Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Radu jak diputusko bahwa sekam harus belayar mik Italia, Paulus rik pira-pira ulun tahanan sai bareh diserahko jama Yulius, perwira pasukan tentera Romawi sai disebut "Resimen Kaisar".

² Sekam cakak mik kapal sai ratong jak Adramitium, kak raduni berangkat jama kapal udi sai radu siap belayar mik pelabuhan-pelabuhan di provinsi Asia. Aristarkhus, sai ulun Makedonia sai ratong jak Tesalonika, belayar juga jejama jama sekam.

³ Jemohni sekam sampai di Sidon. Paulus diperlakuko betik nihan ulih Yulius. Ia diizinko napol kantik-kantikni in tian dapok ngeniko jama ia api sai diperlukoni.

⁴ Jak udi sekam nerusko pelayaran. Ulih sebab angin belawanan jama arah kapal, sekam belayar terus menyusur pantai pulau Siprus sai agak telindung jak angin.

⁵ Raduni sekam mengarungi laok sai behadapan jama Kilikia rik Pamfilia raduni sampai di Mira di negeri Likia.

⁶ Di dudi perwira udi ngehalu sai kapal jak Aleksandria sai haga belayar mik Italia. Maka ia ngalihko sekam mik kapal udi.

⁷ Pira rani sakani sekam belayar lali nihan, rik jama susah payah akherni sekam sampai sejaoh kota Knidus. Raduni mani angin masih juga burak, sekam mak dapok nerusko pelayaran ke jurusan mula-mula. Maka sekam belayar ke selatan pulau Kreta ngeliu Tanjung Salmone in di disan sekam telindung jak angin.

⁸ Jama susah payah sekam belayar menyusur pantai pulau udi sampai akherni sekam sampai di suatu rang sai gelarni Pelabuhan Helau, mak pira jaoh jak kota Lasea.

⁹ Pada waktu udi Rani Buka Pendamaian ulun Yahudi radu liwat. Sekam radu kelebonan lamon waktu, sehingga radu lain waktuni lagi untuk belayar aman. Ulihni seno Paulus ngeni petuah inji jama tian,

¹⁰ "Puari-puari, menurut pendapatku, bebahaya nihan kik ram belayar terus. Ram haga ngalami kerugian balak lain angkah pada muatan ram rik kapal ram, kidang nyawa ram pun dapok lebon."

¹¹ Kidang perwira udi lebih percaya jama juru mudi rik kapten kapal jak cawani Paulus.

¹² Pelabuhan di dudi sangun mak betik bagi kapal-kapal untuk tinggal di musim ngison. Ulihni seno kelamonan awak kapal setuju untuk belayar luot ninggalko pelabuhan udi mani tian haga berusaha sampai di Feniks rik tinggal di dudi selama musim ngison. Feniks pelabuhan di Kreta sai ngehadap barat daya rik barat laok.

¹³ Pada waktu seno angin selatan betiup lembut. Maka awak kapal nyangko tian radu dapok belayar luot. Jadi tian ngebungkar sauh raduni belayar menyusur pantai pulau Kreta.

¹⁴ Kidang mak mesaka jak seno ratong angin ribut -- yakdo angin sai disebut angin Timur Laok -- betiup keras jak darak,

¹⁵ rik mukul kapal sekam. Ulihni seno mak mungkin kapal belayar terus ngelawan angin, maka sekam nyerah gaoh rik naganko kapal tehanyut diusung angin.

¹⁶ Sekam telindung cutik, waktu sekam liwat di kebelah selatan pulau Kauda sai lunik udi. Di dudi jama susah payah sekam behasil nguasai sekuci kapal sekam.

¹⁷ Seraduni sekuci udi dicakakko mik kapal, kapal udi tenggalan dikuatko jama makai tali sai diikok ngelingkor kapal udi. Mani rabai tedampar di dasar heni Sirtis sai dangkal, layar diregahko raduni kapal ditaganko nutuk angin.

¹⁸ Angin terus ngamuk, hingga jemoh ranini muatan kapal mulai ditokko di delom laok.

¹⁹ Rani seterusni lagi awak-awak kapal udi ngetokko muneh pekakas-pekakas kapal mik laok jama culuk tian tenggalan.

²⁰ Berani-rani sakani sekam mak ngeliak matarani rik bintang, rik angin pun terus-menerus ngamuk. Akherni lebon harapan sekam untuk selamat.

²¹ Pira-pira waktu sakani jelma-jelma udi mak mengan. Maka Paulus mik cecok di tengah-tengah tian raduni cawa, "Puari-puari! Kik keti radu nuruti nasihatku rik mak belayar jak Kreta, ram mak ngalami seluruh kecadangan rik kerugian inji.

²² Kidang tano pun nyak ngilu nihan in keti dang kecewa. Mak sai jelma pun jak Puari sai haga mati; ram haga kelebonan angkah kapal inji gaoh.

²³ Mani jeno bingi malaikat jak Allah sai kusumbah, yakdo Allah sai kedau nyak, ratong jama nyak.

²⁴ Malaikat udi cawa, 'Dang rabai, Paulus! Mani niku haga ngehadap Kaisar. Rik atas kebaikan hati Allah jama niku, sunyinni jelma sai belayar jama niku haga selamat mani niku.'

²⁵ Ulihni seno, Puari-puari, hagani Puari dang kecewa! Mani nyak percaya jama Allah bahwa sunyinni haga tejadi injuk sai diucakko-Ni jama nyak.

²⁶ Kidang ram haga tedampar kanah di pantai suatu pulau."

²⁷ Waktu bingi sai keepak belas sekam sedang terapung-apung di Laok Adria. Kira-kira tengah bingi awak kapal ngerasa kapal sedang ngeredik darak.

²⁸ Jadi tian ngulorko tali rik batu untuk ngukor relamni laok. Ternyata rang udi relamni hamper epak puluh meter. Mak mesaka jak seno tian ngukor luot, raduni ngehalu laok di rang udi serelam hamper telu puluh meter.

²⁹ Tian rabai kapal haga kandas di batu karang, jadi tian ngeregahko epak uah sauh jak bagian kudan kapal, raduni ngeharap kik dapok geluk-geluk pagi.

³⁰ Hema-hema para awak kapal nyuba lijung jak kapal udi. Tian ngeregahko sekuci mik way, jama bebuat seolah-olah haga ngeregahko sauh jak hadapni kapal.

³¹ Kidang Paulus cawa jama perwira rik prajurit-prajurit sai di kapal udi, "Kik awak kapal inji mak tinggal di kapal, Puari-puari sunyinni mak dapok selamat."

³² Ulihni seno prajurit-prajurit udi melok tali sekuci udi, sehingga sekuci udi hanyut.

³³ Pada waktu semakkung subuh, Paulus nganjurko in tian sunyinni mengan. Paulus cawa, "Radu epak belas rani sakani Puari sunyinni angkah nunggu-nunggu gaoh delom keadaan tegang rik mak nganik api-api.

³⁴ Kuanjurko, mengando cutik. Seno helau untuk keti, in keti kuat luot. Mani Puari sunyinni haga selamat rik mak kurang api-api."

³⁵ Radu jak cawa injuk reno Paulus ngakuk ruti raduni ngucapko terima kasih jama Tuhan di hadapan tian sunyinni. Radu seno ia ngebagi-bagi ruti ano, raduni dikanik.

³⁶ Maka tian sunyinni besemangat luot rik nutuk nganik juga.

³⁷ Sunyinni sai wat di kapal udi rua ratus pitu puluh enam jelma.

³⁸ Radu jak sunyinni nganik secukupni, tian ngetokko muatan gandum mik laok in kapal jadi mehampang.

³⁹ Waktu rani radu dawah, awak kapal ngeliak darak, kidang tian mak pandai darak api ano. Tian ngeliak sai teluk jama pantaini. Jadi tian bemaksud ngedarakko kapal di disan kik dapok.

⁴⁰ Maka tali-tali sauh dipelok raduni sauh-sauh udi ditaganko tebenam mik laok. Jejama jama ano juga tian ngelepasko tali sai ngikok kemudi-kemudi. Radu jak seno tian nyakakko layar di bagian hadap kapal in angin nyerbu kapal udi maju nuju pantai.

⁴¹ Kidang kapal udi tehantuk dasar heni. Bagian hadapni kandas rik mak begerak, sedang bagian kudanni hancor dipukul umbak sai keras.

⁴² Prajurit-prajurit di kapal udi beniat ngebunuh seluruh ulun tahanan, mani tian rabai dang-dang kanah wat sai langui mik darak rik tegar.

⁴³ Kidang perwira udi nyegah niat tian ano mani ia haga nyelamatko Paulus. Ia ngayun seluruh jelma sai dapok langui terjun mena rik langui mik pantai;

⁴⁴ sai bareh-barehni harus nyusul, jama nyating papan-papan atau pecohan kapal udi. Jama cara injuk reno sekam seluruh selamat sampai di darak.

Kisah Para Rasul

Video Kisah Para Rasul 27

Ikuti Kami:

KONTAK | PARTISIPASI | DONASI