Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Naupu haitu Gubernur Festus nompakatantu i Paulus bo kami anu nomporoa ia, kana mesavi kapala ntasi hau ri ngata Roma ri propinsi Italia. Jadi i Paulus ante bara sako-ndua tona ntanina anu nitavani, niparasayaka i Yulius, saito balengga ntantara lako ri tantara-tantara Magau Mbaso.

² Kami nesavi kapala mbaso anu nakava lako ri ngata Adramitium. Kami nesavi lako ri ngata Kaisarea ante patuju mesai ri pesampo-pesampo ri talinti propinsi Asia. Naria muni saitopa tona nomporoa kami, haitumo i Aristarkhus lako ri ngata Tesalonika ri propinsi Makedonia.

³ Kamailena haitu, kapala kami nesampo ri ngata Sidon. I Yulius nabelo mpuu nte i Paulus, sampe nidekeina i Paulus hau nanggita roa-roana ri ngata Sidon ala mamala radekeira ka ia bara nuapa raparaluuna.

⁴ Lako ri sia kami nompapola polipa kami. Tapi kapala kami nosintomuka poiri, jadi kami nomparinjoso ri bivi ntalinti levuto Siprus anu natelendu sakide lako ri poiri haitu.

⁵ Kami nokapala ri tasi luo anu napara propinsi Kilikia bo Pamfilia, sampe nakava ri ngata Mira ri propinsi Likia.

⁶ Ri ngata Mira, i Yulius nanggava kapala mbaso anu nakava lako ri ngata Aleksandria hau ri propinsi Italia. Jadi nituduna kami molinja ri kapala haitu.

⁷ Bara sako-mbongipa kasaena, kapala haitu aga nompaente nolipa. Nandasa mpuu kami. Nasae pade nakava ri pesampo Knidus. Lako ri sia, domo nipakule kami nompapola polipa kami nantuntuni nia pamulana, sabana peburu mpoiri dopa nabelo. Jadi kapala kami nombaliunaka Uju Salmone hau nomparinjoso ri bivi ntalinti levuto Kreta ri bagia puluna, ala ledo mambela poiri narimboso gaga.

⁸ Nasusa mpuu kami nomparinjoso ri bivi ntalinti ri sabingga puluna lako ri levuto Kreta. Kaupuna nakavamo kami ri pesampo kodi nosanga Pesampo Nagaya, napara ngata Lasea.

⁹ Naulia mpuu kapala kami, sampe naliumo eo mbaso puasa ntoYahudi nikava kami. Tempona haitu domo mamala rapolipaka mokapala sabana tempo mpoiri. Jadi i Paulus nompopatora ira riara kapala,

¹⁰ "Sampesuvu-sampesuvu, nantuntuni panggavaku, ane kita mompapola polipata hitu, kana mandasa mpuu kita ngena. Kana marugi kita, ledo aga pangulaya kapala hitu, tapi kita muni mamate!"

¹¹ Tapi i Yulius ledo nipangalana tesa i Paulus, nipangalanapa tesa ntopompajala kapala bo tupu nu kapala pade tesa i Paulus.

¹² Pesampo Nagaya haitu ledo mami nabelo rapesampo masae ri tempo mpoiri. Sabana haitu, deanapa topesavi kapala kami nanguli, "Agina malai kita lako ri pesampo hitu bo rapasimbukuta mapola hau ri pesampo Feniks bo mesampo hamai sampe maupu tempo mpoiri." Ngata Feniks haitu pesampo ri levuto Kreta anu natelendu lako ri poiri ri tempo mpoiri, sabana notingayo bagia tasi mpanau.

¹³ Tempona haitu, nompamulamo poiri neburu naole-ole lako ri puluna. Haitu sampe nisarumaka nu anabua kapala da mamala kami mapola hau ri pesampo Feniks. Jadi nianggatakaramo talonto kapala, bo kapala nolipa nomparinjoso ri talinti levuto Kreta.

¹⁴ Tapi ledo nasae lako rahaitu, nakavamo poiri narimboso lako ri levuto Kreta, anu niuli ntona "Poiri Mbaso lako ri tasi mpandake".

¹⁵ Kapala kami nirumpa mpoiri rimboso bo domo nompakule nantingayosi poiri. Jadi nipalamba kamimo kapala naave nikeni mpoiri.

¹⁶ Tempo kami naave nikeni mpoiri, nalendumo sakide poiri tempo kami noliu sabingga puluna lako ri sangu levuto kodi nosanga Kauda. Tempo haitu nandasa mpuu kami nompasimbuku nombataja mangore sakaya kodi riara nu kapala mbaso. Sakaya kodi haitu biasa nitaja ri puri nu kapala.

¹⁷ Namalapa sakaya kodi nianggataka bo niboli riara nu kapala mbaso, ana-anabua kapala nompou ntiku karo nu kapala mbaso ante kaloro ala maroso. Naupu haitu nipopanauramo somba nu kapala, ala ledo magasi ntoto polipana, sabana ira naeka kapala mombarumpa bone anu nasore napara talinti tana Libia. Jadi ivesiamo kapala kami nipalambara nikeni mpoiri.

¹⁸ Ledo nenonto poiri narimboso haitu nombaburu kapala kami, sampe naeo mpadondo sagaa pangulaya kapala nitedeakara rantasi ala mangaa sakide kapala ala ledo malodo.

¹⁹ Kamailenapa nitedeakaramo pareva-pareva nu kapala rara ntasi.

²⁰ Bara sako-mbongi kasaena, ledo nikita kami eo bara betue, bo poiri muni ledo naole-ole neburu. Kaupuna domo ria panjarumaka kami matuvu!

²¹ Bara sako-mbongi kasaena, tona riara kapala haitu ledo nangande. Jadi neanggamo i Paulus ri tatangara bo nanguli, "Sampesuvu-sampesuvu! Ane nioseakamiu tesaku bara ipia nanguli nee mompalaikata levuto Kreta, ledo mandasa kita bo ledo marugi ivehitu!

²² Tapi sii-sii kuperapi nte komiu pakaroso raramiu! Ledo ria saitoa kita mamate ngena, tapi kapala hitu tantu marugi.

²³ Nisaniku haitu sabana ibongi Alatala anu nisombaku bo anu nombajagai yaku, nantudu *malaekaNa tumai nte yaku. Malaeka haitu nanguli,

²⁴ 'Nee maeka, Paulus! Iko kana mapola mantingayo Magau Mbaso. Lako ri kabelo nu Alatala nte iko, pura-pura tona nosanggani-nggani ante iko ri kapala hitu masalama pura.'

²⁵ Jadi sampesuvu-sampesuvu, pakaroso raramiu, sabana yaku nomparasaya Alatala, anu niuliNa ka yaku natantumo majadi!

²⁶ Tapi kapalata hitu magero ngena mombarumpa levuto."

²⁷ Nagana kasapulu pata-mbongina kapala kami niburu mpoiri hau tumai ri Tasi Adria, nitasere natanga bongina, anabua kapala nombarasai kapala domo nakavao lako ri kabatana.

²⁸ Sabana haitu, niukurura kandala nu tasi ante vatu nipantoesi, ropulu ndapa kandala nu uve. Ira noenju hauna sakidepa, bo niukurura vaimo, sapulu alima ndapapa kandala nu tasi.

²⁹ Naupu haitu niulurakara ampa talonto vatu rantasi ala domo molipa kapala. lako ri bagia puri nu kapala ala mompopetaa kapala, apa ira naeka kapala kami mombarumpa vatu oti. Ira nosambaya, nerapi masalisa maeo.

³⁰ Tapi bara sako-ndua anabua nu kapala haitu nompasimbuku malai nggalino. Niulira raulurakara talonto lako ri kolu nu kapala, tano sakaya kodi niulurakara hau rara ntasi rapesavira malai.

³¹ Nanggita poviara haitu, i Paulus nanguli ka i Yulius bo tantara-tantarana, "Ane malai ana-anabua kapala hitu, ledo maria tona matau mompajala kapala, bo ledo ntoto maria kita masalama!"

³² Nangepe tesa i Paulus, tantara-tantara nopudusi kaloro sakaya kodi bo nipalambara sakaya kodi haitu maave, ala anabua kapala domo mamala malai lako ri kapala mbaso.

³³ Napara naeo, nitudu i Paulusmo pura-pura tona mangande. Nanguli ia, "Sapulu pata-mbongimo kasaena komiu aga nompopea-pea, ledo nangande nuapa-nuapa!

³⁴ Sabana haitu, kuuli ka komiu, kana mangande nau aga sakide, ala maroso mpanjili komiu bo mamala masalama lako ri kasusa hitu. Kita pura-pura masalama ngena, ledo makuya kita. Ledo ria buluata maronto, nau aga sambesa, ledo pura."

³⁵ Naupu notesa ivesia, nialanamo roti bo niulina tarima kasi ka Alatala ri ngayora pura-pura. Nitubi-tubina roti haitu, bo nangandemo ia.

³⁶ Jadi naroso mpanjili rarara, bo nangande munimo ira.

³⁷ Kadea kami pura-pura riara kapala haitu, roatu pitupulu bo aono.

³⁸ Naupu nangande sampe nabosu puramo, *gando nikeni kapala haitu nitedakara rara ntasimo ala mangaa sakide kapala.

³⁹ Naeopa, topompajala kapala haitu nanggita kabatana tapi ledo nisanira kabatana mbana haitu. Nikitara sangu sidu nu tasi ante talintina. Patujura ala kapala haitu rapopesampora ri talinti haitu.

⁴⁰ Naupu sia, nipudusira kaloro-kaloro nu talonto bo talonto haitu nipalambaramo naboli nalonju rantasi. Nivolera kaloro-kaloro pompou *guli ala kapala mamala raguli. Niorera somba ri kolu nu kapala ala poiri mombaburu kapala hau ri talinti.

⁴¹ Tapi dopame nakava ri talinti, kapala kami aga nombarumpa bone nobunti riara ntasi. Bagia kolu nu kapala nesua riara bone sampe kapala domo namala molipa, bo bagia ri puri nu kapala narupusaka nirumpa nu balumba mbaso.

⁴² Netaapa kapala haitu, tantara-tantara madota mompatesi pura-pura tona nitavani ala ledo ria saitoa morabu hau ri kabatana bo malai.

⁴³ Tapi i Yulius nantagi ira, sabana ia madota mompakasalama i Paulus. Nituduna pura-pura tona natau norabu mokolu motingganavu rara ntasi morabu hau ri kabatana.

⁴⁴ Tona ntanina metuntuni mombasaka dopi bo kayu bingga-bingga nu kapala. Ivesiamo kami pura-pura nasalama nesore ri kabatana.

Kisah Para Rasul

Video Kisah Para Rasul 27

Ikuti Kami:

KONTAK | PARTISIPASI | DONASI