Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ I Paulus bo i Silas nompapola polipara hau ri ngata Derbe, pade napola hau ri ngata Listra. Ri sia naria saito topangoseaka i Yesus nosanga i Timotius. Tinana *toYahudi anu nomparasaya i Yesus munimo. Tapi tuamana toYunani.

² I Timotius nitoiya ntopomparasaya ri ngata Listra bo Ikonium pura-pura.

³ I Paulus madota i Timotius momporoa ia tapi nantuntuni ada ntoYahudi ledo namala toYahudi mosinggani ante tona ledo *nisuna. Nisani ntodea tuama i Timotius toYunani anu ledo nombasuna anara. Jadi nisunana i Timotius ala i Timotius ratarima ntoYahudi ri ngata rakalaura.

⁴ Naupu i Timotius nisuna, nalaimo ira. Ri pura-pura ngata nikalaura nipasimbayura ka topangoseaka i Yesus kabotu polibu nu suro bo pakeni ntopomparasaya ri ngata Yerusalem. Bo nipatudukira tona hamai ala raoseakara atura-atura nipakatantu ri polibu haitu.

⁵ Jadi ivesiamo pomparasaya ntopangoseaka i Yesus nipakaroso, bo eo-eo nantambai kadea ntopomparasaya.

⁶ Nosa Gasa nu Alatala ledo nombadekei gi Paulus mompatolele tesa nu Alatala ri propinsi Asia. Jadi nipapolara polipara hau ri bagia Frigia bo Galatia.

⁷ Tempo ira nakava ri pobingga bagia Misia, ira madota mapola mesua ri propinsi Bitinia. Tapi Nosa Gasa i Yesus nombatagi ira mapola.

⁸ Jadi nolipamo ira noliu ri bagia Misia sampe nakava ri ngata Troas ri bivi ntasi.

⁹ Bongina haitu ri ngata Troas, naria anu nipopakita nu Alatala ka i Paulus. Nikitana saito tona lako ri propinsi Makedonia neangga ri ngayona. Tona haitu nerapi mpuu-mpuu nte i Paulus, "Kaimo tumai mantulungi kami ri Makedonia!"

¹⁰ Jadi naupu nikita i Paulus haitu, kaliu-liu nanggalivomo kami hau ri propinsi Makedonia, sabana nipekiri kami, Alatala mpuu-mpuu nantudu kami mompatolele Kareba Belo ka tona hamai.

¹¹ Kami nompalaisi ngata Troas bo nesavi kapala mbaso hau ri levuto Samotrake. Kamailena napolamo kami sampe nakava ri ngata Neapolis ri propinsi Makedonia.

¹² Lako ri sia kami nantende hau ri ngata Filipi, haitumo ngata mbaso ri propinsi Makedonia. Ngata Filipi haitu ngata ponturo ntodea nu Magau Mbaso. Kami nonturo ri sia bara sako-mbongi kasaena.

¹³ Ri *eo penonto ntoYahudi, kami hau ri tinggi binangga ri savaliku bobaa nu ngata, sabana nisarumaka kami hamai rakasiromu ntoYahudi mosambaya. Jadi kami nonturo notesa-tesa ante mombine-mombine nasiromu ri sia.

¹⁴ Naria saito mombine ri sia lako ri ngata Tiatira nosanga i Lidia. Ia topobalu kae nosura sese mpalola, anu nasuli mpuu alina. Ia mai nombasomba Alatala. Tempo niepena tesa i Paulus, Alatala nompakanoto rarana sampe nitarimana pepatuduki haitu.

¹⁵ Naupu haitu i Lidia sambanua nidiu, tandana ira topangoseaka i Yesus. Naupu ira nidiu, i Lidia nombagaga kami hau ri banuana. Niulina, "Nikitamiu yaku hii mpuu-mpuu nomparasaya i Pue Yesus. Jadi kamaimo monturo ri banua kami." Nipasimbukuna kami hau ri banuana.

¹⁶ Naria sanggani, tempo kami hau ri posiromu posambaya pangane, kami nosinggavaka saito batua mombine. Mombine haitu nipesua nu *seta anu natau nombaboto anu majadi ri tempo makava. Ia nombaboto rasi ntona, jadi nadea saro nikavana ka tona nompobatua ia.

¹⁷ Mombine haitu nongare-ngare ri puri nantuntuni kami gi Paulus. Ia nongare ivei: "Tona hitu batua nu Alatala toNeliu KaogeNa! Ira nakava nompatolele ka komiu berimba komiu mamala rapakasalama!"

¹⁸ Bara sako-eo kasaena mombine haitu ledo naupu-upu nongare ivesia. Kaupuna domo nosabara i Paulus nangepe mombine haitu, jadi neili ntaliku ia bo nanguli ka seta anu nombakuasai mombine haitu, "Ante kuasa i Yesus Kristus, kutudu iko palaimo lako ri mombine tutu!" Naupu sia, seta haitu nalai mpuumo lako ri mombine haitu.

¹⁹ Tempo nisani ntopobatua mombine haitu domo namala ira manggava doi, nisakaramo i Paulus bo i Silas, bo niumbunjaira hau ri potomu mantingayo topoparenta ngata haitu.

²⁰ Nikenira i Paulus bo i Silas hau mantingayo topoparenta nu Magau Mbaso Roma, bo tona nompobatua mombine nanguli ivei: "Tona hitu toYahudi anu nompakagado ngata hitu.

²¹ Nipatudukira tona movia anu nitagi atura-atura ri ngatata hitu! Ledo mamala kita todea Magau Mbaso mantarima atau mangoseaka ada nipatudukira!"

²² Todea nu ngata nantuntuni nangeva i Paulus bo i Silas. Topomparenta nombaseri-seri pakea lako ri karo nu suro randua bo nombatudu tona mombacambu ira.

²³ Naupu ira nicambu pakadua, nisuaraka ri ntarunggumo. Topojaga tarunggu nitudu mombajagai ira pakabelo-belo.

²⁴ Jadi nisuarakana ira ri tombi ntarunggu ri tatangana ntoto bo kadara nibalanggu ante kayu.

²⁵ Nitasere natanga bongina, i Paulus bo i Silas nosambaya bo nodade nantoiya Alatala. Tona ntanina nitarunggu ri sia nompetalingai ira nodade.

²⁶ Sampesani naria lingu narimboso mpuu sampe pandasi banua ntarunggu nogoya muni. Pura-pura vamba natebuka bo rante pobalanggu tona nitarunggu navole sanggani.

²⁷ Nembangumo natekaja topojaga tarunggu haitu. Nikitana pura-pura vamba nateunggemo, nibituna gumana mompatesi karona mboto, apa nisarumakana tona nitarunggu nalai puramo.

²⁸ Tapi i Paulus nongare ante suara namangga, "Nee mupatesi karomu! Da naria pura kami ri sii!"

²⁹ Topojaga tarunggu nerapi poindo bo nangova hau ri tarunggu. Nolete-letemo ia nantaputu ri ngayo i Paulus bo i Silas.

³⁰ Naupu sia, nikenina ira hau ri savalikuna bo nanguli, "Tua, nuapa kupovia ala yaku rapakasalama?"

³¹ Nesana i Paulus bo i Silas, "Parasayamo i Pue Yesus Kristus, bo komiu sambanua rapakasalama."

³² Pade i Paulus bo i Silas nompasimbayu tesa i Pue Yesus ka topojaga tarunggu haitu, bo ka pura-pura tona riara banuana.

³³ Ri tanga bongi haitu muni topojaga tarunggu nanggeni ira hau ri uve bo nompegasa bakara. Naupu haitu, kaliu-liu ira sambanua nidiu, tandana ira nomparasaya i Yesus.

³⁴ Naupu haitu, nikeninamo i Paulus bo i Silas hau ri banuana, bo nipakandena ira. Ira sambanua nadamba mpuu rarara sabana ira nomparasaya Alatalamo. Naupu sia, i Paulus bo i Silas nikeni mpanjili hau ri tarunggu.

³⁵ Naeo mpadondo topoparenta-topoparenta ri ngata Filipi nantudu polisi hau ri tarunggu, mompapola parenta ka topojaga tarunggu ivei: "Kabasakamo tona randua nitarunggu riavi!"

³⁶ Nangepe haitu topojaga tarunggu nanguli ka i Paulus, "Topomparenta ri ngata nomparenta yaku mombakabasaka komiu. Jadi hitupa komiu mamala manjili. Pakabelo-belo ri dala."

³⁷ Tapi i Paulus nanguli ka polisi nakava ri sia, "Kami hii *todea nu Magau Mbaso Roma! Naupa ivesia, ledo nitangara kami, aga nicambu ri ngayo ntodea, bo nisuaraka riara ntarunggu! Bo hitupa topoparenta-topoparenta mombatudu kami manjili nggalino-lino! Ledo madota kami! Kana ira mboto makava mompopesuvu kami!"

³⁸ Polisi-polisi nompapola kareba haitu ka topoparenta ngata. Nieperapa i Paulus bo i Silas haitu todea nu Magau Mbaso Roma, naekamo ira.

³⁹ Jadi ira mboto hau nerapi ampu nte i Paulus bo i Silas. Naupu sia, nikenira randua suro haitu hau ri savalikuna, bo niperapira ala gi Paulus mompalaisi ngata haitu

⁴⁰ Jadi i Paulus bo i Silas nompalaisi tarunggu bo hau ri banua i Lidia. Ri sia ira nasiromu ante topangoseaka i Yesus bo nompakaroso rarara. Naupu haitu nalaimo ira lako ri ngata Filipi.

Kisah Para Rasul

Video Kisah Para Rasul 16

Ikuti Kami:

KONTAK | PARTISIPASI | DONASI