Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Naliu katolumbengina i Festus narata ri propinsi etu, nantendemo i'a nggari ngata Kaisarea mpaka ri ngata Yerusalem.

² Sangga naratapa i'a ri setu naratamo balengga-balengga topanggeni agama bo topanggeniaka-topanggeniaka to Yahudi ri ja'ina. Pade notesamo ira pepangadu ira ewa i Paulus. Ira mpu'u-mpu'u nerapi ka i Festus

³ ala ane mabelo rarana ka ira, i'a kana mompakau tau manggeni i Paulus mpaka ri ngata Yerusalem. Etu niperapi ira apa nasintuwumo ira mantingawu mompatesi i'a ri tatongo jala.

⁴ Tapi nesonomo i Festus ka ira, "Paulus danitarunggu ri ngata Kaisarea, pade aku mboto mana masaeka manjili gusa'a.

⁵ Jadi agina bara sakuya mba'a topanggeniaka komi nggari se'i motua mpasanggani-nggani ante aku mpaka ri ngata Kaisarea. Pade ane maria salana, ri setu pade ratesa komi tesa pepangadu etu."

⁶ Naliu Festus neto'o ri ngata Yerusalem walu atau sampulu mbengi kasaena, nanjilimo i'a mpaka ri ngata Kaisarea. Narata ri setu, naeo tonailena nesuamo i'a ri sapo mpotangara pade nipakauna tau manggeni I Paulus mantingayo i'a.

⁷ Sangga naratapa i Paulus nekanggoremo tau-tau to Yahudi to notua nggari ngata Yerusalem etu nantatiku i'a, pade nipamula iramo nombatesa tesa pepangadu ira to natomo-tomona ka i'a. Tapi da'a ntoto namala ira mompopokita salana to nipangadu ka i'a.

⁸ Naopu ira nompangadu i'a iwetu, i Paulus nebali. Niulina, "Aku e'i da'a nanggawia to naja'ana. Aku da'a nombaliunaka Atura-atura agama to nipapola i Musa, bo da'a wo'u nompakaruto Sapo Mpepue. Pade aku da'a nombasapuaka parenta Magau Roma."

⁹ Tapi i Festus madota mangala rara to Yahudi, jadi i'a nompekutana i Paulus, "Madota iko malau mpaka ri ngata Yerusalem ala iko ratangara ri ngayoku ri setu ewa nuapa to nipangadu ira etu?"

¹⁰ Nesonomo i Paulus, "Aku da'a madota, sabana aku danenggore ri ngayo polibu mpotangara to nipakatantu Magau Roma mboto e'i, pade ri se'imo aku masipato ratangara. Ninjani komi mbotomo, Tua, aku e'i da'a ria salaku ri ja'i ntau to Yahudi.

¹¹ Ane aku e'i nombaliunaka atura-atura atau nanggawia sangaya to masipato aku rasuku mamate, nasadiamo aku mamate. Tapi ane tesa pepangadu ira etu da'a nakono, da'a ria samba'a mamala mombawai aku ka ira etu. Aku mekitangara ri ja'i Magau Roma."

¹² Sangga naopu i Festus notesa-tesa ante topolibu ri setu, nangulimo i'a ka i Paulus, "Iko nekitangara ri ja'i Magau Roma. Jadi iko kana malau mantingayo Magau etu."

¹³ Da'a nasae kaliuna naratamo Magau Agripa ante i Bernike ri ngata Kaisarea ala mombabila i Festus sabana i'a lako nionggotaka najadi Gubernur.

¹⁴ Naopu bara sakuya mbengi ira ri setu, i Festus nombatesa parakara i Paulus ka Magau Agripa. Niuli i Festus, "Ri se'i naria samba'a tau nipalamba i Feliks riara tarunggu to nosanga ka Paulus.

¹⁵ Tempo aku naria ri ngata Yerusalem balengga-balengga topanggeni agama ante totu'a-totu'a to Yahudi nompangadu tau etu. Niperapi ira ala aku mombasuku tau etu.

¹⁶ Tapi aku nombasono ira, 'Nantuki atura kami to Roma, samba'a tau to nipangadu kana mosintingayo ante tau to nompangadu i'a, pade rawai loga mombabali tesa ntau to nompangadu i'a etu. Ane da'apa najadi iwetu da'apa mamala i'a rawai wa'amo.'

¹⁷ Jadi tempo tau to nompangadu i Paulus etu narata ri se'i, da'a mana aku nopea nasae-sae. To nailena nipowiakumo polibu mpotangara pade niparentaku Paulus rakeni rapoposintingayo.

¹⁸ Tempo tau-tau to nompangadu i'a etu nekanggore nompangadu i'a, nipekiriku kana maria tesa pepangadu powiana to naja'a mpu'u. Tapi kakonona da'a ria nitesa ira bara sangaya to naja'ana.

¹⁹ Ira aga nosisala pombarata ante i'a ewa agama ira mboto, pade wo'u ewa samba'a tau nosanga ka Yesus. Tau etu namatemo, aga i Paulus etu nanguli I'a natuwu bali.

²⁰ Tempona etu danaingu aku mompekiri bara iwenu aku mamala mompakanoto parakara etu. Jadi nipekutanaku ka i Paulus bara madota i'a malau mpaka ri ngata Yerusalem pade ratangara ri setu parakarana.

²¹ Tapi i Paulus nekitangara ri ngayo Magau Roma. Niperapi i Paulus ala i'a rakatono ntani sampe parakarana rabutusi ri ngayo Magau Roma. Etu sampe aku nomparenta ala i'a rakatono ntani sampe maria logaku mompakau i'a rakeni mpaka ri ja'i Magau Roma etu."

²² Naopu nangepe etu nangulimo i Agripa ka i Festus, "Aku wo'u madota mangepe pantesa ntau etu." Nesonomo Festus, "Naile mamala komi mangepe i'a."

²³ To nailena naratamo Magau Agripa ante i Bernike ante tandai kamagauna. Nesuamo ira riara tombi mpolibu mpasanggani-nggani ante balengga-balengga tantara pade madika-madika riara ngata etu. Pade i Festus nomparenta ala i Paulus rakeni mpesuamo.

²⁴ Sangga naratapa i Paulus, nangulimo i Festus, "Magau Agripa, pade pura-pura to naria ri se'i. Kita komimo tau e'i! I'a nipangadu pura-pura tau to Yahudi ri ja'iku, nabeloka to naria ri ngata Yerusalem, nabeloka to naria ri se'i. Ira nongare-ngare nerapi ala i'a rasuku mamate.

²⁵ Tapi naopu aku nomparesa i'a, da'a naria kamba sangaya salana nirataku to masipato i'a rasuku mamate. Kaopuna i'a mboto nekitangara ri ngayo Magau Roma. Sabana etu nipakatantukumo i'a kana rakeni mpaka ri ja'i Magau Roma etu.

²⁶ Aga da'apa naria sangaya to nanotona mamala kutulisi ka Magau Roma. Etumo sabana aku nompopotingayo i'a etu ka komi pura-pura, to kaiyampuuna ka komi to nibilaku, Magau Agripa. Patujuku ane maopu i'a raparesa, kana mariamo to mamala ratulisi ka Magau Roma.

²⁷ Apa mantuki pombarataku da'a ntoto masipato samba'a tau rakeni mpaka ri ja'i Magau ane da'a rapakanoto nuapa ntoto salana to nipangadu ka i'a."

Kisah Para Rasul

Video Kisah Para Rasul 25

Ikuti Kami:

KONTAK | PARTISIPASI | DONASI