Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Teluh aco muci rat Péstus pangeh nacing bang bawang ineh, idi ieh nenalan rat Kaisaria iné' Yerusalim.

² Déi', imam-imam rayeh idi lun rayeh-rayeh lun Yahudi nengegala' adu'deh ni Paulus. Ideh mesaad nemutuh ni Péstus

³ pad ieh nima' ni Paulus iten amé' Yerusalim, ngaceku ideh pangeh nepegayam sikal ngaté neneh tangal dalan.

⁴ Iamo' kebala Péstus, "Paulus inimet déi' Kaisaria, idi ieh sebuleng sikal amé' déi' dengan miket.

⁵ Do' amung-amung lun rayeh rat arang muyuh temurun maya' negku, idi kudeng lemulun ineh inan sala' do' ideh ngadu' neneh.

⁶ Idi Péstus netudo dengandeh ualuh kian pulu' aco kinioneh, idi ieh iné Kaisaria. Idi kenebpa ieh netudo bang ruma' besara', idi nengecuk nguit ni Paulus amé' matun neneh.

⁷ Kareb Paulus nacing, idi lun Yahudi luk pangeh nacing rat Yerusalim netuped libutneh, idi nengimun ngadu' neneh tu-tu. Iamo' ideh na miak ngegala' ratnan adu'deh matu.

⁸ Iamo' Paulus nemaré' or, keburi'neh, "Ui na nengelaba Ukum lun Yahudi, ukum Ruma' Allah, idi ukum raca' Rum pana'."

⁹ Péstus pian buren lun Yahudi, idi kebalaneh ni Paulus, "Sikalké iko amé' déi' Yerusalim pad ui nutun namu déi'?"

¹⁰ Iamo' kebala Paulus, "Ui tuped pa kiung besara' raca' Rum, su luk petulu nan nutun negku. Iko sebuleng kali' idi ui na mesala' pa kiung lun Yahudi.

¹¹ Kudeng ui pangeh nengelaba ukum idi pangeh nenganau' anun-anun luk petulu dengan ukum maté, na ui ara' maté. Iamo' kudeng adu'deh na matu, idi seburur pana' nateh luk miak maré negku kuandeh. Ui pian amé' matun besara' raca' Rum."

¹² Idi Péstus nepegayam dengan tebubpun besara' ineh, idi kebalaneh, "Iko pangeh nemutuh amé' matun besara' raca' Rum, idi kuan raca' Rum iko miak amé'."

¹³ Na mio teh idi Raca' Agripa nacing dengan Berniki déi' Kaisaria, sikal ngikak ni Péstus.

¹⁴ Kareb didueh pangeh netudo déi' tuda'-tuda' aco, idi Péstus nemada' raca' ineh ratnan besara' Paulus, keburi'neh, "Inan selemulun luk bang tutup tungé luk tican Pilik.

¹⁵ Idi kareb ui déi' Yerusalim, imam-imam rayeh idi lun rayeh-rayeh lun Yahudi nengadu' neneh, idi nemutuh negku ngukum neneh.

¹⁶ Iamo' kebalaku nedeh, idi na adat lun Rum maré seburur lemulun kumin kareb nateh lemulun luk inadu' ineh nepapu' lemulun luk nengadu' neneh pad ieh ngor adu'deh neneh.

¹⁷ Kareb ideh iné' tungé', na ui nenganét teh, iamo' kenebpa ui netudo luun kerusi besara', idi nengecuk ni Paulus amé' matun negku.

¹⁸ Lun luk nengadu' ineh netuped, iamo' ideh na nenguit adu' ratnan luk dat kudeng luk tirawéku.

¹⁹ Iamo' inan tuda'-tuda' adu' ratnan sembayangdeh sebuleng, idi teh ratnan selemulun ngadanNeh Yésus, luk pangeh naté idi luk bida' Paulus Ieh mulun.

²⁰ Ngaceku ui na kali' kudeng apeh ngelio amung ineh, idi ui nengitun kudeng ieh sikal amé' Yerusalim, pad ieh tetunin déi'.

²¹ Iamo' Paulus nemutuh tetunin pa kiung raca' Rum, idi ieh nemutuh uen matar pad raca' Rum miak mutut besara'neh. Ngaceku ineh ui nengecuk ngimet neneh, pad ui nated neneh amé' matun raca' Rum."

²² Idi keburi' Agripa ni Péstus, "Ui sebuleng pana' sikal ninger bala lemulun ineh." Idi kebala Péstus, "Nebpa iko miak ninger balaneh."

²³ Idi kenebpa Agripa idi Berniki nacing dengan ubur idi nesemuet bang ruma' besara' dengan amung-amung lun rayeh baweh idi lun rayeh-rayeh bawang ineh pana'. Idi Péstus nenguit ni Paulus amé' nedeh.

²⁴ Idi keburi' Péstus, "O Raca' Agripa idi amung-amung lun luk tebubpun dengan kai tungé', muyuh nier lemulun ini. Amung lun Yahudi, do' déi' Yerusalim idi tungé' teh, pangeh nengadu' neneh pa kiungku. Ideh ngitang, kebaladeh, idi na do' ieh mulun teh.

²⁵ Iamo' na ui kali' sebuleng sala'neh luk petulu dengan ukum maté. Idi ngaceku ieh sebuleng nemutuh tetunin raca' Rum, idi ui nengamo nima' neneh amé'.

²⁶ Iamo' na ui kali anun-anun luk uenku ngayud kuan raca' ineh. Ngaceku ineh ui nguit neneh amé' pa atun muyuh, meluun teh pa atun Raca' Agripa, pelé tau ngelio ratnan ini. Pangeh ineh inan teh luk uenku ngayud.

²⁷ Ngaceku bang terawéku, na petulu maré lun tinutup dengan na ngelio adu'neh."

Kisah Para Rasul

Video Kisah Para Rasul 25

Ikuti Kami:

KONTAK | PARTISIPASI | DONASI