jareya aneyat mateyana sakabbiyanna oreng tahanan, sabab tako’ me’-ame’ tahanan jareya padha alangngoy ka tenggangan laju buru.

⁴³ Tape parwira gella’ lang-ngalange neyadda rit-parjurit, sabab aba’na andhi’ maksod nolonga Paulus. Bi’ parwira jareya reng-oreng se bisa alangngoy esoro alonca’ kaadha’ pas alangngoy ka tenggangan;

⁴⁴ Se laenna esoro toron jang budhiyan, esoro neggu’i ka pan-papan otabana la’-bella’anna kapal jareya. Kalaban jalan se kantha jareya kabbi se nompa’ kapal jareya salamet napa’ ka tenggangan.

Kisah Para Rasul

Video Kisah Para Rasul 27

Ikuti Kami:

KONTAK | PARTISIPASI | DONASI