Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Tallungalloi battuna Festus, mange anjoreng ri daeraya, nabokoimi Kaisarea nampa a’lampa mange ri Yerusalem.

² Battumi mae ri ia imang-imang kapalaya siagang pamimping-pamimpinna tu Yahudia anjoreng, ampabattui tuntutanna ke’nanga mae ri Paulus. Tuli nanyonyo’mi ke’nanga Festus,

³ siagang napala’mi ke’nanga pa’mai’ baji’na, sollanna ero’ assuro erangi Paulus mange ri Yerusalem; nasaba’ le’ba’mi assikongkolo’ ke’nanga ero’ ambunoi Paulus ri tangngana aganga.

⁴ Mingka appialimi Festus nakana, "Kamma-kamma anne nitahangi Paulus ri Kaisarea; natena tommo nasallo nakuammotere’ mange anjoreng.

⁵ Jari, bajikangangi punna nia’ siapa are pamimpinnu kuagang mange ri Kaisarea nampa nibicara anjo parkaraya anjoreng, punna ma’nassa nia’ tojeng panggaukang salana Paulus."

⁶ Kira-kira narapiki sagantuju allo yareka sampulo allo pole ammantang ri Yerusalem, ammotere’mi Festus mange ri Kaisarea. Ammukona appare’mi sidang ri pangadelanga, nampa nasuro erang Paulus battu andallekang.

⁷ Ri wattunna battu Paulus, ammentemmi anjo sikamma tu Yahudi battua ri Yerusalem angkulilingi Paulus. Nampa appakkaramulamo ke’nanga antudui siagang ambattalli Paulus. Mingka takkulleai ke’nanga ampa’butti anjo sikamma tuduhang napaua ke’nanga.

⁸ Ri wattunna napakasingara’ kalenna Paulus nakanamo, "Tena sikali apa-apa sala le’ba’ kugaukang mae ri sikamma apa-apa le’baka Napassuroang Allata’ala, situru’ le’baka napabattu Musa. Tena todong panggaukang sala le’ba’ kugaukang mae ri Balla’Na Batara, yareka mae ri Karaenga ri Roma."

⁹ Mingka eroki Festus angngallei pa’mai’na anjo tu Yahudia. Jari akkuta’nammi ri Paulus nakana, "Maka erokko a’lampa mange ri Yerusalem nampa niadeliko anjoreng ri dallekangku ri passala’na sikammaya anjo tuduhanga mae ri kau?"

¹⁰ Appialimi Paulus nakana, "Kamma-kamma anne niakka’ ammenteng ri dallekanna pangadelanna Karaenga ri Roma; jari anjoremma’ ri tampaka siratang niadeli. Kalentami angngassengi angkanaya tena salaku mae ri tu Yahudia.

¹¹ Punna nia’ atorang le’ba’ kudakkai siagang nia’ panggaukang sala le’ba’ kugaukang, nakusiratang nihukkung mate, lakurellakangi kalengku nihukkung mate. Mingka punna tannabaya tuduhanna ke’nanga, tena manna sitau akkulle ampassareangi kalengku mae ri ke’nanga. Kupalaki nakuniadeli ri pangadelanna Karaenga ri Roma!"

¹² Le’baki sipa’bicara Festus siagang tutoa-tutoa biasaya napappalaki pikkirang, nakanamo mae ri Paulus, "Lanri nupalaki niadeli ri pangadelanna Karaenga ri Roma, jari musti a’lampako mange andallekang ri Karaenga."

¹³ Tasalloai ribokoanganna, niaki battu Karaeng Agripa siagang Bernike ero’ ampasalamaki Festus.

¹⁴ Narapiki pirangallo are ke’nanga nia’ ri Kaisarea, nacaritami Festus anjo parkarana Paulus mae ri Karaeng Agripa. Nakana Festus, "Nia’ anrinni sitau tahanang nabolika Feliks.

¹⁵ Ri wattungku nia’ ri Yerusalem, battui ri nakke imang-imang kapalaya siagang pamimping-pamimpinna tu Yahudia antuntuki siagang ansuro hukkungi anjo taua.

¹⁶ Mingka appialima’ ri ke’nanga angkanaya tabiasayai tu Romaya ampassareang bawang-bawangi nihukkung se’rea tu nitudu, punna tenapa nanipasidallekangi siagang balinna, kammayatompa punna tenapa nisarei wattu anjo tu nitudua a’bicara ampakasingaraki kalenna.

¹⁷ Jari, ri wattunna battu ke’nanga mae anrinni tenamo kusallo attayang. Ammukona appare’ memamma’ sidang pangadelang, nampa kusuro erang anjo taua andallekang.

¹⁸ Ri wattunna ammenteng sikamma tau antuduai ampaui tuntutanna ke’nanga, takkulleai ke’nanga ampa’butti manna sirupa, angkana apa panggaukang salana anjo taua.

¹⁹ Assisala pahannaji ke’nanga ri passala’ agamana ke’nanga, siagang passala’ se’rea tau niarenga Isa. Anjo taua matemi mingka naterassi Paulus angkana attallasaki anjo taua.

²⁰ Nasaba’ lingua’ kusa’ring angkana antekamma bateku langgappa kasingarang ri anne parkaraya, akkuta’namma’ ri Paulus angkana maka eroki a’lampa mange ri Yerusalem. Anjorempi niadeli anne parkarana.

²¹ Mingka napalaki Paulus sollanna nai’ ri pangadelang lompoanganga; napalaki ammantanga ri tahananga sa’genna natappuki Karaenga ri Roma anjo parkarana. Iaminjo saba’na nakusuro tahang tuli, sa’gengku anggappa kasampatang angkiringi mae ri Karaenga."

²² Nakanamo Agripa mae ri Festus, "Manna inakke ero’ tonga’ allangngereki bicaranna anjo taua." Appialimi Festus nakana, "Ammuko akkullei kipilangngeri."

²³ Ammukona, battumi Agripa siagang Bernike siagang ada’ kalompoang. Antama’mi ke’nanga ri pammantangang sidanga siagang sikamma tumalompona tantaraya, kammayatompa tumalompona anjo kotaya. Nasuro erammi Festus antama’ Paulus.

²⁴ Nampa nakana Festus, "Tunipakalompoa Agripa, siagang sikontu tau hadereka! Anne taua le’ba’mi nituntu’ ri dallekangku ri sikontu bansa Yahudia, baji’ ia niaka ri Yerusalem kammayatompa niaka anrinni. Ammarrang-marrammi ke’nanga antuntuki anne taua angkanaya tena nasiratang nipa’biang attallasa’ anne taua.

²⁵ Mingka tena kugappa manna sirupa panggaukang sala le’ba’ nagaukang anne taua, sa’genna siratang nihukkung mate. Na lanri kammana, le’ba’mi napala’ kalenna, sollanna anjoreng ri pangadelanna Karaenga niadeli parkarana. Jari le’ba’mi kutappuki sollanna nikiring anne taua mae ri Karaenga ri Roma.

²⁶ Mingka tenapa kugappa kasingarang baji’ dudu, ri passala’ batangkalenna anne taua, akkullea kutulisi’ lalang sura’ mae ri Karaenga. Lanri kammana minjo nakuerang battu andallekang ri dallekanta ngaseng, la’biangampa ri dallekanna tunipakala’birika Karaeng Agripa! Pattujungku iamintu, sollanna punna le’ba’mo niparessa anne taua, akkullema’ anggappa kasingarang angkana apa lakutulisi’ lalang ri suraka mae ri Karaenga ri Roma.

²⁷ Nasaba’ situru’ ri pakkasiakku, tena nasiratang nikiring se’rea tahanang punna tena nanipa’nassai angkanaya apa-apa kasalanna nanituntuki."

Kisah Para Rasul

Video Kisah Para Rasul 25

Ikuti Kami:

KONTAK | PARTISIPASI | DONASI