Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ia tonna dipattantumo kumua la malemokan mangkappala' lako Italia, ia to Paulus sola ba'tu pira-pira toditarungku laenna dipangben lako Yulius, kamandang surudadu to-Roma to disanga "Resimen Tomaraja".

² Mende'mokan kappala' jio kota Kaisarea, kappala' jio mai kota Adramitium, kilamangnguju mpasitarruh-tarruh ba'tu pira-pira kakendenan kappala' jio propinsi Asia. Den mesa' to-Makedonia pole jio mai kota Tesalonika kisolan disanga Aristarkhus.

³ Masawanna ratukan lako kota Sidon. Mabassa joo Kamandang Yulius lako Paulus, jaji naeloranni male lako ba'tu pira-pira solana, to mbenni apa naparallui.

⁴ Ia tongkimangpatarruhmo kalingkangki' jio mai, nnola jiokan randan pulau Siprus, nasaba' ssussangkan angin, na nasala ia angin.

⁵ Mangkai joo too, nnola jiokan olona tana Kilikia na Pamfilia, kiratu lako kota Mira jio tana Likia.

⁶ Jiomo ntuu joo nanii Kamandang Yulius nnampa' mesa' kappala' pole jio mai kota Aleksandria mangnguju lako propinsi Italia, nanii mpalelekan lako.

⁷ Ba'tu pirang allo to nanii menonoh-nonoh manda to kappala'ki', butung to te'da kilandete' kota Knidus. Te'da kikullei nnola jio to kipangngattai jolo, sanga mangngumbuk bang unapi to angin. Mangnguju sau'kan pulau Kreta lliwa'i Tanjung Salmone mpessalai angin.

⁸ Gaja sussa to kappala'ki' nnola jio sa'dena joo pulau, kimane' ratu lako mesa' kampong disanga Kakendenan Melo sikandoppi' kota Lasea.

⁹ Budamo wattungki' masala bang, na liwa' toomi to wattu nanii to-Yahudi puasa. Iamo tandana kumua te'da namelo ke la tarruhpi to kappala'ki'. Iamo joo napupangngingaranni Paulus to tau, nakuanni,

¹⁰ "Ee, todipusile'to! Ia ke aku', la masussa tonggoki' ke la tarruhpiki'. La sabu' tonggoki', nasaba' tangngia ia manda tee kappala' sola luranna la ta'de, apa moi sunga'ta'."

¹¹ Apa la'bi nakatappa'i ia Kamandang Yulius joo jurumudi sola puangna joo kappala' na ia to kadanna Paulus.

¹² Te'da namelo joo kakendenan kappala' dinii torro ke wattu peurananni. Iamo joo nala'bi buda to pangjama kappala' ssitujuii, ke tarruh bangmi male ssalaii la mpendete'i kota Feniks jio pulau Kreta, na torro jio ke peurananni. Ia to kakendenan kappala'na tingngo tama suin lo'na liu, na suin jajanna liu.

¹³ Ia joo wattu mangngiri' lo' mai to angin biasa. Nasangami pangjama kappala' kumua wa'dingmi male. Jaji napaendekki to sau kappala', namale mangrundun randan tasik jio sa'dena pulau Kreta.

¹⁴ Apa te'da namasai, mangngiri'mi to angin bara' pole jao mai gantanan disanga angin pole jio mai kadellekan jajanna liu,

¹⁵ natampai to kappala'ki'. Kila'paran bangmi napupangdongga-donggai angin lan tasik, nasaba' tangnatananmi ssussang angin.

¹⁶ Napupangdongga-dongga tarruhkan angin bara', sanggenna ndete'kan randan mesa' pulau biccu' disanga Kauda. Gaja sussakan ntuu joo, kimane' ngkullei rrui' sekoci kappala',

¹⁷ nadipaendek de'. Mangkai joo dikapu' mengguririkki ulang joo kappala', dikua namawatang. Napalaoi to sompa', nala'paran bangngi joo kappala' nnawang-ngawang nabawa bombang, nasaba' malaja'i titumbu jio kassi' mangtombon disanga Sirtis.

¹⁸ Masawanna joo too kibuang bangmi do' tasik to luran kappala', sanga mangngumbuk tarruhhi to angin bara'.

¹⁹ Ia tonna allo masawanna pole' omo, ia to pangjama kappala' naca'bean to pakakasa' kappala' do' tasik.

²⁰ Ba'tu pirang allomi to te'da bang kikita allo na bintuin na mangngumbuk tarruh bang too to angin bara'. Katampakanna te'damo kikua la tuopakan.

²¹ Ba'tu pirang allomi tangkumande to tau, namale Paulus mentama tangnga-tangngana ngkuanni, "Ee, todipusile'to sola ngasan! Ia ke la mipesa'dingngina' sola ngasan, nadanggi'mo tamale jio mai pulau Kreta, te'da talamasussa sola rugi susi tee.

²² Apa moi nasusi tee, kupeta'da mipamawatang penawammi. Moi mesa' te'daki' la mate, moi namasolang tee kappala'.

²³ Nasaba' ia to Puang Allataala kusompa kupupuang too, ssua malaeka'-Na pubongi' ratu jio sa'deku',

²⁴ nakuanna', 'Ee, Paulus! Danggi' mumalaja', sanga la mangngolommu lako Tomaraja Roma! Sininna tomusolan mangkappala' te'dai la matumba, nasaba' kameloan penawan-Na Puang Allataala lako kalemu.'

²⁵ Iamo joo, tokupusile'to sola ngasan, pemawatangngi to penawammi! Sanga matappa'na' lako Puang Allataala kumua sininna to napauanna' la jaji ia.

²⁶ Apa te'da nasalai, la nabawaki' wai lako mesa' randan pulau."

²⁷ Ia tonna bongi mangpessangpulo a'pa'na napamale melako bang unapakan angin bara' jio Tasik Adria. Agi-agi tangnga bongi nasangai pangjama kappala' kumua la ndete'mi gantanan.

²⁸ Natoke'i batu to ulang na dokkenni do' tasik la ssuka'i to mandalanna. Ci'di'mora naganna' patang pulo metere' dalanna. Te'da namambela jio mai ntuu joo, nasuka' pole' omi, na agi-agimora tallung pulo metere' dalanna.

²⁹ Napado'i to a'pa' sau jao mai boko' kappala', nasaba' malaja'i titampah jio batu karang. Natajanni kumua kenna mariwangmo.

³⁰ Madoangngi la ssalai bunii joo kappala'. Napado'i tasik to sekoci, naanggai'-gai'i butung la mpado' sau jio olo kappala'.

³¹ Apa nakua Paulus lako joo Kamandang Yulius sola to surudadu jao kappala', "Ianna la malai tee mai pangjama kappala', la sabu' ngasanki'."

³² Iamo joo naka'tuanni surudadu to ulang sekoci, nabawai wai.

³³ Ia tonna la mariwangmo, nasuami Paulus to tau kumande sola ngasan nakuanni, "Ee, todipusile'to! Sangpulo a'pa'mo kamu' bonginna sola ngasan tangmangngapa tangkumande.

³⁴ Jaji kupeta'da mikumande sola ngasan, ammimasumanga' pole'. Sanga moi mesa' te'daki' to la matumba."

³⁵ Mangkanna mangkada susi joo, nnalami roti to Paulus, namangkurru sumanga' lako Puang Allataala jio olona sola ngasanni, namane' nti'pek-ti'pekki nakandei.

³⁶ Masumanga' pole'mi sola ngasan nakumande toda.

³⁷ Dua ratuhhi pitung pulo annan tau sola ngasan jao joo kappala'.

³⁸ Ia tonna barah ngasanmo, naballuanmi do' tasik to gose', dikua namaringngan to kappala'.

³⁹ Ia tonna mariwangmo, ngkitami gantanan to pangjama kappala', apa te'da naissenni gantanan umbonna. Nakita tooi to tasik mengkokonna namarante to randanna. Jaji madoangngi, ke wa'dingngi, la mpasissare kappala'na ntuu joo.

⁴⁰ Naka'tuanni to ulang sau, natallan do' tasik. Nabukai tooi to ulang dipake ngkapu' kemudi, namane' mpaendekki to sompa' jio ulu kappala', dikua nairi'i angin lako randan tasik.

⁴¹ Apa titampahhi jio kassi' mangtombon joo kappala'. Ia to ulunna mellammak, te'damo napundiu, na ia to boko'na maicak, nakanna bombang tonggo.

⁴² Madoangngi to surudadu la mbuno ngasanni to toditarungku, dikua danggi' naden male nnorong mpella'paran kalena.

⁴³ Apa madoangngi Kamandang Yulius la mpasalama' Paulus. Iamo joo naanggaii to surudadu mpugauk akkattana. Padami to macca nnorong nasua ngasan jolo mella'bu do' tasik, na nnorong lamban lian.

⁴⁴ Na ia to pira'na la undi mentoe lako bangmo papan iarika lako piakkana joo kappala'. Susimi joo kimane' salama' sola ngasan ndete' randan tasik.

Kisah Para Rasul

Video Kisah Para Rasul 27

Ikuti Kami:

KONTAK | PARTISIPASI | DONASI