Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ 'O Paulus de 'awi ma-manai yogila-gila 'o Derbe ma kotaka, deika 'o Listraka. Ge'enaka 'o Yesusika wongaku-ngaku wimoi wi ronga 'o Timotius. Ma 'esa 'o Yahudi ma nyawa, muna mongakuokau 'o Yesusika. Ma dea 'una 'o Yunanioka.

² 'O nyawa yongaku-ngaku ge'ena 'o Listraka de 'o Ikoniumoka, yoodumu winako 'o Timotius 'una ge'ena 'o nyawa ma owa moi.

³ 'O Paulus womau la 'o Timotius womoteke de de 'una, so wosuloko wisunakasi. 'Una koge'ena wodiai sababu 'o Yahudi ma nyawa ge'enaka gee yoodumu yanako 'ato 'o Timotius ma dea 'una ge'ena 'o Yunani ma nyawa.

⁴ 'O kota ya'adono ma noimi yositotara 'o nyawa yongaku-ngakuka ma ngale 'okia naga gee 'o su-suloko de 'o jamati ma balu-balusu yaputusokau 'o Yerusalemuoka. 'O nyawa yongaku-ngakuokau gee yakidongose la yamoteke 'o butusangi ge'ena.

⁵ So ma jamati ge'ena ma gudai gee, manga ngo-ngaku kaikuata monga, de kayodogo-dogo 'o wange 'isinoi-noimi.

⁶ 'O Ngomasa 'Itebi-tebini koyakisidabiwa 'o Paulus de 'o Silas yositotara ma Jou wi demo ge'ena 'o Asia ma daeraaka. So ka 'o Frigiaku de 'o Galatiaku yosikauku.

⁷ So gee ya'adono 'o Misia ma daeraa ma batinguku, de yositaili 'o Bitinia ma daeraasa yosikaisa, duga 'o Ngomasa 'Itebi-tebini 'o Yesusino koyakisidabikawa.

⁸ So ma rai kayaboootou yotagi, yaboa 'o Misia ma daeraako de kayogila-gilaka 'o Troasoko.

⁹ Yomatoobiri ge'ena 'o Troasoka, de 'o Paulus 'o mo-makeka moi ma Jo'oungu ma Dutuno wamake 'o Makedonia ma nyawa wimoi woma'okode ge'ena wi bionoka. De wigegoto la wosikauku 'o Makedoniaku, la wakiriwo.

¹⁰ Ge'ena 'iduangino, de miomasidiai so miogila-gilakau 'o Makedoniaku. Sababu ngomi miamaoku ma goungu ma Jo'oungu ma Dutu wosuloko 'o Habari ma Owa miositotara ge'enaka dau.

¹¹ 'O Troasoka miomagoraka de miosidete kamiogila-gilaka 'o Samotrake ma daeraaku, ma bibinie 'asa de 'o Neapolisoka.

¹² Ge'enaka deika 'o Filipiku, 'o kota ma amoko moi 'o Makedonia ma daeraaka. 'O Filipi ge'ena 'o Romaka yaparetano. Ge'enaka dau ngomi mia wange muruoka naga.

¹³ Pomaoma-omasa ma Wangeka ngomi miotagi 'o 'akere ma batingoka miaika, 'o kota ma ngorana ma amoko ma dudunoka, sababu mianako ge'enaka de ma 'ena 'o Yahudioka manga lo-lomu ma woa. Ge'enaka de miogogerie mimabi-bicara de ma nge-ngeweka gee yomalomu-lomuno ge'enaka.

¹⁴ Ge'ena yomalomu-lomunoka mimoi 'o mosa 'o 'ungu momawuku-wukunu mi ronga ngo Lidia, 'o Tiatira ma nyawa. Muna ko 'o Yahudiokawa, ma mosuba-suba ma Jo'oungu ma Dutuka, so ma Jo'oungu ma Dutu mi singina wagaraki, la 'idadi masahe de madawongo 'o Paulus wi do-dotoko ge'ena.

¹⁵ Ge'enaka de ngo Lidia de mi woa ma dodaku yaki'osiki. Yaki'osiki 'iduanga, de muna moga'asoko miaika. Mongose 'ato, "Nako nimakeno ma gou-goungu tongakuokau 'o Yesusika, ge'ena niaino la nimasido-dogumu 'ai woaka." De mogegoto la miodomoteke to muna mi ga-ga'asoko ge'ena.

¹⁶ Ma moi ge'ena gee 'o Yahudioka manga lo-lomu ma woaka miotagioli, de mimakamake de 'o ngeweka mimoi muna ge'ena 'o yongosi moi sababu mi'ijakau. Muna 'o tokata miparetano de mosimai-maisi so kamodanakoka 'okia naga gee dua 'idadi 'o bio-bionika. Muna mosimai-maisi 'o nyawa manga 'ahu so ma amoko makisilaha 'ami tuangi gee mi'ija-'ijakau.

¹⁷ Ngomi de 'o Paulus kiaka naga miotagi, muna mita kamonii-niiki, de kamosigaso-gasoko mongose, "'Ona ne'ena ma Jo'oungu ma Dutu wi ro-riwo! 'Ona yaino nisidemo 'o laha ma ngekomo, la 'idadi nisilaha!"

¹⁸ 'O wange muruono naga kamosigaso-gasoko koge'ena, so 'o Paulus kowotahanuawau de womapulutuoko kawongosekau ma tokatika, "De ma Yesus Kristus 'awi kuasa, ngoi tonisuloko nosupu ge'ena munaka." So kage'ena de mimadakau!

¹⁹ Gee mi'ija-'ijakau go'ona yanako 'ato manga singina nganono ma ngale 'o pipi yamake ma ngekomo 'o ngeweka gumuna koi'iwau, de yongamo 'o Paulus de 'o Silasika so yakitagoko de yaki'asa 'o ginitara 'iamo-amokika 'o pasaroka yakisitaari yopa-paretaka.

²⁰ Yaki'asaka 'o Romaka manga pamaretaka de kayongosekau, "No'ona 'o Yahudioka. 'Ona ne'ena nanga kotaka yoruahe.

²¹ 'Ona yosuloko la 'o nyawa yamoteke to 'ona manga 'adati gee koimakadaenuwa de to ngone 'o Romaka nanga 'adati. Ngone koidadiwa pa'ese bolo pamoteke 'o 'adati ge'ena."

²² 'O nyawa yoku-kudai mita yomasimoteke 'o Paulus de 'o Silas yakiringamo; de manga baju ma 'o Romaka ma pamareta ya'eto-'etongie deika yosuloko yakiriba'asana.

²³ Yakiribesana so kogee yakisirioka 'asa de yakibuikau. De yopa-pareta yosuloko ma bui ma saeke gu'una wakijaga wosidi-diai.

²⁴ Sababu yosuloko 'ato wakijaga wosidi-diai so ma rai ma bui ma saeke waki'umoku dau 'o ngii moi yapai-paituku gee 'ifoloi 'ikuru-kurutuku ma bui ma dodaka ge'ena, manga dou ma 'o basagi ngai modidi wosipilatuoka.

²⁵ Poilia 'o utu gorona, de 'o Paulus de 'o Silas yolahidoa ma de yonyanyi ma Jo'oungu ma Dutu wisiarene. Yonyanyi so 'o bui ma nyawa munuka mita yosigisene.

²⁶ De kayasorogano 'i'osu posironga 'o guatino, sigado ma bui ma woa ge'ena kaigiwi-giwi, so ma ngorana ma 'iodumu 'ikokipelenga de ma bui ma nyawa gee 'o rate yakisirangi-rangino ma ma rate ge'ena 'ikokipidiloka.

²⁷ Ma bui ma saeke gu'una witodokana so womomiki. Womomikie 'ena 'o ngorana ma 'ikokipelengakau de 'una wongose 'o bui ma nyawa yokokiowarokau so wosijai-jai wi wase wa'aiki womau womato'omau.

²⁸ De 'o Paulus woma'orese waamo-amokie kawongosekau, "Ee! 'Uwa nomato'oma. Ngomi mioodumu nongokasi!"

²⁹ Ma bui ma saeke gu'una 'o silo woga'asoko, deika kawoowa-owara dokaika so waika de 'o Paulus de 'o Silas manga bionoka wobukuku kawoti-tirine.

³⁰ Ge'enaka de wakisisupu, de kawongosekau, "Dea-dea, kokia la 'o laha tamake?"

³¹ 'O Paulus de 'o Silas kayosangokau, "Salingou nongaku ma Jou Yesusika de ngona 'asa nisilaha! Koge'enali mita 'ani woa ma dodaku."

³² Ge'enaka de 'o Paulus de 'o Silas yosiwaiti ma Jou wi demo 'o bui ma saekika de wi woa ma dodaku yoodumu.

³³ Kage'ena ma obiri 'o utu goronano de 'o bui ma saeke waki'asa de manga dabo wa'isoko. Ge'enaka de 'una de wi woa ma dodaku gee yaki'osiki.

³⁴ Deika 'o Paulus de 'o Silas waki'asa to 'una wi woaka, so wakisi'odomo. 'Una de wi woa ma dodaku yomorene ma sala sababu 'ona ne'ena yongakuokau ma Jo'oungu ma Dutuka.

³⁵ 'Iwangeka de 'o Roma ma pamareta yosuloko 'o polisika, la yaika yosidemo 'ato 'o Paulus de 'o Silas yakisisupunou 'o buioka.

³⁶ So ma bui ma saeke gu'una wositotara ge'ena 'o Paulus de 'o Silasika kawongosekau, "Dea-dea, 'o pamareta yosulokokau minisisupu. So ne'ena ngaro nioliou. Niomasidi-diai!"

³⁷ Ma 'o Paulus kawongosekau 'o polisika go'ona, "Ngomi ne'ena 'o Roma ma nyawa. Komisanowasi 'ena mipesanokau 'o kawasa manga bionoka de 'o buika misiwosanga. De ne'ena yosuloko miotagiou kamimarii-riidou. Ngomi miooluku! Niosuloko yopa-pareta go'ona yaino ne'enano la 'ona ma sirete misisupu!"

³⁸ Ma polisi go'ona yaika de yosidemoka 'o Roma manga pamaretaka, so yo'isenoka 'ato 'o Paulus de 'o Silas go'ona ka 'o Roma ma nyawa, de yakimodongukou.

³⁹ So yaika yomasilo-loa 'o Paulus de 'o Silasika, ge'enaka de yaki'asa yakisisupu 'o buioka. Yakisisupuno 'asa de yakisuloko ma kota ge'ena yamada.

⁴⁰ 'O Paulus de 'o Silas yosupuno de ngo Lidia mi woaka yotagiokasi so yomalomuokasi de 'o nyawa yongaku-ngaku, de manga singina yosikuatokasi 'asa de yotagi.

Kisah Para Rasul

Video Kisah Para Rasul 16

Ikuti Kami:

KONTAK | PARTISIPASI | DONASI